ಬದುಕು ಬದಲಿಸುವ ಬರಹಗಳು....

ಸದಾ ಕಾಲಿಗೆ ಚಕ್ರ ಕಟ್ಟಿಕೊಂಡು ತಿರುಗಾಡುವ ‘ನೇಮಿಚಂದ್ರ’ ಅವರ ಬರಹ ಬೇರೆ ಬೇರೆ ಕ್ಷೇತ್ರಗಳಿಗೆ ವಿಸ್ತರಿಸಿಕೊಂಡಿದೆ. ಅತ್ಯುತ್ತಮ ಕಥೆಗಾರ್ತಿಯಾಗಿರುವ ಅವರು, ಪ್ರವಾಸ ಲೇಖನಗಳಿಗಾಗಿಯೂ ಗುರುತಿಸಲ್ಪಡುತ್ತಿದ್ದಾರೆ. ಅಷ್ಟೇ ಅಲ್ಲ, ಬದುಕಿನ ಬೇರೆ ಬೇರೆ ಮಗ್ಗುಲುಗಳನ್ನು ಕಂಡು, ಅದನ್ನು ಬರೆಯುವ ನೇಮಿಚಂದ್ರ ಅವರಿಗೆ ಅಪಾರ ಅಭಿಮಾನಿ ಬಳಗವಿದೆ. ‘‘ಸಾವೇ ಬರುವುದಿದ್ದರೆ ನಾಳೆ ಬಾ...!’’ ಇದು ನೇಮಿಚಂದ್ರ ಅವರ ಅಂಕಣ ಬರಹಗಳ ಸಂಗ್ರಹ. ಬದುಕು ಬದಲಿಸಬಹುದು ಸಂಪುಟದ ಎರಡನೆಭಾಗ ಇದು. ‘ಆರೋಗ್ಯಕ್ಕಾಗಿ ನಾವು ಎಷ್ಟೆಲ್ಲ ಪರದಾಡುತ್ತೇವೆ. ಎಷ್ಟು ದೂರಕ್ಕೆ ಹುಡುಕಿ ಹೋಗುತ್ತೇವೆ. ಗುಣವಾಗುವ ಪ್ರಕ್ರಿಯೆ ನಮ್ಮಿಳಗೆ ನಮ್ಮಲ್ಲಿಯೇ ಇದೆ’ ಎನ್ನುವ ಸಂತೈಕೆಯ ತಳಹದಿಯಲ್ಲಿ ಇಲ್ಲಿರುವ ಎಲ್ಲ ಲೇಖನಗಳು ನಮ್ಮನ್ನು ತಟ್ಟುತ್ತವೆ. ಇಲ್ಲಿ ಬದುಕಿಗೆ ಬೆಳಕಾಗುವ ವ್ಯಕ್ತಿಗಳು, ಘಟನೆಗಳು, ಪಾಠಗಳನ್ನು ಒಟ್ಟಾಗಿ ಕಟ್ಟಿಕೊಡಲಾಗಿದೆ. ಈ ಮೂಲಕ ನಾವು ನಮ್ಮಿಳಗೆ ಇಳಿದು, ಬದುಕಿನ ವಿಸ್ತಾರವನ್ನು ನೋಡುವ ದೃಷ್ಟಿಯನ್ನು ನೀಡುವ ಪ್ರಯತ್ನವನ್ನು ನೇಮಿಚಂದ್ರ ಮಾಡುತ್ತಾರೆ.

‘ಸಾವೇ, ಬರುವುದಿದ್ದರೆ ನಾಳೆ ಬಾ! ಎನ್ನುವ ಆರಂಭದ ಲೇಖನವೇ ಇಡೀ ಕೃತಿಯ ಉದ್ದೇಶವನ್ನು ನಮಗೆ ಹೇಳಿ ಬಿಡುತ್ತದೆ. ಸಾವನ್ನು ಸೆರಗಿನಲ್ಲಿ ಕಟ್ಟಿಕೊಂಡೇ, ಬದುಕನ್ನು ಅತ್ಯಂತ ಉಲ್ಲಸಿತವಾಗಿ, ಜೀವಂತವಾಗಿ ನಿಭಾಯಿಸಿದ ಹಲವರ ಉದಾಹರಣೆಗಳು ಓದುಗರಿಗೆ ಹೊಸ ಉತ್ಸಾಹವನ್ನು, ಹೊಸ ನಿರೀಕ್ಷೆಗಳನ್ನು ನೀಡುತ್ತವೆ. ಇದೊಂದು ಔಷಧೀಯ ಗುಣವುಳ್ಳ, ನಮ್ಮ ಮನಸ್ಸಿಗೆ ಅಂಟಿಕೊಂಡಿರುವ ನಿರಾಸೆ, ಸೋಮಾರಿತನದ ಜಾಢ್ಯವನ್ನು ತೊಡೆದು ಹಾಕುವ ಶಕ್ತಿವುಳ್ಳ ಲೇಖನ. ಉಳಿದಂತೆ ಅವರು ಬರೆಯುವ ಇನ್ನಿತರ ಬರಹಗಳೂ ಅವುಗಳಿಗೆ ಪೂರಕವಾಗಿಯೇ ಇವೆ. ಇಲ್ಲಿ ಯಾವ ಬರಹಗಳೂ ಉಪದೇಶಗಳಾಗಿ ನಮ್ಮನ್ನು ಬಳಲಿಸುವುದಿಲ್ಲ. ಇಲ್ಲಿರುವ ಎಲ್ಲ ಲೇಖನಗಳಿಗೂ ಕಥನಗುಣಗಳಿವೆ. ಆದುದರಿಂದ, ಬರಹಗಳು ನಮ್ಮಿಳಗೆ ಒಂದು ಅನುಭವವಾಗಿ ವಿಸ್ತಾರವಾಗುತ್ತಾ ಹೋಗುತ್ತದೆ. ಮನಸ್ಸನ್ನು ಇನ್ನಷ್ಟು ಪ್ರಫುಲ್ಲಗೊಳಿಸುತ್ತದೆ. ಬದುಕನ್ನು ಬದಲಿಸುವ ಕಲೆ ಹೇಗೆ ಪ್ರತಿಯೊಬ್ಬನಲ್ಲೂ ಅಡಗಿಕೊಂಡಿದೆ ಮತ್ತು ಅದನ್ನು ಹೊರಗೆ ತೆಗೆಯಬೇಕಾದ ಬಗೆ ಹೇಗೆ ಎನ್ನುವುದನ್ನು ಇಲ್ಲಿರುವ ಬರಹಗಳು ತಿಳಿಸಿಕೊಡುತ್ತವೆ. ನಮ್ಮ ವ್ಯಕ್ತಿತ್ವವನ್ನು ಅರಳಿಸುವ ಶಕ್ತಿಯುಳ್ಳ ಲೇಖನಗಳು ಇವು. ನವಕರ್ನಾಟಕ ಪ್ರಕಾಶನ ಹೊರತಂದಿರುವ ಈ ಕೃತಿಯ ಮುಖಬೆಲೆ 190 ರೂ. ಆಸಕ್ತರು 2220 3580 ಅಥವಾ 3057 8022 ದೂರವಾಣಿಯನ್ನು ಸಂಪರ್ಕಿಸಬಹುದು.