ಅದಾನಿ, ಸಂಭಲ್, ಮಣಿಪುರ ಕುರಿತು ಪ್ರತಿಪಕ್ಷಗಳ ಪ್ರತಿಭಟನೆ ; ಸಂಸತ್ತು ಮತ್ತೆ ಮುಂದೂಡಿಕೆ

ಹೊಸದಿಲ್ಲಿ : ವಿವಿಧ ವಿಷಯಗಳ ಕುರಿತು ಪ್ರತಿಪಕ್ಷಗಳು ಮತ್ತು ಆಡಳಿತ ಪಕ್ಷದ ಪ್ರತಿಭಟನೆಗಳ ನಡುವೆ ಸೋಮವಾರ ಸಂಸತ್ತಿನ ಉಭಯ ಸದನಗಳನ್ನು ದಿನದ ಮಟ್ಟಿಗೆ ಮುಂದೂಡಲಾಗಿದೆ.

ಬೆಳಿಗ್ಗೆ ಲೋಕಸಭೆಯ ಕಲಾಪಗಳು ಆರಂಭಗೊಂಡ ಬಳಿಕ ಪ್ರಶ್ನೆವೇಳೆಯಲ್ಲಿ ಪ್ರತಿಪಕ್ಷ ಸದಸ್ಯರು ವಿವಿಧ ವಿಷಯಗಳನ್ನೆತ್ತಿದ್ದರು. ಇದನ್ನು ಆಕ್ಷೇಪಿಸಿದ ಸ್ಪೀಕರ್ ಓಂ ಬಿರ್ಲಾ ಅವರು ಕಲಾಪಗಳನ್ನು ಮಧ್ಯಾಹ್ನದವರೆಗೆ ಮುಂದೂಡಿದರು.

ಮಧ್ಯಾಹ್ನ 12 ಗಂಟೆಗೆ ಸದನವು ಮರುಸಮಾವೇಶಗೊಂಡಾಗ ಪ್ರತಿಪಕ್ಷ ಸದಸ್ಯರು ‘ನಮಗೆ ನ್ಯಾಯ ಬೇಕು ’ಎಂಬ ಘೋಷಣೆಗಳನ್ನು ಕೂಗತೊಡಗಿದ್ದರು. ಗದ್ದಲ,ಕೋಲಾಹಲದಿಂದಾಗಿ ಸದನವನ್ನು ಅಪರಾಹ್ನ ಮೂರು ಗಂಟೆಯವರೆಗೆ ಮತ್ತು ನಂತರ ದಿನದ ಮಟ್ಟಿಗೆ ಮುಂದೂಡಲಾಯಿತು.

ಮಣಿಪುರ ಹಿಂಸಾಚಾರ,ಅದಾನಿ ಲಂಚ ಆರೋಪ ಮತ್ತು ಸಂಭಲ್ ಹಿಂಸಾಚಾರದಂತಹ ವಿಷಯಗಳ ಮೇಲೆ ಚರ್ಚೆಗೆ ಆಗ್ರಹಿಸಿ ವಿಪಕ್ಷ ನಾಯಕ ರಾಹುಲ್ ಗಾಂಧಿ,ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಸೇರಿದಂತೆ ಪ್ರತಿಪಕ್ಷಗಳ ನಾಯಕರು ಸಂಸತ್ತಿನ ಮಕರದ್ವಾರದ ಮೆಟ್ಟಲುಗಳ ಮುಂದೆಯೂ ಪ್ರತಿಭಟನೆ ನಡೆಸಿ,‘ಮೋದಿ,ಅದಾನಿ ಏಕ್ ಹೈ’ ಮತ್ತು ‘ನಮಗೆ ನ್ಯಾಯ ಬೇಕು’ ಘೋಷಣೆಗಳನ್ನು ಕೂಗಿದರು.

ಗಮನಾರ್ಹವಾಗಿ ಟಿಎಂಸಿ ಮತ್ತು ಸಮಾಜವಾದಿ ಪಾರ್ಟಿ ಸಂಸದರು ಪ್ರತಿಭಟನೆಯಲ್ಲಿ ಭಾಗಿಯಾಗಿರಲಿಲ್ಲ.

ಪ್ರತಿಪಕ್ಷಗಳು ಸಂಸತ್ತಿನ ಕಾರ್ಯ ನಿರ್ವಹಣೆಗೆ ಅಡ್ಡಿಯನ್ನುಂಟು ಮಾಡಲು ಪ್ರಯತ್ನಿಸುತ್ತಿಲ್ಲ ಎಂದು ಸುದ್ದಿಸಂಸ್ಥೆಗೆ ಸ್ಪಷ್ಟಪಡಿಸಿದ ಕಾಂಗ್ರೆಸ್ ಸಂಸದ ಕಿರಣಕುಮಾರ ಚಮಲಾ ಅವರು,‘ನಾವು ಅದಾನಿ,ಸಂಭಲ್ ಹಿಂಸಾಚಾರ ಮತ್ತು ಮಣಿಪುರ ವಿಷಯಗಳ ಚರ್ಚೆಗಾಗಿ ಕೇಳುತ್ತಿದ್ದೇವೆ. ಅದಾನಿ ವಿಷಯದಲ್ಲಿ ಸರಕಾರವೆಂದಿಗೂ ಚರ್ಚೆಯನ್ನು ನಡೆಸುವುದಿಲ್ಲ. ನಾವು ಸದನದ ಕಲಾಪಗಳಿಗೆ ಅಡ್ಡಿಯನ್ನುಂಟು ಮಾಡುತ್ತಿದ್ದೇವೆ ಎಂದು ಅವರು ಅಪಪ್ರಚಾರ ಮಾಡುತ್ತಿದ್ದಾರೆ. ಸದನವು ಕಾರ್ಯ ನಿರ್ವಹಿಸುವುದನ್ನು ಬಿಜೆಪಿಯೇ ಬಯಸುತ್ತಿಲ್ಲ’ ಎಂದು ಹೇಳಿದರು.

ಅತ್ತ ರಾಜ್ಯಸಭೆಯಲ್ಲಿ ಕಾಂಗ್ರೆಸ್‌ನ ಉನ್ನತ ನಾಯಕರು ದೇಶವನ್ನು ಅಸ್ಥಿರಗೊಳಿಸಲು ಅಮೆರಿಕದ ಬಿಲಿಯಾಧೀಶ ಹೂಡಿಕೆದಾರ ಜಾರ್ಜ್ ಸೊರೊಸ್ ಜೊತೆ ಕೈಜೋಡಿಸಿದ್ದಾರೆ ಎಂದು ಆರೋಪಿಸಿ ಆಡಳಿತ ಪಕ್ಷದ ಸಂಸದರು,ಈ ವಿಷಯದಲ್ಲಿ ಚರ್ಚೆಗೆ ಆಗ್ರಹಿಸಿ ಪ್ರತಿಭಟನೆ ನಡೆಸಿದರು. ಕೋಲಾಹಲ,ಗದ್ದಲದ ನಡುವೆ ಸಭಾಪತಿ ಜಗದೀಪ ಧನ್ಕರ್ ಅವರು ಭೋಜನ ವಿರಾಮಕ್ಕೆ ಮುನ್ನ ಎರಡು ಬಾರಿ,ನಂತರ ದಿನದ ಮಟ್ಟಿಗೆ ಸದನವನ್ನು ಮುಂದೂಡಿದರು.

ಫೋರಮ್ ಆಫ್ ಡೆಮಾಕ್ರಟಿಕ್ ಲೀಡರ್ಸ್‌ ಇನ್ ದಿ ಏಶ್ಯಾ-ಫೆಸಿಪಿಕ್(ಎಫ್‌ಡಿಎಲ್-ಎಪಿ) ಮತ್ತು ಸೊರೊಸ್ ನಡುವಿನ ಸಂಬಂಧವು ಕಳವಳದ ವಿಷಯವಾಗಿದೆ. ಫೋರಮ್‌ನ ಸಹ ಅಧ್ಯಕ್ಷೆ ಸೋನಿಯಾ ಗಾಂಧಿ ಈ ಸದನದ ಸದಸ್ಯೆಯಾಗಿದ್ದಾರೆ. ಎಫ್‌ಡಿಎಲ್-ಎಪಿ ಜಮ್ಮುಕಾಶ್ಮೀರವನ್ನು ಪ್ರತ್ಯೇಕ ಘಟಕವನ್ನಾಗಿ ಪರಿಗಣಿಸಿದೆ ಮತ್ತು ರಾಜೀವ ಗಾಂಧಿ ಪ್ರತಿಷ್ಠಾನದಿಂದ ಹಣಕಾಸು ಬೆಂಬಲ ಪಡೆಯುತ್ತಿದೆ ಎಂದು ಸದನ ನಾಯಕ ಜೆ.ಪಿ.ನಡ್ಡಾ ಆರೋಪಿಸಿದರು.

ಇದು ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ವಿಚಾರವಾಗಿರುವುದರಿಂದ ಈ ಕುರಿತು ಸದನದಲ್ಲಿ ಚರ್ಚೆ ನಡೆಯಬೇಕು ಎಂದು ಆಡಳಿತ ಪಕ್ಷದ ಸದಸ್ಯರು ಆಗ್ರಹಿಸಿದರು.

ಇದಕ್ಕೆ ಪ್ರತಿಕ್ರಿಯಿಸಿದ ಕಾಂಗ್ರೆಸ್ ಸದಸ್ಯರು,ಇದು ಅದಾನಿ ವಿಷಯದಿಂದ ಗಮನವನ್ನು ಬೇರೆಡೆಗೆ ಸೆಳೆಯಲು ಆಡಳಿತ ಪಕ್ಷದ ತಂತ್ರವಾಗಿದೆ ಎಂದು ಪ್ರತಿಪಾದಿಸಿದರು.

ಇಂತಹ ವಿಷಯಗಳನ್ನು ಪ್ರಸ್ತಾಪಿಸುವುದು ಮತ್ತು ಸದನದಲ್ಲಿ ಉಪಸ್ಥಿತರಿಲ್ಲದ ಸದಸ್ಯರ ವರ್ಚಸ್ಸಿಗೆ ಹಾನಿಯನ್ನುಂಟು ಮಾಡುವುದು ತಪ್ಪು ಎಂದು ಪ್ರತಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆ ಹೇಳಿದರು.

ಆಡಳಿತ ಪಕ್ಷದ ಸಂಸದರು ಅದಾನಿ ಬೆನ್ನಿಗೆ ನಿಂತಿದ್ದಾರೆ ಮತ್ತು ಅವರಿಗಾಗಿ ಸದನದ ಕಲಾಪಗಳಿಗೆ ಅಡ್ಡಿಯನ್ನುಂಟು ಮಾಡುತ್ತಿದ್ದಾರೆ ಎಂದು ಕಾಂಗ್ರೆಸ್ ಸದಸ್ಯ ಪ್ರಮೋದ್ ತಿವಾರಿ ಆರೋಪಿಸಿದರು.

ಪ್ರತಿಪಕ್ಷ ಮತ್ತು ಆಡಳಿತ ಪಕ್ಷಗಳ ಸಂಸದರ ಆರೋಪ-ಪ್ರತ್ಯಾರೋಪಗಳಿಂದ ಸದನದಲ್ಲಿ ಕೋಲಾಹಲದ ನಡುವೆ ಸಭಾಪತಿ ಅಂತಿಮವಾಗಿ ಸದನವನ್ನು ದಿನದ ಮಟ್ಟಿಗೆ ಮುಂದೂಡಿದರು.