ನೀಟ್ ಯುಜಿ ಪರೀಕ್ಷೆಯಲ್ಲಿ ಸಾಮೂಹಿಕ ಅಕ್ರಮ ನಡೆದಿಲ್ಲ ಎನ್ನುವುದು ವಿಶ್ಲೇಷಣೆಯಿಂದ ದೃಢ: ಸುಪ್ರೀಂಕೋರ್ಟ್ಗೆ ತಿಳಿಸಿದ ಕೇಂದ್ರ
ನೀಟ್ ಅಕ್ರಮ ವಿರೋಧಿಸಿ ವಿದ್ಯಾರ್ಥಿಗಳಿಂದ ಪ್ರತಿಭಟನೆ (PTI)
ಹೊಸದಿಲ್ಲಿ: ನೀಟ್ ಯುಜಿ ಪರೀಕ್ಷೆಯಲ್ಲಿ ಸಾಮೂಹಿಕ ಅಕ್ರಮ ನಡೆದಿಲ್ಲ ಅಥವಾ ಸ್ಥಳೀಯ ಅಭ್ಯರ್ಥಿಗಳು ಅಸಹಜವಾಗಿ ಹೆಚ್ಚಿನ ಅಂಕಗಳನ್ನು ಪಡೆದಿಲ್ಲ ಎನ್ನುವ ಅಂಶ ಫಲಿತಾಂಶದ ಬಗ್ಗೆ ಮದ್ರಾಸ್ ಐಐಟಿ ನಡೆಸಿದ ಡಾಟಾ ಅನಾಲಿಸ್ಟಿಕ್ಸ್ ನಿಂದ ದೃಢಪಟ್ಟಿದೆ ಎಂದು ಕೇಂದ್ರ ಸರ್ಕಾರ ಸುಪ್ರೀಂಕೋರ್ಟ್ಗೆ ಬುಧವಾರ ತಿಳಿಸಿದೆ.
ಶಂಕಿತ ಪ್ರಕರಣಗಳನ್ನು ಗುರುತಿಸಲು ಮತ್ತು ಕಳಂಕಿತ ವಿದ್ಯಾರ್ಥಿಗಳನ್ನು ಕಳಂಕರಹಿತ ವಿದ್ಯಾರ್ಥಿಗಳಿಂದ ಬೇರ್ಪಡಿಸಲು ಡಾಟಾ ಅನಾಲಿಸ್ಟಿಕ್ಸ್ ಬಳಸಿಕೊಳ್ಳುವುದು ಕಾರ್ಯಸಾಧುವೇ ಎನ್ನುವುದನ್ನು ಸೋಮವಾರ ಕೋರ್ಟ್ ಕೇಳಿತ್ತು.
ಇದಕ್ಕೆ ಅಫಿಡವಿಟ್ನಲ್ಲಿ ಪ್ರತಿಕ್ರಿಯಿಸಿರುವ ಉನ್ನತ ಶಿಕ್ಷಣ ಇಲಾಖೆ, ಡಾಟಾ ಅನಾಲಿಸ್ಟಿಕ್ಸ್ ನಡೆಸುವಂತೆ ಮದ್ರಾಸ್ ಐಐಟಿಗೆ ಕೇಳಿಕೊಂಡಿತ್ತು ಎಂದು ಸ್ಪಷ್ಟಪಡಿಸಿದೆ.
ನೀಟ್-ಯುಜಿ 2024ರ ಪರೀಕ್ಷೆಗೆ ಸಂಬಂಧಿಸಿದ ದತ್ತಾಂಶವನ್ನು ವಿಸ್ತೃತವಾಗಿ ತಾಂತ್ರಿಕ ಮೌಲ್ಯಮಾಪನವನ್ನು ಐಐಟಿ-ಮದ್ರಾಸ್ ಮೂಲಕ ನಡೆಸಲಾಗಿದೆ. ಅಂಕಗಳ ಹಂಚಿಕೆ, ನಗರವಾರು ಮತ್ತು ಕೇಂದ್ರವಾರು ರ್ಯಾಂಕ್ ಹಂಚಿಕೆ ಮತ್ತು ವಿವಿಧೆಡೆಯ ಅಭ್ಯರ್ಥಿಗಳ ಅಂಕಗಳ ಶ್ರೇಣಿಯಂಥ ಮಾನದಂಡಗಳ ಆಧಾರದಲ್ಲಿ ವಿಶ್ಲೇಷಣೆ ನಡೆಸಲಾಗಿದೆ ಎಂದು ಸ್ಪಷ್ಟಪಡಿಸಲಾಗಿದೆ.
ಅಧ್ಯಯನ ನಡೆಸಿದ ಐಐಟಿ, ಯಾವುದೇ ಅಹಸಜತೆಗಳು ಕಂಡುಬಂದಿಲ್ಲ ಎಂಬ ಅಭಿಪ್ರಾಯಕ್ಕೆ ಬಂದಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಒಟ್ಟಾರೆಯಾಗಿ 550 ರಿಂದ 720 ಅಂಕಗಳನ್ನು ಪಡೆದ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿ ಗಣನೀಯ ಹೆಚ್ಚಳವಾಗಿದೆ. ಎಲ್ಲ ಕೇಂದ್ರ ಮತ್ತು ನಗರಗಳಲ್ಲಿ ಈ ಹೆಚ್ಚಳ ಕಂಡುಬಂದಿದೆ. ಶೇಕಡ 25ರಷ್ಟು ಪಠ್ಯಕ್ರಮವನ್ನು ಕಡಿತಗೊಳಿಸಿದ್ದು ಕೂಡಾ ಇದಕ್ಕೆ ಕಾರಣ ಎಂದು ಅಭಿಪ್ರಾಯಪಟ್ಟಿದೆ.