ದೇಶದ ಅತ್ಯಂತ ಎತ್ತರದ ತ್ರಿವರ್ಣ ಧ್ವಜಕ್ಕೆ ಎದುರಾಗಿದೆ ಗಂಭೀರ ಸಮಸ್ಯೆ

ಹೊಸದಿಲ್ಲಿ, ಮಾ.30: ಭಾರತ-ಪಾಕ್ ಗಡಿ ಸಮೀಪ ಹಾರಾಡುತ್ತಿರುವ ದೇಶದ ಅತ್ಯಂತ ಎತ್ತರದ ತ್ರಿವರ್ಣ ಧ್ವಜಕ್ಕೆ ಗಂಭೀರ ಸಮಸ್ಯೆ ಎದುರಾಗಿದ್ದು ಹಲವರ ಮುಖ ಕೆಂಪಾಗಿಸಿದೆ. ಈ ಅತ್ಯಂತ ಎತ್ತರದ ಧ್ವಜಕ್ಕೆ ಅಲ್ಲಿನ ವಾತಾವರಣ ಅನುಕೂಲಕರವಾಗಿಲ್ಲವೆನಿಸುತ್ತದೆ. ಅಲ್ಲಿ ಬೀಸುವ ತೀವ್ರ ಗಾಳಿಯಿಂದ ಈ ಧ್ವಜ ಆಗಾಗ ಹರಿದು ಹೋಗುತ್ತಿದ್ದು ಕಳೆದ ತಿಂಗಳು ಧ್ವಜ ಏರಿಸಿದ ನಂತರ ಇಲ್ಲಿಯವರೆಗೆ ಧ್ವಜವನ್ನು ನಾಲ್ಕು ಬಾರಿ ಬದಲಾಯಿಸಲಾಗಿದೆ.

ಬಹಳಷ್ಟು ಪ್ರಚಾರ ಗಿಟ್ಟಿಸಿ ಈ ಧ್ವಜವನ್ನು ಅತ್ಯಂತ ಎತ್ತರದ ಧ್ವಜಸ್ಥಂಭದಲ್ಲಿ ಹಾರಿಸಲಾಗಿದ್ದರೆ, ಇದೀಗ ಈ ಧ್ವಜ ಆಗಾಗ ಹರಿಯುತ್ತಿರುವುದರಿಂದ ಅದು ದೇಶದ ಗೌರವಕ್ಕೆ ಧಕ್ಕೆ ತಂದಿದೆಯಲ್ಲದೆ ಹಣವೂ ಅನಗತ್ಯ ಖರ್ಚಾಗುತ್ತಿದೆ ಎಂದು ಅಧಿಕಾರಿಗಳು ಹೇಳಲಾರಂಭಿಸಿದ್ದಾರೆ. 106 ಮೀಟರ್ (350 ಅಡಿ) ಎತ್ತರದಲ್ಲಿರುವ ಈ ಧ್ವಜವಿರುವ ಪ್ರದೇಶಕ್ಕಿಂತ 20 ಕಿಮೀ ದೂರವಿರುವ ಲಾಹೋರ್ ನಗರದಿಂದಲೂ ಅದು ಕಾಣಿಸುತ್ತದೆ. ಆದರೆ ಈಗ ಈ ಭಾರತದ ಧ್ವಜ ಆಗಾಗ ಹರಿದು ಹೋಗುತ್ತಿದೆಯೆಂದು ತಿಳಿದು ಪಾಕಿಸ್ತಾನೀಯರು ಒಳಗೊಳಗೇ ಸಂತಸ ಪಡುತ್ತಿರಬಹುದು.

ರಾಷ್ಟ್ರಧ್ವಜ ಹರಿದು ಹೋಗಿದ್ದರೆ ಅದನ್ನು ಹಾಗೆಯೇ ಹಾರಲು ಬಿಡುವುದು ದೇಶದ ಕಾನೂನಿನಂತೆ ಅಪರಾಧ. ಅಂತೆಯೇ ಅದನ್ನು ಮತ್ತೆ ಕೆಳಗಿಳಿಸಿ ಬೇರೊಂದು ಹೊಸ ಧ್ವಜ ಅಳವಡಿಸುವುದೂ ಬಹಳ ಶ್ರಮದಾಯಕ ಕೆಲಸವಾಗಿ ಬಿಟ್ಟಿದೆ. ನಿಜ ಹೇಳಬೇಕೆಂದರೆ ಇಷ್ಟೊಂದು ಎತ್ತರದಲ್ಲಿ ಧ್ವಜಸ್ಥಂಭ ಅಳವಡಿಸುವ ಮುಂಚೆ ಅಲ್ಲಿನ ಹವಾಮಾನ ಪರಿಸ್ಥಿತಿಯನ್ನು ಅಧಿಕಾರಿಗಳು ಅವಲೋಕಿಸುವ ಗೋಜಿಗೇ ಹೋಗಿರಲಿಲ್ಲ. ಇಂತಹ ಎತ್ತರದ ಸ್ಥಳದಲ್ಲಿ ರಾಷ್ಟ್ರಧ್ವಜ ಹಾರಿಸುವ ವಿರುದ್ಧ ತಾನು ಸಲಹೆ ನೀಡಿದ್ದಾಗಿ ಫ್ಲ್ಯಾಗ್ ಫೌಂಡೇಶನ್ ಆಫ್ ಇಂಡಿಯಾ ಅಧ್ಯಕ್ಷ ಕೆ ವಿ ಸಿಂಗ್ ಹೇಳಿದ್ದಾರೆ. ‘‘ನಾವು ಸಣ್ಣ ಧ್ವಜ ಹಾರಿಸುವಂತೆ ಹೇಳಿದ್ದೆವು. ಆದರೆ ಧ್ವಜ ಪಾಕಿಸ್ತಾನದ ಲಾಹೋರ್ ನಗರದಲ್ಲೂ ಕಾಣಿಸಬೇಕೆಂಬ ಉದ್ದೇಶದಿಂದ ಎತ್ತರದಲ್ಲಿ ಹರಿಸಲಾಗಿತ್ತು,’’ ಎಂದು ಅವರು ಹೇಳುತ್ತಾರೆ.

ಹೈದರಾಬಾದ್ ನಗರದಲ್ಲಿರುವ 455 ವರ್ಷ ಹಳೆಯದಾದ ಹುಸೈನ್ ಸಾಗರ್ ಕೆರೆ ಸಮೀಪವಿರುವ 88 ಮೀಟರ್ ಎತ್ತರದ ರಾಷ್ಟ್ರಧ್ವಜ ಕೂಡ ಇದೇ ಸಮಸ್ಯೆಯನ್ನು ಎದುರಿಸುತ್ತಿದೆ. ದೆಹಲಿಯಲ್ಲಿರುವ 63 ಮೀಟರ್ ಎತ್ತರದ ರಾಷ್ಟ್ರಧ್ವಜ ಕಳೆದ ಮೇ ಹಾಗೂ ಜೂನ್ ತಿಂಗಳುಗಳಲ್ಲಿ ಒಟ್ಟು 11 ಬಾರಿ ಹರಿದಿದೆಯೆಂದು ಸಿಂಗ್ ಹೇಳುತ್ತಾರೆ.