ಫ್ರೆಂಚ್ ಓಪನ್: ನಡಾಲ್ ಗೆಲುವಿನ ಆರಂಭ

ಪ್ಯಾರಿಸ್, ಮೇ 27: ‘ಕ್ಲೇ ಕೋರ್ಟ್ ಕಿಂಗ್’ ಖ್ಯಾತಿಯ ರಫೆಲ್ ನಡಾಲ್ ಫ್ರೆಂಚ್ ಓಪನ್ ಟೆನಿಸ್ ಟೂರ್ನಮೆಂಟ್‌ನಲ್ಲಿ ಶುಭಾರಂಭ ಮಾಡಿದ್ದಾರೆ.

ಸೋಮವಾರ ಇಲ್ಲಿ ನಡೆದ ಪುರುಷರ ಸಿಂಗಲ್ಸ್‌ನ ಮೊದಲ ಸುತ್ತಿನ ಪಂದ್ಯದಲ್ಲಿ ನಡಾಲ್ ಜರ್ಮನಿಯ ಕ್ವಾಲಿಫೈಯರ್ ಯಾನಿಕ್ ಹ್ಯಾನ್‌ಮನ್‌ರನ್ನು 6-2, 6-1, 6-3 ಸೆಟ್‌ಗಳಿಂದ ಮಣಿಸಿದ್ದಾರೆ.

11 ಬಾರಿ ಚಾಂಪಿಯನ್ ಆಗಿರುವ ನಡಾಲ್ ಮುಂದಿನ ಸುತ್ತಿನಲ್ಲಿ ಇನ್ನೋರ್ವ ಕ್ವಾಲಿಫೈಯರ್ ಆಟಗಾರನನ್ನು ಎದುರಿಸಲಿದ್ದಾರೆ.

ನಡಾಲ್ ತನ್ನ ನೆಚ್ಚಿನ ಮೈದಾನದಲ್ಲಿ ಸಾಮಾನ್ಯವಾಗಿ ನಿಧಾನಗತಿಯ ಆರಂಭ ಪಡೆಯುತ್ತಾರೆ. ಇಂದು ಅವರು ಪಂದ್ಯದಲ್ಲಿ ಬಿಗಿ ಹಿಡಿತ ಸಾಧಿಸಿದ್ದು, ಅನಗತ್ಯ ತಪ್ಪನ್ನು ಕಡಿಮೆಗೊಳಿಸಿದರು.