ದೇರಳಕಟ್ಟೆ: ಕಣಚೂರು ಆಸ್ಪತ್ರೆಯ ವೈದ್ಯರಿಂದ ಬಾಲಕನ ಯಶಸ್ವಿ ಶಸ್ತ್ರಚಿಕಿತ್ಸೆ

ಕೊಣಾಜೆ: ಯಂತ್ರಕ್ಕೆ ಸಿಲುಕಿ ಗಂಭೀರ ಗಾಯಗೊಂಡು ಎಡ ಕೈಯನ್ನು ಕಳೆದುಕೊಳ್ಳುವ ಹಂತದಲ್ಲಿದ್ದ 11 ವರ್ಷದ ಬಾಲಕನ ಕೈಯನ್ನು ದೇರಳಕಟ್ಟೆಯ ಕಣಚೂರು ಆಸ್ಪತ್ರೆ ಮತ್ತು ಸಂಶೋಧನಾ ಕೇಂದ್ರದ ನುರಿತ ವೈದ್ಯಕೀಯ ತಜ್ಞರ ತಂಡವು ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ಮಾಡಿದೆ.‌

ಈ ಕುರಿತು ಶನಿವಾರ ನಾಟೆಕಲ್ ಕಣಚೂರು ಆಸ್ಪತ್ರೆಯ ಸಭಾಂಗಣದಲ್ಲಿ ವೈದ್ಯರ ತಂಡವು ಸುದ್ಧಿಗೋಷ್ಠಿ ನಡೆಸಿ ಮಾಹಿತಿ ನೀಡಿದರು.

ಕಣಚೂರು ಆಸ್ಪತ್ರೆ ಪ್ಲಾಸ್ಟಿಕ್ ಸರ್ಜರಿ ವಿಭಾಗದ ಡಾ. ಆಸೀಫ್ ಅವರು ಈ ಬಗ್ಗೆ ಮಾಹಿತಿ ನೀಡಿ , ಚೆನ್ನರಾಯಪಟ್ಟಣದ 11ರ ಹರೆಯದ ಬಾಲಕ, ಫೆ. 26ರಂದು ಹುಲ್ಲು ಕತ್ತರಿಸುವ ಯಂತ್ರದಲ್ಲಿ ಕೈ ಸಿಲುಕಿ ಎಲುಬುಗಳು ತುಂಡಾಗಿ ಸಂಪೂರ್ಣ ಮಾಂಸಖಂಡವೂ ಜಾರಿತ್ತು. ತಕ್ಷಣವೇ ಬಾಲಕನನ್ನು ದೂರದ ಚೆನ್ನರಾಯಪಟ್ಟಣದಿಂದ ನಾಟೆಕಲ್ ನ ಕಣಚೂರು ಆಸ್ಪತ್ರೆಗೆ ಕರೆತರಲಾಗಿತ್ತು. ಕೈ ಭಾಗದಲ್ಲಿದ್ದ ಪ್ರಮುಖ ರಕ್ತನಾಳಕ್ಕೆ ಯಾವುದೇ ಗಾಯಗಳಾಗದೇ ಇದ್ದುದರಿಂದ ರಕ್ತಸ್ರಾವ ಉಂಟಾಗದೇ ಸೂಕ್ತ ಸಮಯದಲ್ಲಿಯೂ ಕಣಚೂರು ಆಸ್ಪತ್ರೆಗೆ ದಾಖಲಿಸಲಾಗಿತ್ತು.

ಮಗು ತೀವ್ರ ಗಾಯಗಳಿಂದ ತುರ್ತು ಪರಿಸ್ಥಿತಿಯಲ್ಲಿದ್ದರೂ ತಜ್ಞರು ಕೈ ಕತ್ತರಿಸುವ ಬದಲು ಅದನ್ನು ಉಳಿಸುವ ನಿರ್ಧಾರವನ್ನು ತೆಗೆದುಕೊಂಡರು. ಕುಟುಂಬಕ್ಕೆ ಮುಂದಿನ ಚಿಕಿತ್ಸೆಯ ಸವಾಲುಗಳು, ಹಂತ ಹಂತವಾಗಿ ಶಸ್ತ್ರಚಿಕಿತ್ಸೆಗಳು ನಡೆಯಬೇಕಾಗಿರುವುದು, ರಕ್ತ ವರ್ಗಾವಣೆ ಅಗತ್ಯತೆ, ಸೋಂಕು, ತ್ವರಿತ ರಕ್ತಸ್ರಾವ ಮತ್ತು ವಿಫಲತೆಯ ಭೀತಿಗಳು ಮುಂತಾದ ಎಲ್ಲಾ ಅಂಶಗಳನ್ನು ವಿವರಿಸಿ ತಿಳಿಸಿದ ನಂತರ ವೈದ್ಯಕೀಯ ತಂಡದ ಮೇಲೆ ಬಾಲಕನ ಕುಟುಂಬ ನಂಬಿಕೆಯಿಟ್ಟು ಮುಂದೆ ಸಾಗಲು ಒಪ್ಪಿಗೆ ನೀಡಿತು.

ಮೊದಲ ಹಂತದಲ್ಲಿ ಸ್ಥೂಲ ಮುರಿತ ಶಸ್ತ್ರಚಿಕಿತ್ಸೆ ನಡೆಸಲಾಯಿತು. ನಂತರ ನರವಾಹಿನಿ ಹಾಗೂ ರಕ್ತನಾಳದ ಚಿಕಿತ್ಸೆ, ಗಾಯದ ಸ್ವಚ್ಛತೆಗಾಗಿ ಡಿಬ್ರೈಡ್ಮೆಂಟ್ ಮಾಡಲಾಯಿತು. ನಿರಂತರವಾಗಿ ವ್ಯಾಕ್ಯೂಮ್ ಡ್ರೆಸಿಂಗ್‌ಗಳನ್ನು ಬಳಸಿ ಗಾಯವನ್ನು ತೊಳೆಯಲಾಗುತಿತ್ತು.

ಬಳಿಕ ಪ್ಲಾಸ್ಟಿಕ್ ಶಸ್ತ್ರಚಿಕಿತ್ಸಕರಿಂದ ಅಬ್ಡೊಮಿನೋಥೊರಾಸಿಕ್ ಫ್ಲ್ಯಾಪ್ ಶಸ್ತ್ರಚಿಕಿತ್ಸೆ ಮೂಲಕ ಜೋಡಣೆ ಮತ್ತು ಎಲುಬಿನ ಮೇಲೆ ಚರ್ಮದ ಕವಚ ನೀಡಲಾಯಿತು. 3 ವಾರಗಳ ಬಳಿಕ ಫ್ಲ್ಯಾಪ್ ಬೇರ್ಪಡಿಸಿ ಮತ್ತೆ ಚರ್ಮದ ಗ್ರಾಫ್ಟ್ ಇಡಲಾಯಿತು. 8 ವಾರಗಳೊಳಗೆ ಗಾಯ ಸಂಪೂರ್ಣ ಗುಣಮುಖವಾಗಿ ಕೈ ಉಳಿಸಲಾಯಿತು.

ಅಷ್ಟೇ ಅಲ್ಲದೆ, ಸೋಂಕು ತಡೆಯಲು ಸೂಕ್ತ ಪ್ರತಿಜೀವಿ ಚಿಕಿತ್ಸೆಗಳು, ನೋವಿನ ನಿಯಂತ್ರಣ ಮತ್ತು ಶುದ್ಧ ಪರಿಸರದ ಮೂಲಕ ಚಿಕಿತ್ಸೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲಾಯಿತು. ಮುಂದಿನ ಹಂತದಲ್ಲಿ 6-8 ತಿಂಗಳ ಒಳಗೆ ಕೈ ಮತ್ತು ಬೆರಳುಗಳ ಚಲನೆ ಪುನಃ ಸ್ಥಾಪಿಸಲು ಟೆಂಡನ್ ಟ್ರಾನ್ಸ್ಫರ್ ಶಸ್ತ್ರಚಿಕಿತ್ಸೆಗಳನ್ನು ನೆರವೇರಿಸಲಾಗುವುದು ಎಂದರು.

ಕಣಚೂರು ವೈದ್ಯ ವಿಜ್ಞಾನ ಸಂಸ್ಥೆ ಗೌರವ ಸಲಹೆಗಾರ ಡಾ. ಮೊಹಮ್ಮದ್ ಇಸ್ಮಾಯಿಲ್ ಮಾತನಾಡಿ, ಸುದೀರ್ಘ 10 ವರ್ಷಗಳನ್ನು ಪೂರೈಸುತ್ತಿರುವ ಕಣಚೂರು ಆಸ್ಪತ್ರೆಯಲ್ಲಿ ತುರ್ತು ಚಿಕಿತ್ಸಾ ವಿಭಾಗ ಪರಿಣಾಮಕಾರಿಯಾಗಿ ಕಾರ‍್ಯಾಚರಿಸುತ್ತಿದೆ. ನುರಿತ ವೈದ್ಯರ ತಂಡ ಹಾಗೂ ಅದಕ್ಕೆ ತಕ್ಕುದಾಗಿ ಬೇಕಾದ ಸಲಕರಣೆಗಳ ವ್ಯವಸ್ಥೆಯೂ ಆಸ್ಪತ್ರೆಯಲ್ಲಿದೆ. ಈಗಾಗಲೇ ಅನೇಕ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿರುವ ವೈದ್ಯರ ತಂಡ ಪ್ರಸ್ತುತ ಪ್ರಕರಣ ಇನ್ನೊಂದು ಮೈಲುಗಲ್ಲು ಸ್ಥಾಪಿಸಿದೆ ಎಂದರು.

ಯಶಸ್ವೀ ಶಸ್ತ್ರಚಿಕಿತ್ಸೆ ಕೈಗೊಂಡ ತಂಡದಲ್ಲಿ ಪ್ಲಾಸ್ಟಿಕ್ ಸರ್ಜರಿ ವಿಭಾಗದ ಡಾ.ಆಸಿಫ್, ಅನೆಸ್ತೀಷಿಯಾ ವಿಭಾಗದ ಡಾ. ಅಶ್ವಿನ್, ಡಾ.ವಿನ್ಸೆಂಟ್, ಡಾ.ಲಿಖಿತ್ ರೈ ಭಾಗವಹಿಸಿದ್ದರು.

ಸುದ್ಧಿಗೋಷ್ಠಿಯಲ್ಲಿ ವೈದ್ಯಕೀಯ ಅಧೀಕ್ಷಕರಾದ ಡಾ.ವೆಂಕಟ್ ರಾಯ ಪ್ರಭು, ವೈದ್ಯಕೀಯ ಕಾಲೇಜಿನ ಡೀನ್ ಡಾ.ಶಹನವಾಝ್ ಮಾಣಿಪ್ಪಾಡಿ, ಆಡಳಿತಾಧಿಕಾರಿ ಡಾ.ರೋಹನ್ ಮೋನಿಸ್, ಡಾ.ಹರೀಶ್ ಶೆಟ್ಟಿ, ಡಾ. ಅಶ್ವಿನ್, ಡಾ.ಹರಣ್ ಮಿತ್ತಲ್ ಮೊದಲಾದವರು ಉಪಸ್ಥಿತರಿದ್ದರು.