ಉಡುಪಿ ಜಿಲ್ಲೆಯಲ್ಲಿ 9.53 ಲಕ್ಷ ಮತದಾರರು

ಉಡುಪಿ, ಜ.7: ಉಡುಪಿ ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 2016ರ ಜ.1ಕ್ಕೆ ಇರುವ ಮತದಾರರ ಅಂತಿಮ ಪಟ್ಟಿಯನ್ನು ಸಿದ್ಧಪಡಿಸಲಾಗಿದ್ದು, ಜ.11ರಂದು ಅಧಿಕೃತವಾಗಿ ಪ್ರಕಟಿಸಲಾಗುವುದು ಎಂದು ಉಡುಪಿ ಜಿಲ್ಲಾಧಿಕಾರಿ ಡಾ.ವಿಶಾಲ್ ಆರ್. ತಿಳಿಸಿದ್ದಾರೆ.

ಇದರಂತೆ ಜಿಲ್ಲೆಯಲ್ಲಿರುವ ಒಟ್ಟು ಮತದಾರರ ಸಂಖ್ಯೆ 9,53,544 ಆಗಿದ್ದು, ಇದರಲ್ಲಿ 4,57,226 ಪುರುಷರ ಮತ ದಾರರು ಹಾಗೂ 4,96,318 ಮಹಿಳಾ ಮತದಾರರಿದ್ದಾರೆ. ಜಿಲ್ಲೆಯ ಪುರುಷ ಮತ್ತು ಮಹಿಳೆಯರ ಅನುಪಾತ 1000 ಪುರುಷರಿಗೆ 1,085 ಮಹಿಳೆಯರು ಎಂದು ಈ ಮಾಹಿತಿಗಳಿಂದ ತಿಳಿದುಬಂದಿದೆ.

ಜಿಲ್ಲೆಯ ಬೈಂದೂರು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 1,03,005 ಪುರುಷ ಹಾಗೂ 1,10,862 ಮಹಿಳಾ ಮತದಾರರು ಸೇರಿದಂತೆ ಒಟ್ಟು 2,13,867 ಮತದಾರರಿದ್ದಾರೆ. ಕ್ಷೇತ್ರದ ಲಿಂಗಾನುಪಾತ 1,076 ಆಗಿದೆ. ಅದೇ ರೀತಿ ಕುಂದಾಪುರ ವಿಧಾನಸಭಾ ಕ್ಷೇತ್ರದಲ್ಲಿ 92,850 ಪುರುಷ, 1,00,948 ಮಹಿಳಾ ಮತದಾರರು ಸೇರಿದಂತೆ ಒಟ್ಟು 1,93,798 ಮತದಾರರಿದ್ದು, ಇಲ್ಲಿನ ಲಿಂಗಾನುಪಾತ 1,087 ಆಗಿದೆ.

ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ 96,532 ಪುರುಷ, 1,02,386 ಮಹಿಳಾ ಮತದಾರರು ಸೇರಿದಂತೆ ಒಟ್ಟು 1,98,918 ಮತದಾರರಿದ್ದು, ಈ ಕ್ಷೇತ್ರದ ಲಿಂಗಾನುಪಾತ 1,061 ಆಗಿದೆ. ಕಾಪು ವಿಧಾನಸಭಾ ಕ್ಷೇತ್ರದಲ್ಲಿ 82,649 ಪುರುಷ, 91,777 ಮಹಿಳೆಯರು ಸೇರಿದಂತೆ ಒಟ್ಟು 1,74,426 ಮತದಾರರಿದ್ದು, ಕ್ಷೇತ್ರದ ಲಿಂಗಾನುಪಾತ 1,110 ಆಗಿದೆ. ಅದೇ ರೀತಿ ಕಾರ್ಕಳ ಕ್ಷೇತ್ರದಲ್ಲಿ 82,190 ಪುರುಷ, 90,345 ಮಹಿಳೆಯರು ಸೇರಿ ಒಟ್ಟು 1.72,535 ಮತದಾರರಿದ್ದಾರೆ. ಈ ಕ್ಷೇತ್ರದ ಲಿಂಗಾನುಪಾತ 1,099 ಆಗಿದೆ.

ಜಿಲ್ಲೆಯ ಅಂತಿಮ ಮತದಾರರ ಪಟ್ಟಿಯನ್ನು ಜ.11ರಂದು ಪ್ರಕಟಿಸಲಾಗುತ್ತಿದ್ದು, ಪ್ರತಿಯೊಬ್ಬ ನೋಂದಾಯಿತ ಮತದಾರರು ಪ್ರಕಟವಾಗುವ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ಇರುವುದನ್ನು ಖಾತ್ರಿ ಪಡಿಸಿಕೊಳ್ಳಬೇಕು. ಅಲ್ಲದೇ ಕಳೆದ ಸೆಪ್ಟಂಬರ್-ಅಕ್ಟೋಬರ್‌ನಲ್ಲಿ ನಡೆದ ವಿಶೇಷ ಸಂಕ್ಷಿಪ್ತ ಪರಿಷ್ಕರಣೆ ವೇಳೆ ನಮೂನೆ 6, 8 ಹಾಗೂ 8ಎ ನಮೂನೆಗಳಲ್ಲಿ ಅರ್ಜಿ ಸಲ್ಲಿಸಿ ಅನುಮೋದನೆಯಾಗಿರುವ ಮತದಾರರಿಗೆ ಬಿಎಲ್‌ಒ ಮೂಲಕ ಮತದಾರರ ಗುರುತಿನ ಚೀಟಿಯನ್ನು (ಎಪಿಕ್) ವಿತರಣೆ ಮಾಡುವ ಕಾರ್ಯ ಈಗಾಗಲೇ ಆರಂಭಗೊಂಡಿದೆ. ಯುವ ಮತದಾರರಿಗೆ ಜ.25ರ ರಾಷ್ಟ್ರೀಯ ಮತದಾರರ ದಿನಾಚರಣೆಯಂದು ಆಯಾ ಮತಗಟ್ಟೆಗಳಲ್ಲಿ ಎಪಿಕ್ ಕಾರ್ಡನ್ನು ವಿತರಿಸಲಾಗುವುದು ಎಂದು ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.