ವಿಶ್ವಕಪ್: ಬಾಂಗ್ಲಾದೇಶದ ವಿರುದ್ಧ ನ್ಯೂಝಿಲೆಂಡ್‌ಗೆ ಭರ್ಜರಿ ಜಯ

ಕೋಲ್ಕತಾ, ಮಾ.26: ನಾಯಕ ಕೇನ್ ವಿಲಿಯಮ್ಸನ್ ಸಂದರ್ಭೋಚಿತ ಬ್ಯಾಟಿಂಗ್, ಎಲಿಯಟ್(3-12) ಹಾಗೂ ಐಶ್ ಸೋಧಿ(3-21) ಕರಾರುವಾಕ್ ಬೌಲಿಂಗ್‌ನ ನೆರವಿನಿಂದ ನ್ಯೂಝಿಲೆಂಡ್ ತಂಡ ಬಾಂಗ್ಲಾದೇಶ ವಿರುದ್ಧ ಸೂಪರ್-10 ಸುತ್ತಿನ ಕೊನೆಯ ಪಂದ್ಯದಲ್ಲಿ 75 ರನ್‌ಗಳ ಅಂತರದಿಂದ ಗೆಲುವು ಸಾಧಿಸಿದೆ.

 ನ್ಯೂಝಿಲೆಂಡ್ ಸತತ ನಾಲ್ಕನೆ ಗೆಲುವು ಸಾಧಿಸಿ ಸೆಮಿಫೈನಲ್‌ಗೆ ಅಜೇಯವಾಗಿ ಪ್ರವೇಶಿಸಿದರೆ, ಬಾಂಗ್ಲಾದೇಶ ತಂಡ ಸೂಪರ್-10ರಲ್ಲಿ ಒಂದೂ ಪಂದ್ಯವನ್ನು ಗೆಲ್ಲಲಾಗದೇ ಬರಿಗೈಯಲ್ಲಿ ಮನೆಗೆ ವಾಪಸಾಗಬೇಕಾಗಿದೆ.

ಮೊದಲು ಬ್ಯಾಟಿಂಗ್ ಮಾಡಿದ್ದ ಕಿವೀಸ್ ಯುವ ವೇಗದ ಬೌಲರ್ ಮುಸ್ತಫಿಝುರ್ರಹ್ಮಾನ್(5-22) ಅತ್ಯುತ್ತಮ ಬೌಲಿಂಗ್‌ನ ಹೊರತಾಗಿಯೂ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ 145 ರನ್ ಗಳಿಸಿತು. ಗೆಲ್ಲಲು ಸವಾಲಿನ ಮೊತ್ತ ಪಡೆದ ಬಾಂಗ್ಲಾದೇಶ 15.4 ಓವರ್‌ಗಳಲ್ಲಿ ಕೇವಲ 70 ರನ್‌ಗೆ ಗಂಟುಮೂಟೆ ಕಟ್ಟಿತು.

ಬಾಂಗ್ಲಾದ ಪರ ಬಾಲಂಗೋಚಿ ಶುವಗತ ಹೊಮ್(ಔಟಾಗದೆ 16) ಅಗ್ರ ಸ್ಕೋರರ್ ಎನಿಸಿಕೊಂಡರು. ಮುಹಮ್ಮದ್ ಮಿಥುನ್(11) ಹಾಗೂ ಶಬ್ಬೀರರಹ್ಮಾನ್(12) ಎರಡಂಕೆಯ ಮೊತ್ತ ದಾಖಲಿಸಿದರು. ಉಳಿದವರು ಪೆವಿಲಿಯನ್‌ಗೆ ಪರೇಡ್ ನಡೆಸಿದರು.

ಕಿವೀಸ್ 145/8: ಇದಕ್ಕೆ ಮೊದಲು ಇಲ್ಲಿನ ಈಡನ್ ಗಾರ್ಡನ್ಸ್ ಸ್ಟೇಡಿಯಂನಲ್ಲಿ ಗ್ರೂಪ್-2ರ ಪಂದ್ಯದಲ್ಲಿ ಟಾಸ್ ಜಯಿಸಿದ ನ್ಯೂಝಿಲೆಂಡ್ ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು. ಬಾಂಗ್ಲಾದೇಶದ ಯುವ ವೇಗದ ಬೌಲರ್ ಮುಸ್ತಫಿಝುರ್ರಹ್ಮಾನ್ ಅವರು 5 ವಿಕೆಟ್‌ಗಳನ್ನು ಕಬಳಿಸಿ ಮಿಂಚಿದರು.

ಕಿವೀಸ್‌ನ ಆರಂಭಿಕ ದಾಂಡಿಗರಾದ ನಿಕೊಲ್ಸ್(7), ನಾಯಕ ವಿಲಿಯಮ್ಸನ್(42), ಎಲಿಯಟ್(09)ಸ್ಯಾಂಟರ್(3), ಹಾಗೂ ನಥನ್ ಮೆಕಲಮ್(0) ಅವರುಗಳು ರಹ್ಮಾನ್ ದಾಳಿಗೆ ನಿರುತ್ತರರಾದರು. ಕಿವೀಸ್‌ನ ಪರ ನಾಯಕ ವಿಲಿಯಮ್ಸನ್(42 ರನ್, 32 ಎಸೆತ, 5 ಬೌಂಡರಿ, 1 ಸಿಕ್ಸರ್) ಅಗ್ರ ಸ್ಕೋರರ್ ಎನಿಸಿಕೊಂಡರು. ಮುನ್ರೊ(35) ಹಾಗೂ ರಾಸ್ ಟೇಲರ್(28) ಎರಡಂಕೆಯ ಸ್ಕೋರ್ ದಾಖಲಿಸಿದರು. ಬಾಂಗ್ಲಾದ ಪರ ಅಲ್-ಅಮೀನ್ ಹುಸೈನ್(2-27) 2 ವಿಕೆಟ್ ಪಡೆದಿದ್ದರು.