ಪಂಜಾಬ್: ಜೈಲಿನಲ್ಲಿ ಗಾಯಕ ಮೂಸೆವಾಲಾ ಕೊಲೆ ಆರೋಪಿಗಳನ್ನು ಹತ್ಯೆಗೈದು ಸಂಭ್ರಮಿಸುತ್ತಿರುವ ಕೈದಿಗಳ ವಿಡಿಯೋ ವೈರಲ್‌
ಚಂಢೀಗಡ: ತರ್ನ್ ತರನ್ ಜಿಲ್ಲೆಯ ಗೋಯಿಂಡ್ವಾಲ್ ಸಾಹಿಬ್ ಸೆಂಟ್ರಲ್ ಜೈಲಿನ ಕೈದಿಗಳು ಇತ್ತೀಚೆಗೆ ದರೋಡೆಕೋರ ಜಗ್ಗು ಭಗವಾನ್‌ಪುರಿಯ ಇಬ್ಬರು ಸಹಾಯಕರನ್ನು ಹತ್ಯೆಗೈದಿದ್ದು, ಜೈಲಿನ ಆವರಣದಲ್ಲಿ ಮೃತದೇಹಗಳನ್ನು ಪ್ರದರ್ಶಿಸುತ್ತಿರುವ ಎರಡು ವೀಡಿಯೊಗಳು ವೈರಲ್‌ ಆಗಿವೆ. ಜೈಲಿನ ಆವರಣದಲ್ಲೇ ನಡೆದ ಈ ಘಟನೆ ಪಂಜಾಬ್ ಪೊಲೀಸರಿಗೆ ತೀವ್ರ ಮುಜುಗರ ಉಂಟು ಮಾಡಿದೆ.
ಫೆಬ್ರವರಿ 26 ರಂದು ಜೈಲಿನ ಕೈದಿಗಳ ನಡುವೆ ನಡೆದ ಘರ್ಷಣೆಯಲ್ಲಿ ಬಟಾಲದ ಮನದೀಪ್ ಸಿಂಗ್ ಅಲಿಯಾಸ್ ತೂಫಾನ್ ಮತ್ತು ಮಾನ್ಸಾದ ಬುಧ್ಲಡಾ ಬಳಿಯ ರಲ್ಲಿ ಗ್ರಾಮದ ಮನಮೋಹನ್ ಸಿಂಗ್ ಅಲಿಯಾಸ್ ಮೋಹ್ನಾ ಸಾವನ್ನಪ್ಪಿದ್ದು, ಇತರ ಮೂವರು ಗಾಯಗೊಂಡಿದ್ದಾರೆ. ಇವರೆಲ್ಲರೂ ಕೂಡಾ ಪಂಜಾಬಿ ಗಾಯಕ ಸಿಧು ಮೂಸೆವಾಲಾ ಹತ್ಯೆಯ ಆರೋಪಿಗಳಾಗಿದ್ದಾರೆ.
ಭಗವಾನ್‌ಪುರಿಯ ವಿರೋಧಿ ಗ್ಯಾಂಗ್‌ಗೆ ಸೇರಿದ ಇಬ್ಬರು ವ್ಯಕ್ತಿಗಳನ್ನು ಹತ್ಯೆಯ ಮಾಡುವ ವಿಡಿಯೋವನ್ನು ಕುಖ್ಯಾತ ಗ್ಯಾಂಗ್ ಸ್ಟರ್ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ನ ಸಚಿನ್ ಭಿವಾನಿ ಮೊಬೈಲ್ ಫೋನ್‌ನಲ್ಲಿ ಚಿತ್ರೀಕರಿಸಿದ್ದು, ಸದ್ಯ ಈ ವೀಡಿಯೊಗಳು ಈಗ ಹೊರಬಂದಿವೆ.
ಅಂಕಿತ್ ಸೆರ್ಸಾ ಸೇರಿದಂತೆ ಕುಖ್ಯಾತ ಗ್ಯಾಂಗ್ ಸ್ಟರ್ಗಳು ವೀಡಿಯೊಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಮೊದಲ ವಿಡಿಯೋದಲ್ಲಿ, ಭಿವಾನಿ ಮತ್ತು ಸಹವರ್ತಿ ದರೋಡೆಕೋರರು ಇಬ್ಬರು ವ್ಯಕ್ತಿಗಳನ್ನು ಕೊಂದಿರುವುದಾಗಿ ಬಹಿರಂಗವಾಗಿ ಹೇಳಿಕೊಳ್ಳುತ್ತಿದ್ದಾರೆ. ಎರಡನೇ ವೀಡಿಯೋದಲ್ಲಿ ಸಚಿನ್ ಭಿವಾನಿ ಬಿಷ್ಣೋಯಿ ಇತರರೊಂದಿಗೆ ಕೊಲೆಗಳನ್ನು ಸಂಭ್ರಮಿಸುತ್ತಿರುವಂತೆ ತೋರುತ್ತಿದೆ. ಮೂಸೆವಾಲನನ್ನು ತಾವೇ ಕೊಂದಿದ್ದೇವೆ ಮತ್ತು ಯಾರನ್ನೂ ಬಿಡುವುದಿಲ್ಲ ಎಂದು ಬೆದರಿಕೆ ಹಾಕುವುದು ವಿಡಿಯೋದಲ್ಲಿ ಕಂಡುಬಂದಿದೆ.
ಇದನ್ನು ಓದಿ: ಹಥ್ರಾಸ್ ಪ್ರಕರಣ ಬಿಜೆಪಿಯ ‘ಬೇಟಿ ಬಚಾವೊ’ ಘೋಷಣೆಯ ಪೊಳ್ಳುತನ ತೋರಿಸಿದೆ: ಕಾಂಗ್ರೆಸ್