ಕರ್ನಾಟಕ ರಾಜ್ಯ ಮನಪಾ ನಿವೃತ್ತ ನೌಕರರ ಸಂಘಗಳ ಒಕ್ಕೂಟದ ಸಭೆ

ಮಂಗಳೂರು: ಮಂಗಳೂರು ಮಹಾನಗರ ಪಾಲಿಕೆಯ ನಿವೃತ್ತ ನೌಕರರ ಸಂಘದ ಸಹಯೋಗದಲ್ಲಿ ಕರ್ನಾಟಕ ರಾಜ್ಯ ಮಹಾನಗರ ಪಾಲಿಕೆ ನಿವೃತ್ತ ನೌಕರರ ಸಂಘಗಳ ಒಕ್ಕೂಟದ ಸಭೆಯು ರಾಜ್ಯಾಧ್ಯಕ್ಷ ವೀರಭದ್ರ ಸಿಂಪಿ ಅವರ ಅಧ್ಯಕ್ಷತೆ ಯಲ್ಲಿ ನಗರದ ಖಾಸಗೀ ಸಭಾಂಗಣದಲ್ಲಿ ರವಿವಾರ ಜರಗಿತು.

ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ರಾಜ್ಯಾಧ್ಯಕ್ಷ ವೀರಭದ್ರ ಸಿಂಪಿ ರಾಜ್ಯ ಸರಕಾರಿ ನೌಕರರರಲ್ಲಿ ಇಲಾಖಾವಾರು ಭೇದಭಾವ ಸರಿಯಲ್ಲ. ಮಹಾನಗರ ಪಾಲಿಕೆಯ ನೌಕರರೂ ಕೂಡ ಸರಕಾರಿ ನೌಕರರಾಗಿದ್ದಾರೆ. ನಗರದ ಸ್ವಚ್ಚತೆ, ಆರೋಗ್ಯ ರಕ್ಷಣೆಯ ಜತೆಗೆ ಜನರ ಜತೆ ದೈನಂದಿನ ಚಟುವಟಿಕೆಯಲ್ಲಿ ಸದಾ ಬೆರೆತು ಕೆಲಸ ಮಾಡುತ್ತಾರೆ. ಇಂತಹ ಪ್ರಮುಖ ನೌಕರರ ಬೇಡಿಕೆಯನ್ನು ಕಡೆಗಣಿಸದೆ ಸರಕಾರ ಈಡೇರಿಸಬೇಕು ಎಂದರು.

ಕೆಸಿಎಸ್‌ಆರ್ ನಿಯಮದನ್ವಯ ಪಿಂಚಣಿಯ ಎಲ್ಲಾ ಸವಲತ್ತುಗಳನ್ನು ರಾಜ್ಯದ ಮನಪಾ ನಿವೃತ್ತ ನೌಕರರಿಗೆ 7-8 ವರ್ಷವಾದರೂ ನೀಡದಿರುವುದನ್ನು ಖಂಡಿಸಿ ಸರಕಾರಿ ನಿವೃತ್ತ ನೌಕರರಿಗೆ ನೀಡಿದಂತೆ ನಮಗೂ ನೀಡಿ ತಾರತಮ್ಯ ತಪ್ಪಿಸಬೇಕು ಎಂದು ಸಭೆಯಲ್ಲಿ ನಿರ್ಣಯಿಸಿ ಸರಕಾರದ ಗಮನಕ್ಕೆ ತರಲು ನಿರ್ಧರಿಸಲಾಯಿತು.

ಸಭೆಯಲ್ಲಿ ರಾಜ್ಯ ಸಂಘದ ನೋಂದಣಿ ನಿಯಮಗಳ ಕರಡು ಪ್ರತಿಯ ಉಪಸಮಿತಿ ತೀರ್ಮಾನಿಸಿದ ನಡಾವಳಿ ಮಂಡಿಸ ಲಾಯಿತು. ರಾಜ್ಯಮಹಾನಗರ ಪಾಲಿಕೆಯ ನಿವೃತ್ತ ನೌಕರರ ರಾಜ್ಯಮಟ್ಟದ ಪ್ರಥಮ ಸಮ್ಮೇಳನ ನಡೆಸಲು ತೀರ್ಮಾನಿ ಸಲಾಯಿತು. ಬೆಂಗಳೂರಿನಲ್ಲಿ ರಾಜ್ಯ ಸಂಘದ ಕಚೇರಿ ಸ್ಥಾಪಿಸಲು, ಮಂಗಳೂರು ಪಾಲಿಕೆ ನಿವೃತ್ತ ನೌಕರರ ಸಂಘದ ಮತ್ತು ಸದಸ್ಯರ ವಿಚಾರಗಳ ಕುರಿತು ಸಭೆಯಲ್ಲಿ ಚರ್ಚಿಸಿ, ಪರಿಹಾರಕ್ಕೆ ಯೋಜನೆ ರೂಪಿಸಲಾಯಿತು.

ನಿವೃತ್ತ ನೌಕರರ ಬೇಡಿಕೆಯನ್ನು ಸರಕಾರದ ಮಟ್ಟದಲ್ಲಿಟ್ಟು ನೆರವೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ ವೀರಭದ್ರ ಸಿಂಪಿ ಅವರನ್ನು ಸಭೆಯಲ್ಲಿ ಸನ್ಮಾನಿಸಲಾಯಿತು. ಶೇ.17ರ ಪರಿಹಾರ ನಿಧಿ ವಿಳಂಭವಾಗಿರುವುದನ್ನು ಪರಿಹರಿಸಿ ಕೊಡುವಲ್ಲಿ ಸಹಕರಿಸಿದ ಸಚಿವರಾದ ಬಿ.ಸುರೇಶ, ಪ್ರಿಯಾಂಕ್ ಖರ್ಗೆ, ಡಾ. ಶರಣಪ್ರಕಾಶ ಪಾಟೀಲ ಮತ್ತು ಪೌರಾಡಳಿತ ಇಲಾಖೆ ಆಯುಕ್ತರು, ನಗರಾಭಿವೃದ್ಧಿ ಇಲಾಖೆ ಕಾರ್ಯದರ್ಶಿ ಅವರನ್ನು ಅಭಿನಂದಿಸಲಾಯಿತು.

ಸಭೆಯಲ್ಲಿ ಮಂಗಳೂರು ಮಹಾನಗರ ಪಾಲಿಕೆಯ ನಿವೃತ್ತ ನೌಕರರ ಸಂಘದ ಗೌರವಾಧ್ಯಕ್ಷ ಜಗನ್ನಾಥ ಶೆಟ್ಟಿ, ಅಧ್ಯಕ್ಷ ಎ.ಪದ್ಮನಾಭ, ಪ್ರಧಾನ ಕಾರ್ಯದರ್ಶಿ ಚಿನ್ನಪ್ಪಮೂಲ್ಯ, ಜತೆ ಕಾರ್ಯದರ್ಶಿ ಶಿವಣ್ಣ ನಾಯಕ್, ಕೋಶಾಧಿಕಾರಿ ಟಿ.ರಘು ರಾಮ ಶೆಟ್ಟಿ, ರಾಜ್ಯ ಪ್ರಧಾನ ಕಾರ್ಯದರ್ಶಿ ಅಕ್ರಂ ಅಹ್ಮದ್, ಖಜಾಂಚಿ ಶಿವಾಜಿ ಜಮಾದಾರ ಪಾಲ್ಗೊಂಡಿದ್ದರು.

ರಾಮು ಮಾಯಿಪ್ಪಾಡಿ ಪ್ರಾರ್ಥಿಸಿದರು. ಕಲ್ಯಾಣಪ್ಪಬಿರಾದಾರ ವಚನ ಗಾಯನ ಮಾಡಿದರು. ಮಂಗಳೂರು ಪಾಲಿಕೆ ಕಾರ್ಯದರ್ಶಿ ಶಿವಣ್ಣ ನಾಯಕ್ ಕಾರ್ಯಕ್ರಮ ನಿರೂಪಿಸಿದರು.