ಉಪ್ಪಿನಂಗಡಿ| ಅವೈಜ್ಞಾನಿಕ ಕಾಮಗಾರಿಯಿಂದ ಅಪಘಾತ: ಪೊಲೀಸ್ ದೂರು

ಉಪ್ಪಿನಂಗಡಿ: ರಾಷ್ಟ್ರೀಯ ಹೆದ್ದಾರಿ ಚತುಷ್ಪಥ ಕಾಮಗಾರಿ ಸಂದರ್ಭ ಸರ್ವೀಸ್ ರಸ್ತೆಯನ್ನು ಸೂಕ್ತ ನಿರ್ವಹಣೆ ಮಾಡದೇ ಹೆದ್ದಾರಿಯಲ್ಲೇ ಕಾಮಗಾರಿ ನಡೆಸಿದ್ದರಿಂದ ಹೆದ್ದಾರಿಯ ಹೊಂಡಗಳಿಂದಾಗಿ ದ್ವಿಚಕ್ರ ವಾಹನವೊಂದು ಪಲ್ಟಿಯಾಗಿದ್ದು, ಈ ಬಗ್ಗೆ ದ್ವಿಚಕ್ರ ವಾಹನ ಸವಾರ ಕಾಮಗಾರಿ ಗುತ್ತಿಗೆದಾರ ಸಂಸ್ಥೆ ಕೆಎನ್‍ಆರ್ ಸಂಸ್ಥೆಯ ಪರ ಪೊಲೀಸ್ ದೂರು ನೀಡಿದ ಬೆನ್ನಲ್ಲೇ ಡಾಮರು ಹಾಕಿ ಆ ರಸ್ತೆಯ ಹೊಂಡಗುಂಡಿಗಳನ್ನು ಮುಚ್ಚುವ ಕೆಲಸ ಗುತ್ತಿಗೆದಾರ ಸಂಸ್ಥೆಯಿಂದಾಗಿದೆ.

34 ನೆಕ್ಕಿಲಾಡಿಯಲ್ಲಿರುವ ಕುಮಾರಧಾರ ನದಿಯ ಒಂದು ಸೇತುವೆಯನ್ನು ಮುಚ್ಚಿ ಅದರಲ್ಲಿ ಚತುಷ್ಪಥ ಹೆದ್ದಾರಿಯ ಕಾಮಗಾರಿ ನಡೆಯುತ್ತಿದ್ದರೆ, ಅದರ ಬಳಿಯೇ ಇರುವ ಮತ್ತೊಂದು ಸೇತುವೆಯಲ್ಲಿ ವಾಹನ ಸಂಚಾರಕ್ಕೆ ಅನುವು ಮಾಡಿ ಕೊಡಲಾಗಿತ್ತು. ವಾಹನ ಸಂಚಾರಕ್ಕೆ ಅನುವು ಮಾಡಿಕೊಟ್ಟಿರುವ ಹೆದ್ದಾರಿಯು ಹೊಂಡ-ಗುಂಡಿಗಳಿದ್ದವು. ಅಲ್ಲದೇ, ಕಾಮಗಾರಿ ನಡೆಸುವ ಸಂದರ್ಭ ಈ ರಸ್ತೆಗೆ ಮಣ್ಣು ಬಿದ್ದಿತ್ತು. ಧೂಳು ಏದ್ದೇಳಬಾರದೆಂದು ಗುತ್ತಿಗೆದಾರ ಸಂಸ್ಥೆಯು ರಸ್ತೆಗೆ ನೀರು ಹಾಕಿತ್ತು. ಇದರಿಂದಾಗಿ ರಸ್ತೆಯು ಕೆಸರಾಗಿ ಜಾರುತ್ತಿತ್ತು. ನ.25ರಂದು ರಾತ್ರಿ 34 ನೆಕ್ಕಿಲಾಡಿಯ ಅಬ್ದುಲ್ ರ್ರಹ್ಮಾನ್ ಯುನಿಕ್ ಅವರು ಅದೇ ರಸ್ತೆಯಲ್ಲಿ ದ್ವಿಚಕ್ರ ವಾಹನದಲ್ಲಿ ಬಂದಾಗ ಹೊಂಡಕ್ಕೆ ಬಿದ್ದು ಇವರ ದ್ವಿಚಕ್ರ ವಾಹನ ಪಲ್ಟಿಯಾಗಿ, ಅವರು ಗಾಯಗೊಂಡಿದ್ದರು. ಬಳಿಕ ಈ ಅಪಘಾತಕ್ಕೆ ಗುತ್ತಿಗೆದಾರ ಸಂಸ್ಥೆಯಾದ ಕೆಎನ್‍ಆರ್‍ನವರ ಅವೈಜ್ಞಾ ನಿಕ ಕಾಮಗಾರಿಯೇ ಕಾರಣ ಎಂದು ಉಪ್ಪಿನಂಗಡಿ ಪೊಲೀಸರಿಗೆ ದೂರು ನೀಡಿದ್ದರು. ಈ ಬಗ್ಗೆ ತಿಳಿದೊಡನೇ ಎಚ್ಚೆತ್ತು ಕೊಂಡ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಎಂಜಿನಿಯರ್‍ಗಳು, ಕೆಎನ್‍ಆರ್ ಸಂಸ್ಥೆಯ ಎಂಜಿನಿಯರ್‍ಗಳು ಅಧಿಕಾರಿಗಳು ಮರುದಿನವೇ ಡಾಮರು ಕಾಮಗಾರಿ ನಡೆಸಿ, ಅಲ್ಲಿರುವ ಹೊಂಡ- ಗುಂಡಿಗಳನ್ನು ಮುಚ್ಚಿದ್ದಾರೆ. ಅವರ ಮನವಿಯ ಬಳಿಕ ಅಬ್ದುರ್ರಹ್ಮಾನ್ ಪೊಲೀಸರಿಗೆ ಕೊಟ್ಟ ದೂರನ್ನು ಹಿಂಪಡೆದುಕೊಂಡಿದ್ದಾರೆ.