ತೈಝ್ ನಲ್ಲಿ ಹೌದಿ ದಾಳಿಯನ್ನು ಹಿಮ್ಮೆಟ್ಟಿಸಿದ ಯಮನ್ ಪಡೆ; ಕನಿಷ್ಠ 30 ಹೌದಿ ಹೋರಾಟಗಾರರು ಮೃತ್ಯು: ವರದಿ

ಸನಾ, ಅ. 2: ಯಮನ್ ನ ತೈಝ್ ಪ್ರಾಂತದಲ್ಲಿ ಸರಕಾರಿ ನಿಯಂತ್ರಣದಲ್ಲಿರುವ ಪ್ರದೇಶಗಳ ಮೇಲೆ ಇರಾನ್ ಬೆಂಬಲಿತ ಹೌದಿ ಪಡೆಗಳು ನಡೆಸಿದ ಅತ್ಯಂತ ತೀವ್ರ ಮತ್ತು ಸಂಘಟಿತ ದಾಳಿಯನ್ನು ಸರಕಾರಿ ಪಡೆಗಳು ಹಿಮ್ಮೆಟ್ಟಿಸಿವೆ. ಕಳೆದ 24 ಗಂಟೆಗಳಲ್ಲಿ ಕನಿಷ್ಠ 30 ಹೌದಿಗಳು ಕೊಲ್ಲಲ್ಪಟ್ಟಿದ್ದಾರೆ ಎಂದು ಯಮನ್ ಸೇನಾಧಿಕಾರಿ ಗುರುವಾರ ತಿಳಿಸಿದ್ದಾರೆ.

ಬುಧವಾರ ರಾತ್ರಿ ತೈಝ್ ನ ಹೆಚ್ಚಿನ ಭಾಗಗಳ ಮೇಲೆ ಹೌದಿಗಳು ಭಾರಿ ಮೋರ್ಟಾರ್ ಗುಂಡಿನ ದಾಳಿ ನಡೆಸಿದರು. ಬಳಿಕ ನೆಲದ ಮೂಲಕ ದಾಳಿಗಳನ್ನು ಪ್ರಾರಂಭಿಸಿದ್ದು, ಸರಕಾರಿ ಪಡೆಗಳು ಮತ್ತು ಮಿತ್ರರಾಷ್ಟ್ರಗಳ ಸ್ಥಳೀಯ ಹೋರಾಟಗಾರರೊಂದಿಗೆ ತೀವ್ರ ಕಾದಾಟಕ್ಕೆ ಕಾರಣವಾಯಿತು.

ಸರಕಾರಿ ರಕ್ಷಣಾ ಗೋಡೆಗಳನ್ನು ಭೇದಿಸುವ ಪ್ರಯತ್ನದಲ್ಲಿ ಹೌದಿಗಳು ಕತ್ತಲೆಯ ಮರೆಯಲ್ಲಿ ಒಳನುಸುಳಲು ಯತ್ನಿಸಿದವು. ಸರಕಾರಿ ನಿಯಂತ್ರಣದ ಪ್ರದೇಶಗಳನ್ನು ಗಮನಕ್ಕೆ ಬಾರದಂತೆ ಪ್ರವೇಶಿಸಲು ಕೆಲವು ಹೋರಾಟಗಾರರು ಮಹಿಳೆಯರ ಉಡುಪನ್ನು ಧರಿಸಿದ್ದರು ಎಂದು ಅವರು ತಿಳಿಸಿದರು. ಗುರುವಾರ ಮಧ್ಯಾಹ್ನದವರೆಗೂ ಹೋರಾಟ ಮುಂದುವರಿಯಿತು, ಆದರೆ ಸರಕಾರಿ ಪಡೆಗಳು ಹೌದಿಗಳ ಹೆಚ್ಚಿನ ಮುನ್ನಡೆಯನ್ನು ತಡೆದವು ಎಂದು ಯಮನ್ ಮಿಲಿಟರಿಯ ವಕ್ತಾರ ಕರ್ನಲ್ ಮಾಜೆದ್ ಅಲ್-ನುಜೈಲ್ ಹೇಳಿದರು.

ತೈಝ್ ಅನ್ನು ದಕ್ಷಿಣದ ನಗರವಾದ ಏಡೆನ್ ಗೆ ಸಂಪರ್ಕಿಸುವ ಮುಖ್ಯ ಮಾರ್ಗವಾದ ಹೈಜತ್ ಅಲ್-ಅಬ್ದ್ ರಸ್ತೆಯನ್ನು ಹೌದಿ ಹೋರಾಟಗಾರರು ಪ್ರವೇಶಿಸಿ, ಸೇತುವೆಯ ಕೆಳಗಿನ ಕಾಲುವೆಯಲ್ಲಿ ಸ್ಫೋಟಕಗಳನ್ನು ಇಟ್ಟು ಸ್ಫೋಟಿಸಿದರು. ಇದರಿಂದ ರಸ್ತೆ ಸಂಪರ್ಕ ಕಡಿತಗೊಂಡಿದೆ ಎಂದು ನಿವಾಸಿಗಳು ತಿಳಿಸಿದ್ದಾರೆ. ತನ್ನ ಪಡೆಗಳು ಸ್ಥಳೀಯ ಹೋರಾಟಗಾರರ ಬೆಂಬಲದೊಂದಿಗೆ ತೈಝ್ ನ ಪಶ್ಚಿಮದಲ್ಲಿರುವ ಜಬಲ್ ಹಬಾಶಿ ಮತ್ತು ಮಕ್ಬನಾ ಜಿಲ್ಲೆಗಳಲ್ಲಿ ಹಾಗೂ ಅಲ್-ಮಿಸ್ರಾಖ್ ಜಿಲ್ಲೆಯಲ್ಲಿ ಪ್ರಮುಖ ಹೌದಿ ದಾಳಿಗಳನ್ನು ಹಿಮ್ಮೆಟ್ಟಿಸುತ್ತಿವೆ. ಕ್ಷೇತ್ರ ಕಮಾಂಡರ್ಗಳು ಸೇರಿದಂತೆ ಹತ್ತಾರು ಹೌದಿಗಳು ಕೊಲ್ಲಲ್ಪಟ್ಟಿದ್ದಾರೆ, ಗಾಯಗೊಂಡಿದ್ದಾರೆ ಅಥವಾ ವಶಕ್ಕೆ ಪಡೆಯಲಾಗಿದೆ. ಹೌದಿಗಳ ಹೆಚ್ಚಿನ ಪ್ರಮಾಣದ ಮಿಲಿಟರಿ ಉಪಕರಣಗಳನ್ನು ನಾಶಪಡಿಸಲಾಗಿದೆ. ದಕ್ಷಿಣ ಮತ್ತು ಆಗ್ನೇಯ ತೈಝ್ ನಲ್ಲಿರುವ ಹೌದಿ ನೆಲೆಗಳನ್ನು ಗುರಿಯಾಗಿಸಿಕೊಂಡು ಸರಕಾರಿ ಯುದ್ಧವಿಮಾನಗಳು ವೈಮಾನಿಕ ದಾಳಿಗಳನ್ನು ನಡೆಸಿವೆ ಎಂದು ಗುರುವಾರ ನೀಡಿದ ಹೇಳಿಕೆಯಲ್ಲಿ ಯಮನ್ ಸೇನೆ ತಿಳಿಸಿದೆ.

► ಹೌದಿ ನೆಲೆಗಳ ಮೇಲೆ 20 ದಾಳಿ

ತನ್ನ ಸೇನೆ ಮೂರು ಗಂಟೆಗಳ ಅವಧಿಯಲ್ಲಿ ತೈಝ್ ಪ್ರಾಂತ್ಯದಲ್ಲಿನ ಹೌದಿ ಗುರಿಗಳ ವಿರುದ್ಧ 20 ದಾಳಿಗಳನ್ನು ನಡೆಸಿದೆ ಎಂದು ಯಮನ್ ಗುರುವಾರ ಹೇಳಿದೆ. ಈ ದಾಳಿಗಳು ಪ್ರಾಂತ್ಯದಲ್ಲಿದ್ದ ಹೌದಿಗಳ ಚಲನವಲನಗಳು, ಸಿಬ್ಬಂದಿ, ವಾಹನಗಳು ಮತ್ತು ಮಿಲಿಟರಿ ಉಪಕರಣಗಳನ್ನು ಗುರಿಯಾಗಿಸಿಕೊಂಡು ನಡೆದಿವೆ ಎಂದು ಅಂತರರಾಷ್ಟ್ರೀಯ ಮಾನ್ಯತೆ ಪಡೆದ ಯಮನ್ ಸರಕಾರದ ಮಿಲಿಟರಿ ವಕ್ತಾರರು ತಿಳಿಸಿದ್ದಾರೆ.