ಹಬ್ಬದ ಋತುವಿನಲ್ಲಿ ಶಾಪಿಂಗ್? ಸೈಬರ್ ವಂಚನೆಗಳ ಬಗ್ಗೆ ಎಚ್ಚರ!

ಹಬ್ಬದ ಸಂದರ್ಭದಲ್ಲಿ ವಿತರಣಾ ಸಿಬ್ಬಂದಿ, ಬ್ಯಾಂಕ್ ಪ್ರತಿನಿಧಿಗಳು ಮತ್ತು ಗ್ರಾಹಕ ಸೇವಾ ಏಜೆಂಟ್ ಗಳ ಸೋಗಿನಲ್ಲಿ ಬರುವ ವಂಚನೆಯ ಕರೆಗಳ ಬಗ್ಗೆ ಜಾಗರೂಕರಾಗಿರಬೇಕು.

ಪರಿಪೂರ್ಣ ದೀಪಾವಳಿ ಉಡುಗೊರೆಯನ್ನು ಹುಡುಕುವ ಭರದಲ್ಲಿ ಸಾಮಾಜಿಕ ಮಾಧ್ಯಮಗಳಲ್ಲಿ ಸ್ಕ್ರಾಲ್ ಮಾಡುವಾಗ ವರ್ಣರಂಜಿತ ಜಾಹೀರಾತುಗಳು ಕಣ್ಣಿಗೆ ಬೀಳುತ್ತವೆ. ಮಾರಾಟಗಾರರು ಆಕರ್ಷಕ ಹಬ್ಬದ ರಿಯಾಯಿತಿಗಳು ಅಥವಾ ಒಂದು ವಸ್ತು ಖರೀದಿಸಿದರೆ ಮತ್ತೊಂದು ಉಚಿತ ಎಂಬ ಕೊಡುಗೆಗಳನ್ನು ಘೋಷಿಸುತ್ತಾರೆ. ಆದರೆ ಇಂತಹ ಆಕರ್ಷಕ ಕೊಡುಗೆಗಳು ಎಚ್ಚರಿಕೆಯಿಂದ ಹೆಣೆದ ಸೈಬರ್ ವಂಚನೆಯ ಬಲೆಯಾಗಿರಬಹುದು.

ಕೆಲವೊಮ್ಮೆ ಖರೀದಿ ಮೊತ್ತದ ಒಂದು ಭಾಗವನ್ನು ಹಿಂದಿರುಗಿಸುವುದಾಗಿ ಹೇಳುವ ಕ್ಯಾಶ್‌ ಬ್ಯಾಕ್ ಕೊಡುಗೆಗಳು ಮೋಸದ ಪಾವತಿ ಲಿಂಕ್‌ ಗಳಿಗೆ ಕರೆದೊಯ್ಯಬಹುದು. ಇಂತಹ ಲಿಂಕ್‌ ಗಳಲ್ಲಿ UPI ಪಿನ್ ನಮೂದಿಸುವುದು ಅಥವಾ ಬ್ಯಾಂಕಿಂಗ್ ವಿವರಗಳನ್ನು ಹಂಚಿಕೊಳ್ಳುವುದು ನಿಮ್ಮ ಖಾತೆಯಿಂದ ಹಣ ಕಡಿತವಾಗಲು ಕಾರಣವಾಗಬಹುದು.

►ನಕಲಿ ಶಾಪಿಂಗ್ ಲಿಂಕ್‌ ಗಳು

ವಂಚಕರು ನಕಲಿ ಶಾಪಿಂಗ್ ಆ್ಯಪ್ ಗಳ ಲಿಂಕ್‌ ಗಳನ್ನು ಕೂಡ ಹರಡಬಹುದು. ಹೆಚ್ಚುವರಿ ರಿಯಾಯಿತಿ ಅಥವಾ ದೀಪಾವಳಿ ವಿಶೇಷ ಕೊಡುಗೆಗಳನ್ನು ನೀಡುವುದಾಗಿ ಆಮಿಷವೊಡ್ಡಬಹುದು. ಪರಿಶೀಲಿಸದ ಮೂಲಗಳಿಂದ ಇಂತಹ ಆ್ಯಪ್‌ ಗಳನ್ನು ಡೌನ್‌ ಲೋಡ್ ಮಾಡಿಕೊಳ್ಳುವುದರಿಂದ ಬಳಕೆದಾರರು ಮಾಲ್‌ ವೇರ್ ದಾಳಿಗೆ ತುತ್ತಾಗಬಹುದು. ಇದರಿಂದ ವಂಚಕರು ಸೂಕ್ಷ್ಮ ಮಾಹಿತಿಯನ್ನು ಕದಿಯಲು, ಬಳಕೆದಾರರ ಚಟುವಟಿಕೆಗಳ ಮೇಲೆ ನಿಗಾ ಇರಿಸಲು ಅಥವಾ ಸಾಧನಗಳ ನಿಯಂತ್ರಣ ಪಡೆಯಲು ಸಾಧ್ಯವಾಗಬಹುದು.

ವಾಟ್ಸ್ಆ್ಯಪ್‌ ನಂತಹ ಪರಿಚಿತ ವೇದಿಕೆಗಳ ಮೂಲಕವೂ ಇಂತಹ ವಂಚನೆಗಳು ನಡೆಯುತ್ತವೆ. ಪ್ರಧಾನಿಯವರ ಹೆಸರಿನಲ್ಲಿ ಕೇಂದ್ರ ಸರ್ಕಾರ 8,000 ರೂ. ದೀಪಾವಳಿ ಬೋನಸ್ ನೀಡುತ್ತಿದೆ ಎಂದು ಹೇಳಿಕೊಳ್ಳುವ ನಕಲಿ ಸಂದೇಶ ಇದಕ್ಕೊಂದು ಉದಾಹರಣೆ. ಸರ್ಕಾರಿ ಸೌಲಭ್ಯದ ಆಮಿಷವೊಡ್ಡಿ ಪರಿಶೀಲಿಸದ ಲಿಂಕ್ ಗಳ ಮೇಲೆ ಕ್ಲಿಕ್ ಮಾಡುವಂತೆ ಜನರನ್ನು ಪ್ರೇರೇಪಿಸುವುದು ಇಂತಹ ಸಂದೇಶಗಳ ಉದ್ದೇಶ.

►ಸಾಮಾಜಿಕ ಮಾಧ್ಯಮಗಳ ಮೂಲಕ ವಂಚನೆ

ಸಾಮಾಜಿಕ ಮಾಧ್ಯಮಗಳು ಮಾರುಕಟ್ಟೆಗಳಾಗಿ ರೂಪುಗೊಳ್ಳುತ್ತಿರುವುದರೊಂದಿಗೆ ಹಬ್ಬದ ಶಾಪಿಂಗ್ ಚಟುವಟಿಕೆಗಳೂ ಹೆಚ್ಚುತ್ತಿವೆ. ಆನ್‌ ಲೈನ್ ಖರೀದಿ ಮತ್ತು ಡಿಜಿಟಲ್ ಪಾವತಿಗಳ ಹೆಚ್ಚಳವನ್ನು ವಂಚಕರು ತಮ್ಮ ಅನುಕೂಲಕ್ಕೆ ಬಳಸಿಕೊಳ್ಳುತ್ತಿದ್ದಾರೆ.

ಈ ಸಂದರ್ಭದಲ್ಲಿ ನಕಲಿ ಶಾಪಿಂಗ್ ವೆಬ್‌ ಸೈಟ್‌ ಗಳು, ಫಿಶಿಂಗ್ ಲಿಂಕ್‌ ಗಳು, ನಕಲಿ ವಿತರಣಾ ಸಂದೇಶಗಳು ಮತ್ತು ಅನುಕರಣೆ ಕರೆಗಳು ಹೆಚ್ಚಾಗುತ್ತವೆ. ಹುಡುಕಾಟ ಫಲಿತಾಂಶಗಳಲ್ಲಿ ಕಾಣಿಸಿಕೊಳ್ಳುವ ನಕಲಿ ಗ್ರಾಹಕ ಸೇವಾ ದೂರವಾಣಿ ಸಂಖ್ಯೆಗಳೂ ಈ ವಂಚನೆಯ ಭಾಗವಾಗಿರುತ್ತವೆ.

ಗ್ರಾಹಕರು ವಿಶ್ವಾಸಾರ್ಹ ವೆಬ್‌ ಸೈಟ್‌ ಗಳು ಮತ್ತು ಅಧಿಕೃತ ಆ್ಯಪ್ ಗಳ ಮೂಲಕ ಮಾತ್ರ ಶಾಪಿಂಗ್ ಮಾಡಬೇಕು. ಅಪರಿಚಿತ ಮೂಲಗಳಿಂದ ಬರುವ ಸಂದೇಶಗಳಲ್ಲಿನ ಲಿಂಕ್‌ ಗಳನ್ನು ತೆರೆಯಬಾರದು. ಒಟಿಪಿ, ಪಿನ್, ಪಾಸ್ ವರ್ಡ್ ಅಥವಾ ಕಾರ್ಡ್ ವಿವರಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬಾರದು.

►ಗುರುತಿಸುವುದು ಕಷ್ಟವಾಗುತ್ತಿರುವ AI ವಂಚನೆ

ಆನ್‌ ಲೈನ್ ವಂಚನೆಗಳು ದಿನದಿಂದ ದಿನಕ್ಕೆ ಹೆಚ್ಚು ಅತ್ಯಾಧುನಿಕವಾಗುತ್ತಿರುವುದು ಮತ್ತೊಂದು ಕಳವಳಕಾರಿ ಸಂಗತಿ. ವಂಚಕರು ಕೃತಕ ಬುದ್ಧಿಮತ್ತೆ (AI) ಮತ್ತು ಡೇಟಾ ಸೋರಿಕೆಯ ಮೂಲಕ ಸಂಗ್ರಹಿಸಿದ ವೈಯಕ್ತಿಕ ಮಾಹಿತಿಯನ್ನು ಬಳಸಿಕೊಂಡು ಮೋಸದ ಸಂದೇಶಗಳು, ವೆಬ್‌ ಸೈಟ್‌ ಗಳು ಮತ್ತು ಪಾವತಿ ಮನವಿಗಳನ್ನು ಹೆಚ್ಚು ನೈಜವಾಗಿ ಕಾಣುವಂತೆ ರೂಪಿಸುತ್ತಿದ್ದಾರೆ.

ತುರ್ತು ಪರಿಸ್ಥಿತಿಯನ್ನು ಸೃಷ್ಟಿಸುವ ಅಥವಾ ತಕ್ಷಣ ನಿರ್ಧಾರ ಕೈಗೊಳ್ಳುವಂತೆ ಒತ್ತಡ ಹೇರುವ ಸಂದೇಶಗಳ ಬಗ್ಗೆ ವಿಶೇಷ ಎಚ್ಚರಿಕೆ ವಹಿಸಬೇಕು. ಕೊಡುಗೆಗಳು ಮತ್ತು ಪಾವತಿ ಮನವಿಗಳ ಸತ್ಯಾಸತ್ಯತೆಯನ್ನು ಬ್ರ್ಯಾಂಡ್ಗಳ ಅಧಿಕೃತ ವೆಬ್‌ ಸೈಟ್‌ ಗಳು ಅಥವಾ ಆ್ಯಪ್ ಗಳ ಮೂಲಕವೇ ಪರಿಶೀಲಿಸಬೇಕು. ಅಪರಿಚಿತ ಸಂದೇಶಗಳ ಮೂಲಕ ಕಳುಹಿಸಲಾದ ಫೈಲ್ಗಳು ಅಥವಾ ಆ್ಯಪ್‌ ಗಳನ್ನು ಡೌನ್‌ ಲೋಡ್ ಮಾಡಿಕೊಳ್ಳಬಾರದು.

►ಹಬ್ಬದ ಋತುವಿನಲ್ಲಿ ವಂಚಕರಿಗೆ ಏಕೆ ಹೆಚ್ಚು ಅವಕಾಶ?

ಡಿಜಿಟಲ್ ವಹಿವಾಟುಗಳ ಹೆಚ್ಚಳ, ಸೀಮಿತ ಅವಧಿಯ ಕೊಡುಗೆಗಳು ಮತ್ತು ಅಪರಿಚಿತ ಮಾರಾಟಗಾರರೊಂದಿಗಿನ ಸಂವಹನಗಳು ಹಬ್ಬದ ಋತುವನ್ನು ವಂಚಕರಿಗೆ ಹೆಚ್ಚು ಅನುಕೂಲಕರವಾಗಿಸಿವೆ.

ಈ ಅವಧಿಯಲ್ಲಿ ಗ್ರಾಹಕರು ಹೆಚ್ಚಿನ ಮೊತ್ತದ ಡಿಜಿಟಲ್ ಪಾವತಿಗಳನ್ನು ಮಾಡುತ್ತಾರೆ. ರಾಜ್ಯ ಮತ್ತು ರಾಷ್ಟ್ರೀಯ ಗಡಿಗಳಾಚೆ ಇರುವ ಕುಟುಂಬ ಸದಸ್ಯರಿಗೆ ಹಣ ಕಳುಹಿಸುತ್ತಾರೆ. ಅಪರಿಚಿತ ಮಾರಾಟಗಾರರು ಮತ್ತು ಆನ್‌ ಲೈನ್ ವೇದಿಕೆಗಳೊಂದಿಗೆ ವ್ಯವಹರಿಸುತ್ತಾರೆ.

ಜನರೇಟಿವ್ AI ಬಳಕೆಯು ಈ ಸಮಸ್ಯೆಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿದೆ. ವಂಚನೆಯ ವೆಬ್‌ ಸೈಟ್‌ ಗಳು, ಇಮೇಲ್ಗಳು, ಪಠ್ಯ ಸಂದೇಶಗಳು ಮತ್ತು ಪಾವತಿ ಮನವಿಗಳನ್ನು ಕಾನೂನುಬದ್ಧ ಸಂಸ್ಥೆಗಳ ಸಂವಹನಗಳಂತೆಯೇ ರೂಪಿಸಬಹುದು. ಹೀಗಾಗಿ ನೈಜ ಮತ್ತು ನಕಲಿ ಸಂದೇಶಗಳ ನಡುವಿನ ವ್ಯತ್ಯಾಸ ಗುರುತಿಸುವುದು ಕಷ್ಟವಾಗುತ್ತಿದೆ.

ಹಬ್ಬದ ಋತುವಿನಲ್ಲಿ ವಿತರಣಾ ಸಿಬ್ಬಂದಿ, ಬ್ಯಾಂಕ್ ಪ್ರತಿನಿಧಿಗಳು ಮತ್ತು ಗ್ರಾಹಕ ಸೇವಾ ಏಜೆಂಟ್ ಗಳ ಸೋಗಿನಲ್ಲಿ ಬರುವ ವಂಚನೆಯ ಕರೆಗಳೂ ಕಳವಳಕ್ಕೆ ಕಾರಣವಾಗಿವೆ.

ಇದನ್ನು ತಡೆಯಲು ಈಗಿನ ಮೊಬೈಲ್ ಫೋನ್ ಗಳಲ್ಲಿ ಕರೆ ಮಾಡುವವರ ಗುರುತಿಸುವಿಕೆ ಮತ್ತು ಸ್ಪ್ಯಾಮ್ ಹಾಗೂ ವಂಚನೆ ಕರೆಗಳನ್ನು ನಿರ್ಬಂಧಿಸುವ ಸೌಲಭ್ಯಗಳಿವೆ. ಟ್ರೂಕಾಲರ್ ಮುಖ್ಯಸ್ಥರು ಮಾಧ್ಯಮಗಳಿಗೆ ನೀಡಿರುವ ಮಾಹಿತಿ ಪ್ರಕಾರ, 2025ರಲ್ಲಿ 68 ಶತಕೋಟಿಗೂ ಹೆಚ್ಚು ಸ್ಪ್ಯಾಮ್ ಮತ್ತು ವಂಚನೆ ಕರೆಗಳನ್ನು ಗುರುತಿಸಲಾಗಿದೆ.

ಕರೆ ಮಾಡುವವರ ಗುರುತಿಸುವಿಕೆ ಮತ್ತು ಸ್ಪ್ಯಾಮ್ ನಿರ್ಬಂಧಿಸುವ ಸಾಧನಗಳು ಅನುಮಾನಾಸ್ಪದ ಕರೆಗಳನ್ನು ಪತ್ತೆಹಚ್ಚಲು ನೆರವಾಗಬಹುದು. ಆದರೆ ಗ್ರಾಹಕರು ಕೂಡ ಕರೆಗಳ ಸತ್ಯಾಸತ್ಯತೆಯನ್ನು ಸ್ವತಃ ಪರಿಶೀಲಿಸಬೇಕು. ಫೋನ್ ಕರೆಗಳ ಮೂಲಕ ಒಟಿಪಿ, UPI ಪಿನ್ ಅಥವಾ ಬ್ಯಾಂಕಿಂಗ್ ರುಜುವಾತುಗಳನ್ನು ಎಂದಿಗೂ ಹಂಚಿಕೊಳ್ಳಬಾರದು.

►ಸುರಕ್ಷಿತ ಹಬ್ಬದ ಶಾಪಿಂಗ್: ಮಾಡಬೇಕಾದ್ದು ಮತ್ತು ಮಾಡಬಾರದ್ದು

ಸೈಬರ್ ಭದ್ರತಾ ಸಾಧನಗಳು ಅನುಮಾನಾಸ್ಪದ ಲಿಂಕ್‌ ಗಳು, ಆ್ಯಪ್‌ ಗಳು ಮತ್ತು ಕರೆಗಳನ್ನು ಗುರುತಿಸಲು ನೆರವಾಗುತ್ತವೆ. ಇದರೊಂದಿಗೆ ಕೆಲವು ಮೂಲಭೂತ ಮುನ್ನೆಚ್ಚರಿಕೆಗಳನ್ನು ಅನುಸರಿಸುವುದರಿಂದ ಆನ್‌ ಲೈನ್ ವಂಚನೆಗೆ ತುತ್ತಾಗುವ ಅಪಾಯವನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು.

►ಮಾಡಬೇಕಾದ್ದು:

• ಪರಿಶೀಲಿತ ವೆಬ್‌ ಸೈಟ್‌ ಗಳು ಮತ್ತು ಅಧಿಕೃತ ಶಾಪಿಂಗ್ ಆ್ಯಪ್ ಗಳ ಮೂಲಕವೇ ಖರೀದಿ ಮಾಡಿ. ಪಾವತಿ ಮಾಡುವ ಮೊದಲು ವೆಬ್‌ ಸೈಟ್ ವಿಳಾಸವನ್ನು ಎಚ್ಚರಿಕೆಯಿಂದ ಪರಿಶೀಲಿಸಿ.

• ಸಾಮಾಜಿಕ ಮಾಧ್ಯಮಗಳ ಮೂಲಕ ಆರ್ಡರ್ ಮಾಡುವ ಮೊದಲು ಮಾರಾಟಗಾರರ ವಿಶ್ವಾಸಾರ್ಹತೆ, ಗ್ರಾಹಕರ ವಿಮರ್ಶೆಗಳು, ವಸ್ತುಗಳನ್ನು ಹಿಂದಿರುಗಿಸುವ ನೀತಿ ಮತ್ತು ಸಂಪರ್ಕ ವಿವರಗಳನ್ನು ಪರಿಶೀಲಿಸಿ.

• ಘೋಷಿಸಲಾದ ಕೊಡುಗೆಯು ಬ್ರ್ಯಾಂಡ್ನ ಅಧಿಕೃತ ವೆಬ್‌ ಸೈಟ್ ಅಥವಾ ಆ್ಯಪ್ನಲ್ಲಿ ಲಭ್ಯವಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ.

• ಸುರಕ್ಷಿತ ಪಾವತಿ ವಿಧಾನಗಳನ್ನು ಬಳಸಿ. ಬ್ಯಾಂಕ್ ಮತ್ತು UPI ವಹಿವಾಟುಗಳಿಗೆ ಸಂಬಂಧಿಸಿದ ಎಚ್ಚರಿಕೆ ಸಂದೇಶಗಳ ಸೌಲಭ್ಯವನ್ನು ಸಕ್ರಿಯಗೊಳಿಸಿ.

• ಅಧಿಕೃತ ಆ್ಯಪ್ ಸ್ಟೋರ್ ಗಳಿಂದ ಮಾತ್ರ ಶಾಪಿಂಗ್ ಆ್ಯಪ್‌ ಗಳನ್ನು ಡೌನ್‌ ಲೋಡ್ ಮಾಡಿ. ಆ್ಯಪ್ ಅಭಿವೃದ್ಧಿಪಡಿಸಿದವರ ಗುರುತು ಮತ್ತು ಅದು ಕೇಳುವ ಅನುಮತಿಗಳನ್ನು ಪರಿಶೀಲಿಸಿ.

• ಕೊರಿಯರ್ ಕಂಪೆನಿಯ ಅಧಿಕೃತ ವೆಬ್‌ ಸೈಟ್ ಅಥವಾ ಗ್ರಾಹಕ ಸೇವಾ ಸಂಖ್ಯೆಯ ಮೂಲಕ ವಿತರಣೆಗೆ ಸಂಬಂಧಿಸಿದ ಸಂದೇಶಗಳ ಸತ್ಯಾಸತ್ಯತೆಯನ್ನು ಖಚಿತಪಡಿಸಿಕೊಳ್ಳಿ.

• ಅನುಮಾನಾಸ್ಪದ ವಹಿವಾಟು ಕಂಡುಬಂದರೆ ತಕ್ಷಣ ಬ್ಯಾಂಕ್ಗೆ ಮಾಹಿತಿ ನೀಡಿ. ರಾಷ್ಟ್ರೀಯ ಸೈಬರ್ ಅಪರಾಧ ಸಹಾಯವಾಣಿ 1930ಕ್ಕೆ ಕರೆ ಮಾಡಿ ಅಥವಾ cybercrime.gov.in ಮೂಲಕ ದೂರು ದಾಖಲಿಸಿ.

►ಮಾಡಬಾರದ್ದು:

• ಅಪರಿಚಿತ ವಾಟ್ಸ್ಆ್ಯಪ್ ಸಂದೇಶಗಳು, SMS ಅಥವಾ ಇಮೇಲ್ಗಳ ಮೂಲಕ ಬರುವ ಶಾಪಿಂಗ್, ಕ್ಯಾಶ್‌ ಬ್ಯಾಕ್ ಅಥವಾ ಹಬ್ಬದ ಬೋನಸ್ ಲಿಂಕ್‌ ಗಳನ್ನು ತೆರೆಯಬೇಡಿ.

• ಗ್ರಾಹಕ ಸೇವಾ ಪ್ರತಿನಿಧಿಗಳೆಂದು ಹೇಳಿಕೊಳ್ಳುವವರು ಸೇರಿದಂತೆ ಯಾರೊಂದಿಗೂ ಒಟಿಪಿ, UPI ಪಿನ್, ಸಿವಿವಿ, ಪಾಸ್ ವರ್ಡ್ ಅಥವಾ ಬ್ಯಾಂಕಿಂಗ್ ವಿವರಗಳನ್ನು ಹಂಚಿಕೊಳ್ಳಬೇಡಿ.

• ಕ್ಯಾಶ್‌ ಬ್ಯಾಕ್ ಅಥವಾ ಮರುಪಾವತಿ ಪಡೆಯಲು UPI ಪಿನ್ ನಮೂದಿಸಬೇಡಿ. UPI ಪಿನ್ ಪಾವತಿಯನ್ನು ದೃಢೀಕರಿಸಲು ಬಳಸಲಾಗುತ್ತದೆಯೇ ಹೊರತು ಹಣ ಸ್ವೀಕರಿಸಲು ಅಲ್ಲ.

• ಅಪರಿಚಿತ ಮಾರಾಟಗಾರರು ಕಳುಹಿಸುವ ಲಿಂಕ್ ಗಳ ಮೂಲಕ ಎಪಿಕೆ ಫೈಲ್ಗಳನ್ನು ಡೌನ್‌ ಲೋಡ್ ಮಾಡಬೇಡಿ ಅಥವಾ ಆ್ಯಪ್‌ ಗಳನ್ನು ಇನ್ಸ್ಟಾಲ್ ಮಾಡಿಕೊಳ್ಳಬೇಡಿ.

• ಹೆಚ್ಚುವರಿ ರಿಯಾಯಿತಿ ನೀಡುವುದಾಗಿ ಹೇಳಿದ ಮಾತ್ರಕ್ಕೆ ಮಾರಾಟಗಾರರ ವೈಯಕ್ತಿಕ ಖಾತೆಗಳಿಗೆ ಹಣ ವರ್ಗಾಯಿಸಬೇಡಿ.

• ಆಕರ್ಷಕ ಉತ್ಪನ್ನಗಳ ಚಿತ್ರಗಳು, ಸಕಾರಾತ್ಮಕ ಕಮೆಂಟ್‌ ಗಳು ಅಥವಾ ಹೆಚ್ಚಿನ ಸಂಖ್ಯೆಯ ಫಾಲೋವರ್ ಗಳನ್ನು ಹೊಂದಿವೆ ಎಂಬ ಕಾರಣಕ್ಕೆ ಮಾತ್ರ ವೆಬ್‌ ಸೈಟ್ ಅಥವಾ ಸಾಮಾಜಿಕ ಮಾಧ್ಯಮ ಪುಟಗಳನ್ನು ನಂಬಬೇಡಿ.

• ಶಾಪಿಂಗ್ ಆ್ಯಪ್‌ ಗಳು ಕೇಳುವ ಅನುಮಾನಾಸ್ಪದ ಅನುಮತಿಗಳನ್ನು ನಿರ್ಲಕ್ಷಿಸಬೇಡಿ. ವಿಶೇಷವಾಗಿ SMS, ಸಂಪರ್ಕಗಳು, ಪ್ರವೇಶಿಸುವಿಕೆ ಸೇವೆಗಳು ಅಥವಾ ಇತರ ಸೂಕ್ಷ್ಮ ಸೌಲಭ್ಯಗಳಿಗೆ ಪ್ರವೇಶ ಕೇಳಿದಾಗ ಎಚ್ಚರಿಕೆ ವಹಿಸಿ.

ಸೌಜನ್ಯ: Indian Express