ನೆರೆಯ ದೇಶಗಳ ಸಹಕಾರ ಯುದ್ಧವನ್ನು ಎದುರಿಸಲು ಇರಾನ್‍ಗೆ ನೆರವಾಗಿದೆ : ಇರಾನ್ ಅಧ್ಯಕ್ಷ ಮಸೂದ್‌ ಪೆಝೆಶ್ಕಿಯನ್

ಟೆಹರಾನ್, ಆ.7: ಸಂಯೋಜಿತ ಆಡಳಿತ, ಪರಿಣಾಮಕಾರಿ ಬಿಕ್ಕಟ್ಟು ನಿರ್ವಹಣೆ ಮತ್ತು ನೆರೆಹೊರೆಯ ದೇಶಗಳ ಸಹಕಾರವು ಪ್ರಸ್ತುತ ನಡೆಯುತ್ತಿರುವ ಯುದ್ಧವನ್ನು ಎದುರಿಸಲು ಇರಾನ್‍ಗೆ ನೆರವಾಗಿದೆ ಎಂದು ಇರಾನ್ ಅಧ್ಯಕ್ಷ ಮಸೂದ್‌ ಪೆಝೆಶ್ಕಿಯನ್ ಹೇಳಿದ್ದಾರೆ.

ಸಂಘರ್ಷದ ಸಮಯದಲ್ಲಿ ಯಥಾಸ್ಥಿತಿಯನ್ನು ಕಾಯ್ದುಕೊಳ್ಳಲು ಸರ್ಕಾರಿ ಸಂಸ್ಥೆಗಳು, ಪ್ರಾಂತೀಯ ಆಡಳಿತಗಳು ಮತ್ತು ಸಂಪುಟದ ನಡುವಿನ ಸಮನ್ವಯವೇ ಕಾರಣ ಎಂದು ರಾಷ್ಟ್ರವನ್ನು ಉದ್ದೇಶಿಸಿ ಮಾಡಿದ ಭಾಷಣದಲ್ಲಿ ಪೆಝೆಶ್ಕಿಯನ್ ಹೇಳಿದರು.

ಜನರಿಗೆ ಯುದ್ಧದ ಅನುಭವವೇ ಆಗಲಿಲ್ಲ. ಎಲ್ಲೋ ಒಂದು ಕಡೆ ದಾಳಿಯಾದಾಗ ಅಥವಾ ಅದರ ದೃಶ್ಯಗಳನ್ನು ದೂರದರ್ಶನದಲ್ಲಿ ನೋಡಿದಾಗ ಮಾತ್ರ ಏನೋ ಸಂಭವಿಸಿದೆ ಎಂದು ಅವರಿಗೆ ತಿಳಿಯಿತು. ನಮ್ಮ ವ್ಯವಸ್ಥಾಪಕರು, ರಾಜ್ಯಪಾಲರು, ಕೌಂಟಿ ಆಡಳಿತಾಧಿಕಾರಿಗಳು ಹಾಗೂ ನಮ್ಮ ಸಚಿವರ ಸಮನ್ವಯದಿಂದಾಗಿ ಈ ಪರಿಸ್ಥಿತಿಯನ್ನು ನಿಯಂತ್ರಿಸಲು ಸಾಧ್ಯವಾಯಿತು ಎಂದು ಇರಾನ್ ಅಧ್ಯಕ್ಷರು ಹೇಳಿದ್ದಾರೆ.