ಸ್ಟಾರ್ಟ್ ಅಪ್ ಇಂಡಿಯಾಗೆ 10 ಸಾವಿರ ಕೋಟಿ ರೂ. ಪ್ರಧಾನಿ ಘೋಷಣೆ

ಹೊಸದಿಲ್ಲಿ, ಜ.16: ದೇಶದ ಯುವಜನತೆಯಲ್ಲಿ ಉದ್ಯಮ ಶೀಲತೆಯನ್ನು ಪ್ರೋತ್ಸಾಹಿಸುವ ಕಾರ್ಯ ಸೂಚಿಯೊಂದಿಗೆ, ಕೇಂದ್ರ ಸರಕಾರ ಆರಂಭಿಸಿರುವ ಮಹತ್ವಾಕಾಂಕ್ಷಿ ‘ಸ್ಟಾರ್ಟ್ ಅಪ್ ಇಂಡಿಯಾ’ ಅಭಿ ಯಾನಕ್ಕೆ ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಚಾಲನೆ ನೀಡಿದರು. ಸ್ಟಾರ್ಟ್ ಅಭಿಯಾನಕ್ಕೆ ಹತ್ತು ಸಾವಿರ ಕೋಟಿ ರೂ.ಗಳ ಕಾರ್ಪಸ್ ನಿಧಿಯನ್ನು ಅವರು ಈ ಸಂದರ್ಭದಲ್ಲಿ ಘೋಷಿಸಿದರು. ಆಕರ್ಷಕ ತೆರಿಗೆ ವಿನಾಯಿತಿ ಸೌಲಭ್ಯಗಳೊಂದಿಗೆ, ಸ್ಟಾರ್ಟ್ ಅಪ್ ಉದ್ಯಮಗಳ ಕಾರ್ಯನಿರ್ವಹಣೆಯಲ್ಲಿ ಸರಕಾರದ ಕನಿಷ್ಠ ಮಟ್ಟದ ಹಸ್ತಕ್ಷೇಪ ಸೇರಿದಂತೆ ಹಲವು ಕೊಡುಗೆಗಳನ್ನು ಈ ಸಂದರ್ಭದಲ್ಲಿ ಅವರು ಘೋಷಿಸಿದರು.

  ದೇಶಾದ್ಯಂತದಿಂದ ಆಗಮಿಸಿದ ಉತ್ಸಾಹಿ ಉದ್ಯಮಶೀಲರು, ಸಿಇಓಗಳು, ಆರ್ಥಿಕ ತಜ್ಞರ ಸಮಕ್ಷದಲ್ಲಿ ಸ್ಟಾರ್ಟ್ ಅಪ್ ಇಂಡಿ ಯಾದ ಕ್ರಿಯಾಯೋಜನೆಯನ್ನು ಅನಾ ವರಣಗೊಳಿಸುತ್ತಾ ಮಾತನಾಡಿದ ಪ್ರಧಾನಿ, ನೂತನ ಉದ್ಯಮಿಗಳಿಗೆ ತಮ್ಮ ಉದ್ಯಮಗಳನ್ನು ಸುಗಮವಾಗಿ ನಿರ್ವಹಿಸಲು ನೆರವಾಗುವ ಮಹತ್ವದ ಉದ್ದೇಶದೊಂದಿಗೆ ಸ್ಟಾರ್ಟ್ ಅಪ್ ಇಂಡಿಯಾ ಯೋಜನೆಯನ್ನು ತನ್ನ ಸರಕಾರ ಆರಂಭಿಸಿದೆಯೆಂದರು. ತಮ್ಮ ಕನಸುಗಳನ್ನು ನನಸುಗೊಳಿಸಲು ರಿಸ್ಕ್ ತೆಗೆದುಕೊಳ್ಳುವುದಕ್ಕೆ ಹಿಂಜರಿ ಯಬಾರದೆಂದು ಪ್ರಧಾನಿ ಈ ಸಂದರ್ಭದಲ್ಲಿ ಯುವಜನತೆಗೆ ಕಿವಿಮಾತು ನೀಡಿದರು.
  ಸ್ಟಾರ್ಟ್ ಅಪ್ ಉದ್ಯಮಗಳಲ್ಲಿ ಸರಕಾರದ ಹಸ್ತಕ್ಷೇಪ ಅತ್ಯಂತ ಕನಿಷ್ಠ ಮಟ್ಟದಲ್ಲಿರಬೇಕೆಂದು ತಾನು ಭಾವಿಸಿರುವುದಾಗಿ ಹೇಳಿದ ಅವರು, ಸರಕಾರವು ಏನನ್ನು ಮಾಡಕೂಡದೆಂದು ತಮ್ಮಿಂದ ಆಲಿಸಲು ತಾನು ಇಲ್ಲಿಗೆ ಬಂದಿರುವುದಾಗಿ ತಿಳಿಸಿದರು. ಸ್ಟಾರ್ಟ್ ಅಪ್ ಚಳವಳಿಯ ಉದ್ದೇಶವು, ಕೇವಲ ಹಣ ಸಂಪಾದನೆ ಹಾಗೂ ಪ್ರಸಿದ್ಧಿ ಗಳಿಕೆಗೆ ಮಾತ್ರವಲ್ಲ, ಶ್ರೀಸಾಮಾನ್ಯನನ ಬದುಕಿನಲ್ಲಿ ಬದಲಾವಣೆ ತರುವುದು ಹಾಗೂ ಆ ಮೂಲಕ ದೇಶವನ್ನು ಪ್ರಗತಿಯತ್ತ ಕೊಂಡೊಯ್ಯುವುದಾಗಿದೆಯೆಂದರು. ಈಗಾಗಲೇ ಹಲವು ಉದ್ಯಮ ಶೀಲರು, ಶ್ರೀಸಾಮಾನ್ಯರ ಬದು ಕನ್ನು ಸುಗಮ ಹಾಗೂ ಉತ್ತಮ ಗೊಳಿಸುವ ಗುರಿಯೊಂದಿಗೆ ಮುನ್ನಡೆ ಯುತ್ತಿದ್ದಾರೆಂದು ಅವರು ಹೇಳಿದರು.
‘‘ಸ್ಟಾರ್ಟ್ ಅಪ್‌ಗಳನ್ನು ಆರಂಭಿಸು ವವರಿಗೆ ಹಣವೆಂಬುದು ಉಪ ಉತ್ಪನ್ನವಷ್ಟೇ. ಜನಸಾಮಾನ್ಯರ ಬದುಕನ್ನು ಉತ್ತಮಗೊಳಿಸುವುದೇ ಅವರ ಮುಖ್ಯ ಉದ್ದೇಶವಾಗಿದೆ’’ ಎಂದು ಪ್ರಧಾನಿ ಸಭಿಕರ ಚಪ್ಪಳೆಯ ಮಧ್ಯೆ ಹೇಳಿದರು.
‘‘ರಿಸ್ಕ್‌ಗಳನ್ನು ತೆಗೆದುಕೊಳ್ಳು ವುದರಲ್ಲಿ ಉದ್ಯಮಶೀಲರ ಯಶಸ್ಸು ಅಡಗಿದೆ. ರಿಸ್ಕ್ ತೆಗೆದುಕೊಳ್ಳುವ ಸಾಮರ್ಥ್ಯ ಹಾಗೂ ಸಾಹಸಿ ಪ್ರವೃತ್ತಿಯೊಂದಿಗೆ, ನಾವು ಜಗತ್ತಿಗೆ ಏನಾದರೂ ಒಳ್ಳೆಯದನ್ನು ನೀಡಬಹುದಾಗಿದೆ’’ಎಂದು ಪ್ರಧಾನಿ ಮಾರ್ಮಿಕವಾಗಿ ತಿಳಿಸಿದರು.

ಸ್ಟಾರ್ಟ್ ಅಪ್ ಇಂಡಿಯಾ ಹೈಲೈಟ್ಸ್
10 ಸಾವಿರ ಕೋಟಿ ರೂ. ಮೊತ್ತದ ಕಾರ್ಪಸ್ ನಿಧಿ.
ಸ್ಟಾರ್ಟ್ ಉದ್ಯಮಿಗಳಿಗೆ 3 ವರ್ಷಗಳವರೆಗೆ ಆದಾಯತೆರಿಗೆ ವಿನಾಯಿತಿ.
ತಮ್ಮ ಸ್ವಂತ ಸಂಪತ್ತನ್ನು ಉದ್ಯಮದಲ್ಲಿ ಹೂಡುವವರಿಗೆ ಬಂಡವಾಳ ಲಾಭ ತೆರಿಗೆ (ಕ್ಯಾಪಿಟಲ್ ಗೆಯಿನ್ಸ್ ಟ್ಯಾಕ್ಸ್)ಯಿಂದ ವಿನಾಯಿತಿ.
ಹಕ್ಕುಸ್ವಾಮ್ಯ (ಪೇಟೆಂಟ್) ನೋಂದಣಿ ಶುಲ್ಕದಿಂದ ಶೇ.80 ತೆರಿಗೆ ವಿನಾಯಿತಿ.
ಸ್ವಯಂ ಪ್ರಮಾಣೀಕರಣ- ಕಾರ್ಮಿಕರ ತಪಾಸಣೆಯಿಲ್ಲ, 3 ವರ್ಷಗಳ ವರೆಗೆ ಪರಿಸರ ಕಾನೂನಿನ ಅಂಗೀಕಾರ.
ಸರಕಾರದೊಂದಿಗೆ ಸಂವಹನಕ್ಕೆ ಸ್ಟಾರ್ಟ್‌ಅಪ್ ಇಂಡಿಯಾ ಹಬ್ ಸ್ಥಾಪನೆ.