ಮಾಂಸ ಮಾರಾಟ ನಿಷೇಧ ದಿನ ಘೋಷಣೆ ಹಿಂಪಡೆಯಲು ದ.ಕ. ಜಿಲ್ಲಾಧಿಕಾರಿ ಪತ್ರ

ಬುದ್ಧ ಜಯಂತಿ, ಗಾಂಧಿ ಜಯಂತಿ, ಹುತಾತ್ಮರ ದಿನ, ಮಹಾವೀರ ಜಯಂತಿ, ಕೃಷ್ಣ ಜನ್ಮಾಷ್ಟಮಿ, ಗಣೇಶ ಚತುರ್ಥಿ, ಮಹಾ ಶಿವರಾತ್ರಿ, ರಾಮನವಮಿ, ಡಾ. ಅಂಬೇಡ್ಕರ್ ಜಯಂತಿ, ಸಂಕ್ರಾಂತಿ, ರಾಮಲಿಂಗ ಅಡಿಕಲಾರ್ ಮೆಮೋರಿಯಲ್ ದಿನ ಹಾಗೂ ಮತ್ತಿತರ ದಿನಗಳನ್ನು ಪ್ರಾಣಿವಧೆ ಹಾಗೂ ಮಾಂಸ ಮಾರಾಟ ನಿಷೇಧ ದಿನಗಳೆಂದು ಘೋಷಿಸಿ 1970ರಲ್ಲಿ ಆದೇಶ ಹೊರಡಿಸಲಾಗಿತ್ತು. ನಂತರ ದೇಶ ಹಾಗೂ ರಾಜ್ಯದಲ್ಲಿ ಹಲವಾರು ಬದಲಾವಣೆಗಳು ಸಾರ್ವಜನಿಕವಾಗಿ ಮತ್ತು ಆಡಳಿತಾತ್ಮಕವಾಗಿ ಆಗಿವೆ. ಈ ಹಿನ್ನೆಲೆಯಲ್ಲಿ ಮಾಂಸ ಮಾರಾಟ ನಿಷೇಧ ಆದೇಶವನ್ನು ಕೆಲವು ಕಾರಣಗಳಿಗಾಗಿ ಪುನರಾವಲೋಕನ ಮಾಡಬೇ ಕಾಗಿರುವ ಅಗತ್ಯತೆ ಕಂಡುಬರುತ್ತಿದೆ ಎಂದು ಜಿಲ್ಲಾಧಿ ಕಾರಿ ಇಬ್ರಾಹೀಂ ಪತ್ರದಲ್ಲಿ ನಗರಾಭಿವೃದ್ಧಿ ಇಲಾಖೆಯ ಸರಕಾರದ ಪ್ರ. ಕಾರ್ಯದರ್ಶಿಗಳಿಗೆ ತಿಳಿಸಿದ್ದಾರೆ.

ಮಂಗಳೂರು, ಜ.4: ಪ್ರಾಣಿವಧೆ ಹಾಗೂ ಮಾಂಸ ಮಾರಾಟ ನಿಷೇಧ ದಿನಗಳೆಂದು ಘೋಷಿಸುವ ನಿಯಮವನ್ನು ಹಿಂಪಡೆಯುವುದು, ಹಾಗೂ ಪುನರ್ ಪರಿಶೀಲಿಸುವುದು ಸೂಕ್ತ ಎಂದು ದ.ಕ.ಜಿಲ್ಲಾಧಿಕಾರಿ ಎ.ಬಿ. ಇಬ್ರಾಹೀಂ ಅವರು ನಗರಾಭಿವೃದ್ಧಿ ಇಲಾಖೆಯ ಸರಕಾರದ ಪ್ರ. ಕಾರ್ಯದರ್ಶಿಗಳಿಗೆ ಪತ್ರವನ್ನು ಬರೆದಿದ್ದಾರೆ.
ದ.ಕ. ಜಿಲ್ಲಾಧಿಕಾರಿ ಬರೆದಿರುವ ಪತ್ರದ ಸಂಪೂರ್ಣ ವಿವರ

ಆದೇಶದಲ್ಲಿ ನಮೂದಿಸಲಾದ ಕೆಲವೊಂದು ಹಬ್ಬಗಳಿಗೆ ಜಿಲ್ಲೆ ಯಲ್ಲಿ ಸ್ಥಳೀಯವಾಗಿ ಯಾವುದೇ ಮಹತ್ವ ಇಲ್ಲ. ಉದಾಹರಣೆಗೆ ರಾಮಲಿಂಗ ಅಡಿಕಲಾರ್ ಮೆಮೋರಿಯಲ್ ದಿನ ಎಂಬ ದಿನವು ವರ್ಷದಲ್ಲಿ ಯಾವ ದಿನ ಬರುತ್ತದೆ, ಯಾವ ಸಮುದಾಯದವರು ಆಚರಿಸುತ್ತಾರೆ, ಯಾವ ಜಿಲ್ಲೆಯಲ್ಲಿ ಈ ಸಮುದಾಯದವರು ವಾಸವಿದ್ದಾರೆ ಅಥವಾ ಈ ದಿನದ ಮಹತ್ವವೇನು ಎಂಬ ಬಗ್ಗೆ ಈ ಜಿಲ್ಲೆಯ ಜನತೆಗೆ ತಿಳಿದಿಲ್ಲ. ಅಂತಹ ದಿನಗಳಲ್ಲಿ ಪ್ರಾಣಿ ವಧೆ ಹಾಗೂ ಮಾಂಸ ಮಾರಾಟ ನಿಷೇಧ ಮಾಡುವುದರಲ್ಲಿ ಔಚಿತ್ಯ ಕಂಡುಬರುವುದಿಲ್ಲ ಎಂದವರು ತಿಳಿಸಿದ್ದಾರೆ.

ಅದೇ ರೀತಿ ದಕ್ಷಿಣ ಕನ್ನಡ ಜಿಲ್ಲೆಯ ಸಹಿತ ಹಲವಾರು ಜಿಲ್ಲೆಗಳಲ್ಲಿ ಬೌದ್ಧ ಮತದವರು ನೆಲೆಸಿಲ್ಲ. ಹೆಚ್ಚಿನ ಸಂಖ್ಯೆಯಲ್ಲಿ ದಲಿತರು ಬೌದ್ಧ ಧರ್ಮಕ್ಕೆ ಮತಾಂತರವಾಗುತ್ತಿದ್ದಾರೆ. ಇವರು ಮಾಂಸಹಾರಿಗಳಾಗಿದ್ದು ಮಾಂಸ ಮಾರಾಟ ನಿಷೇಧವನ್ನು ಒಪ್ಪುವುದಿಲ್ಲ. ಆ ಕಾರಣದಿಂದ ಬುದ್ಧ ಜಯಂತಿ ದಿನ ಪ್ರಾಣಿ ವಧೆ ಹಾಗೂ ಮಾಂಸ ಮಾರಾಟ ನಿಷೇಧ ಮಾಡುವ ಔಚಿತ್ಯ ಕಂಡುಬರುವುದಿಲ್ಲ. ನಿರ್ದಿಷ್ಟಪಡಿಸಿದ ಹಲವಾರು ಸಣ್ಣಪ್ರಾಣಿಗಳ ಮಾರುಕಟ್ಟೆಯನ್ನು ಹೊರತುಪಡಿಸಿ ಕೆಲವೆಡೆ ಮಾತ್ರ ಮಾಂಸ ಮಾರಾಟ ಮಾಡುತ್ತಿ ರುವ ಅಂಗಡಿಗಳಿರುವ ಹಿನ್ನೆಲೆಯಲ್ಲಿ ಈ ಆದೇಶದಂತೆ ಪರಿಣಾಮ ಕಾರಿಯಾಗಿ ಕ್ರಮ ಕೈಗೊಳ್ಳಲು ಜಿಲ್ಲಾಡಳಿತಕ್ಕೆ ಕಷ್ಟಸಾಧ್ಯವಾಗಿದೆ ಎಂದವರು ತಿಳಿಸಿದ್ದಾರೆ.

ಪ್ರಾಣಿ ವಧೆ ನಿಷೇಧಿಸಿ ದರೂ ಸಹ ಶೀತಲೀಕರಣ ತಂತ್ರಜ್ಞಾನವನ್ನು ಬಳಸಿ ಹಲವಾರು ಕಡೆಗಳಲ್ಲಿ ಅಂತಹ ದಿನಗಳಲ್ಲಿ ಶೀತಲೀಕರಿಸಿರು ವಂತಹ ಮಾಂಸವನ್ನು ಮಾರಾಟ ಮಾಡುತ್ತಿರುವುದು ಕಂಡುಬರುತ್ತದೆ.

ಹಾಲಿ ಸರಕಾರ ಹೊರಡಿಸಿರುವ ಆದೇಶದಲ್ಲಿ ಕೋಳಿ, ಮೀನು, ಮೊಟ್ಟೆಗಳನ್ನು ಹೊರತುಪಡಿಸಿದ್ದರೂ ಮಾಂಸ ಮಾರಾಟ ನಿಷೇಧಿಸಿದ ನಿರ್ದಿಷ್ಟ ದಿನಗಳಲ್ಲಿ ಇವುಗಳ ಮಾರಾಟ ಮಾಡಲು ಅವಕಾಶವಿರುವುದರಿಂದ, ಆಡು, ಕುರಿ ಮತ್ತಿತರ ಪ್ರಾಣಿಗಳಿಗೆ ಮಾತ್ರ ಇದು ಅನ್ವಯವಾಗುತ್ತಿದೆ. ಕೇವಲ ಆಡು, ಕುರಿ ಮತ್ತಿತರ ಪ್ರಾಣಿಗಳ ಬಗ್ಗೆ ಮಾತ್ರ ನಿಷೇಧವಿರುವ ಹಿನ್ನೆಲೆಯಲ್ಲಿ ಹೋಟೆಲ್ಗಳಲ್ಲಿ ದೊಡ್ಡ ಪ್ರಾಣಿಗಳ ಭಕ್ಷ ತಯಾರಿಸಿದ್ದಾರೆಯೇ ಅಥವಾ ಕೋಳಿಯಂತಹ ಸಣ್ಣ ಪ್ರಾಣಿಗಳ ಭಕ್ಷ ತಯಾರಿಸಿದ್ದಾರೆಯೇ ಎಂಬ ಬಗ್ಗೆ ಪರಿಶೀಲನೆ ಮಾಡಿ ಕ್ರಮವನ್ನು ಜರಗಿಸಬೇಕಾಗಿರುತ್ತದೆ.

ಇದು ಆಡಳಿತ ವ್ಯವಸ್ಥೆಯಲ್ಲಿ ಮುಜುಗರವನ್ನು ತರುವಂತಾಗಿದೆ ಎಂದವರು ತಿಳಿಸಿದ್ದಾರೆ. ಮುಕ್ತ ಮಾರುಕಟ್ಟೆ ಹಾಗೂ ಉದಾರೀಕರಣ ನೀತಿಯನ್ನು ಉತ್ತೇಜಿಸುವಂತಹ ರೀತಿ ನಿಯಮಗಳನ್ನು ಅಳವಡಿಸುವ ಹಿನ್ನೆಲೆಯಲ್ಲಿ ಮತ್ತು ಪ್ರವಾಸೋದ್ಯಮಕ್ಕೆ ಉತ್ತೇಜನ ನೀಡುವ ನಿಯಮಗಳನ್ನು ಅಳವಡಿಸುವ ಕುರಿತು ಪ್ರಾಣಿವಧೆ ಹಾಗೂ ಮಾಂಸ ಮಾರಾಟ ನಿಷೇಧ ದಿನಗಳೆಂದು ಘೋಷಿಸುವ ನಿಯಮವನ್ನು ಹಿಂಪಡೆಯುವುದು ಹಾಗೂ ಪುನರ್ ಪರಿಶೀಲಿಸುವುದು ಸೂಕ್ತ ಎಂದು ಅವರು ಪತ್ರದಲ್ಲಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಮುಖ್ಯಾಂಶಗಳು...
 ಹೊಸತಾಗಿ ಬಹುಮಹಡಿ /ಸೂಪರ್ ಮಾರ್ಕೆಟ್‌ಗಳು ಆರಂಭವಾಗಿದ್ದು, ಇವುಗಳಲ್ಲಿ ಶೀತಲೀಕರಿಸಿದ ಮಾಂಸ ಮಾರಾಟದ ವಿಭಾಗಗಳು ಪ್ರತ್ಯೇಕವಾಗಿ ಇದೆ. ಇದನ್ನು ತಡೆಗಟ್ಟಲು ಕ್ಲಿಷ್ಟಕರವಾಗಿದೆ. ಏಕೆಂದರೆ ಕೇವಲ ಮಾಂಸ ಮಾರಾಟ ನಿಷೇಧಿಸಲು ಪೂರ್ಣವಾಗಿ ಸೂಪರ್ ಮಾರ್ಕೆಟ್‌ಗಳನ್ನು ಬಂದ್ ಮಾಡುವುದು ಅಸಾಧ್ಯವಾಗಿದೆ.

ಡಾ.ಬಿ.ಆರ್ ಅಂಬೇಡ್ಕರ್ ಜಯಂತಿ ದಿನ ಮಾಂಸ ಮಾರಾಟ ನಿಷೇಧ ಎಂದು ಘೋಷಿಸಲಾಗಿದ್ದರೂ, ಡಾ. ಬಿ.ಆರ್. ಅಂಬೇಡ್ಕರ್‌ರ ಅನುಯಾಯಿಗಳು ಹಾಗೂ ದಲಿತ ಸಂಘರ್ಷ ಸಮಿತಿ ಸಹಿತ ಹಲವಾರು ಸಂಘಟನೆಗಳು ಮಾಂಸ ತಿನ್ನುವುದು ತಮ್ಮ ಆಹಾರದ ಹಕ್ಕು ಎಂದು ಹಲವು ವೇದಿಕೆಗಳಲ್ಲಿ ವಾದವನ್ನು ಮಂಡಿಸುತ್ತಿದ್ದಾರೆ.