ಐಪಿಎಲ್: ಸನ್‌ರೈಸರ್ಸ್ ಹೈದರಾಬಾದ್ ಫೈನಲ್‌ಗೆ, ರವಿವಾರ ಆರ್‌ಸಿಬಿ ಎದುರಾಳಿ

ವಾರ್ನರ್ ಏಕಾಂಗಿ ಹೋರಾಟ

ಹೊಸದಿಲ್ಲಿ, ಮೇ 27: ಐಪಿಎಲ್ ಟ್ವೆಂಟಿ-20 ಟೂರ್ನಿಯ ಎರಡನೆ ಕ್ವಾಲಿಫೈಯರ್ ಪಂದ್ಯದಲ್ಲಿ ಡೇವಿಡ್ ವಾರ್ನರ್(93ರನ್, 58 ಎಸೆತ) ಏಕಾಂಗಿ ಹೋರಾಟದ ನೆರವಿನಿಂದ ಗುಜರಾತ್ ಲಯನ್ಸ್ ತಂಡವನ್ನು 4 ವಿಕೆಟ್‌ಗಳಿಂದ ಮಣಿಸಿದ ಸನ್‌ರೈಸರ್ಸ್ ಹೈದರಾಬಾದ್ ತಂಡ ಫೈನಲ್‌ಗೆ ಪ್ರವೇಶಿಸಿದೆ.

 ಈ ವರ್ಷದ ಐಪಿಎಲ್‌ನಲ್ಲಿ ಲಯನ್ಸ್ ವಿರುದ್ಧ ಗೆಲುವಿನ ದಾಖಲೆ ಕಾಯ್ದುಕೊಂಡಿರುವ ಹೈದರಾಬಾದ್ ಬೆಂಗಳೂರಿನಲ್ಲಿ ಮೇ 29 ರಂದು ನಡೆಯಲಿರುವ ಫೈನಲ್ ಫೈಟ್‌ನಲ್ಲಿ ಆತಿಥೇಯ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಎದುರಿಸಲಿದೆ.

ಶುಕ್ರವಾರ ಇಲ್ಲಿನ ಫಿರೋಝ್ ಷಾ ಕೋಟ್ಲಾ ಸ್ಟೇಡಿಯಂನಲ್ಲಿ ಗೆಲ್ಲಲು 163 ರನ್ ಗುರಿ ಪಡೆದ ಹೈದರಾಬಾದ್ 2ನೆ ಓವರ್‌ನಲ್ಲಿ ಲೋಕಲ್ ಹೀರೋ ಶಿಖರ್ ಧವನ್ ವಿಕೆಟ್‌ನ್ನು ಕಳೆದುಕೊಂಡು ಆತಂಕ ಎದುರಿಸಿತ್ತು. 13ನೆ ಓವರ್‌ನಲ್ಲಿ 84 ರನ್‌ಗೆ 5 ವಿಕೆಟ್ ಕಳೆದುಕೊಂಡಿದ್ದ ಹೈದರಾಬಾದ್‌ಗೆ ನಾಯಕ ವಾರ್ನರ್(ಔಟಾಗದೆ 93, 58 ಎಸೆತ, 11 ಬೌಂಡರಿ, 3 ಸಿಕ್ಸರ್) ಕೊನೆಯ ತನಕ ಆಸರೆಯಾಗಿ ನಿಂತು 4 ಎಸೆತಗಳು ಬಾಕಿ ಇರುವಾಗಲೇ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ನಮನ್ ಓಜಾ ಔಟಾದಾಗ ಹೈದರಾಬಾದ್‌ಗೆ 24 ಎಸೆತಗಳಲ್ಲಿ 45 ರನ್ ಅಗತ್ಯವಿತ್ತು. ಆಗ ವಾರ್ನರ್‌ರೊಂದಿಗೆ ಕೈಜೋಡಿಸಿದ ಬಿಪುಲ್ ಶರ್ಮ(ಔಟಾಗದೆ 27,11 ಎಸೆತ, 3 ಸಿಕ್ಸರ್) 7ನೆ ವಿಕೆಟ್‌ಗೆ ಮುರಿಯದ ಜೊತೆಯಾಟದಲ್ಲಿ 46 ರನ್ ಸೇರಿಸಿ ತಂಡದ ಗೆಲುವನ್ನು ಖಾತ್ರಿ ಪಡಿಸಿದರು.

ಗುಜರಾತ್ 162/7: ಆ್ಯರೊನ್ ಫಿಂಚ್(50ರನ್, 32 ಎಸೆತ) ಬಾರಿಸಿದ ಅರ್ಧಶತಕದ ನೆರವಿನಿಂದ ಗುಜರಾತ್ ಲಯನ್ಸ್ ತಂಡ ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಗೆಲುವಿಗೆ 163 ರನ್ ಗುರಿ ನೀಡಿತು.

ಟಾಸ್ ಜಯಿಸಿದ ಹೈದರಾಬಾದ್ ತಂಡದ ನಾಯಕ ಡೇವಿಡ್ ವಾರ್ನರ್ ಗುಜರಾತ್ ತಂಡವನ್ನು ಬ್ಯಾಟಿಂಗ್‌ಗೆ ಆಹ್ವಾನಿಸಿದರು. ಗುಜರಾತ್ ಮೊದಲ ಓವರ್‌ನ ಕೊನೆಯ ಎಸೆತದಲ್ಲಿ ಏಕಲವ್ಯ ದ್ವಿವೇದಿ(5) ವಿಕೆಟ್‌ನ್ನು ಕಳೆದುಕೊಳ್ಳುವುದರೊಂದಿಗೆ ಕಳಪೆ ಆರಂಭ ಪಡೆಯಿತು. ಮೆಕಲಮ್‌ರೊಂದಿಗೆ ಇನಿಂಗ್ಸ್ ಆರಂಭಿಸಿದ್ದ ದ್ವಿವೇದಿಗೆ ಭುವನೇಶ್ವರ ಕುಮಾರ್ ಪೆವಿಲಿಯನ್‌ಗೆ ಕಳುಹಿಸಿದರು.
 3ನೆ ಕ್ರಮಾಂಕದಲ್ಲಿ ಆಡಿದ ನಾಯಕ ಸುರೇಶ್ ರೈನಾ ಕೇವಲ 1 ರನ್ ಗಳಿಸಿ ಬೌಲ್ಟ್ ಬೌಲಿಂಗ್‌ನಲ್ಲಿ ಔಟಾದರು. ಆಗ 3ನೆ ವಿಕೆಟ್‌ಗೆ 44 ರನ್ ಜೊತೆಯಾಟವನ್ನು ನಡೆಸಿದ ದಿನೇಶ್ ಕಾರ್ತಿಕ್(26ರನ್) ಹಾಗೂ ಮೆಕಲಮ್(32 ರನ್, 29 ಎಸೆತ, 5 ಬೌಂಡರಿ) ತಂಡವನ್ನು ಆಧರಿಸಲು ಯತ್ನಿಸಿದರು.

ಆದರೆ, ಕಾರ್ತಿಕ್ ರನೌಟಾಗುವ ಮೂಲಕ ಈ ಜೋಡಿ ಬೇರ್ಪಟ್ಟಿತು.
 ಡ್ವೇಯ್ನ ಸ್ಮಿತ್(1), ಅಲ್ಪ ಮೊತ್ತಕ್ಕೆ ಔಟಾದಾಗ ಲಯನ್ಸ್ ಸ್ಕೋರ್ 5 ವಿಕೆಟ್‌ಗಳ ನಷ್ಟಕ್ಕೆ 83 ರನ್.
6ನೆ ವಿಕೆಟ್‌ಗೆ 51 ರನ್ ಜೊತೆಯಾಟ ನಡೆಸಿದ ಫಿಂಚ್(50 ರನ್, 32 ಎಸೆತ, 7 ಬೌಂಡರಿ, 2 ಸಿಕ್ಸರ್) ಹಾಗೂ ಜಡೇಜ(ಔಟಾಗದೆ 19, 15 ಎಸೆತ, 1 ಬೌಂಡರಿ ) ಗುಜರಾತ್ ಲಯನ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 7 ವಿಕೆಟ್‌ಗಳ ನಷ್ಟಕ್ಕೆ 162 ರನ್ ಗಳಿಸಲು ನೆರವಾದರು.
ಸ್ಕೋರ್ ವಿವರ
ಗುಜರಾತ್ ಲಯನ್ಸ್
20 ಓವರ್‌ಗಳಲ್ಲಿ 162/7
ದ್ವಿವೇದಿ ಸಿ ಬೌಲ್ಟ್ ಬಿ ಕುಮಾರ್ 05
ಮೆಕಲಮ್ ಸಿ ಕುಮಾರ್ ಬಿಪುಲ್ ಶರ್ಮ 32
ಸುರೇಶ್ ರೈನಾ ಎಲ್‌ಬಿಡಬ್ಲು ಬೌಲ್ಟ್ 01
ದಿನೇಶ್ ಕಾರ್ತಿಕ್ ರನೌಟ್ 26
ಫಿಂಚ್ ಬಿ ಕಟ್ಟಿಂಗ್ 50
ಡ್ವೆಯ್ನೆ ಸ್ಮಿತ್ ಸಿ ಧವನ್ ಬಿ ಕಟ್ಟಿಂಗ್ 01
ರವೀಂದ್ರ ಜಡೇಜ ಔಟಾಗದೆ 19
ಡ್ವೇಯ್ನ ಬ್ರಾವೊ ಬಿ ಕುಮಾರ್ 20
ಧವಳ್ ಕುಲಕರ್ಣಿ ಔಟಾಗದೆ 03
ಇತರ 05
ವಿಕೆಟ್ ಪತನ: 1-7, 2-19, 3-63, 4-81, 5-83, 6-134, 7-158.
ಬೌಲಿಂಗ್ ವಿವರ:
ಭುವನೇಶ್ವರ ಕುಮಾರ್ 4-0-27-2
ಟ್ರೆಂಟ್ ಬೌಲ್ಟ್ 4-0-39-1
ಸ್ರಾನ್ 3-0-28-0
ಬಿಪುಲ್ ಶರ್ಮ 3-0-21-1
ಕಟ್ಟಿಂಗ್ 3-0-20-2
ಹೆನ್ರಿಕ್ಸ್ 3-0-27-0.
ಸನ್‌ರೈಸರ್ಸ್ ಹೈದರಾಬಾದ್:
19.2 ಓವರ್‌ಗಳಲ್ಲಿ 163/6
ವಾರ್ನರ್ ಔಟಾಗದೆ 93
ಧವನ್ ರನೌಟ್(ಮೆಕಲಮ್) 00
ಹೆನ್ರಿಕ್ಸ್ ಸಿ ದ್ವಿವೇದಿ ಬಿ ಸ್ಮಿತ್ 11
ಯುವರಾಜ್ ಸಿಂಗ್ ಸಿ ಸ್ಮಿತ್ ಬಿ ಕೌಶಿಕ್ 08
ಹೂಡಾ ಎಲ್‌ಬಿಡಬ್ಲು ಬ್ರಾವೊ 04
ಕಟ್ಟಿಂಗ್ ಸಿ ಕಾರ್ತಿಕ್ ಬಿ ಕೌಶಿಕ್ 08
ನಮನ್ ಓಜಾ ಸಿ ಜಡೇಜ ಬಿ ಬ್ರಾವೊ 10
ಬಿಪುಲ್ ಶರ್ಮ ಔಟಾಗದೆ 27
ಇತರ 02
ವಿಕೆಟ್ ಪತನ: 1-6, 2-33, 3-61, 4-75, 5-84, 6-117.
ಬೌಲಿಂಗ್ ವಿವರ:
 ಪ್ರವೀಣ್ ಕುಮಾರ್ 3.2-0-32-0
ಧವಲ್ ಕುಲಕರ್ಣಿ 4-0-32-0
ಸ್ಮಿತ್ 2-0-29-1
ರೈನಾ 2-0-15-0
ಕೌಶಿಕ್ 4-0-22-2
ಬ್ರಾವೊ 4-0-32-2