ಕಲಬುರಗಿ: ಮಳೆ ನೀರಿನಿಂದ ಶಿಥಿಲಗೊಂಡ ವಿಶ್ವದ ಮೊಟ್ಟ ಮೊದಲ ಇಕೋ ಸೌಂಡ್ ಜಾಮಿಯಾ ಮಸೀದಿ

ಕಲಬುರಗಿ: ಬಹಮನಿ ಸಾಮ್ರಾಜ್ಯದ ಮೊದಲನೇ ಸುಲ್ತಾನ್ ಮುಹಮ್ಮದ್ ಶಾ ಅವರಿಂದ 1367ರಲ್ಲಿ ಕಲಬುರಗಿ ಕೋಟೆ ಆವರಣದಲ್ಲಿ ನಿರ್ಮಿಸಲಾದ ಖಿಲಾ ಎ ಹುಶಾಮ್ ಜುಮಾ ಜಾಮಿಯಾ ಮಸೀದಿ, ಏಶಿಯಾದ ಅತಿದೊಡ್ಡ ಮಸೀದಿಯಲ್ಲಿ ಒಂದಾಗಿದ ಮತ್ತು ವಿಶ್ವದ ಮೊದಲ ಇಕೋ ಸೌಂಡ್ ಹೊಂದಿರುವ ಮೊಟ್ಟಮೊದಲ ಮಸೀದಿ ಎಂದೇ ಕರೆಯಲ್ಪಡುತ್ತದೆ. ಈ ಪ್ರಖ್ಯಾತ ಮಸೀದಿಯ ಮೇಲ್ಛಾವಣಿ ಶಿಥಿಲಗೊಂಡು ಮಳೆ ನೀರು ಸೋರುತ್ತಿದೆ.

ಒಟ್ಟು 136 ಪಿಲ್ಲರ್‌ಗಳು, 107 ಡೊಮ್ (ಗೋಪುರ) ಮತ್ತು ಒಂದೇ ಛಾವಣಿಯಲ್ಲಿ ಪರ್ಶಿಯನ್ ವಾಸ್ತುಶಿಲ್ಪ ಕಲೆಯ ವೈಶಿಷ್ಟ್ಯ ಹೊಂದಿರುವ ಬಹುಮನಿ ಕೋಟೆಯ ಒಳಗೆ ವಿಶಾಲವಾಗಿ ಈ ಮಸೀದಿಯನ್ನು ನಿರ್ಮಿಸಲಾಗಿದೆ. ಈ ಮಸೀದಿಯ ವೈಶಿಷ್ಟ್ಯವನ್ನು ನೋಡಲು ದೇಶ, ವಿದೇಶಗಳ ಸಾವಿರಾರು ಪ್ರವಾಸಿಗರು ಬರುತ್ತಾರೆ.

650 ವರ್ಷಗಳ ಇತಿಹಾಸವಿರುವ ಜಾಮಿಯಾ ಮಸೀದಿಯ ಕಟ್ಟಡದ ಗೋಡೆಗಳು, ವರ್ಷದ ಮಳೆಗಾಲದಿಂದ ಈ ವರ್ಷದ ಮಳೆಗಾಳದ ವರೆಗೆ 12 ಪಿಲ್ಲರ್‌ಗಳ ಮೇಲ್ಛಾವಣಿಯಿಂದ ಮಳೆ ನೀರು ಸೋರಿ, ನೆಲಕ್ಕೆ ತಲುಪುತ್ತಿದೆ. ಪ್ರವೇಶ ದ್ವಾರದ ಪ್ಲಾಸ್ಟರ್ ಉದುರುತ್ತಿದೆ. ನೆಲದ ಮೇಲಿನ ಫ್ಲೋರಿಂಗ್ ಸಿಮೆಂಟ್ ಕಿತ್ತುಕೊಂಡು ಬರುತ್ತಿದೆ. ಕುಡಿಯಲು ನೀರಿನ ವ್ಯವಸ್ಥೆ ಇದೆ. ಸೆಕ್ಯುರಿಟಿ ಗಾರ್ಡ್ ಇಲ್ಲ. ಸ್ಮಾರಕದ ನಾಮಫಲಕದಲ್ಲಿ ಗೊಂದಲ ಮಾಹಿತಿ ಹಾಕಲಾಗಿದೆ.

ವಕ್ಫ್ ಮಂಡಳಿ, ಇತಿಹಾಸಕಾರರು, ರಾಜ್ಯ ಪುರಾತತ್ವ ಇಲಾಖೆ ಹಾಗೂ ಎಎಸ್‌ಐ ಟೂರಿಸಮ್ ಇಲಾಖೆಯ ನಿರ್ಲಕ್ಷ್ಯಕ್ಕೆ ಒಳಗಾಗಿ ಈ ಸ್ಮಾರಕ ದುಸ್ಥಿತಿಗೆ ತಲುಪಿದೆ. ಈ ಬಾರಿಯ ಮಳೆಗಾಲದಲ್ಲಿ ಮತ್ತಷ್ಟು ಹಾನಿಯಾಗುವ ಮುನ್ನ ಸಚಿವರು ಮತ್ತು ಸ್ಥಳೀಯ ಶಾಸಕರು, ರಾಜ್ಯ ಮತ್ತು ಕೇಂದ್ರದ ಟೂರಿಸಮ್ ನಿರ್ದೇಶಕರು ಎಚ್ಚೆತುಕೊಂಡು ದುರಸ್ತಿ ನಡೆಸಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

ಐತಿಹಾಸಿಕ ಸ್ಮಾರಕಗಳ ಹಾನಿ ತಡೆಯಲು ಸರಕಾರ ಮತ್ತು ಜಿಲ್ಲಾಡಳಿತ ವಿಶೇಷ ಕಾಳಜಿವಹಿಸಿ, ಸಂಬಂಧಪಟ್ಟ ಇಲಾಖೆಗಳ ಮೂಲಕ ಅಭಿವೃದ್ಧಿ ಕಾರ್ಯಗಳು ನಡೆಸಿ ಕಲ್ಯಾಣ ಕರ್ನಾಟಕ ಭಾಗವನ್ನು ಪ್ರವಾಸಿ ತಾಣವಾಗಿಸಲು ಮುಂದಾಗಬೇಕೆಂದು ಸಂಶೋಧಕರಾದ ಮುಹಮ್ಮದ್ ಅಯಾಝುದ್ದೀನ್ ಪಟೇಲ್ ಒತ್ತಾಯಿಸಿದ್ದಾರೆ.