ಮಂಗಳೂರು | ಟ್ರಕ್ ಚಾಲಕರಿಗೆ ಸಿಗದ ಟರ್ಮಿನಲ್ ಭಾಗ್ಯ!

ಮಂಗಳೂರು, ಡಿ.7: ನಗರ ಹೊರವಲಯದ ಕುಳಾಯಿಯಲ್ಲಿ ಟ್ರಕ್ ಟರ್ಮಿನಲ್ ನಿರ್ಮಾಣವಾಗಲಿದೆ, ಇದರಿಂದ 1,500ಕ್ಕೂ ಅಧಿಕ ಟ್ರಕ್/ಲಾರಿಗಳಿಗೆ ನಿಲುಗಡೆ ವ್ಯವಸ್ಥೆ ಆಗುತ್ತದೆ ಎಂದು ಹೇಳಲಾಗಿತ್ತು. ಆದರೆ ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಈ ಪ್ರಸ್ತಾವಕ್ಕೆ 22 ವರ್ಷಗಳೇ ಕಳೆದರೂ, ಅದಿನ್ನೂ ಕಾರ್ಯಗತಗೊಂಡಿಲ್ಲ. ಟ್ರಕ್/ಲಾರಿ ಚಾಲಕರು ಟರ್ಮಿನಲ್ ಭಾಗ್ಯದಿಂದ ವಂಚಿತರಾಗಿದ್ದಾರೆ ಎಂದು ಹೇಳಬಹುದು.

ಮಂಗಳೂರು ನಗರವು ಕೈಗಾರಿಕೆ, ವಾಣಿಜ್ಯ ಹಬ್ ಆಗಿ ಬೆಳೆಯುತ್ತಿದೆ. ನವಮಂಗಳೂರು ಬಂದರು, ಒಎನ್‌ಜಿಸಿ-ಎಂಆರ್‌ಪಿಎಲ್, ಎಸ್‌ಇಝೆಡ್, ಬೈಕಂಪಾಡಿ, ಯೆಯ್ಯಾಡಿ ಕೈಗಾರಿಕಾ ಪ್ರದೇಶಗಳನ್ನು ಹೊಂದಿದೆ. ಪೆಟ್ರೋಲಿಯಂ ಉತ್ಪನ್ನಗಳು, ಗ್ಯಾಸ್ ರಾಜ್ಯದ ನಾನಾ ಕಡೆಗಳಿಗೆ ಸರಬರಾಜು ಆಗುತ್ತಿವೆ. ಮಂಗಳೂರಿಗೆ ರಾಜ್ಯ ಮತ್ತು ದೇಶದ ನಾನಾ ಊರುಗಳಿಂದ ಸರಕು ಸಾಗಣೆಯ ವಾಹನಗಳು ಬರುತ್ತಿವೆ.

ಮಂಗಳೂರಿಗೆ ಬರುವ ಲಾರಿ/ಟ್ರಕ್‌ಗಳು ಸರಕುಗಳನ್ನು ಖಾಲಿ ಮಾಡಿದ ಬಳಿಕ ಮುಂದಿನ ಲೋಡ್‌ಗಾಗಿ ಕಾಯಬೇಕಾಗುತ್ತದೆ. ಲಾರಿ/ಟ್ಯಾಂಕರ್‌ಗಳಿಗೆ ಗ್ಯಾಸ್, ಪೆಟ್ರೋಲ್, ಡೀಸೆಲ್ ತುಂಬಿಸಲು ಸಮಯವೂ ಬೇಕಾಗುತ್ತದೆ. ಈ ವೇಳೆ ಲಾರಿ/ಟ್ರಕ್‌ಗಳನ್ನು ಒಂದೆಡೆ ನಿಲ್ಲಿಸುವುದು ಅನಿವಾರ್ಯವಾಗಿದೆ. ಕೆಲವೊಮ್ಮೆ 4-5 ದಿನಗಳ ಕಾಲ ಲೋಡ್‌ಗಾಗಿ ಲಾರಿ/ಟ್ರಕ್‌ಗಳು ಕಾಯಬೇಕಾಗುತ್ತದೆ. ಆದರೆ ಮಂಗಳೂರು ನಗರ ಅಥವಾ ಹೊರವಲಯದಲ್ಲಿ ಸುಸಜ್ಜಿತ ಪಾರ್ಕಿಂಗ್ ವ್ಯವಸ್ಥೆ ಇಲ್ಲದ ಕಾರಣ ರಸ್ತೆ ಬದಿಗಳಲ್ಲೇ ಪಾರ್ಕಿಂಗ್ ಮಾಡಲಾಗುತ್ತಿದೆ. ಹೆದ್ದಾರಿ ಬದಿಗಳಲ್ಲಿ ಟ್ರಕ್/ಲಾರಿಗಳು ಸಾಲು ಸಾಲಾಗಿ ನಿಲ್ಲಿಸುವುದರಿಂದ ಕೆಲವೊಮ್ಮೆ ಅಪಘಾತಗಳಿಗೂ ಇದು ಕಾರಣವಾಗುತ್ತದೆ. ಸುಗಮ ಸಂಚಾರಕ್ಕೂ ಅಡ್ಡಿಯಾಗುತ್ತಿವೆ. ಹಾಗಾಗಿ ಲಾರಿ/ಟ್ರಕ್‌ಗಳ ನಿಲುಗಡೆಗೆ ವಿಶಾಲ ಮತ್ತು ಸುಸಜ್ಜಿತವಾದ ಟ್ರಕ್ ಟರ್ಮಿನಲ್ ಅಗತ್ಯವಿದೆ.

► ಎಚ್‌ಪಿಸಿಎಲ್ ಹಾಗೂ ನವಮಂಗಳೂರು ಬಂದರು ಯಾರ್ಡ್‌ನಲ್ಲಿ ಎರಡು ಟ್ರಕ್ ಟರ್ಮಿನಲ್‌ಗಳಿವೆ. ಆದರೆ ಅದು ಆ ಕಂಪೆನಿಗೆ ಸೀಮಿತವಾಗಿದೆ. ಈ ನಿಟ್ಟಿನಲ್ಲಿ 2003ರಲ್ಲಿ ಮಂಗಳೂರಿನಲ್ಲಿ ಟ್ರಕ್ ಟರ್ಮಿನಲ್ ನಿರ್ಮಿಸುವ ಬಗ್ಗೆ ರೂಪುರೇಷೆ ಸಿದ್ಧಪಡಿಸಲಾಗಿತ್ತು. ಅಂದರೆ ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರ(ಮುಡಾ)ದಿಂದ ಕುಳಾಯಿಯ 35 ಎಕರೆ ಜಾಗದಲ್ಲಿ ಸುಮಾರು 14 ಕೋ.ರೂ. ವೆಚ್ಚದಲ್ಲಿ ಟ್ರಕ್ ಟರ್ಮಿನಲ್ ಸ್ಥಾಪಿಸುವ ಪ್ರಸ್ತಾವವನ್ನು ಸರಕಾರಕ್ಕೆ ಸಲ್ಲಿಸಲಾಗಿತ್ತು. ಆ ಬಳಿಕ ಅದು ಕಾರ್ಯಗತಗೊಳ್ಳಲೇ ಇಲ್ಲ.

► ಹೆದ್ದಾರಿ ಬಳಿ ವಾಹನ ನಿಲ್ಲಿಸಿದರೂ ಹಗಲು ವೇಳೆ ಸಂಭಾವ್ಯ ಅಪಾಯ ತಪ್ಪಿಸಬಹುದು. ಆದರೆ ರಾತ್ರಿ ವೇಳೆ ಸ್ವಲ್ಪ ನಿಯಂತ್ರಣ ಕಳೆದುಕೊಂಡರೆ ಅಪಾಯ ತಪ್ಪಿದ್ದಲ್ಲ. ಹಾಗಾಗಿ ಮಂಗಳೂರಿನಲ್ಲಿ ಟ್ರಕ್ ಟರ್ಮಿನಲ್ ಸ್ಥಾಪಿಸುವ ಅಗತ್ಯವಿದೆ. ಈ ನಿಟ್ಟಿನಲ್ಲಿ ಸಂಬಂಧಪಟ್ಟವರು ಮುಂದಾಗಬೇಕು ಎಂದು ಲಾರಿ/ಟ್ರಕ್ ಚಾಲಕರು ಆಗ್ರಹಿಸಿದ್ದಾರೆ.