ಕ್ಷಯರೋಗದ ಔಷಧದ ಪೇಟೆಂಟ್ ನಿರಾಕರಿಸಿದ ಭಾರತ: ರೋಗಿಗಳಿಗೆ ಸಿಗಲಿದೆಯೇ ದೊಡ್ಡ ರಿಲೀಫ್?

ಬೆಡಾಕ್ವಿಲಿನ್, ಪ್ರಿಟೋಮಾನಿಡ್ ಮತ್ತು ಲಿನೆಜೋಲಿಡ್ ಎಂಬ ಮೂರು ಕ್ಷಯರೋಗದ (TB) ಔಷಧಿಗಳ ಸಂಯೋಜನೆಯ (ಬಿಪಿಎಎಲ್ - BPaL) ಪೇಟೆಂಟ್ ಅರ್ಜಿಯನ್ನು ಭಾರತೀಯ ಪೇಟೆಂಟ್ ಕಚೇರಿ ತಿರಸ್ಕರಿಸಿದೆ. ಔಷಧಿ-ನಿರೋಧಕ ಟಿಬಿ (Drug-resistant TB) ಚಿಕಿತ್ಸೆಯನ್ನು ಹೆಚ್ಚು ಕೈಗೆಟುಕುವಂತೆ ಮತ್ತು ಸುಲಭವಾಗಿ ಲಭ್ಯವಾಗುವಂತೆ ಮಾಡುವಲ್ಲಿ ಈ ನಿರ್ಧಾರ ಪ್ರಮುಖ ಹೆಜ್ಜೆಯಾಗಿದೆ ಎಂದು ತಜ್ಞರು ಸ್ವಾಗತಿಸಿದ್ದಾರೆ.

ಈ ಅರ್ಜಿಯನ್ನು ಅಮೆರಿಕ ಮೂಲದ 'ಗ್ಲೋಬಲ್ ಅಲಯನ್ಸ್ ಫಾರ್ ಟಿಬಿ ಡ್ರಗ್ ಡೆವಲಪ್ಮೆಂಟ್' ಸಂಸ್ಥೆಯು ಸಲ್ಲಿಸಿತ್ತು. ಪೇಟೆಂಟ್ ನಿರಾಕರಣೆಯಿಂದಾಗಿ, ಈ ಔಷಧಿಗಳ ಸಂಯೋಜನೆಯ ಮೇಲೆ ಆ ಸಂಸ್ಥೆಗೆ ಭಾರತದಲ್ಲಿ ಏಕಸ್ವಾಮ್ಯ ಹಕ್ಕು ಸಿಗುವುದಿಲ್ಲ. ಇದರಿಂದಾಗಿ ಹೆಚ್ಚಿನ ಉತ್ಪಾದಕರು ಈ ಔಷಧಿಗಳನ್ನು ತಯಾರಿಸಲು ಹಾದಿ ಸುಗಮವಾಗಲಿದ್ದು, ಮಾರುಕಟ್ಟೆಯಲ್ಲಿ ಪೈಪೋಟಿ ಹೆಚ್ಚಿ ಔಷಧಿಗಳ ಬೆಲೆ ಕಡಿಮೆಯಾಗುವ ಸಾಧ್ಯತೆಯಿದೆ.

2020ರಲ್ಲಿ ಸಲ್ಲಿಸಲಾಗಿದ್ದ ಎರಡು 'ಪೇಟೆಂಟ್ ಪೂರ್ವ ಆಕ್ಷೇಪಣೆ'ಗಳ ಆಧಾರದ ಮೇಲೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಪೇಟೆಂಟ್ ಮಂಜೂರಾಗುವ ಮುನ್ನವೇ ವ್ಯಕ್ತಿಗಳು ಅಥವಾ ಸಂಸ್ಥೆಗಳು ಅರ್ಜಿಯನ್ನು ಪ್ರಶ್ನಿಸಲು ಈ ವ್ಯವಸ್ಥೆ ಅವಕಾಶ ನೀಡುತ್ತದೆ. ಮೊದಲ ಆಕ್ಷೇಪಣೆಯನ್ನು ಸಂಕಲ್ಪ ರಿಹ್ಯಾಬಿಲಿಟೇಶನ್ ಟ್ರಸ್ಟ್ ನ ಎಲ್ಡ್ರೆಡ್ ಟೆಲ್ಲಿಸ್ ಮತ್ತು ಗಣೇಶ್ ಆಚಾರ್ಯ ಅವರು ಲಾಯರ್ಸ್ ಕಲೆಕ್ಟಿವ್ ಮತ್ತು ಮೆಡಿಸಿನ್ಸ್ ಸಾನ್ಸ್ ಫ್ರಾಂಟಿಯರ್ಸ್ ಸಹಯೋಗದೊಂದಿಗೆ ಸಲ್ಲಿಸಿದ್ದರು. ಎರಡನೇ ಆಕ್ಷೇಪಣೆಯನ್ನು 'ಡೆಲ್ಲಿ ನೆಟ್ವರ್ಕ್ ಆಫ್ ಪಾಸಿಟಿವ್ ಪೀಪಲ್' (DNP+) ಸಂಸ್ಥೆಯು 'ಥರ್ಡ್ ವರ್ಲ್ಡ್ ನೆಟ್ವರ್ಕ್' ಬೆಂಬಲದೊಂದಿಗೆ ಸಲ್ಲಿಸಿತ್ತು.

ಪೇಟೆಂಟ್ ಅರ್ಜಿಯನ್ನು ತಿರಸ್ಕರಿಸಿರುವುದು ದೊಡ್ಡ ಮಟ್ಟದ ಹೋರಾಟದ ಒಂದು ಭಾಗವಷ್ಟೇ ಎಂದು ತಜ್ಞರು ಹೇಳುತ್ತಾರೆ. ರಾಷ್ಟ್ರೀಯ ಟಿಬಿ ಕಾರ್ಯಕ್ರಮದ ಮೂಲಕ ಚಿಕಿತ್ಸೆಗೆ ಅರ್ಹರಾಗಿರುವ ಪ್ರತಿಯೊಬ್ಬ ರೋಗಿಗೂ ಈ ಕಡಿಮೆ ಅವಧಿಯ ಚಿಕಿತ್ಸೆ ಸಿಗುವಂತೆ ಮಾಡುವುದು ಅತ್ಯಂತ ಪ್ರಮುಖ ಕೆಲಸವಾಗಿದೆ. ಭಾರತವು ವಿಶ್ವದಲ್ಲೇ ಅತಿ ಹೆಚ್ಚು ಟಿಬಿ ಪೀಡಿತರನ್ನು ಹೊಂದಿದ್ದು, ಜಾಗತಿಕ ಪ್ರಕರಣಗಳಲ್ಲಿ ಸುಮಾರು ಕಾಲು ಭಾಗದಷ್ಟು ಪ್ರಕರಣಗಳು ಇಲ್ಲಿಯೇ ವರದಿಯಾಗುತ್ತವೆ. 2024ರಲ್ಲಿ ದೇಶದ ಟಿಬಿ ಪ್ರಮಾಣವು ಪ್ರತಿ 1,00,000 ಜನರಿಗೆ 187 ಪ್ರಕರಣಗಳಷ್ಟಿತ್ತು.

►ಬಿಪಿಎಎಲ್ (BPaL) ಎಂದರೇನು?

ಇದು ಔಷಧಿ-ನಿರೋಧಕ ಟಿಬಿಯಿಂದ (Drug-resistant TB) ಬಳಲುತ್ತಿರುವ ಅರ್ಹ ರೋಗಿಗಳಿಗೆ ವಿಶ್ವ ಆರೋಗ್ಯ ಸಂಸ್ಥೆ (WHO) ಶಿಫಾರಸು ಮಾಡಿರುವ ಆರು ತಿಂಗಳ ಸಂಪೂರ್ಣ ಮಾತ್ರೆಗಳ ಆಧಾರಿತ ಚಿಕಿತ್ಸೆಯಾಗಿದೆ. ಇದರಲ್ಲಿ ಬೆಡಾಕ್ವಿಲಿನ್ (B), ಪ್ರಿಟೋಮಾನಿಡ್ (Pa) ಮತ್ತು ಲಿನೆಜೋಲಿಡ್ (L) ಎಂಬ ಮೂರು ಔಷಧಿಗಳನ್ನು ಸಂಯೋಜಿಸಲಾಗಿದೆ. ಇದಕ್ಕೆ ಸಂಬಂಧಿಸಿದ ಮತ್ತೊಂದು ಚಿಕಿತ್ಸಾ ವಿಧಾನವಾದ 'ಬಿಪಿಎಎಲ್ಎಂ' (BPaLM)ಗೆ ನಾಲ್ಕನೇ ಔಷಧಿಯಾಗಿ 'ಮೊಕ್ಸಿಫ್ಲೋಕ್ಸಾಸಿನ್' (M) ಸೇರಿಸಲಾಗುತ್ತದೆ. ಸಾಮಾನ್ಯ ಚಿಕಿತ್ಸಾ ವಿಧಾನಗಳಲ್ಲಿ ಶೇ. 52ರಿಂದ 75ರಷ್ಟು ರೋಗಿಗಳು ಮಾತ್ರ ಗುಣಮುಖರಾಗುತ್ತಿದ್ದರೆ, ಬಿಪಿಎಎಲ್ಎಂ ಚಿಕಿತ್ಸೆಯಲ್ಲಿ ಶೇ. 89ರಷ್ಟು ರೋಗಿಗಳು ಗುಣಮುಖರಾಗಿದ್ದಾರೆ. ಭಾರತದ ರಾಷ್ಟ್ರೀಯ ಟಿಬಿ ಕಾರ್ಯಕ್ರಮದ ಅಡಿಯಲ್ಲಿ ಈಗಾಗಲೇ 15,000ಕ್ಕೂ ಹೆಚ್ಚು ರೋಗಿಗಳು ಬಿಪಿಎಎಲ್ಎಂ ಚಿಕಿತ್ಸೆಯನ್ನು ಪಡೆಯಲು ಪ್ರಾರಂಭಿಸಿದ್ದಾರೆ.

ಹಿಂದಿನ ಚಿಕಿತ್ಸಾ ವಿಧಾನಗಳಲ್ಲಿ ರೋಗಿಗಳು ಹಲವು ತಿಂಗಳುಗಳ ಕಾಲ ಆಂಟಿಬಯೋಟಿಕ್ ಗಳನ್ನು ತೆಗೆದುಕೊಳ್ಳಬೇಕಿತ್ತು ಮತ್ತು ನೋವಿನಿಂದ ಕೂಡಿದ ಇಂಜೆಕ್ಷನ್ಗಳನ್ನು ಪಡೆಯಬೇಕಿತ್ತು. ಆದರೆ, ಬಿಪಿಎಎಲ್ ಆಧಾರಿತ ಚಿಕಿತ್ಸೆಯು ಕೇವಲ ಮಾತ್ರೆಗಳ ಮೂಲಕ ಕಡಿಮೆ ಅವಧಿಯ ಚಿಕಿತ್ಸಾ ಕೋರ್ಸ್ ಒದಗಿಸುತ್ತದೆ. ಇದು ರೋಗಿಗಳ ಮೇಲಿನ ದೈಹಿಕ, ಆರ್ಥಿಕ ಮತ್ತು ಮಾನಸಿಕ ಹೊರೆಯನ್ನು ಕಡಿಮೆ ಮಾಡುತ್ತದೆ.

►ಪೇಟೆಂಟ್ ತೀರ್ಪು ರೋಗಿಗಳಿಗೆ ಏನು ಸಂದೇಶ ನೀಡುತ್ತದೆ?

ಈ ತೀರ್ಪು ಬಿಪಿಎಎಲ್ ಸಂಯೋಜನೆಯನ್ನು ತಯಾರಿಸುವ ಸಂಸ್ಥೆಗಳ ನಡುವಿನ ಪೈಪೋಟಿಗೆ ಇದ್ದ ಒಂದು ಕಾನೂನು ಅಡಚಣೆಯನ್ನು ತೆರವುಗೊಳಿಸಿದೆ. ಆದರೆ, ಈ ನಿರ್ಧಾರದಿಂದ ಚಿಕಿತ್ಸೆಯು ತಕ್ಷಣವೇ ಅಗ್ಗವಾಗುತ್ತದೆ ಅಥವಾ ಎಲ್ಲೆಡೆ ಔಷಧಿಗಳು ಸಿಗುತ್ತವೆ ಎಂದು ಖಾತರಿಪಡಿಸುವುದಿಲ್ಲ. ಅದು ಉತ್ತಮ ಗುಣಮಟ್ಟದ ಪೂರೈಕೆದಾರರ ಸಂಖ್ಯೆ, ಸರ್ಕಾರದ ಖರೀದಿ ವ್ಯವಸ್ಥೆ ಮತ್ತು ತಡೆರಹಿತ ಸರಬರಾಜನ್ನು ಅವಲಂಬಿಸಿರುತ್ತದೆ.

"ಔಷಧಿ-ನಿರೋಧಕ ಟಿಬಿಗೆ ಕೈಗೆಟುಕುವ ದರದಲ್ಲಿ ಚಿಕಿತ್ಸೆ ಸಿಗುವಂತೆ ಮಾಡಲು ಈ ತೀರ್ಪು ಉತ್ತಮ ಅವಕಾಶವಾಗಿದೆ. ಆದರೆ, ಇದು ಯಾವುದೇ ಹೊಸ ಔಷಧಿಯನ್ನು ಅನುಮೋದಿಸುವುದಿಲ್ಲ ಅಥವಾ ಚಿಕಿತ್ಸಾ ಮಾರ್ಗಸೂಚಿಗಳನ್ನು ಬದಲಾಯಿಸುವುದಿಲ್ಲ" ಎಂದು ಶ್ವಾಸಕೋಶ ತಜ್ಞ ಮತ್ತು ರಾಷ್ಟ್ರೀಯ ಟಿಬಿ ನಿರ್ಮೂಲನಾ ಕಾರ್ಯಕ್ರಮದ ಮಾಜಿ ತಾಂತ್ರಿಕ ತಜ್ಞ ಡಾ. ವಿಕಾಸ್ ಓಸ್ವಾಲ್ ತಿಳಿಸಿದ್ದಾರೆ.

"ಈ ನಿರಾಕರಣೆಯೊಂದಿಗೆ ಭಾರತದಲ್ಲಿ ಸವಾಲು ಮಾಡಲಾಗಿದ್ದ ಬೆಡಾಕ್ವಿಲಿನ್ ಸಂಬಂಧಿತ ಪ್ರತಿಯೊಂದು ಪೇಟೆಂಟ್ ಅರ್ಜಿಯೂ ತಿರಸ್ಕೃತಗೊಂಡಂತಾಗಿದೆ. ಇವುಗಳಲ್ಲಿ ಬೆಡಾಕ್ವಿಲಿನ್ ಸಾಲ್ಟ್ ಫಾರ್ಮ್ (2023), ಮಕ್ಕಳಿಗಾಗಿ ತಯಾರಿಸಿದ ಫಾರ್ಮುಲೇಶನ್ (2024), ದೀರ್ಘಾವಧಿಯ ಇಂಜೆಕ್ಷನ್ ಮತ್ತು ಈಗ ಬಿಪಿಎಎಲ್ ಸಂಯೋಜನೆ ಸೇರಿವೆ. ಭಾರತದಲ್ಲಿ ಈ ಚಿಕಿತ್ಸಾ ವಿಧಾನದ ಮೇಲೆ ಯಾವುದೇ ಒಂದು ಕಂಪೆನಿಯು ಏಕಸ್ವಾಮ್ಯ ಹಕ್ಕನ್ನು ಕೋರಲು ಸಾಧ್ಯವಿಲ್ಲ. ಯಾವುದೇ ಟಿಬಿ ಔಷಧ ತಯಾರಕರು ಭಾರತೀಯ ಕಾರ್ಯಕ್ರಮಕ್ಕಾಗಿ ಇದನ್ನು ತಯಾರಿಸಬಹುದು ಹಾಗೂ ರಫ್ತು ಮಾಡಬಹುದು" ಎಂದು ಸಾರ್ವಜನಿಕ ಆರೋಗ್ಯ ಮತ್ತು ವಿಮಾನಯಾನ ಕಾನೂನು ಸಲಹೆಗಾರ್ತಿ ಲೀನಾ ಮೆಂಗಾನಿ ಹೇಳಿದ್ದಾರೆ.

ಥರ್ಡ್ ವರ್ಲ್ಡ್ ನೆಟ್ವರ್ಕ್ ನ ಹಿರಿಯ ಸಂಶೋಧಕಿ ಪ್ರತಿಭಾ ಶಿವಸುಬ್ರಮಣಿಯನ್ ಅವರ ಪ್ರಕಾರ, ಪರಿಚಿತ ಔಷಧಿಗಳ ಮೇಲಿನ ಅನಗತ್ಯ ಮತ್ತು ದ್ವಿತೀಯ ಹಂತದ ಪೇಟೆಂಟ್ ಗಳ ವಿರುದ್ಧ ರೋಗಿಗಳು ನಡೆಸಿದ ಹೋರಾಟಕ್ಕೆ ಈ ತೀರ್ಪು ಮನ್ನಣೆ ನೀಡಿದೆ. "ಸರಳವಾಗಿ ಹೇಳುವುದಾದರೆ, ಪ್ರಮುಖ ಟಿಬಿ ಔಷಧಿಗಳ ಪೇಟೆಂಟ್ ಗಳ ನಿರಂತರ ವಿಸ್ತರಣೆಗೆ (ಎವರ್ ಗ್ರೀನಿಂಗ್) ಇದರಿಂದ ತಡೆಬಿದ್ದಿದೆ" ಎಂದು ಅವರು ಹೇಳಿದರು. ಅಸ್ತಿತ್ವದಲ್ಲಿರುವ ಔಷಧಿಯಲ್ಲಿ ಸಣ್ಣಪುಟ್ಟ ಬದಲಾವಣೆಗಳನ್ನು ಮಾಡಿ ಅಥವಾ ಹೊಸ ರೂಪಗಳನ್ನು ತಂದು, ಕಂಪೆನಿಯು ತನ್ನ ಪೇಟೆಂಟ್ ಹಕ್ಕಿನ ಅವಧಿಯನ್ನು ದೀರ್ಘಕಾಲ ಮುಂದುವರಿಸಿಕೊಳ್ಳುವ ಪ್ರಯತ್ನವನ್ನೇ 'ಎವರ್ ಗ್ರೀನಿಂಗ್' ಎಂದು ಕರೆಯಲಾಗುತ್ತದೆ. ಇಂತಹ ಪದ್ಧತಿಗಳು ಜೆನೆರಿಕ್ ಔಷಧ ತಯಾರಕರಿಂದ ಬರುವ ಸ್ಪರ್ಧೆಯನ್ನು ವಿಳಂಬಗೊಳಿಸುತ್ತವೆ ಎಂದು ರೋಗಿಗಳ ಪರ ಗುಂಪುಗಳು ಮತ್ತು ಹಕ್ಕು ಹೋರಾಟಗಾರರು ವಾದಿಸಿದ್ದಾರೆ.

►ಟಿಬಿ ಚಿಕಿತ್ಸೆ ಅಗ್ಗವಾಗಲಿದೆಯೇ?

ರೋಗಿಗಳಿಗೆ ಈ ಕಡಿಮೆ ಅವಧಿಯ ಚಿಕಿತ್ಸೆಯು ಮಾತ್ರೆಗಳ ಸಂಖ್ಯೆಯ ದೃಷ್ಟಿಯಿಂದ ಮಾತ್ರವಲ್ಲದೆ, ಇನ್ನೂ ಹಲವು ಕಾರಣಗಳಿಂದ ಮಹತ್ವದ್ದಾಗಿದೆ. "ವರ್ಷಕ್ಕೂ ಹೆಚ್ಚು ಕಾಲ ನೋವಿನ ಇಂಜೆಕ್ಷನ್ ಗಳೊಂದಿಗೆ ಆಂಟಿಬಯೋಟಿಕ್ಗಳನ್ನು ತೆಗೆದುಕೊಳ್ಳುವುದು ಎಂಥದ್ದು ಎಂಬುದು ಟಿಬಿ ಚಿಕಿತ್ಸೆಗೆ ಒಳಗಾದವರಿಗೆ ಮಾತ್ರ ಗೊತ್ತು. ಕಡಿಮೆ ಅವಧಿಯ ಮತ್ತು ಮಾತ್ರೆಗಳ ಮೂಲಕ ಸಿಗುವ ಪರಿಣಾಮಕಾರಿ ಚಿಕಿತ್ಸೆಯು ರೋಗಿಗಳಿಗೆ ಬೇಗನೆ ಕೆಲಸಕ್ಕೆ ಮರಳಲು, ಕುಟುಂಬವನ್ನು ನೋಡಿಕೊಳ್ಳಲು ಮತ್ತು ತಮ್ಮ ಜೀವನವನ್ನು ಮತ್ತೆ ಕಟ್ಟಿಕೊಳ್ಳಲು ಸಹಾಯ ಮಾಡುತ್ತದೆ" ಎಂದು ಡೆಲ್ಲಿ ನೆಟ್ವರ್ಕ್ ಆಫ್ ಪಾಸಿಟಿವ್ ಪೀಪಲ್ನ (DNP+) ಲೂನ್ ಗಂಗ್ತೆ ಹೇಳಿದ್ದಾರೆ.

ಆದರೆ, ಈ ಉಳಿತಾಯದ ಸಾಧ್ಯತೆಯನ್ನು ಸನ್ನಿವೇಶಕ್ಕೆ ಅನುಗುಣವಾಗಿ ಅರ್ಥಮಾಡಿಕೊಳ್ಳಬೇಕಾಗುತ್ತದೆ. ಸರಕಾರಿ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯ ಮೂಲಕ ಔಷಧಿ-ನಿರೋಧಕ ಟಿಬಿ ಚಿಕಿತ್ಸೆ ಪಡೆಯುವ ರೋಗಿಗಳಿಗೆ ಈಗಾಗಲೇ ಉಚಿತವಾಗಿ ಔಷಧಿಗಳನ್ನು ನೀಡಲಾಗುತ್ತಿದೆ. ಆದ್ದರಿಂದ, ಔಷಧ ಬೆಲೆ ಕಡಿಮೆಯಾಗುವುದರ ಮುಖ್ಯ ಆರ್ಥಿಕ ಲಾಭವು ಆರಂಭದಲ್ಲಿ ರಾಷ್ಟ್ರೀಯ ಕಾರ್ಯಕ್ರಮಕ್ಕಾಗಿ ಔಷಧಿಗಳನ್ನು ಖರೀದಿಸುವ ಸರ್ಕಾರಕ್ಕೆ ತಲುಪುತ್ತದೆ. ಭಾರತದಲ್ಲಿ ಬೆಡಾಕ್ವಿಲಿನ್ ಫ್ಯುಮರೇಟ್ ಸಾಲ್ಟ್ ಪೇಟೆಂಟ್ ತಿರಸ್ಕರಿಸಲ್ಪಟ್ಟ ನಂತರ, ಜೆನೆರಿಕ್ ತಯಾರಕರ ನಡುವಿನ ಪೈಪೋಟಿಯು ಚಿಕಿತ್ಸೆಯ ವೆಚ್ಚವನ್ನು ಕಡಿಮೆ ಮಾಡಲು ಸಹಾಯ ಮಾಡಿದೆ ಎಂದು ಮೆಂಗಾನಿ ಹೇಳಿದ್ದಾರೆ. "ಆರು ತಿಂಗಳ ಬಿಪಿಎಎಲ್ಎಂ ಚಿಕಿತ್ಸಾ ಕೋರ್ಸ್ನ ವೆಚ್ಚವು 2022ರಲ್ಲಿ ಇದ್ದ 588 ಡಾಲರ್ನಿಂದ ಈಗ 284 ಡಾಲರ್ಗೆ ಇಳಿಕೆಯಾಗಿದೆ" ಎಂದಿದ್ದಾರೆ ಅವರು.

ಸರಳವಾಗಿ ಹೇಳುವುದಾದರೆ, ಸರ್ಕಾರವು ಪ್ರತಿಯೊಂದು ಚಿಕಿತ್ಸಾ ಕೋರ್ಸ್ ಅನ್ನು ಕಡಿಮೆ ಬೆಲೆಗೆ ಖರೀದಿಸಲು ಸಾಧ್ಯವಾದರೆ, ಅದೇ ಬಜೆಟ್ನಲ್ಲಿ ಹೆಚ್ಚಿನ ರೋಗಿಗಳಿಗೆ ಚಿಕಿತ್ಸೆ ನೀಡಲು ಸಾಧ್ಯವಾಗುತ್ತದೆ. ಹೆಚ್ಚಿನ ಪೈಪೋಟಿಯು ಬೆರಳೆಣಿಕೆಯಷ್ಟು ಸಂಸ್ಥೆಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಿ, ಔಷಧಿಗಳ ಸರಬರಾಜನ್ನು ಹೆಚ್ಚು ವಿಶ್ವಾಸಾರ್ಹವಾಗಿಸುತ್ತದೆ.

"ರೋಗಿಗಳು ಪ್ರಯಾಣದ ವೆಚ್ಚ, ಕಾರ್ಯಕ್ರಮದ ಹೊರತಾದ ತಪಾಸಣೆಗಳು, ಪೌಷ್ಟಿಕ ಆಹಾರ ಮತ್ತು ಕಳೆದುಕೊಂಡ ಆದಾಯಕ್ಕಾಗಿ ಇನ್ನೂ ಭಾರೀ ವೆಚ್ಚಗಳನ್ನು ಎದುರಿಸಬೇಕಾಗುತ್ತದೆ. ಕೇವಲ ಔಷಧದ ಬೆಲೆ ಕಡಿಮೆಯಾಗುವುದರಿಂದ ಈ ಹೊರೆಗಳು ಸಂಪೂರ್ಣವಾಗಿ ನಿವಾರಣೆಯಾಗುವುದಿಲ್ಲ. ಈ ಪೇಟೆಂಟ್ ತೀರ್ಪಿನಿಂದ ಸಿಗುವ ಹೆಚ್ಚುವರಿ ಉಳಿತಾಯದ ನೈಜ ಚಿತ್ರಣವು ಮಾರುಕಟ್ಟೆಯ ಅಸಲಿ ಬೆಲೆಗಳು ಮತ್ತು ಪೂರೈಕೆ ವ್ಯವಸ್ಥೆಗಳು ಖಚಿತವಾದ ನಂತರವೇ ತಿಳಿಯುತ್ತದೆ" ಎಂದು ಡಾ. ಓಸ್ವಾಲ್ ಹೇಳಿದ್ದಾರೆ.

►ಅಗ್ಗದ ಜೆನೆರಿಕ್ ಔಷಧಿಗಳು ಶೀಘ್ರದಲ್ಲೇ ಸಿಗಲಿವೆಯೇ? ಮುಂದಿರುವ ಹಂತಗಳೇನು?

ಭಾರತದ ರಾಷ್ಟ್ರೀಯ ಔಷಧ ನಿಯಂತ್ರಣ ಸಂಸ್ಥೆಯಾದ 'ಸೆಂಟ್ರಲ್ ಡ್ರಗ್ಸ್ ಸ್ಟ್ಯಾಂಡರ್ಡ್ಸ್ ಕಂಟ್ರೋಲ್ ಆರ್ಗನೈಸೇಶನ್' (CDSCO), ರಾಷ್ಟ್ರೀಯ ಟಿಬಿ ನಿರ್ಮೂಲನಾ ಕಾರ್ಯಕ್ರಮದ (NTEP) ಅಡಿಯಲ್ಲಿ ಬೆಡಾಕ್ವಿಲಿನ್ ಮತ್ತು ಪ್ರಿಟೋಮಾನಿಡ್ ಬಳಕೆಗೆ ಅನುಮೋದನೆ ನೀಡಿದೆ. ಲಿನೆಜೋಲಿಡ್ ಮತ್ತು ಮೊಕ್ಸಿಫ್ಲೋಕ್ಸಾಸಿನ್ ಹಳೆಯ ಆಂಟಿಬಯೋಟಿಕ್ ಗಳಾಗಿದ್ದು, ಈಗ ಔಷಧಿ-ನಿರೋಧಕ ಟಿಬಿ ಚಿಕಿತ್ಸೆಯ ಭಾಗವಾಗಿ ಬಳಸಲಾಗುತ್ತಿದೆ. ಮೆಂಗಾನಿ ಅವರ ಪ್ರಕಾರ, ಸರ್ಕಾರವು ರಿಫಾಂಪಿಸಿನ್-ನಿರೋಧಕ ಟಿಬಿ ಪತ್ತೆಯಾದ ಪ್ರತಿಯೊಬ್ಬ ಅರ್ಹ ರೋಗಿಗೂ ಬಿಪಿಎಎಲ್ / ಬಿಪಿಎಎಲ್ಎಂ ಚಿಕಿತ್ಸೆಯನ್ನು ತಲುಪಿಸುವುದು ಈಗಿರುವ ಅತ್ಯಂತ ಪ್ರಮುಖ ಹಂತವಾಗಿದೆ.

ಆದರೆ, ಪೇಟೆಂಟ್ ಅರ್ಜಿ ತಿರಸ್ಕೃತಗೊಂಡ ತಕ್ಷಣ ಈ ಔಷಧಿಗಳ ಸಂಯೋಜನೆಯನ್ನು ಯಾವುದೇ ನಿರ್ಬಂಧವಿಲ್ಲದೆ ಮಾರಾಟ ಮಾಡಲು ಸ್ವಯಂಚಾಲಿತ ಅನುಮತಿ ಸಿಕ್ಕಿದೆ ಎಂದು ಭಾವಿಸಬಾರದು. ಪೇಟೆಂಟ್ ಅನುಮೋದನೆ ಮತ್ತು ಔಷಧ ನಿಯಂತ್ರಣ ಮಂಡಳಿಯ ಅನುಮೋದನೆ ಎರಡೂ ಬೇರೆ ಬೇರೆ ಪ್ರಕ್ರಿಯೆಗಳಾಗಿವೆ. ಪೇಟೆಂಟ್ ಎಂಬುದು ಒಂದು ಸಂಶೋಧನೆಯ ಮೇಲೆ ಕಂಪೆನಿಗೆ ಏಕಸ್ವಾಮ್ಯ ಹಕ್ಕು ಇದೆಯೇ ಎಂಬುದನ್ನು ನಿರ್ಧರಿಸುತ್ತದೆ. ಆದರೆ, ಔಷಧ ನಿಯಂತ್ರಕರು ಔಷಧಿಯ ಸುರಕ್ಷತೆ ಮತ್ತು ಅದನ್ನು ನಿಗದಿತ ಷರತ್ತುಗಳಡಿ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಬಹುದೇ ಎಂಬುದನ್ನು ಪರಿಶೀಲಿಸುತ್ತಾರೆ. ಭಾರತದಲ್ಲಿ ಈ ಚಿಕಿತ್ಸಾ ವಿಧಾನಗಳ ಲಭ್ಯತೆಯು ರಾಷ್ಟ್ರೀಯ ಟಿಬಿ ಕಾರ್ಯಕ್ರಮ ಮತ್ತು ಅದರ ಚಿಕಿತ್ಸಾ ಮಾನದಂಡಗಳಿಗೆ ಒಳಪಟ್ಟಿರುತ್ತದೆ.

ಅದೇ ರೀತಿ, ವಿಶ್ವ ಆರೋಗ್ಯ ಸಂಸ್ಥೆಯ (WHO) ಪೂರ್ವ ಅರ್ಹತಾ ಅನುಮೋದನೆಯು (ಔಷಧಿಯು ಜಾಗತಿಕ ಗುಣಮಟ್ಟ, ಸುರಕ್ಷತೆ ಮತ್ತು ಪರಿಣಾಮಕಾರಿತ್ವವನ್ನು ಹೊಂದಿದೆಯೇ ಎಂಬ ಮೌಲ್ಯಮಾಪನ) ಭಾರತೀಯ ನಿಯಂತ್ರಕರಿಂದ ಅಗತ್ಯವಿರುವ ಮಾರಾಟ ಅನುಮತಿಗೆ ಪರ್ಯಾಯವಾಗುವುದಿಲ್ಲ.

►ಯಾರಿಗೆ ಅತಿ ಹೆಚ್ಚು ಲಾಭವಾಗಲಿದೆ?

ಬಹು-ಔಷಧಿ ನಿರೋಧಕ ಅಥವಾ ರಿಫಾಂಪಿಸಿನ್-ನಿರೋಧಕ ಟಿಬಿ (MDR/RR-TB) ಹೊಂದಿರುವ ರೋಗಿಗಳಿಗೆ, ಮುಖ್ಯವಾಗಿ ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವವರಿಗೆ, ಚಿಕಿತ್ಸೆ ಪ್ರಾರಂಭಿಸಲು ವಿಳಂಬವಾಗುತ್ತಿರುವವರಿಗೆ ಮತ್ತು ಚಿಕಿತ್ಸಾ ಕೇಂದ್ರಗಳನ್ನು ತಲುಪಲು ಕಷ್ಟಪಡುತ್ತಿರುವವರಿಗೆ ಇದರಿಂದ ಅತಿ ಹೆಚ್ಚಿನ ಲಾಭವಾಗಲಿದೆ.

►ಅಗ್ಗದ ಜೆನೆರಿಕ್ ಔಷಧಿಗಳಿಂದ ಗುಣಮಟ್ಟ ಅಥವಾ ಸುರಕ್ಷತೆಯಲ್ಲಿ ರಾಜಿಯಾಗಲಿದೆಯೇ?

ಜೆನೆರಿಕ್ ಔಷಧಿಗಳು ಮೂಲ ಔಷಧಿಗಳಲ್ಲಿರುವಂತೆಯೇ ಸಕ್ರಿಯ ರಾಸಾಯನಿಕ ಘಟಕಗಳನ್ನು (Active Pharmaceutical Ingredients) ಹೊಂದಿರುತ್ತವೆ ಮತ್ತು ನಿಗದಿತ ನಿಯಂತ್ರಕ ಮಾನದಂಡಗಳನ್ನು ಪೂರೈಸುವ ನಿರೀಕ್ಷೆಯಿರುತ್ತದೆ. ಡಾ. ಓಸ್ವಾಲ್ ತಿಳಿಸಿರುವಂತೆ, ಹೆಚ್ಚಿನ ತಯಾರಕರು ಮಾರುಕಟ್ಟೆಗೆ ಬಂದಾಗಲೂ ಗುಣಮಟ್ಟದ ತಪಾಸಣೆಗಳು ನಿರಂತರವಾಗಿ ಮುಂದುವರಿಯಬೇಕಾಗುತ್ತದೆ.

ಸೌಜನ್ಯ: indianexpress.com