ಚೈನಾ ಓಪನ್ : ಪಿ.ವಿ.ಸಿಂಧು ಫೈನಲ್ ಗೆ

ಬೀಜಿಂಗ್, ನ.19:ರಿಯೋ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಜಯಿಸಿದ ಭಾರತದ ಬ್ಯಾಡ್ಮಿಂಟನ್ ಆಟಗಾರ್ತಿ ಪಿ.ವಿ.ಸಿಂಧು ಅವರು ಚೈನಾ ಓಪನ್ ಸೂಪರ್ ಸಿರೀಸ್‌ನ ಮಹಿಳೆಯರ ಸಿಂಗಲ್ಸ್‌ನಲ್ಲಿ ಇಂದು ಫೈನಲ್ ತಲುಪಿದ್ದಾರೆ.
ಪಿ.ವಿ.ಸಿಂಧು ಅವರು ಇಂದು ನಡೆದ ಸೆಮಿಫೈನಲ್‌ನಲ್ಲಿ ದಕ್ಷಿಣ ಕೊರಿಯಾದ ಸಂಗ್ ಜಿ ಹ್ಯೂನ್ ಅವರನ್ನು 11-21, 23-21, 21-19 ಅಂತರದಲ್ಲಿ ಮಣಿಸಿ ಫೈನಲ್ ತಲುಪಿದರು.
82 ನಿಮಿಷಗಳ ಅವಧಿಯಲ್ಲಿ ಇವರ ನಡುವಿನ ಹಣಾಹಣಿ ಮುಗಿಯಿತು.
 ರವಿವಾರ ನಡೆಯಲಿರುವ ಫೈನಲ್‌ನಲ್ಲಿ ಚೀನಾದ ಆಟಗಾರ್ತಿ ಸನ್ ಯೂ ಅವರನ್ನು ಎದುರಿಸಲಿದ್ದಾರೆ.
ಸಿಂಧು ಫೈನಲ್ ತಲುಪುವುದರೊಂದಿಗೆ ಭಾರತ ಮೂರನೆ ಬಾರಿ ಫೈನಲ್ ತಲುಪಿದೆ. 2014ರಲ್ಲಿ ಸೈನಾ ನೆಹ್ವಾಲ್ ಪ್ರಶಸ್ತಿ ಗೆದ್ದುಕೊಂಡಿದ್ದರು. 2015ರಲ್ಲಿ ಸೈನಾ ಫೈನಲ್ ತಲುಪಿದ್ದರೂ, ಲಿ ಕ್ಸೂರಿಯಿ ವಿರುದ್ಧ ಸೋಲು ಅನುಭವಿಸಿ ಎರಡನೆ ಬಾರಿ ಪ್ರಶಸ್ತಿ ಗೆಲ್ಲುವ ಅವಕಾಶ ಕಳೆದುಕೊಂಡಿದ್ದರು. ಈ ಬಾರಿ ಸಿಂಧು ಅವರು ಪ್ರಶಸ್ತಿಗಾಗಿ ಫೈನಲ್‌ನಲ್ಲಿ ಹಣಾಹಣಿ ನಡೆಸಲಿದ್ದಾರೆ.
ಮಾಜಿ ಚಾಂಪಿಯನ್ ಭಾರತದ ಸೈನಾ ನೆಹ್ವಾಲ್ ಅವರು ಚೀನಾ ಓಪನ್‌ನಲ್ಲಿ ಪ್ರಥಮ ಸುತ್ತಿನಲ್ಲೇ ನಿರ್ಗಮಿಸಿದ್ದರು. ಪುರುಷರ ಸಿಂಗಲ್ಸ್‌ನಲ್ಲಿ ಅಜಯ್ ಜಯರಾಮ್ ಅವರು ಕ್ವಾರ್ಟರ್ ಫೈನಲ್‌ನಲ್ಲಿ ಚೆನ್ ಲಾಂಗ್ ವಿರುದ್ಧ ಸೋಲು ಅನುಭವಿಸಿದ್ದರು.