ಕಪೋತಾಸನ ಭಂಗಿ| ಇಂಡಿಯಾ ಬುಕ್ ಆಫ್ ರೆಕಾರ್ಡ್, ವರ್ಲ್ಡ್ ವೈಡ್ ಬುಕ್ ಆಫ್ ರೆಕಾರ್ಡ್ನಲ್ಲಿ ಬಾಲಕಿಯ ದಾಖಲೆ
ಮಂಗಳೂರು, ಜೂ.20: ನಗರದ ಫಳ್ನೀರ್ನ ಸೈಂಟ್ ಮೇರಿಸ್ ವಿದ್ಯಾ ಸಂಸ್ಥೆಯ 2ನೆ ತರಗತಿಯ ವಿದ್ಯಾರ್ಥಿನಿ (8 ವರ್ಷ) ಶರಣ್ಯ ಶರತ್ ಯೋಗಾಸನದ ಕಪೋತಾಸನದ ಭಂಗಿಯಲ್ಲಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ವರ್ಲ್ಡ್ ವೈಡ್ ಬುಕ್ ಆಫ್ ರೆಕಾರ್ಡ್ನಲ್ಲಿ ದಾಖಲೆ ನಿರ್ಮಿಸಿದ್ದಾರೆ.
ನಗರದ ಪ್ರೆಸ್ಕ್ಲಬ್ನಲ್ಲಿ ಶುಕ್ರವಾರ ಸುದ್ದಿಗೋಷ್ಟಿಯಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ ಹವ್ಯಾಸಿ ಈಜುಗಾರ ಎ. ಚಂದ್ರಹಾಸ ಶೆಟ್ಟಿ, ಶರಣ್ಯ ಶರತ್ರವರು ತಮ್ಮ ಸಾಧನೆಯ ಮೂಲಕ ಸದ್ಯ ತಮಿಳುನಾಡಿನ ಹರಿಣಿತ ಬಿ.ಎಸ್. ಅವರ ಹೆಸರಿನಲ್ಲಿ ಇದ್ದ 15 ನಿಮಿಷಗಳ ಕಪೋತಾಸನದ ದಾಖಲೆ ಮುರಿದು ಒಂದು ಗಂಟೆ ಎರಡು ನಿಮಿಷದ ಅವಧಿಗೆ ಕಪೋತಾಸನದ ಹೊಸ ದಾಖಲೆ ತನ್ನದಾಗಿಸಿಕೊಂಡಿದ್ದಾರೆ ಎಂದರು.
ಅಂತಾರಾಷ್ಟ್ರೀಯ ಯೋಗ ಪಟು ಕವಿತಾ ಅಶೋಕ್ರವರು ಶರಣ್ಯಗೆ ತರಬೇತಿ ನೀಡುತ್ತಿದ್ದಾರೆ. ಮಂಗಳೂರು ಮಹಾನಗರ ಪಾಲಿಕೆಯ ಈಜುಕೊಳದ ವ್ಯವಸ್ಥಾಪಕ ರಮೇಶ್ ಬಿಜೈ ಮತ್ತು ಈಜುಗಾರ ಚಂದ್ರಶೇಖರ್ ಸೂರಿಕುಮೇರ್ ಅವರೂ ಬಾಲಕಿಯ ಸಾಧನೆಗೆ ಬೆನ್ನೆಲುಬಾಗಿ ಸಹಕರಿಸುತ್ತಿದ್ದಾರೆ ಎಂದರು.
ಶಾಲೆಯ ಪ್ರಾಂಶುಪಾಲರಾದ ಸಿಸ್ಟರ್ ಮೇಝಿ ಎ.ಸಿ.ಯವರು ಮಾತನಾಡಿ, ನಮ್ಮ ಶಾಲೆಯ ವಿದ್ಯಾರ್ಥಿನಿಯ ಸಾಧನೆಯು ಶಾಲೆಗೂ ಹೆಸರು ತಂದಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಗೋಷ್ಟಿಯಲ್ಲಿ ಸೈಂಟ್ ಮೇರಿಸ್ ವಿದ್ಯಾಸಂಸ್ತೆಯ ಉಪ ಪ್ರಾಂಶುಪಾಲೆ ಸಿ. ಸಂತೋಷ್ ಮೇರಿ, ಸೋನಿಯಾ ಜೆ., ಬಾಲಕಿ ಶರಣ್ಯ ಶರತ್, ಯೋಗ ಶಿಕ್ಷಕಿ ಕವಿತಾ ಅಶೋಕ್ ಉಪಸ್ಥಿತರಿದ್ದರು.
