ರಷ್ಯಾದಿಂದ ಡೀಸೆಲ್ ಖರೀದಿಸಲು ಅಮೆರಿಕ ಒಪ್ಪಿಗೆ: ಡೊನಾಲ್ಡ್ ಟ್ರಂಪ್ ಘೋಷಣೆ

ವಾಷಿಂಗ್ಟನ್: ರಷ್ಯಾದಿಂದ ಡೀಸೆಲ್ ಖರೀದಿಸಲು ಅಮೆರಿಕ ಒಪ್ಪಿಕೊಂಡಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶುಕ್ರವಾರ ತಿಳಿಸಿದ್ದಾರೆ. ಈ ನಿರ್ಧಾರದಿಂದ ರಷ್ಯಾಕ್ಕೆ ಉಕ್ರೇನ್ ವಿರುದ್ಧದ ಯುದ್ಧ ಮುಂದುವರಿಸಲು ಹಣ ಸಿಗಲಿದೆ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಟೀಕಿಸಿದ್ದಾರೆ.

ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ಮಾತುಕತೆ ನಡೆಸಿದ ಬಳಿಕ ಟ್ರಂಪ್ ಈ ಒಪ್ಪಂದವನ್ನು ಘೋಷಿಸಿದ್ದಾರೆ. ರಷ್ಯಾ ತಕ್ಷಣವೇ 3 ಲಕ್ಷ ಮೆಟ್ರಿಕ್ ಟನ್‌ಗಿಂತ ಹೆಚ್ಚು ಡೀಸೆಲ್ ಪೂರೈಸಲಿದೆ. ನವೆಂಬರ್‌ನಲ್ಲಿ ಇನ್ನೂ 5 ಲಕ್ಷ ಮೆಟ್ರಿಕ್ ಟನ್ ಹಾಗೂ ಬಳಿಕ ಮತ್ತೊಂದು 10 ಲಕ್ಷ ಮೆಟ್ರಿಕ್ ಟನ್ ಡೀಸೆಲ್ ಪೂರೈಸಲಿದೆ ಎಂದು ಟ್ರಂಪ್ ತಮ್ಮ ‘ಟ್ರೂತ್ ಸೋಶಿಯಲ್’ ಖಾತೆಯಲ್ಲಿ ತಿಳಿಸಿದ್ದಾರೆ.

ಅಮೆರಿಕದಲ್ಲಿ ಇಂಧನ ಬೆಲೆ ಏರಿಕೆಯಾಗಿದ್ದು, ಅದನ್ನು ಕಡಿಮೆ ಮಾಡುವುದು ಟ್ರಂಪ್ ಆಡಳಿತದ ಗುರಿಯಾಗಿದೆ. ನವೆಂಬರ್ 3ರಂದು ನಡೆಯಲಿರುವ ಮಧ್ಯಂತರ ಚುನಾವಣೆಗೂ ಮುನ್ನ ಬೆಲೆ ಇಳಿಸಲು ಆಡಳಿತ ಪ್ರಯತ್ನಿಸುತ್ತಿದೆ.

ಝೆಲೆನ್ಸ್ಕಿ ವಿರೋಧ

ರಷ್ಯಾ ಡೀಸೆಲ್ ಮಾರಾಟದಿಂದ ಹಣ ಗಳಿಸಿದರೆ, ಆ ಹಣವನ್ನು ಉಕ್ರೇನ್ ವಿರುದ್ಧದ ಯುದ್ಧ ಮುಂದುವರಿಸಲು ಬಳಸಬಹುದು ಎಂದು ಝೆಲೆನ್ಸ್ಕಿ ಹೇಳಿದ್ದಾರೆ. ಈ ಒಪ್ಪಂದವನ್ನು ಅವರು ‘ಯುದ್ಧದಲ್ಲಿನ ಹೂಡಿಕೆ’ ಎಂದು ಹೇಳಿದ್ದಾರೆ.

‘ಪುಟಿನ್‌ಗೆ ನೀಡುವ ಉಡುಗೊರೆಗಳು ಜಗತ್ತಿಗೆ ಶಾಂತಿ ಅಥವಾ ಯಾವುದೇ ಪ್ರಯೋಜನ ತರುವುದಿಲ್ಲ’ ಎಂದು ಝೆಲೆನ್ಸ್ಕಿ ‘ಎಕ್ಸ್’ನಲ್ಲಿ ಬರೆದಿದ್ದಾರೆ.

ರಷ್ಯಾ ಡೀಸೆಲ್ ಪೂರೈಸಿದರೂ, ಪ್ರತಿಯಾಗಿ ಮತ್ತಷ್ಟು ದಾಳಿ ಮತ್ತು ವಿಶ್ವಾಸಘಾತುಕತನದ ಮೂಲಕ ಪ್ರತಿಕ್ರಿಯಿಸಬಹುದು ಎಂದು ಅವರು ಎಚ್ಚರಿಸಿದ್ದಾರೆ. ಸಂಘರ್ಷವನ್ನು ಕಡಿಮೆ ಮಾಡಲು ಎರಡೂ ಕಡೆಯವರು ನಿಜವಾದ ಪ್ರಯತ್ನ ಮಾಡಬೇಕು ಎಂದು ಕರೆ ನೀಡಿದ್ದಾರೆ.

 ಸುದ್ದಿಗಾರರೊಂದಿಗೆ ಮಾತನಾಡಿದ ಝೆಲೆನ್ಸ್ಕಿ, ಈ ಒಪ್ಪಂದದಿಂದ ರಷ್ಯಾಕ್ಕೆ ಯುದ್ಧ ಮುಂದುವರಿಸಲು ಹೆಚ್ಚಿನ ಸಂಪನ್ಮೂಲಗಳು ದೊರೆಯಲಿವೆ. ಇದರಿಂದ ಶಾಂತಿ ಮಾತುಕತೆಗೂ ಹಿನ್ನಡೆಯಾಗಲಿದೆ ಎಂದು ಹೇಳಿದ್ದಾರೆ.

ಅಮೆರಿಕದಲ್ಲಿರುವ ಉಕ್ರೇನ್ ನಿಯೋಗವನ್ನು ಕೇವಲ ತೋರಿಕೆಗಾಗಿ ಬಳಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. ಈ ಒಪ್ಪಂದ ನ್ಯಾಯಯುತವಲ್ಲ ಎಂದೂ ಹೇಳಿದ್ದಾರೆ.

2022ರ ಫೆಬ್ರುವರಿಯಲ್ಲಿ ರಷ್ಯಾ ಉಕ್ರೇನ್ ಮೇಲೆ ಪೂರ್ಣ ಪ್ರಮಾಣದ ಆಕ್ರಮಣ ಆರಂಭಿಸಿತ್ತು. ಈ ಯುದ್ಧವನ್ನು ಕೊನೆಗೊಳಿಸುವ ಕುರಿತು ಚರ್ಚಿಸಲು ಉಕ್ರೇನ್ ನಿಯೋಗ ಅಮೆರಿಕದಲ್ಲಿದ್ದಾಗಲೇ ಡೀಸೆಲ್ ಪೂರೈಕೆ ಒಪ್ಪಂದ ಪ್ರಕಟವಾಗಿದೆ.

ಇಂಧನ ಬೆಲೆ ಇಳಿಸುವ ಗುರಿ

ಅಮೆರಿಕದಲ್ಲಿ ಡೀಸೆಲ್ ಬೆಲೆ ಹೆಚ್ಚಿರುವುದರಿಂದ ರೈತರು, ಪಶುಪಾಲಕರು ಮತ್ತು ಟ್ರಕ್ ಚಾಲಕರಿಗೆ ಹೆಚ್ಚಿನ ವೆಚ್ಚವಾಗುತ್ತಿದೆ. ರಷ್ಯಾದಿಂದ ಡೀಸೆಲ್ ಆಮದು ಮಾಡಿಕೊಂಡರೆ ಬೆಲೆ ಇಳಿಯಬಹುದು ಎಂಬುದು ಟ್ರಂಪ್ ಆಡಳಿತದ ನಿರೀಕ್ಷೆ.

‘ಅಮೆರಿಕದ ರೈತರು, ಪಶುಪಾಲಕರು ಮತ್ತು ಟ್ರಕ್ ಚಾಲಕರಿಗೆ ಕಡಿಮೆ ಬೆಲೆಯಲ್ಲಿ ಇಂಧನ ಒದಗಿಸುವುದು ನನ್ನ ಪ್ರಮುಖ ಆದ್ಯತೆ’ ಎಂದು ಟ್ರಂಪ್ ಹೇಳಿದ್ದಾರೆ.

ರಷ್ಯಾದ ಇಂಧನ ಕಂಪೆನಿಗಳ ಮೇಲೆ ಅಮೆರಿಕ ನಿರ್ಬಂಧ ವಿಧಿಸಿದ್ದರೂ, ಎಪ್ರಿಲ್ 7ರವರೆಗೆ ರಷ್ಯಾದಿಂದ ಡೀಸೆಲ್ ಆಮದು ಮಾಡಿಕೊಳ್ಳಲು ಅನುಮತಿ ನೀಡುವ ಪರವಾನಗಿಯನ್ನು ಅಮೆರಿಕದ ಖಜಾನೆ ಇಲಾಖೆ ಶುಕ್ರವಾರ ಹೊರಡಿಸಿದೆ.

ಪುಟಿನ್ ಅವರ ಪ್ರತಿನಿಧಿ ಕಿರಿಲ್ ಡಿಮಿಟ್ರಿವ್ ಕೂಡ ಅಮೆರಿಕ–ರಷ್ಯಾ ಇಂಧನ ಸಹಕಾರವನ್ನು ಸ್ವಾಗತಿಸಿದ್ದಾರೆ.

ಆರಂಭದಲ್ಲಿ ಪೂರೈಕೆಯಾಗಲಿರುವ 3 ಲಕ್ಷ ಮೆಟ್ರಿಕ್ ಟನ್ ಡೀಸೆಲ್ ಸುಮಾರು 22.5 ಲಕ್ಷ ಬ್ಯಾರೆಲ್‌ಗಳಿಗೆ ಸಮಾನವಾಗಿದೆ. ಅಮೆರಿಕ ಪ್ರತಿದಿನ ಸುಮಾರು 15 ಲಕ್ಷ ಬ್ಯಾರೆಲ್ ಡೀಸೆಲ್ ರಫ್ತು ಮಾಡುತ್ತದೆ.

ಬೆಲೆ ಎಷ್ಟು ಕಡಿಮೆಯಾಗಬಹುದು?

ರಷ್ಯಾದಿಂದ ಡೀಸೆಲ್ ಬಂದರೂ ಬೆಲೆ ಗಣನೀಯವಾಗಿ ಅಥವಾ ದೀರ್ಘಕಾಲ ಕಡಿಮೆಯಾಗುವ ಸಾಧ್ಯತೆ ಇಲ್ಲ ಎಂದು ತಜ್ಞರು ಹೇಳಿದ್ದಾರೆ.

ತೈಲ ಮಾರುಕಟ್ಟೆ ಸಂಶೋಧಕ ರೋರಿ ಜಾನ್‌ಸ್ಟನ್ ಅವರ ಪ್ರಕಾರ, ರಷ್ಯಾದ ಸಂಸ್ಕರಣಾಗಾರಗಳ ಮೇಲೆ ದಾಳಿ ನಡೆಯದಿದ್ದರೆ ಆ ದೇಶವು ಈಗ ಘೋಷಿಸಿರುವುದಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಡೀಸೆಲ್ ರಫ್ತು ಮಾಡುತ್ತದೆ.

ವುಡ್ ಮೆಕೆಂಜಿ ಸಂಸ್ಥೆಯ ವಿಶ್ಲೇಷಕ ಜಿಮ್ ಮಿಚೆಲ್ ಅವರ ಪ್ರಕಾರ, ಈ ಪೂರೈಕೆಯಿಂದ ಮಾರುಕಟ್ಟೆಗೆ ಸ್ವಲ್ಪ ನೆರವಾಗಬಹುದು. ಆದರೆ, ಇದು ಸಂಪೂರ್ಣ ಪರಿಹಾರವಲ್ಲ.

ಫೆಬ್ರುವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಇರಾನ್ ವಿರುದ್ಧ ಯುದ್ಧ ಆರಂಭಿಸಿದ ಬಳಿಕ ಅಮೆರಿಕದಲ್ಲಿ ಡೀಸೆಲ್ ಬೆಲೆ ಸುಮಾರು ಶೇ 70ರಷ್ಟು ಏರಿಕೆಯಾಗಿದೆ. ಉಕ್ರೇನ್ ಮತ್ತು ಇರಾನ್‌ನಲ್ಲಿನ ಸಂಘರ್ಷಗಳು ಜಾಗತಿಕ ಇಂಧನ ಪೂರೈಕೆಯ ಮೇಲೆ ಒತ್ತಡ ಹೆಚ್ಚಿಸಿವೆ.

ಗುರುವಾರ ಅಮೆರಿಕದಲ್ಲಿ ಡೀಸೆಲ್‌ನ ಸರಾಸರಿ ಬೆಲೆ ಪ್ರತಿ ಗ್ಯಾಲನ್‌ಗೆ 6.28 ಡಾಲರ್‌ಗೆ ತಲುಪಿದೆ ಎಂದು ವಾಹನ ಚಾಲಕರ ಸಂಘಟನೆ AAA ತಿಳಿಸಿದೆ.

ಬೆಲೆ ಇಳಿಸಲು ಅಮೆರಿಕವು ತುರ್ತು ಇಂಧನ ನಿಕ್ಷೇಪಗಳನ್ನು ಬಿಡುಗಡೆ ಮಾಡುವಂತೆ ಮಿತ್ರರಾಷ್ಟ್ರಗಳ ಮೇಲೆ ಒತ್ತಡ ಹೇರುತ್ತಿದೆ. ಕೃಷಿ ಉಪಕರಣಗಳಲ್ಲಿ ಬಳಸುವ, ತೆರಿಗೆ ವಿನಾಯಿತಿ ಹೊಂದಿರುವ ‘ಕೆಂಪು ಬಣ್ಣದ ಡೀಸೆಲ್’ ಲಭ್ಯತೆಯನ್ನು ಹೆಚ್ಚಿಸುವ ಪ್ರಯತ್ನವನ್ನೂ ನಡೆಸುತ್ತಿದೆ.

ಒಪ್ಪಂದದ ಸುದ್ದಿ ಹೊರಬಿದ್ದ ಬಳಿಕ ಅಮೆರಿಕದ ಡೀಸೆಲ್ ಫ್ಯೂಚರ್ಸ್ ದರ ಶೇ 4.8ಕ್ಕೂ ಹೆಚ್ಚು ಕುಸಿದು, ಪ್ರತಿ ಗ್ಯಾಲನ್‌ಗೆ 4.64 ಡಾಲರ್‌ಗೆ ತಲುಪಿದೆ.

ಇಂಧನ ಉತ್ಪಾದನೆ ಹೆಚ್ಚಿಸಲು ಅಮೆರಿಕದ ಚಿಂತನೆ

ಇಂಧನ ಬೆಲೆ ನಿಯಂತ್ರಿಸಲು ಟ್ರಂಪ್ ಆಡಳಿತ ಮತ್ತಷ್ಟು ಕ್ರಮಗಳನ್ನು ಪರಿಶೀಲಿಸುತ್ತಿದೆ ಎಂದು ಉದ್ಯಮದ ಮೂರು ಮೂಲಗಳು ರಾಯಿಟರ್ಸ್‌ಗೆ ತಿಳಿಸಿವೆ.

ಈ ಸಂಬಂಧ ಅಧ್ಯಕ್ಷೀಯ ಜ್ಞಾಪಕ ಪತ್ರ ಹೊರಡಿಸುವ ಸಾಧ್ಯತೆಯಿದೆ. ಇಂಧನ ಉತ್ಪಾದನೆಗೆ ಅಡ್ಡಿಯಾಗುವ ರಾಜ್ಯ ಮತ್ತು ಸ್ಥಳೀಯ ನಿಯಮಗಳನ್ನು ಪರಿಶೀಲಿಸುವುದು ಹಾಗೂ ದೇಶೀಯ ತೈಲ ಉತ್ಪಾದನೆ ಹೆಚ್ಚಿಸಲು ‘ರಕ್ಷಣಾ ಉತ್ಪಾದನಾ ಕಾಯ್ದೆ’ಯನ್ನು (Defense Production Act) ಬಳಸುವ ಸಾಧ್ಯತೆಯನ್ನು ಪರಿಗಣಿಸುವಂತೆ ಅಧಿಕಾರಿಗಳಿಗೆ ಸೂಚಿಸಬಹುದು.

ಈ ಕಾಯ್ದೆಯಡಿ ಸರ್ಕಾರವು ಸಾಲ ಮತ್ತು ಸಾಲದ ಖಾತರಿಗಳ ಮೂಲಕ ಉತ್ಪಾದನೆಗೆ ನೆರವು ನೀಡಬಹುದು. ಅಗತ್ಯ ವಸ್ತುಗಳಿಗೆ ಸಂಬಂಧಿಸಿದ ಸರ್ಕಾರಿ ಗುತ್ತಿಗೆಗಳಿಗೂ ಆದ್ಯತೆ ನೀಡಬಹುದು.

ಇರಾನ್ ಸಂಘರ್ಷದಿಂದ ಇಂಧನ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗುವ ಅಪಾಯ ಹೆಚ್ಚಿರುವುದರಿಂದ, ತೈಲ ಸಂಸ್ಕರಣಾ ಸಾಮರ್ಥ್ಯವನ್ನು ಹೆಚ್ಚಿಸುವ ಮಾರ್ಗಗಳನ್ನು ಶ್ವೇತಭವನ ಪರಿಶೀಲಿಸುತ್ತಿದೆ.

ಹೊಸ ಸಂಸ್ಕರಣಾಗಾರಗಳನ್ನು ನಿರ್ಮಿಸಲು ಹಲವು ವರ್ಷಗಳು ಬೇಕಾಗುವುದರಿಂದ, ಈಗಿರುವ ಸಂಸ್ಕರಣಾಗಾರಗಳನ್ನು ಸುಧಾರಿಸುವುದು ಅಥವಾ ಅವುಗಳ ಸಾಮರ್ಥ್ಯವನ್ನು ಹೆಚ್ಚಿಸುವುದು ಹೆಚ್ಚು ಪ್ರಾಯೋಗಿಕ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.