ಬಜಾಲ್ ನ ರಸ್ತೆ ಅಭಿವೃದ್ಧಿಗೆ ಆಗ್ರಹಿಸಿ ಡಿವೈಎಫ್ ಐ ಧರಣಿ

ಮಂಗಳೂರು, ಜು.19: ಬಜಾಲ್ ಜಲ್ಲಿಗುಡ್ಡೆ ಮುಖ್ಯರಸ್ತೆ ಅಗಲೀಕರಿಸಿ ಕಾಂಕ್ರಿಟೀಕರಣಗೊಳಿಸಲು ಹಾಗೂ ಜಯನಗರ ಸಹಿತ ಎಲ್ಲ ಮುಖ್ಯರಸ್ತೆಗಳ ಕಾಂಕ್ರಿಟೀಕರಣಗೊಳಿಸಲು ಒತ್ತಾಯಿಸಿ ಸಿಪಿಎಂ ಜಲ್ಲಿಗುಡ್ಡೆ ಶಾಖೆಯ ವತಿಯಿಂದ ಮಂಗಳವಾರ ಬೆಳಗ್ಗೆ ಜಲ್ಲಿಗುಡ್ಡೆ ಬಸ್ ನಿಲ್ದಾಣದ ಬಳಿ ಧರಣಿ ನಡೆಸಲಾಯಿತು.

ಧರಣಿಯನ್ನುದ್ದೇಶಿಸಿ ಮಾತನಾಡಿದ ಸಿಪಿಎಂ ನಗರ ಕಾರ್ಯದರ್ಶಿ ಸಂತೋಷ್ ಬಜಾಲ್, ಸ್ಮಾರ್ಟ್ ಸಿಟಿಯ ಹೆಸರಲಿ ಕೋಟಿ ಕೋಟಿ ಹಣವನ್ನು ಬೇಕಾಬಿಟ್ಟಿ ಖರ್ಚು ಮಾಡಿ ಅಭಿವೃದ್ಧಿ ಹೆಸರಲ್ಲಿ ಕಮಿಷನ್ ಹೊಡೆದು ಜನರ ತೆರಿಗೆ ಹಣವನ್ನು ಪೋಲು ಮಾಡುವ ಶಾಸಕರಿಗೆ ಬಜಾಲ್ ವಾರ್ಡಿನ ಮುಖ್ಯರಸ್ತೆಯ ಅಗಲೀಕರಣ ಮತ್ತು ಕಾಂಕ್ರಟೀಕರಣಗೊಳಿಸಲಾಗಲಿ ಅಥವಾ ಬಜಾಲ್ ವಾರ್ಡಿನ ಅಭಿವೃದ್ಧಿಗೊಳಿಸುವಲ್ಲಿ ಕಡೆಗಣಿಸುವುದಾದರೆ ಈ ಭಾಗದ ಜನರ ಹೋರಾಟ ತೀವ್ರಗೊಳಿಸಲಾಗುವುದು ಎಂದರು.

ಸಿಪಿಎಂ ಜಿಲ್ಲಾ ಕಾರ್ಯದರ್ಶಿ ಮಂಡಳಿ ಸದಸ್ಯ ಸುನೀಲ್ ಕುಮಾರ್ ಬಜಾಲ್ ಮಾತನಾಡಿ, ಜಯನಗರ ಜಲ್ಲಿಗುಡ್ಡೆ 200 ಮೀಟರ್ ರಸ್ತೆಯ ಕಾಮಗಾರಿಗೆ ಈಗಾಗಲೇ 68 ಲಕ್ಷ ರೂ. ಮಂಜೂರಾಗಿದೆ. ಆದರೆ ಕಾಮಗಾರಿ ಪ್ರಾರಂಭಿಸಲು ಈವರೆಗೂ ಕ್ರಮ ಕೈಗೊಂಡಿಲ್ಲ. ಪ್ರತೀ ಬಾರಿ ಈ ಪ್ರದೇಶಕ್ಕೆ ಭೇಟಿ ನೀಡುವ ಶಾಸಕ ವೇದವ್ಯಾಸ ಕಾಮತ್ ರಿಗೆ ಮುಖ್ಯರಸ್ತೆ ಅವ್ಯವಸ್ಥೆ ಕಾಣಲೇ ಇಲ್ಲವೇ. ಬಿಜೆಪಿ ಆಡಳಿತ ಇಲ್ಲಿಯ ಜನಪ್ರತಿನಿಧಿಯನ್ನು ಕಡೆಗಣಿಸಿ ಶಾಸಕರ ಹಿಂಬಾಲಕರೇ ಕಾರ್ಪೊರೇಟರ್ ರೀತಿಯಲ್ಲಿ ದುರಂಹಕಾರದಿಂದ ವರ್ತನೆ ಸಹಿಸಲಾಗದು. ಬಜಾಲ್ ವಾರ್ಡಿನ ಮುಖ್ಯರಸ್ತೆಯಿಂದ ಹಿಡಿದು ಒಳರಸ್ತೆಯನ್ನು ಕೂಡಲೇ ಸರಿಪಡಿಸಲು ಕ್ರಮ ಕೈಗೊಳ್ಳದಿದ್ದಲ್ಲಿ ಪಾಲಿಕೆ ಆಯುಕ್ತರ ಕಚೇರಿಗೆ ಮುತ್ತಿಗೆ ಹಾಕಲಾಗುವುದು ಎಂದು ಎಚ್ಚರಿಕೆ ನೀಡಿದರು.

ಧರಣಿಯಲ್ಲಿ ಸಿಪಿಎಂ ಜಲ್ಲಿಗುಡ್ಡೆ ಶಾಖಾ ಕಾರ್ಯದರ್ಶಿ ದೀಪಕ್ ಬಜಾಲ್, ಮೋಹನ ಜಲ್ಲಿಗುಡ್ಡೆ, ನಗರ ಸಮಿತಿಯ ಸದಸ್ಯರಾದ ಲೋಕೇಶ್ ಎಂ., ಯೋಗೀಶ್ ಜಪ್ಪಿನಮೊಗರು, ಅಶೋಕ್ ಸಾಲ್ಯಾನ್, ಜಯಪ್ರಕಾಶ್ ಜಲ್ಲಿಗುಡ್ಡೆ, ಸಿಪಿಎಂ ಜಲ್ಲಿಗುಡ್ಡೆ ಮಹಿಳಾ ಶಾಖಾ ಕಾರ್ಯದರ್ಶಿ ರೋಹಿಣಿ ಜಲ್ಲಿಗುಡ್ಡೆ, ಗೀತಾ ಪ್ರೇಮನಾಥ್, ಮಮತಾ ಜಯಪ್ರಕಾಶ್, ಡಿವೈಎಫ್ಐ ಮುಖಂಡರಾದ ಜಗದೀಶ್ ಬಜಾಲ್, ದೀಕ್ಷಿತ್ ಭಂಡಾರಿ, ಧೀರಜ್ ಬಜಾಲ್, ಆನಂದ ಬಜಾಲ್, ವರಪ್ರಸಾದ್, ದೀಕ್ಷಿತಾ ಜಲ್ಲಿಗುಡ್ಡೆ ಮಮತಾ ಜಲ್ಲಿಗುಡ್ಡೆ, ಸ್ಥಳೀಯರಾದ ಅಯಾಝ್, ಸಂಕಪ್ಪ, ನಾರಾಯಣ, ಉಮರಬ್ಬ ಹಿರಿಯರಾದ ಕೇಶವ ಭಂಡಾರಿ, ಲತೀಫ್ ಜಲ್ಲಿಗುಡ್ಡೆ, ಸದಾಶಿವ ನಾಯಕ್ ಮುಂತಾದವರು ಉಪಸ್ಥಿತರಿದ್ದರು.