ಚಂದ್ರಯಾನ-3ರ ಕ್ರಯೋಜೆನಿಕ್ ಎಂಜಿನ್ ನ ಪ್ರಾಯೋಗಿಕ ಪರೀಕ್ಷೆ ಯಶಸ್ವಿ: ಇಸ್ರೋ

ಬೆಂಗಳೂರು, ಫೆ. 28: ಚಂದ್ರಯಾನ-3 ಯೋಜನೆಯಲ್ಲಿ ಬಳಸಲಾಗುವ ಸಿಇ-20 ಕ್ರಯೋಜೆನಿಕ್ ಎಂಜಿನ್ ನ ಪ್ರಾಯೋಗಿಕ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಪ್ರಕಟಿಸಿದೆ. ಚಂದ್ರಯಾನ-3ರ ಉಡಾವಣಾ ವಾಹಕದ ಮೇಲಿನ ಕ್ರಯೋಜೆನಿಕ್ ಹಂತವನ್ನು ಮುನ್ನಡೆಸಲು ಈ ಇಂಜಿನನ್ನು ಬಳಸಲಾಗುತ್ತದೆ.

ತಮಿಳುನಾಡಿನ ಮಹೇಂದ್ರಗಿರಿಯಲ್ಲಿರುವ ಇಸ್ರೋ ಪ್ರೊಪಲ್ಶನ್ ಕಾಂಪ್ಲೆಕ್ಸ್ನಲ್ಲಿರುವ ಹೈ ಆಲ್ಟಿಟ್ಯೂಡ್ ಟೆಸ್ಟ್ ಫೆಸಿಲಿಟಿಯಲ್ಲಿ ಫೆಬ್ರವರಿ 24ರಂದು 25 ಸೆಕೆಂಡ್ಗಳ ಕಾಲ ಉಷ್ಣತಾ ಪರೀಕ್ಷೆಯನ್ನು ನಡೆಸಲಾಯಿತು ಎಂದು ಬೆಂಗಳೂರಿನಲ್ಲಿ ಪ್ರಧಾನ ಕೇಂದ್ರ ಹೊಂದಿರುವ ಇಸ್ರೋ ತಿಳಿಸಿದೆ.

‘‘ಪರೀಕ್ಷೆಯ ವೇಳೆ, ಎಲ್ಲಾ ಮಾನದಂಡಗಳು ತೃಪ್ತಿಕರವಾಗಿ ಕಾರ್ಯನಿರ್ವಹಿಸಿದವು ಹಾಗೂ ಫಲಿತಾಂಶ ನಿರೀಕ್ಷೆಯ ಮಟ್ಟಕ್ಕೆ ಇತ್ತು’’ ಎಂದು ಸೋಮವಾರ ಬಿಡುಗಡೆ ಮಾಡಿದ ಹೇಳಿಕೆಯೊಂದರಲ್ಲಿ ಇಸ್ರೋ ಹೇಳಿದೆ. ಕ್ರಯೋಜೆನಿಕ್ ಎಂಜಿನನ್ನು ಪ್ರೊಪೆಲಾಂಟ್ ಟ್ಯಾಂಕ್ಗಳು, ವಿವಿಧ ಹಂತಗಳ ವ್ಯವಸ್ಥೆಗಳು ಮತ್ತು ಸಂಬಂಧಿತ ದ್ರವ ಸಾಗಾಟ ಮಾರ್ಗಗಳೊಂದಿಗೆ ಇನ್ನಷ್ಟು ಹೆಚ್ಚಿನ ಪ್ರಮಾಣದಲ್ಲಿ ವಿಲೀನಗೊಳಿಸಿ ಸಮಗ್ರ ಹಾರಾಟ ಕ್ರಯೋಜೆನಿಕ್ ಹಂತವನ್ನು ಸೃಷ್ಟಿಸಲಾಗುವುದು ಎಂದು ಅದು ತಿಳಿಸಿದೆ.

ಈ ವರ್ಷದ ಆದಿ ಭಾಗದಲ್ಲಿ, ಇಲ್ಲಿನ ಯು.ಆರ್. ರಾವ್ ಉಪಗ್ರಹ ಕೇಂದ್ರದಲ್ಲಿ ಚಂದ್ರಯಾನ್-3 ಲ್ಯಾಂಡರ್ ಯಶಸ್ವಿಯಾಗಿ ಇಎಮ್ಐ/ಇಎಮ್ಸಿ ಪರೀಕ್ಷೆಗೆ ಒಳಪಟ್ಟಿದೆ.