ದುಬೈನಿಂದ ಭಾರತೀಯರು ಕಾನೂನುಬದ್ಧವಾಗಿ ಎಷ್ಟು ಚಿನ್ನವನ್ನು ತರಬಹುದು?; ಇಲ್ಲಿದೆ ಮಾಹಿತಿ...

ಹೊಸದಿಲ್ಲಿ: ಭಾರತೀಯರು ಸಾಮಾನ್ಯವಾಗಿ ದುಬೈಯಲ್ಲಿ ಚಿನ್ನವನ್ನು ಖರೀದಿಸಿ ಭಾರತಕ್ಕೆ ತರುತ್ತಾರೆ, ಏಕೆಂದರೆ ಅಲ್ಲಿ ಭಾರತಕ್ಕಿಂತ ಕಡಿಮೆ ವೆಚ್ಚವಾಗುತ್ತದೆ. ಚಿನ್ನವನ್ನು ಯಾವಾಗಲೂ ಸುರಕ್ಷಿತ ಹೂಡಿಕೆಯಾಗಿ ಭಾರತೀಯರು ನೋಡುತ್ತಾರೆ. ಭಾರತೀಯರು ವಿವಾಹ, ಅಲಂಕಾರ ಸೇರಿ ನಾನಾ ಕಾರಣಗಳಿಗೆ ಚಿನ್ನವನ್ನು ಖರೀದಿಸುತ್ತಾರೆ. ತುಲನಾತ್ಮಕವಾಗಿ ಭಾರತದಲ್ಲಿ ಚಿನ್ನವು ಹೆಚ್ಚಿನ ಬೇಡಿಕೆಯನ್ನು ಹೊಂದಿದೆ.

ದುಬೈನಿಂದ ಭಾರತೀಯರು ಕಾನೂನುಬದ್ಧವಾಗಿ ಎಷ್ಟು ಚಿನ್ನವನ್ನು ತರಬಹುದು?

ಭಾರತೀಯ ಪ್ರಯಾಣಿಕರು ಸುಂಕವನ್ನು ಪಾವತಿಸಿದ ನಂತರ ದುಬೈನಿಂದ ಲಗೇಜ್‌ಗಳಲ್ಲಿ 1 ಕೆಜಿಯಷ್ಟು ಚಿನ್ನವನ್ನು ನಾಣ್ಯಗಳು ಮತ್ತು ಗಟ್ಟಿಗಳ ರೂಪದಲ್ಲಿ ಭಾರತಕ್ಕೆ ತರಬಹುದು. ಆದರೆ, ಅವರು ಆರು ತಿಂಗಳಿಗಿಂತ ಹೆಚ್ಚು ಕಾಲ ದುಬೈನಲ್ಲಿ ವಾಸ್ತವವಿರಬೇಕು ಎಂದು ಕೇಂದ್ರೀಯ ಪರೋಕ್ಷ ತೆರಿಗೆಗಳು ಮತ್ತು ಕಸ್ಟಮ್ಸ್ ಮಂಡಳಿಯ ನಿಯಮಾವಳಿಗಳು ಹೇಳುತ್ತದೆ.

ಅನುಮತಿಸಲಾದ ಮಿತಿಗಿಂತ ಹೆಚ್ಚಿನ ಚಿನ್ನವನ್ನು ಸಾಗಿಸುವ ಭಾರತೀಯರು ಕಸ್ಟಮ್ಸ್ ಅಥವಾ ಇತರ ಸುಂಕಗಳಿಗೆ ಹೊಣೆಗಾರರಾಗಿರುತ್ತಾರೆ. ಅನುಮತಿಸಲಾದ ಮಿತಿಗಿಂತ ಹೆಚ್ಚಿನ ಚಿನ್ನವನ್ನು ಸಾಗಿಸುವ ಭಾರತೀಯರು ತಮ್ಮ ʼಡ್ಯೂಟಿಯಬಲ್ʼ ಚಿನ್ನವನ್ನು ಘೋಷಿಸಬೇಕು ಮತ್ತು ʼರೆಡ್ ಚಾನಲ್ʼ ಅನ್ನು ನಮೂದಿಸಬೇಕು.

ಸುಂಕ- ಮುಕ್ತ ಚಿನ್ನದ ಮಿತಿ ಏನು?

ಪುರುಷರಿಗೆ ದುಬೈನಿಂದ ಭಾರತಕ್ಕೆ 20 ಗ್ರಾಂ ಚಿನ್ನವನ್ನು ತರಲು ಅನುಮತಿ ಇದೆ. ಕಸ್ಟಮ್ಸ್ ಸುಂಕವನ್ನು ಪಾವತಿಸದೆ ದುಬೈನಿಂದ ಭಾರತಕ್ಕೆ ಗಟ್ಟಿಗಳು ಮತ್ತು ನಾಣ್ಯಗಳಾಗಿ 50,000ಕ್ಕಿಂತ ಕಡಿಮೆ ಮೌಲ್ಯದ ಚಿನ್ನಾಭರಣವನ್ನು ತರಬಹುದು.

ಮಹಿಳೆಯರು 40 ಗ್ರಾಂ ಚಿನ್ನವನ್ನು ತರಬಹುದು. ಆದರೆ, ಯಾವುದೇ ಕಸ್ಟಮ್ಸ್ ಸುಂಕವಿಲ್ಲದೆ 1 ಲಕ್ಷಕ್ಕಿಂತ ಕಡಿಮೆ ಮೌಲ್ಯದ ಚಿನ್ನಾಭರಣ, ಗಟ್ಟಿಗಳು, ನಾಣ್ಯಗಳನ್ನು ದುಬೈನಿಂದ ಭಾರತಕ್ಕೆ ತರಬಹುದು.

15 ವರ್ಷದೊಳಗಿನ ಮಕ್ಕಳು ದುಬೈನಿಂದ ಭಾರತಕ್ಕೆ ಆಭರಣಗಳು ಅಥವಾ ಉಡುಗೊರೆಗಳ ರೂಪದಲ್ಲಿ 40 ಗ್ರಾಂಗಿಂತ ಕಡಿಮೆ ಚಿನ್ನವನ್ನು ತರಬಹುದು. ಆದರೆ, ಅವರು ಜೊತೆಯಲ್ಲಿರುವ ವಯಸ್ಕರೊಂದಿಗೆ ತಮ್ಮ ಸಂಬಂಧದ ಗುರುತಿನ ಪುರಾವೆಗಳನ್ನು ಹೊಂದಿರಬೇಕು. ಕಸ್ಟಮ್ಸ್ ಅಧಿಕಾರಿಗಳು ಪರಿಶೀಲಿಸುವಾಗ ಅಂತಹ ಪ್ರಯಾಣಿಕರು ಚಿನ್ನದ ಬಗ್ಗೆ ಸರಿಯಾದ ದಾಖಲೆಗಳನ್ನು ಹೊಂದಿರಬೇಕು.

ಚಿನ್ನ ನಿಗದಿತ ಮಿತಿಗಿಂತ ಅಧಿಕವಿದ್ದರೆ ಪಾವತಿಸಬೇಕಾದ ಕಸ್ಟಮ್ಸ್ ಸುಂಕ :

ಪುರುಷರಿಗೆ 20-50 ಗ್ರಾಂ ಚಿನ್ನಕ್ಕೆ 3% ಕಸ್ಟಮ್ಸ್ ಸುಂಕ ಅನ್ವಯಿಸುತ್ತದೆ, 50-100 ಗ್ರಾಂ ನಡುವಿನ ಚಿನ್ನಕ್ಕೆ 6% ಸುಂಕ ಅನ್ವಯಿಸುತ್ತದೆ ಮತ್ತು 100 ಗ್ರಾಂ ಮೀರಿದರೆ 10% ಸುಂಕ ಅನ್ವಯಿಸುತ್ತದೆ.

ಮಹಿಳೆಯರು ಮತ್ತು ಮಕ್ಕಳಿಗೆ 40-100 ಗ್ರಾಂ ನಡುವಿನ ಚಿನ್ನಕ್ಕೆ 3% ಸುಂಕ ಅನ್ವಯಿಸುತ್ತದೆ, 100-200 ಗ್ರಾಂಗಳಿಗೆ 6% ಮತ್ತು 200 ಗ್ರಾಂ ಮೀರಿದರೆ 10% ದರವು ಅನ್ವಯಿಸುತ್ತದೆ.