ಅರವಿಂದ್ ಕೇಜ್ರಿವಾಲ್ ಗಿಂತ ಅತಿಶಿ ಸಾವಿರ ಪಾಲು ಉತ್ತಮ ಸಿಎಂ ಎಂದು ಶ್ಲಾ ಘಿಸಿದ ದಿಲ್ಲಿ ಲೆಫ್ಟಿನೆಂಟ್ ಗವರ್ನರ್!

ಹೊಸದಿಲ್ಲಿ: ದಿಲ್ಲಿ ಮುಖ್ಯಮಂತ್ರಿ ಅತಿಶಿಯನ್ನು ಅಪರೂಪಕ್ಕೆ ಶ್ಲಾ ಘಿಸಿರುವ ದಿಲ್ಲಿ ಲೆಫ್ಟಿನೆಂಟ್ ಗವರ್ನರ್ ವಿ.ಕೆ.ಸಕ್ಸೇನಾ, “ತಮ್ಮ ನಿಕಟವರ್ತಿ ಅರವಿಂದ್ ಕೇಜ್ರಿವಾಲ್ ಗಿಂತ ಅತಿಶಿ ಸಾವಿರ ಪಾಲು ಉತ್ತಮ ಮುಖ್ಯಮಂತ್ರಿ” ಎಂದು ಶುಕ್ರವಾರ ಹೇಳಿದರು.

ಇಲ್ಲಿ ನಡೆದ ಇಂದಿರಾ ಗಾಂಧಿ ದಿಲ್ಲಿ ಮಹಿಳಾ ತಾಂತ್ರಿಕ ವಿಶ್ವವಿದ್ಯಾಲಯದ ಏಳನೆ ಘಟಿಕೋತ್ಸವದಲ್ಲಿ ಪಾಲ್ಗೊಂಡು ಮಾತನಾಡಿದ ಸಕ್ಸೇನಾ, “ಈಗಿನ ದಿಲ್ಲಿ ಮುಖ್ಯಮಂತ್ರಿ ಅತಿಶಿ ಓರ್ವ ಮಹಿಳೆ ಎಂಬ ಕುರಿತು ನನಗೆ ಸಂತಸವಾಗಿದ್ದು, ಅವರು ತಮ್ಮ ನಿಕಟವರ್ತಿಗಿಂತ ಸಾವಿರ ಪಾಲು ಉತ್ತಮ ಮುಖ್ಯಮಂತ್ರಿಯಾಗಿದ್ದಾರೆ” ಎಂದು ಪ್ರಶಂಸಿಸಿದರು.

ಘಟಿಕೋತ್ಸವದಲ್ಲಿ ಉಪಸ್ಥಿತರಿದ್ದ ಅತಿಶಿಯತ್ತ ಒಮ್ಮೆ ಕಣ್ಣು ಹಾಯಿಸಿ ಅವರು ಈ ಹೇಳಿಕೆ ನೀಡಿದರು.

ಘಟಿಕೋತ್ಸವದಲ್ಲಿ ವಿದ್ಯಾರ್ಥಿಗಳನ್ನುದ್ದೇಶಿಸಿ ಮಾತನಾಡಿದ ಸಕ್ಸೇನಾ, “ನೀವು ಮುಂದುವರಿದಂತೆ, ನಿಮ್ಮನ್ನು ಮುನ್ನಡೆಸುವ ನಾಲ್ಕು ಮಾರ್ಗದರ್ಶಿ ಸೂತ್ರಗಳಿರುತ್ತವೆ. ಮೊದಲನೆಯದು, ನಿಮ್ಮ ಕಡೆಗಿನ ನಿಮ್ಮ ಜವಾಬ್ದಾರಿ, ಎರಡನೆಯದು, ನಿಮ್ಮ ಪೋಷಕರು ಹಾಗೂ ಕುಟುಂಬ, ಮೂರನೆಯದು, ಸಮಾಜ ಮತ್ತು ರಾಷ್ಟ್ರ ನಿರ್ಮಾಣದೆಡೆಗಿನ ಹೊಣೆಗಾರಿಕೆ. ಲಿಂಗ ತಾರತಮ್ಯದ ಗೋಡೆಯನ್ನು ಒಡೆದು ಹಾಕಿ, ಎಲ್ಲ ಕ್ಷೇತ್ರಗಳಲ್ಲೂ ಇನ್ನಿತರರೊಂದಿಗೆ ಸಮನಾಗಿ ನಿಲ್ಲುವ ಮಹಿಳೆಯಾಗುವುದು ನಿಮ್ಮ ನಾಲ್ಕನೆ ಜವಾಬ್ದಾರಿ” ಎಂದು ಕಿವಿಮಾತು ಹೇಳಿದರು.

ಸೆಪ್ಟೆಂಬರ್ ತಿಂಗಳಲ್ಲಿ ಕೇಜ್ರಿವಾಲ್ ತಮ್ಮ ಹುದ್ದೆಗೆ ರಾಜೀನಾಮೆ ಸಲ್ಲಿಸಿದ ನಂತರ, ಆಡಳಿತ ಮತ್ತು ಅಧಿಕಾರಶಾಹಿಯ ನಿಯಂತ್ರಣ ಸೇರಿದಂತೆ ವಿವಿಧ ವಿಷಯಗಳ ಕುರಿತು ಆಪ್ ಮತ್ತು ಬಿಜೆಪಿ ನಡುವೆ ಹಗ್ಗ ಜಗ್ಗಾಟ ನಡೆಯುತ್ತಿದೆ.

ತಮ್ಮ ವಿರುದ್ಧ ಭ್ರಷ್ಟಾಚಾರದ ಆರೋಪ ಕೇಳಿ ಬಂದ ಹಿನ್ನೆಲೆಯಲ್ಲಿ, ಸಾರ್ವಜನಿಕರಿಂದ ನಾನು ಪ್ರಾಮಾಣಿಕತೆಯ ಪ್ರಮಾಣ ಪತ್ರ ಪಡೆಯಲು ಬಯಸುತ್ತೇನೆ ಎಂದು ರಾಜೀನಾಮೆ ಸಲ್ಲಿಕೆಯ ಸಂದರ್ಭದಲ್ಲಿ ಅರವಿಂದ್ ಕೇಜ್ರಿವಾಲ್ ಹೇಳಿದ್ದರು.