ಇತಿಹಾಸದಲ್ಲೇ ಅತಿ ದೊಡ್ಡ ಕ್ರಿಪ್ಟೋ ದರೋಡೆ: 6.3 ಬಿಲಿಯನ್ ಡಾಲರ್ ಕಳವಾಗಿದೆ ಎಂದ ಬೈನಾನ್ಸ್; ಇದು ಹೇಗೆ ನಡೆಯಿತು?

ವಿಶ್ವದ ಅತಿ ದೊಡ್ಡ ಕ್ರಿಪ್ಟೋಕರೆನ್ಸಿ ಎಕ್ಸ್ಚೇಂಜ್ ಸಂಸ್ಥೆಯಾದ ಬೈನಾನ್ಸ್ ನಿಂದ (Binance) ಸುಮಾರು 6.3 ಬಿಲಿಯನ್ ಡಾಲರ್ ಮೌಲ್ಯದ ಹಣವನ್ನು ಹ್ಯಾಕರ್‌ ಗಳು ಕದ್ದಿದ್ದಾರೆ. ಇದು ಸಾರ್ವಕಾಲಿಕ ದಾಖಲೆಯ ಅತಿ ದೊಡ್ಡ ಕ್ರಿಪ್ಟೋ ದರೋಡೆ ಎಂದು ಹೇಳಲಾಗಿದೆ.

ಚೀನಾ ಮೂಲದ ಕೆನಡಾದ ಶ್ರೀಮಂತ ಉದ್ಯಮಿ ಚಾಂಗ್ಪೆಂಗ್ ಝಾವೋ ಸ್ಥಾಪಿಸಿದ ಈ ಸಂಸ್ಥೆಯು ಗುರುವಾರದಿಂದ ಠೇವಣಿ ಮತ್ತು ಹಣ ಹಿಂಪಡೆಯುವಿಕೆ ಸೇವೆಗಳನ್ನು ಸ್ಥಗಿತಗೊಳಿಸಿದೆ. ಆದರೆ, ಗ್ರಾಹಕರ ಹಣ ಸುರಕ್ಷಿತವಾಗಿದೆ ಮತ್ತು ಉಂಟಾಗಿರುವ ಸಂಪೂರ್ಣ ನಷ್ಟವನ್ನು ತಾನೇ ಭರಿಸುವುದಾಗಿ ಸಂಸ್ಥೆ ತಿಳಿಸಿದೆ.

ಅಮೆರಿಕದ ಎರಡು ಬ್ಲಾಕ್‌ ಚೇನ್ ವಿಶ್ಲೇಷಣಾ ಸಂಸ್ಥೆಗಳು ಈ ಸೈಬರ್ ದಾಳಿಯ ಹಿಂದೆ ಉತ್ತರ ಕೊರಿಯಾದ ಕೈವಾಡವಿದೆ ಎಂದು ಆರೋಪಿಸಿವೆ.

►ಏನಿದು ಘಟನೆ?

ಬ್ಲಾಕ್‌ ಚೇನ್ ವಿಶ್ಲೇಷಣಾ ಸಂಸ್ಥೆಗಳಾದ TRM ಲ್ಯಾಬ್ಸ್ (TRM Labs) ಮತ್ತು ಚೈನಾಲಿಸಿಸ್ (Chainalysis) ನೀಡಿದ ಮಾಹಿತಿಯ ಪ್ರಕಾರ, ಗುರುವಾರ ತಡರಾತ್ರಿ ಕೇವಲ 20 ನಿಮಿಷಗಳ ಅವಧಿಯಲ್ಲಿ ಈ ಭಾರಿ ಕಳವು ನಡೆದಿದೆ.

"ಹ್ಯಾಕರ್‌ ಗಳು 10 ಬ್ಲಾಕ್‌ ಚೇನ್‌ ಗಳಲ್ಲಿನ ಬೈನಾನ್ಸ್ ವಾಲೆಟ್‌ ಗಳಿಂದ ಸುಮಾರು 6.36 ಬಿಲಿಯನ್ ಡಾಲರ್ ಹಣವನ್ನು ಬೇರೆಡೆಗೆ ವರ್ಗಾಯಿಸಿದ್ದಾರೆ" ಎಂದು TRM ವರದಿ ಮಾಡಿದೆ.

2025ರ ಫೆಬ್ರವರಿಯಲ್ಲಿ ಬೈಬಿಟ್ (Bybit) ಎಕ್ಸ್ಚೇಂಜ್ ನಿಂದ 1.5 ಬಿಲಿಯನ್ ಡಾಲರ್ ಕದ್ದಿದ್ದೇ ಇದುವರೆಗಿನ ಅತಿ ದೊಡ್ಡ ದರೋಡೆಯಾಗಿತ್ತು. ಈಗ ನಡೆದ ಘಟನೆಯು ಆ ದಾಖಲೆಯನ್ನು ಮುರಿದಿದೆ.

ಕಳುವಾದ ಹಣದಲ್ಲಿ ಸುಮಾರು 3 ಬಿಲಿಯನ್ ಡಾಲರ್ ಮೊತ್ತವನ್ನು ಈಗಾಗಲೇ ಫ್ರೀಝ್ ಮಾಡಲಾಗಿದೆ ಎಂದು ಬೈನಾನ್ಸ್ ತಿಳಿಸಿದೆ. ಇದರಲ್ಲಿ 2.3 ಬಿಲಿಯನ್ ಡಾಲರ್‌ ಗೂ ಹೆಚ್ಚಿನ ಹಣವನ್ನು 'ಸ್ಟೇಬಲ್‌ ಕಾಯಿನ್' ಪೂರೈಕೆದಾರರಾದ ಟೆದರ್ (Tether) ಮತ್ತು ಸರ್ಕಲ್ (Circle) ಸಂಸ್ಥೆಗಳು ಫ್ರೀಝ್ ಮಾಡಿವೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಉಳಿದ 3.3 ಬಿಲಿಯನ್ ಡಾಲರ್ ಹಣಕ್ಕೆ ಏನಾಯಿತು ಎಂಬುದನ್ನು ಬೈನಾನ್ಸ್ ಇನ್ನೂ ಖಚಿತಪಡಿಸಿಲ್ಲ.

ಉಳಿದ ಹಣವನ್ನು ಪತ್ತೆಹಚ್ಚುವ ಮತ್ತು ಫ್ರೀಝ್ ಮಾಡುವ ಕಾರ್ಯ ಮುಂದುವರಿದಿರುವುದರಿಂದ, ಕಳುವಾದ 6.3 ಬಿಲಿಯನ್ ಡಾಲರ್ ಮೊತ್ತವು ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಸಂಸ್ಥೆಯು 'ಎಕ್ಸ್' ಖಾತೆಯಲ್ಲಿ ಎಚ್ಚರಿಸಿದೆ.

►ಈ ದರೋಡೆ ನಡೆಸಿದ್ದು ಯಾರು? ಹೇಗೆ?

ಹಣದ ಚಲನವಲನವನ್ನು ಪತ್ತೆಹಚ್ಚುತ್ತಿರುವ ಸಂಸ್ಥೆಗಳ ಪ್ರಕಾರ, ಉತ್ತರ ಕೊರಿಯಾದ ಹ್ಯಾಕರ್‌ ಗಳು ಈ ದರೋಡೆ ನಡೆಸಿದ್ದಾರೆ.

ಲಜಾರಸ್ ಗ್ರೂಪ್ (Lazarus Group) ಜೊತೆ ಸಂಪರ್ಕ ಹೊಂದಿರುವ ಉತ್ತರ ಕೊರಿಯಾದ 'ಟ್ರೇಡರ್ಟ್ರೇಟರ್' (TraderTraitor) ಎಂಬ ಹ್ಯಾಕಿಂಗ್ ತಂಡವೇ ಈ ದಾಳಿ ನಡೆಸಿದೆ ಎಂದು TRM ಸಂಸ್ಥೆ 'ಹೆಚ್ಚಿನ ವಿಶ್ವಾಸದೊಂದಿಗೆ' ಅಂದಾಜಿಸಿದೆ.

ಕೌನ್ಸಿಲ್ ಆನ್ ಫಾರಿನ್ ರಿಲೇಶನ್ಸ್ (CFR) ಪ್ರಕಾರ, ಲಜಾರಸ್ ಗ್ರೂಪ್ ಮುಖ್ಯವಾಗಿ ದಕ್ಷಿಣ ಕೊರಿಯಾದ ಸಂಸ್ಥೆಗಳು ಮತ್ತು ಹಿತಾಸಕ್ತಿಗಳನ್ನು ಗುರಿಯಾಗಿಸಿಕೊಂಡು ಮಾಹಿತಿ ಕದಿಯುವುದು, ಅಡ್ಡಿಪಡಿಸುವುದು ಮತ್ತು ವಿನಾಶಕಾರಿ ಸೈಬರ್ ದಾಳಿಗಳನ್ನು ನಡೆಸುತ್ತದೆ.

ಇದರ ಜೊತೆಗೆ, ಆರ್ಥಿಕ ಲಾಭಕ್ಕಾಗಿ ಕ್ರಿಪ್ಟೋಕರೆನ್ಸಿ ಎಕ್ಸ್ಚೇಂಜ್ಗಳನ್ನು ಗುರಿಯಾಗಿಸಿಕೊಂಡು ಸೈಬರ್ ಕಾರ್ಯಾಚರಣೆಗಳನ್ನು ನಡೆಸುತ್ತದೆ ಎಂದು ಸಂಸ್ಥೆ ತಿಳಿಸಿದೆ.

ಉತ್ತರ ಕೊರಿಯಾದ ಮುಖ್ಯ ಗೂಢಚರ್ಯೆ ವಿಭಾಗದ ನಿಯಂತ್ರಣದಲ್ಲಿ ಲಜಾರಸ್ ಗ್ರೂಪ್ ಕಾರ್ಯನಿರ್ವಹಿಸುತ್ತಿದೆ ಎಂದು ಆರೋಪಿಸಿ, 2019ರಲ್ಲಿ ಅಮೆರಿಕದ ಖಜಾನೆ ಇಲಾಖೆಯು ಇದರ ಮೇಲೆ ನಿರ್ಬಂಧ ವಿಧಿಸಿತ್ತು. ಆದರೆ, ಉತ್ತರ ಕೊರಿಯಾ ಹ್ಯಾಕಿಂಗ್ನಲ್ಲಿ ತನ್ನ ಪಾತ್ರವನ್ನು ನಿರಂತರವಾಗಿ ನಿರಾಕರಿಸುತ್ತಾ ಬಂದಿದೆ.

ಚೈನಾಲಿಸಿಸ್ ಸಂಸ್ಥೆಯೂ ಇದೇ ತೀರ್ಮಾನಕ್ಕೆ ಬಂದಿದೆ.

2025ರ ಬೈಬಿಟ್ (Bybit) ಹ್ಯಾಕಿಂಗ್‌ ಗೂ ಇದೇ ಹ್ಯಾಕಿಂಗ್ ತಂಡ ಕಾರಣ ಎಂದು ಎಫ್ಬಿಐ (FBI) ಆರೋಪಿಸಿತ್ತು.

ಬೈಬಿಟ್ ಹ್ಯಾಕಿಂಗ್ ಮಾದರಿಯಲ್ಲೇ, ಹ್ಯಾಕರ್‌ ಗಳು ಬೈನಾನ್ಸ್ ವಾಲೆಟ್‌ ಗಳಲ್ಲಿದ್ದ ಹಣವನ್ನು ತಮ್ಮ ನಿಯಂತ್ರಣದಲ್ಲಿದ್ದ ವಾಲೆಟ್‌ ಗಳಿಗೆ ವರ್ಗಾಯಿಸುವಂತೆ ಸೂಚನೆ ನೀಡಿದ್ದಾರೆ ಎಂದು TRM ಹೇಳಿದೆ.

ಆದರೆ, ಬೈನಾನ್ಸ್ ಈ ವಿಷಯದಲ್ಲಿ ಹೆಚ್ಚು ಎಚ್ಚರಿಕೆಯ ನಿಲುವು ತಳೆದಿದೆ. "ನಮ್ಮ ತನಿಖೆಯಲ್ಲಿ ಇದುವರೆಗೆ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯ ಹೆಸರನ್ನು ಖಚಿತಪಡಿಸಿಲ್ಲ" ಎಂದು ಸಂಸ್ಥೆಯ ಸಹ-ಸಿಇಒ ರಿಚರ್ಡ್ ಟೆಂಗ್ 'ಎಕ್ಸ್' ಖಾತೆಯಲ್ಲಿ ತಿಳಿಸಿದ್ದಾರೆ.

ತಮ್ಮ ಸಂಸ್ಥೆಯ ಎಂಜಿನಿಯರ್ ಒಬ್ಬರ ಲ್ಯಾಪ್ಟಾಪ್ ಹ್ಯಾಕ್ ಆಗಿದ್ದೇ ಈ ಭದ್ರತಾ ಲೋಪಕ್ಕೆ ಕಾರಣವಾಗಿರಬಹುದು ಎಂದು ಸಂಸ್ಥೆ ಆರಂಭದಲ್ಲಿ ಹೇಳಿತ್ತು. ಆದರೆ, ಶುಕ್ರವಾರ ನಡೆದ ಮುಂದಿನ ತನಿಖೆಯಲ್ಲಿ "ಇನ್ನಷ್ಟು ಭದ್ರತಾ ಲೋಪದ ಹಂತಗಳು" ಪತ್ತೆಯಾಗಿವೆ ಎಂದು ತಿಳಿಸಿದೆ.

ಕ್ರಿಪ್ಟೋ ವಾಲೆಟ್ ಅನ್ನು ನಿಯಂತ್ರಿಸುವ ಡಿಜಿಟಲ್ ಪಾಸ್ವರ್ಡ್ ('ಪ್ರೈವೇಟ್ ಕೀ') ಸೋರಿಕೆಯಾಗಿದೆ ಎಂಬುದಕ್ಕೆ ಯಾವುದೇ ಸಾಕ್ಷಿ ಸಿಕ್ಕಿಲ್ಲ ಎಂದು ಬೈನಾನ್ಸ್ ಹೇಳಿದೆ.

ಆದರೆ, ಕನಿಷ್ಠ ಎರಡು ಬೈನಾನ್ಸ್ ವಾಲೆಟ್ ಗಳ 'ಪ್ರೈವೇಟ್ ಕೀ'ಗಳನ್ನು ಹ್ಯಾಕರ್‌ ಗಳು ಪಡೆದಿರುವ ಸಾಧ್ಯತೆಯಿದೆ ಎಂದು ಜಪಾನ್ನ ಟೋಕಿಯೊದಲ್ಲಿರುವ 'ಮೌಂಟ್ ಗಾಕ್ಸ್' ಎಕ್ಸ್ಚೇಂಜ್ನ ಮಾಜಿ ಮುಖ್ಯಸ್ಥ ಮಾರ್ಕ್ ಕರ್ಪೆಲೆಸ್ ರಾಯಿಟರ್ಸ್ಗೆ ತಿಳಿಸಿದ್ದಾರೆ.

►ಈ ದಾಳಿಯ ಉದ್ದೇಶವೇನಾಗಿತ್ತು?

ಹಣ ದೋಚುವುದೇ ಇದರ ಉದ್ದೇಶ.

ಉತ್ತರ ಕೊರಿಯಾ ಕ್ರಿಪ್ಟೋ ಕಳವಿನಲ್ಲಿ ತನ್ನ ಪಾತ್ರವನ್ನು ನಿರಾಕರಿಸುತ್ತಾ ಬಂದಿದ್ದರೂ, ಪ್ಯೊಂಗ್ಯಾಂಗ್ಗೆ (ಉತ್ತರ ಕೊರಿಯಾದ ರಾಜಧಾನಿ) ಇದು ಅಗತ್ಯ ವಿದೇಶಿ ವಿನಿಮಯದ ಮೂಲವಾಗಿದೆ. ವಿಶ್ವಸಂಸ್ಥೆಯ ನಿರ್ಬಂಧಕ್ಕೆ ಒಳಗಾಗಿರುವ ಅಲ್ಲಿನ ಆರ್ಥಿಕತೆಗೆ ಬೆಂಬಲ ನೀಡಲು ಹಾಗೂ ಅಣ್ವಸ್ತ್ರ ಕಾರ್ಯಕ್ರಮಕ್ಕೆ ಹಣಕಾಸು ಒದಗಿಸಲು ಇದು ನೆರವಾಗುತ್ತಿದೆ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.

2022ರ ಡಿಸೆಂಬರ್‌ ನಲ್ಲಿ ದಕ್ಷಿಣ ಕೊರಿಯಾದ ಗೂಢಚರ್ಯೆ ಸಂಸ್ಥೆ ನೀಡಿದ ಅಂದಾಜಿನ ಪ್ರಕಾರ, ಉತ್ತರ ಕೊರಿಯಾದ ಹ್ಯಾಕರ್‌ ಗಳು ಐದು ವರ್ಷಗಳಲ್ಲಿ ಸುಮಾರು 1.5 ಟ್ರಿಲಿಯನ್ ವಾನ್ (1.1 ಬಿಲಿಯನ್ ಡಾಲರ್) ಮೌಲ್ಯದ ಕ್ರಿಪ್ಟೋ ಮತ್ತು ಇತರ ಡಿಜಿಟಲ್ ಆಸ್ತಿಗಳನ್ನು ಕದ್ದಿದ್ದಾರೆ.

"ಉತ್ತರ ಕೊರಿಯಾ ಈ ಪ್ರಮಾಣದಲ್ಲಿ ಹಣವನ್ನು ಕದ್ದಾಗ, ಆ ಹಣವು ಆಯುಧಗಳ ತಯಾರಿಕೆ ಮತ್ತು ಇತರ ಅಪಾಯಕಾರಿ ಚಟುವಟಿಕೆಗಳಿಗೆ ಬಳಕೆಯಾಗುತ್ತದೆ. ಹೀಗಾಗಿ, ಇದು ಕೇವಲ ಕ್ರಿಪ್ಟೋ ಕಳವಿನ ವಿಷಯವಲ್ಲ; ಬದಲಿಗೆ ಜಾಗತಿಕ ಭದ್ರತೆಯ ಸಮಸ್ಯೆಯಾಗಿದೆ" ಎಂದು TRM ಸಂಸ್ಥೆಯ ಜಾಗತಿಕ ನೀತಿ ವಿಭಾಗದ ಮುಖ್ಯಸ್ಥ ಅರಿ ರೆಡ್ ಬೋರ್ಡ್ ಅಲ್ ಜಝೀರಾಗೆ ತಿಳಿಸಿದ್ದಾರೆ.

►ಕ್ರಿಪ್ಟೋ ಮಾರುಕಟ್ಟೆಯ ಮೇಲೆ ಇದು ಬೀರುವ ಪರಿಣಾಮವೇನು?

ಆರಂಭಿಕ ಆಘಾತದ ನಂತರ ಮಾರುಕಟ್ಟೆ ಚೇತರಿಸಿಕೊಂಡಿದೆಯಾದರೂ, ಕ್ರಿಪ್ಟೋ ಬೆಲೆಗಳು ಕುಸಿದಿವೆ.

ಬಿಟ್ಕಾಯಿನ್ ಮೌಲ್ಯವು ಆರು ವಾರಗಳ ಕನಿಷ್ಠ ಮಟ್ಟವಾದ 76,368 ಡಾಲರ್‌ ಗೆ ತಲುಪಿದೆ. ಈಥರ್ (Ether) ಮೌಲ್ಯವು ಶೇ. 3ಕ್ಕಿಂತ ಹೆಚ್ಚು ಕುಸಿದು, ಎರಡು ತಿಂಗಳ ಕನಿಷ್ಠ ಮಟ್ಟವಾದ 2,178 ಡಾಲರ್‌ ಗೆ ತಲುಪಿದೆ.

ತನ್ನ ಮೇಲೆ ಯಾವುದೇ ಪರಿಣಾಮ ಬೀರಿಲ್ಲ ಎಂದು ಸ್ಪಷ್ಟಪಡಿಸಿದ ಕಾಯಿನ್ಬೇಸ್ (Coinbase) ಕ್ರಿಪ್ಟೋ ಎಕ್ಸ್ಚೇಂಜ್ ಸಂಸ್ಥೆಯ ಷೇರುಗಳು ಶೇ. 4.8ರಷ್ಟು ಕುಸಿದಿವೆ.

ಅಮೆರಿಕದ ಹೆಚ್ಚಿನ ಬಡ್ಡಿದರಗಳು ಮತ್ತು ಎಕ್ಸ್ಚೇಂಜ್-ಟ್ರೇಡೆಡ್ ಫಂಡ್ (ETF) ಖರೀದಿದಾರರಿಂದ ಬೇಡಿಕೆ ಕಡಿಮೆಯಾಗಿದ್ದರಿಂದ ಕ್ರಿಪ್ಟೋ ಮಾರುಕಟ್ಟೆ ಈಗಾಗಲೇ ಒತ್ತಡದಲ್ಲಿತ್ತು ಎಂದು ವಿಶ್ಲೇಷಕರು ರಾಯಿಟರ್ಸ್ಗೆ ತಿಳಿಸಿದ್ದಾರೆ.

ಬೈನಾನ್ಸ್ ಸಂಸ್ಥೆಯು 2018ರಲ್ಲಿ ಗ್ರಾಹಕರ ಸುರಕ್ಷತೆಗಾಗಿ ಸಂಪೂರ್ಣವಾಗಿ ಬಿಟ್ಕಾಯಿನ್ ರೂಪದಲ್ಲಿ ಇರಿಸಿದ್ದ 1 ಬಿಲಿಯನ್ ಡಾಲರ್ ತುರ್ತು ನಿಧಿಗಿಂತ (SAFU), ಈ ಕಳವಾದ ಮೊತ್ತವು ಆರಕ್ಕೂ ಹೆಚ್ಚು ಪಟ್ಟು ದೊಡ್ಡದಾಗಿದೆ.

ಆದರೆ, ಸಂಸ್ಥೆಯ ಸ್ವಂತ ನಿಧಿಯಿಂದ ಉಂಟಾದ ನಷ್ಟವನ್ನು ಭರಿಸಲಾಗುವುದು ಎಂದು ಸಹ-ಸಿಇಒ ರಿಚರ್ಡ್ ಟೆಂಗ್ ಸ್ಪಷ್ಟಪಡಿಸಿದ್ದಾರೆ.

►ಕ್ರಿಪ್ಟೋ ಮೂಲತಃ ಅಭದ್ರ ಹೂಡಿಕೆಯೇ?

ಇತ್ತೀಚಿನ ಹ್ಯಾಕಿಂಗ್ ಘಟನೆಯು ಒಂದು ಪ್ರಮುಖ ದೌರ್ಬಲ್ಯವನ್ನು ಎತ್ತಿ ತೋರಿಸಿದೆ. ಗ್ರಾಹಕರ ಡಿಜಿಟಲ್ ಆಸ್ತಿಗಳನ್ನು ತಮ್ಮಲ್ಲಿಟ್ಟುಕೊಳ್ಳುವ ಬೃಹತ್ ಕೇಂದ್ರೀಕೃತ ಎಕ್ಸ್ಚೇಂಜ್ ಗಳು (Centralised Exchanges) ಪ್ರಮುಖ ಸವಾಲಾಗಿ ಪರಿಣಮಿಸಿವೆ.

"ಕೇಂದ್ರೀಕೃತ ಎಕ್ಸ್ಚೇಂಜ್ ನಲ್ಲಿ ಇರಿಸಲಾದ ಯಾವುದೇ ಆಸ್ತಿಯ ಭದ್ರತೆಯು ಆ ಸಂಸ್ಥೆಯ ಭದ್ರತೆಯನ್ನೇ ಅವಲಂಬಿಸಿರುತ್ತದೆ. ಎಕ್ಸ್ಚೇಂಜ್ ಎಷ್ಟು ದೊಡ್ಡದೋ, ಹ್ಯಾಕರ್ ಗಳ ಕಣ್ಣು ಅದರ ಮೇಲಿರುವ ಸಾಧ್ಯತೆಯೂ ಅಷ್ಟೇ ಹೆಚ್ಚು" ಎಂದು ಸಿಡ್ನಿಯ ಮ್ಯಾಕ್ವಾರಿ ವಿಶ್ವವಿದ್ಯಾಲಯದ ಕ್ರಿಪ್ಟೋ ಮಾರುಕಟ್ಟೆ ತಜ್ಞ ಶಾನ್ ಫೋಲಿ ಅಲ್ ಜಝೀರಾಗೆ ತಿಳಿಸಿದ್ದಾರೆ.

ಅಪರಾಧ ಮತ್ತು ಸೈಬರ್ ವಿಮಾ ಪಾಲಿಸಿಗಳು ಹೆಚ್ಚಾಗಿ ಕಳುವಾದ ಕ್ರಿಪ್ಟೋಕರೆನ್ಸಿಗೆ ರಕ್ಷಣೆ ನೀಡುವುದಿಲ್ಲ. ಕ್ರಿಪ್ಟೋ ವಿಮೆಯು ಕೆಲವು ನಿರ್ದಿಷ್ಟ ವಿಮಾ ಸಂಸ್ಥೆಗಳಿಗೆ ಮಾತ್ರ ಸೀಮಿತವಾಗಿದ್ದು, ಅತ್ಯಂತ ಕಡಿಮೆ ರಕ್ಷಣೆ ನೀಡುತ್ತದೆ.

ಮಾರುಕಟ್ಟೆಯಲ್ಲಿ ಕಳವು ಪ್ರಕರಣಗಳು ನಿರಂತರವಾಗಿ ನಡೆಯುತ್ತಿವೆ. TRM ಸಂಸ್ಥೆಯ 2026ರ ಕ್ರಿಪ್ಟೋ ಅಪರಾಧ ವರದಿಯ ಪ್ರಕಾರ, 2025ರ ಒಂದೇ ವರ್ಷದಲ್ಲಿ ನಡೆದ ಸುಮಾರು 150 ಸೈಬರ್ ದಾಳಿಗಳಲ್ಲಿ ಹ್ಯಾಕರ್‌ ಗಳು 2.87 ಬಿಲಿಯನ್ ಡಾಲರ್ ಮೌಲ್ಯದ ಕ್ರಿಪ್ಟೋ ಹಣವನ್ನು ದೋಚಿದ್ದಾರೆ.

ಸ್ವತಃ ಬೈನಾನ್ಸ್ ಸಂಸ್ಥೆಯೂ ಕಾನೂನು ಸಂಕಷ್ಟಗಳನ್ನು ಎದುರಿಸಿದೆ. ಸಂಸ್ಥೆಯ ವೇದಿಕೆಯಲ್ಲಿ ಹಣಕಾಸು ಅಕ್ರಮ ತಡೆಯಲು ವಿಫಲವಾದ ಆರೋಪದ ಮೇಲೆ, ಅದರ ಸಂಸ್ಥಾಪಕ ಚಾಂಗ್ಪೆಂಗ್ ಝಾವೋ 2023ರಲ್ಲಿ ಅಪರಾಧವನ್ನು ಒಪ್ಪಿಕೊಂಡಿದ್ದರು. 2025ರಲ್ಲಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಕ್ಷಮಾದಾನ ನೀಡಿದ್ದರು.

ಕಾನೂನು ಜಾರಿ ಸಂಸ್ಥೆಗಳೊಂದಿಗೆ ಸಮನ್ವಯದಿಂದ ಕೆಲಸ ಮಾಡುತ್ತಿದ್ದು, 45 ಗಂಟೆಗಳ ಒಳಗೆ ಹಣ ಹಿಂಪಡೆಯುವಿಕೆ ಸೇವೆಯನ್ನು ಮತ್ತೆ ಪ್ರಾರಂಭಿಸುವ ಗುರಿ ಹೊಂದಿರುವುದಾಗಿ ಬೈನಾನ್ಸ್ ಶುಕ್ರವಾರ ತಿಳಿಸಿದೆ.

ಸೌಜನ್ಯ: Aljazeera.com