ಆಸ್ಟ್ರೇಲಿಯನ್ ಓಪನ್: ಅಂತಿಮ ಸುತ್ತಿನಲ್ಲಿ ಎಡವಿದ ಮೈನೇನಿ

ಮೆಲ್ಬೋರ್ನ್, ಜ.16: ಭಾರತದ ಡೇವಿಸ್‌ಕಪ್ ಆಟಗಾರ ಸಾಕೇತ್ ಮೈನೇನಿ ಆಸ್ಟ್ರೇಲಿಯನ್ ಓಪನ್‌ನ ಅರ್ಹತಾ ಸುತ್ತಿನ ಪಂದ್ಯದಲ್ಲಿ ಅಂತಿಮ ತಡೆಯನ್ನು ದಾಟಲು ವಿಫಲರಾಗಿದ್ದಾರೆ.

ಶನಿವಾರ ನಡೆದ ಮೂರನೆ ಸುತ್ತಿನ ಪಂದ್ಯದಲ್ಲಿ ಮೈನೇನಿ ಅವರು ಬೋಸ್ನಿಯದ ಮಿರ್ಝಾ ಬ್ಯಾಸಿಕ್ ವಿರುದ್ಧ ಉತ್ತಮ ಆರಂಭ ಪಡೆದು ಎರಡು ಗಂಟೆ ಹಾಗೂ 6 ನಿಮಿಷಗಳ ಕಾಲ ಹೋರಾಟ ನೀಡಿದರೂ ಅಂತಿಮವಾಗಿ 6-3, 4-6, 6-8 ಸೆಟ್‌ಗಳ ಅಂತರದಿಂದ ಶರಣಾದರು.

ಆಸ್ಟ್ರೇಲಿಯನ್ ಓಪನ್‌ನ ಅರ್ಹತಾ ಸುತ್ತಿನಲ್ಲಿ ಮೈನೇನಿ ಸೋಲುವುದರೊಂದಿಗೆ ಪ್ರತಿಷ್ಠಿತ ಟೂರ್ನಿಯ ಪುರುಷರ ಸಿಂಗಲ್ಸ್‌ನ ಮುಖ್ಯ ಡ್ರಾನಲ್ಲಿ ಭಾರತದ ಏಕೈಕ ಆಟಗಾರ ಯೂಕಿ ಭಾಂಬ್ರಿ ಮಾತ್ರ ಸ್ಪರ್ಧೆಯಲ್ಲಿ ಉಳಿದಿದ್ದಾರೆ. ದಿಲ್ಲಿಯ ಆಟಗಾರ ಭಾಂಬ್ರಿ ಮೊದಲ ಸುತ್ತಿನ ಪಂದ್ಯದಲ್ಲಿ ವಿಶ್ವದ ನಂ.6ನೆ ಆಟಗಾರ ಥಾಮಸ್ ಬೆರ್ಡಿಕ್‌ರಿಂದ ಕಠಿಣ ಸವಾಲು ಎದುರಿಸಲಿದ್ದಾರೆ.