ಯುವಜನತೆ ದುಶ್ಚಟಕ್ಕೆ ಬಲಿಯಾಗದಿರಲಿ ರಾಷ್ಟ್ರೀಯ ಯುವ ದಿನಾಚರಣೆಯಲ್ಲಿ ತರುಣ್ ವಿಜಯ್

 ಮೂಡುಬಿದಿರೆ : ಮನಸ್ಸು ಮತ್ತು ದೇಹ ಸ್ವಚ್ಛವಾಗಿದ್ದರೆ ಪ್ರಪಂಚವೇ ಸ್ವಚ್ಛವಾಗಿರುತ್ತದೆ. ಪ್ರಪಂಚದಲ್ಲೇ ಭಾರತವು ಅತ್ಯುತ್ತಮ ರಾಷ್ಟ್ರವಾಗಿ ಮೂಡಿ ಬರಲು ನಮ್ಮ ಯುವಜನರ ಕೊಡುಗೆಯ ಅಗತ್ಯವಿದೆ ಆದ್ದರಿಂದ ಯುವಜನತೆ ದುಶ್ಚಟಕ್ಕೆ ಬಲಿಯಾಗದೆ, ಮಹಾನ್ ಪುರುಷರ ತತ್ವಾದರ್ಶಗಳನ್ನು ಮೈಗೂಡಿಸಿಕೊಂಡು ಸ್ವಾಮಿ ವಿವೇಕಾನಂದರ ಬಲಿಷ್ಟ ರಾಷ್ಟ್ರದ ಕನಸನ್ನು ನನಸು ಮಾಡಲು ಸನ್ನದ್ಧರಾಗಬೇಕಾಗಿದೆ ಎಂದು ರಾಜ್ಯಸಭಾ ಸದಸ್ಯ, ಅಂಕಣಕಾರ ತರುಣ್ ವಿಜಯ್ ಹೇಳಿದರು.  ಅವರು ಮಹಾನ್ ಚೇತನ ಸ್ವಾಮಿ ವಿವೇಕಾನಂದ 153 ನೇ ಜಯಂತಿ ಪ್ರಯುಕ್ತ "ಸ್ವಚ್ಛ ವ್ಯಸನ ಮುಕ್ತ ಮತ್ತು ಸಾಮರಸ್ಯಪೂರ್ಣ ಮೂಡುಬಿದಿರೆಗಾಗಿ" ಎಂಬ ಧ್ಯೇಯ ವಾಕ್ಯದೊಂದಿಗೆ ಮೂಡುಬಿದಿರೆಯ ವಿವೇಕಾನಂದ ಜನ್ಮ ದಿನೋತ್ಸವ ಮೂಡುಬಿದಿರೆ ಸಮಿತಿ ಮತ್ತು ಸಂಚಲನ್ ವತಿಯಿಂದ ಮಂಗಳವಾರ ಸಮಾಜ ಮಂದಿರದಲ್ಲಿ ನಡೆದ ರಾಷ್ಟ್ರೀಯ ಯುವ ದಿನಾಚರಣೆ ಮತ್ತು ಯುವ ಸಮಾವೇಶದಲ್ಲಿ ಯುವ ವಕ್ತಾರರಾಗಿ ಭಾಗವಹಿಸಿ ಮಾತನಾಡಿದರು.

ಮಣಿಪಾಲ ವಿ.ವಿ.ಯ ವಿಶ್ರಾಂತ ಉಪಕುಲಪತಿ ಪದ್ಮಭೂಷಣ ಡಾ.ಬಿ.ಎಂ ಹೆಗ್ಡೆ ಮುಖ್ಯ ಅತಿಥಿಯಾಗಿ ಭಾಗವಹಿಸಿ, ದೇಶವನ್ನು ಬದಲಾಯಿಸುವ ಶಕ್ತಿ ಇರುವುದು ರಾಜಕಾರಣಿಗಳಲ್ಲಿಯಲ್ಲ. ಸನ್ಮಾರ್ಗದಲ್ಲಿ ನಡೆಯುವ ಉತ್ಸಾಹಿ ಯುವ ಸಮೂಹದಿಂದ ಮಾತ್ರ ದೇಶದ ದಿಕ್ಕು ಬದಲಾಗುತ್ತದೆ. ಭಾರತದಲ್ಲಿ ಇಂದಿಗೂ 40ಮಿಲಿಯನ್ ಮಕ್ಕಳು ಹಸಿವಿನಿಂದ ಬಳಲುತ್ತಿದ್ದಾರೆ. ದೇಶದ ಇಂತಹ ದುಸ್ಥಿತಿಯನ್ನು ತೊಲಗಿಸುವ ಕಾರ್ಯ ಯುವ ಸಮೂಹದಿಂದಲೇ ಆಗಬೇಕಾಗಿದೆ. ವಿವೇಕಾನಂದ ಯಾವುದೇ ಜಾತಿ, ಪಕ್ಷಕ್ಕೆ ಸೀಮಿತವಾಗಿಲ್ಲ. ಅವರು ಭಾರತೀಯತೆಯ ಪ್ರತೀಕ ಎಂದರು. ವಿವೇಕಾನಂದ ಜನ್ಮ ದಿನೋತ್ಸವ ಸಮಿತಿಯ ಅಧ್ಯಕ್ಷ ವಿವೇಕ್ ಆಳ್ವ ಸಮಾರಂಭದಲ್ಲಿ ಪ್ರಾಸ್ತಾವಿಕವಾಗಿ ಮಾತನಾಡಿ, ಯುವಶಕ್ತಿ ಇರುವುದು ವಯಸ್ಸಿನಲ್ಲಿ ಅಲ್ಲ, ಅದು ಮನಸ್ಸಿನಲ್ಲಿ. ವಿವೇಕಾನಂದ ವಿಚಾರಧಾರೆಯಲ್ಲಿ ಅನುಷ್ಠಾನದೊಂದಿಗೆ ಯುವಕರು ಮುನ್ನಡದರೇ ಅವರ ವ್ಯಕ್ತಿತ್ವ, ಸಮಾಜ ಎರಡೂ ಬೆಳಗುತ್ತದೆ ಎಂದರು.

ವಿದ್ಯಾರ್ಥಿಗಳಿಗೆ ವಿವೇಕಾನಂದರ ತತ್ವಗಳ ಜೊತೆಗೆ ಚೈತನ್ಯದ ಅರಿವು ಮೂಡಿಸಲು ಆಯೋಜಿಸಿದ್ದ ವಿವಿಧ ಸ್ಪರ್ಧೆಗಳ ವಿಜೇತರಿಗೆ ಬಹುಮಾನವನ್ನು ವಿತರಿಸಲಾಯಿತು.  ಮಾಜಿ ಸಚಿವ ಕೆ.ಅಮರನಾಥ ಶೆಟ್ಟಿ, ಮೂಡುಬಿದಿರೆ ಪುರಸಭಾಧ್ಯಕ್ಷೆ ರೂಪಾ ಸಂತೋಷ್ ಶೆಟ್ಟಿ, ಚೇತನ್ ಕುಮಾರ್ ಶೆಟ್ಟಿ. ಪ್ರಧಾನ ಕಾರ್ಯದರ್ಶಿ ಸುದರ್ಶನ್.ಎಂ, ಕೋಶಾಧಿಕಾರಿ ರಾಜೇಶ್ ಬಂಗೇರ ವೇದಿಕೆಯಲ್ಲಿದ್ದರು. ಸ್ವಾತಿ ಬೋರ್ಕರ್ ವಂದೇ ಮಾತರಂ ಹಾಡಿದರು. ರಂಜಿತ್ ಹಾಗೂ ಬಳಗದಿಂದ ವೇಣು ವಾದನ ನಡೆಯಿತು. . ಇದಕ್ಕೂ ಮೊದಲು ಮೂಡುಬಿದಿರೆಯ ಪದ್ಮಾವತಿ ಕಲಾ ಮಂದಿರದಿಂದ ಸಮಾಜ ಮಂದಿರದ ವರೆಗೆ ನಡೆದ ಶೋಭಾಯಾತ್ರೆಯಲ್ಲಿ ಶಾಲಾ, ಕಾಲೇಜು ವಿದ್ಯಾರ್ಥಿಗಳಿಂದ ವಿವೇಕಾನಂದರ ತತ್ವಗಳನ್ನು ಬಿಂಬಿಸುವ ವಿವಿಧ ವೇಷಭೂಷಣ ಫಲಕಗಳೂಂದಿಗೆ ಸಾರ್ವಜನಿಕರಿಗೆ ಜಾಗೃತಿ ಮತ್ತು ಅರಿವು ಮೂಡಿಸುವ ಜಾಥಾ ನಡೆಯಿತು.

 ಸಮಿತಿಯ ಸಂಚಾಲಕ ದೇವಿ ಪ್ರಸಾದ್ ಶೆಟ್ಟಿ ಸ್ವಾಗತಿಸಿದರು. ನಿತಿನ್ ರೈ ಸ್ಪರ್ಧಾ ವಿಜೇತರ ಬಹುಮಾನ ವಿತರಿಸಿದರು. ಸಮಿತಿ ಸದಸ್ಯ ಗುರುಬಾಗೇವಾಡಿ ಕಾರ್ಯಕ್ರಮ ನಿರೂಪಿಸಿದರು. ಪ್ರ.ಕಾರ್ಯದರ್ಶಿ ಧಿರೇಂದ್ರ ಜೈನ್ ವಂದಿಸಿದರು

ಎಲ್ಲ ಧರ್ಮದವರ ಸ್ವತಂತ್ರ ಆಚರಣೆಗೆ ಅವಕಾಶ ಮಾಡಿಕೊಡುವ ಭಾರತ ಹಿಂದೆ, ಇಂದು, ಮುಂದೆಯೂ ಸಹಿಷ್ಣು ದೇಶ. ಇಲ್ಲಿ ನಾಸ್ತಿಕ, ಆಸ್ತಿಕರಲ್ಲದೇ, ಸ್ವಯಂಘೋಷಿತ ದೇವ ಮಾನವರಿದ್ದಾರೆ. ತನ್ನ ಅಪೂರ್ವ ಸಹಿಷ್ಣು ಗುಣದಿಂದ ವಿಶ್ವದ ಗಮನ ಸೆಳೆದ ಭಾರತವನ್ನು ಅಸಹಿಷ್ಣುತೆ ರೂಪದಲ್ಲಿ ಭಾರತೀಯರೇ ಕಾಣುತ್ತಿರುವುದು ದುರಂತ ಎಂದು ಅಭಿಪ್ರಾಯಪಟ್ಟರು.