ಸಿಂಗಾಪುರದಲ್ಲಿ ನಡೆದ ಗೌಪ್ಯ ಗುಪ್ತಚರ ಸಭೆಯಲ್ಲಿ ಭಾಗವಹಿಸಿದ್ದ ರಾ ಮುಖ್ಯಸ್ಥ: ವರದಿ
ಹೊಸದಿಲ್ಲಿ: ಶಾಂಗ್ರಿ-ಲಾ ರಕ್ಷಣಾ ಶೃಂಗಸಭೆಯ ವೇಳೆಯಲ್ಲಿಯೇ ಸಿಂಗಾಪುರ ಸರ್ಕಾರ ಸುಮಾರು ಎರಡು ಡಜನ್‌ ದೇಶಗಳ ಹಿರಿಯ ಗುಪ್ತಚರ ಅಧಿಕಾರಿಗಳ ರಹಸ್ಯ ಸಭೆ ನಡೆಸಿದೆ ಎಂದು ವರದಿಯಾಗಿದೆ. ಈ ಸಭೆಯಲ್ಲಿ ಭಾರತದ ರಾ – ರಿಸರ್ಚ್‌ ಎಂಡ್‌ ಅನಾಲಿಸಿಸ್‌ ವಿಂಗ್‌ ಮುಖ್ಯಸ್ಥರಾದ ಸಮಂತ್‌ ಗೋಯೆಲ್‌ ಕೂಡ ಭಾಗವಹಿಸಿದ್ದರೆಂದು ಮೂಲವೊಂದು ದೃಢಪಡಿಸಿದೆ ಎಂದು thewire.in ವರದಿ ಮಾಡಿದೆ.
ಆದರೆ ಇಂತಹ ರಹಸ್ಯ ಸಭೆಗಳು ಪ್ರತಿ ವರ್ಷ ರಕ್ಷಣಾ ಶೃಂಗಸಭೆಯ ವೇಳೆ ನಡೆಯುತ್ತಿದೆ ಹಾಗೂ ಈ ಹಿಂದೆ ಅದರ ಬಗ್ಗೆ ಎಲ್ಲಿಯೂ ವರದಿಯಾಗಿಲ್ಲ ಎಂದು ಮೂಲಗಳು ತಿಳಿಸಿವೆ.
ಹೆಚ್ಚು ಔಪಚಾರಿಕ ಮತ್ತು ಮುಕ್ತ ರಾಜತಾಂತ್ರಿಕತೆ ಕಷ್ಟವಾದಾಗ ಇಂತಹ ಸಭೆಗಳನ್ನು ನಡೆಸಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ. ಈ ಬಾರಿಯ ಸಭೆಯಲ್ಲಿ ರಷ್ಯಾ, ಉಕ್ರೇನ್‌ ಪ್ರತಿನಿಧಿಗಳು ಭಾಗವಹಿಸಿದ್ದಾರೆ.
ಶಾಂಗ್ರಿ-ಲಾ ರಕ್ಷಣಾ ಶ್ರಂಗ ಸಭೆಯನ್ನು ಸಿಂಗಾಪುರದ ಶಾಂಗ್ರಿ ಲಾ ಹೋಟೆಲಿನಲ್ಲಿ ಪ್ರತಿವರ್ಷ ಇಂಟರ್‌ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಫಾರ್‌ ಸ್ಟ್ರೆಟಜಿಕ್‌ ಸ್ಟಡೀಸ್‌ ಆಯೋಜಿಸುತ್ತದೆ.
ಈ ವರ್ಷದ ಸಭೆಯಲ್ಲಿ ಭಾರತ ಸಹಿತ 49 ದೇಶಗಳ 600 ಪ್ರತಿನಿಧಿಗಳು ಭಾಗವಹಿಸಿದ್ದರು. ದಿಕ್ಸೂಚಿ ಭಾಷಣವನ್ನು ಆಸ್ಟ್ರೇಲಿಯಾ ಪ್ರಧಾನಿ ಆಂಟನಿ ಆಲ್ಬನೀಸ್‌ ನೀಡಿದ್ದರು.