ಮಧ್ಯಪ್ರದೇಶ: ದಲಿತ ಮಹಿಳೆಗೆ ಜಾತಿನಿಂದನೆಗೈದು ಹಲ್ಲೆ

ಭೋಪಾಲ, ಫೆ. 5: ಗ್ರಾಮಸ್ಥರ ಗುಂಪೊಂದು ದಲಿತ ಮಹಿಳೆಯ ಜಾತಿ ನಿಂದಿಸಿ, ಹಲ್ಲೆ ನಡೆಸಿದ ಘಟನೆ ಮಧ್ಯಪ್ರದೇಶ ಖರ್ಗಾಂವ್ ಜಿಲ್ಲೆಯಲ್ಲಿ ಶುಕ್ರವಾರ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.

ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳಲಾದ ಘಟನೆಯ ವೀಡಿಯೊದಲ್ಲಿ ಮಹಿಳೆಯ ಕೈಗಳನ್ನು ಕಟ್ಟಿರುವುದು ಹಾಗೂ ಆಕೆಯ ಹಿಂದೆ ನಿಂತಿದ್ದ ವ್ಯಕ್ತಿಯೋರ್ವ ‘‘ಆಕೆಗೆ ಥಳಿಸಲಾಗಿದೆ’’ ಎಂದು ಹೇಳುತ್ತಿರುವುದು ದಾಖಲಾಗಿದೆ. ತಾನು ಗಣೇಶ್ ಯಾದವ್ ಎಂಬವರ ನೆರೆಯ ಮನೆಯಲ್ಲಿ ವಾಸಿಸುತ್ತಿದ್ದೇನೆ. ಜಾತಿಯ ಕಾರಣಕ್ಕೆ ತಾನು ಇಲ್ಲಿ ವಾಸಿಸುತ್ತಿರುವುದನ್ನು ಆತ ಇಷ್ಟಪಡುತ್ತಿಲ್ಲ.

ತನ್ನ ಮನೆಯನ್ನು ನಾಶಗೊಳಿಸುವುದಾಗಿ ಆತ ಬೆದರಿಕೆ ಒಡ್ಡಿದ್ದಾನೆ ಎಂದು ದಲಿತ ಮಹಿಳೆ ಆರೋಪಿಸಿದ್ದಾರೆ. ಯಾದವ ತನ್ನ ತಾಯಿ ಹಾಗೂ ಪತ್ನಿಯೊಂದಿಗೆ ಶುಕ್ರವಾರ ಮನೆಗೆ ನುಗ್ಗಿದ್ದಾನೆ. ತನ್ನ ಕೈಗಳನ್ನು ಕಟ್ಟಿಹಾಕಿ ಎರಡು ಗಂಟೆಗಳ ಕಾಲ ಹಲ್ಲೆ ನಡೆಸಿದ್ದಾನೆ.

ಜಾತಿ ನಿಂದನೆ ಮಾಡಿದ್ದಾನೆ ಎಂದು ಅವರು ಆರೋಪಿಸಿದ್ದಾರೆ. ಘಟನೆಗೆ ಸಂಬಂಧಿಸಿ ಜಿಲ್ಲೆಯ ಸನವಾಡ್ ಪೊಲೀಸ್ ಠಾಣೆಯಲ್ಲಿ ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡ ದೌರ್ಜನ್ಯ ತಡೆ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

An elderly woman was tied with a rope and thrashed by a group of people while hurling casteist remarks at her at a village in Khargone. pic.twitter.com/MyyzhysZmr

— Anurag Dwary (@Anurag_Dwary) February 4, 2023