ಏರಿಕೆಯಾಗುತ್ತಿರುವ ‘ಮನೆಯಲ್ಲೇ ಕುಳಿತು ಕೆಲಸ ಮಾಡಿ’ ಹಗರಣ; ಎಚ್ಚರಿಕೆ ನೀಡಿದ ಕೇಂದ್ರ

ಹೊಸದಿಲ್ಲಿ: ಸಂಘಟಿತ ಹೂಡಿಕೆ ಹಾಗೂ ಗುರಿ ನಿಗದಿತ ಅರೆಕಾಲೀನ ಉದ್ಯೋಗ ವಂಚನೆಯಲ್ಲಿ ಭಾಗಿಯಾಗಿದ್ದ 100 ಅಂತರ್ಜಾಲ ತಾಣಗಳನ್ನು ನಿಷೇಧಿಸಲಾಗಿದೆ ಎಂದು ಬುಧವಾರ ಕೇಂದ್ರ ಸರ್ಕಾರ ಹೇಳಿದೆ. ಈ ಅಂತರ್ಜಾಲ ತಾಣಗಳು ಸಂಘಟಿತ ಅಕ್ರಮ ಹೂಡಿಕೆ ಸಂಬಂಧಿ ಆರ್ಥಿಕ ಅಪರಾಧ ಕೃತ್ಯಗಳಲ್ಲಿ ತೊಡಗಿದ್ದವು ಎಂದು ಅದು ಎಚ್ಚರಿಕೆ ನೀಡಿದೆ ಎಂದು ndtv.com ವರದಿ ಮಾಡಿದೆ.

ಈ ಅಂತರ್ಜಾಲ ತಾಣಗಳನ್ನು ಸಾಗರೋತ್ತರ ಸೈಬರ್ ದಾಳಿಕೋರರು ನಿರ್ವಹಿಸುತ್ತಿದ್ದು, ಅವರು ಡಿಜಿಟಲ್ ಜಾಹೀರಾತು, ಚಾಟ್ ಮೆಸೆಂಜರ್ ಗಳು, ತಟಸ್ಥ ಹಾಗೂ ಬಾಡಿಗೆ ಖಾತೆಗಳನ್ನು ಬಳಸುತ್ತಿದ್ದಾರೆ ಎಂದು ತಿಳಿದು ಬಂದಿದೆ ಎಂದು ಕೇಂದ್ರ ಗೃಹ ವ್ಯವಹಾರಗಳ ಸಚಿವಾಲಯವು ತನ್ನ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ.

“ಈ ಭಾರಿ ಪ್ರಮಾಣದ ಆರ್ಥಿಕ ವಂಚನೆಗಳು ಮುಂದುವರಿದಿದ್ದು, ಅದರಿಂದ ಸಂಗ್ರಹವಾಗುವ ಮೊತ್ತವನ್ನು ಕಾರ್ಡ್ ಜಾಲ, ಕ್ರಿಪ್ಟೊಕರೆನ್ಸಿ, ಸಾಗರೋತ್ತರ ಎಟಿಎಂ ಹಿಂಪಡೆಯುವಿಕೆ ಹಾಗೂ ಅಂತಾರಾಷ್ಟ್ರೀಯ ಆರ್ಥಿಕ ತಂತ್ರಜ್ಞಾನ ಕಂಪನಿಗಳ ಮೂಲಕ ಭಾರತದಿಂದ ಅಕ್ರಮವಾಗಿ ವರ್ಗಾಯಿಸಲಾಗುತ್ತಿದೆ” ಎಂದು ಅದು ಎಚ್ಚರಿಸಿದೆ.

“ಕೇಂದ್ರ ಗೃಹ ವ್ಯವಹಾರಗಳ ಸಚಿವ ಅಮಿತ್ ಶಾ ಅವರ ಮಾರ್ಗದರ್ಶನದನ್ವಯ, ಕೇಂದ್ರ ಗೃಹ ವ್ಯವಹಾರಗಳ ಸಚಿವಾಲಯವು ಸೈಬರ್ ಅಪರಾಧಗಳನ್ನು ಮಟ್ಟ ಹಾಕಿ, ಅಂತಹ ದಾಳಿಕೋರರಿಂದ ಜನರನ್ನು ರಕ್ಷಿಸಲು ಬದ್ಧವಾಗಿದೆ” ಎಂದೂ ತನ್ನ ಪ್ರಕಟಣೆಯಲ್ಲಿ ಹೇಳಿದೆ.