ಕಾರ್ಕಳ: ಈ ವರ್ಷ ಐದು ದಿನ ಸಾಂತ್ಮಾರಿ
ಜ.24ರಂದು ಅತ್ತೂರು ಜಾತ್ರೆ ಆರಂಭ
ಕಾರ್ಕಳ: ಅತ್ತೂರು ಸಂತ ಲಾರೆನ್ಸರ ಪುಣ್ಯಕ್ಷೇತ್ರದಲ್ಲಿ ವರ್ಷಂಪ್ರತಿ ನಡೆಯುವ ಸಾಂತ್ಮಾರಿ ಪ್ರಸಕ್ತ ಸಾಲಿನಲ್ಲಿ ಐದು ದಿನಗಳ ಕಾಲ ನಡೆಯಲಿದ್ದು, ಜ.24ರಿಂದ ಜ.28ರವರೆಗೆ ನಡೆಯಲಿದೆ ಎಂದು ಕ್ಷೇತ್ರದ ಧರ್ಮಗುರುಗಳಾದ ವಂ.ಫಾ. ಜೋರ್ಜ್ ಡಿಸೋಜಾ ಹೇಳಿದ್ದಾರೆ.
ಅವರು ಅತ್ತೂರು ಚರ್ಚ್ನಲ್ಲಿ ಗುರುವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ವರ್ಪಂಪ್ರತಿ ಮೂರು ದಿನಗಳ ಕಾಲ ನಡೆಯುತ್ತಿದ್ದ ಈ ಜಾತ್ರೆಯನ್ನು ಐದು ದಿನಗಳ ಕಾಲ ವಿಸ್ತರಿಸಿದ್ದು, ಜಾತ್ರೆಗೆ ಸೇರುವ ಜನಸಂದಣಿ ಹಂಚಿ ಹೋಗಲು ಈ ರೀತಿಯ ನಿರ್ಣಯ ಕೈಗೊಂಡಿದ್ದೇವೆ. ಐದು ದಿನಗಳ ಕಾಲ 18ರಿಂದ 24 ಲಕ್ಷ ಜನ ಸೇರುವ ನಿರೀಕ್ಷೆಯಿದೆ. ಜಾತ್ರೆಯ ಪೂರ್ವ ಸಿದ್ದತೆಗಳು ಕೂಡಾ ವ್ಯವಸ್ಥಿತ ರೀತಿಯಲ್ಲಿ ನಡೆದಿದೆ ಎಂದರು.
ಪ್ರಮುಖ ವಿಷಯಗಳು:
* ಜ.24ರಂದು ಬೆಳಗ್ಗೆ 7.30 ಗಂಟೆಗೆ ದಿವ್ಯ ಬಲಿಪೂಜೆಯೊಂದಿಗೆ ಭ್ರಾತೃತ್ವದ ಭಾನುವಾರವನ್ನು ಆಚರಿಸಿ, ದಿವ್ಯ ಪರಮ ಪ್ರಸಾದದ ಮೆರವಣಿಗೆಯೊಂದಿಗೆ ಈ ವರ್ಷದ ವಾರ್ಷಿಕ ಮಹೋತ್ಸವವು ಪ್ರಾರಂಭಗೊಳ್ಳುವುದು. ಅಂದು ಬೆಳಗ್ಗೆ 11 ಗಂಟೆ ಹಾಗೂ 3 ಗಂಟೆಗೆ ಮಕ್ಕಳಿಗಾಗಿ ವಿಶೇಷ ಬಲಿಪೂಜೆ ಅರ್ಪಿಸಲಾಗುವುದು.
* ಜ.25ರಂದು ಬೆಳಗ್ಗೆ 10 ಗಂಟೆಗೆ ಹಾಗೂ ಮಧ್ಯಾಹ್ನ 3.30 ಗಂಟೆಗೆ ವ್ಯಾಧಿಷ್ಠರಿಗಾಗಿ ವಿಶೇಷ ಬಲಿಪೂಜೆ ಅರ್ಪಿಸಲಾಗುವುದು. ವ್ಯಾದಿಷ್ಟರು ಅದೇ ದಿವಸದ ಬಲಿಪೂಜೆಗೆ ಬಂದು ನಮ್ಮೊಂದಿಗೆ ಸಹಕರಿಸಬೇಕಾಗಿ ವಿನಂತಿ.
* ವಾರ್ಷಿಕ ಮಹೋತ್ಸವದ ದಿನಗಳಲ್ಲಿ 42 ದಿವ್ಯ ಬಲಿಪೂಜೆಗಳನ್ನು ಕೊಂಕಣಿ, ಕನ್ನಡ ಮತ್ತು ಇಂಗ್ಲೀಷ್ ಭಾಷೆಗಳಲ್ಲಿ ಅರ್ಪಿಸಲಾಗುವುದು. ವಾರ್ಷಿಕ ಮಹೋತ್ಸವದ ದಿನಗಳಲ್ಲಿ ಬಳ್ಳಾರಿ, ವಾರಣಾಸಿ, ಬೆಳ್ತಂಗಡಿ, ಮಂಗಳೂರು ಹಾಗೂ ಉಡುಪಿ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷರುಗಳು ಆಗಮಿಸಿ ಬಲಿಪೂಜೆ ಅರ್ಪಿಸುವರು.
* ಯಾತ್ರಿಕರ ಸುರಕ್ಷತೆಗಾಗಿ ಹಳೆಯ ಮತ್ತು ಹೊಸ ಇಗರ್ಜಿಗಳ ಒಳಗಡೆ, ಪುಣ್ಯಕ್ಷೇತ್ರದ ವಠಾರದಲ್ಲಿ ಈಗಾಗಲೇ 48 ಸಿ.ಸಿ. ಕ್ಯಾಮೆರಾಗಳನ್ನು ಅಳವಡಿಸಿದ್ದು, ಜಾತ್ರಾ ಪರಿಸರದಲ್ಲಿ ಇನ್ನೂ 24 ಸಿ.ಸಿ. ಕ್ಯಾಮರಾಗಳನ್ನು ಆಯಕಟ್ಟಿನ ಸ್ಥಳದಲ್ಲಿ ಅಳವಡಿಸಲು ನಿರ್ಧರಿಸಲಾಗಿದೆ.
* ಪುಣ್ಯಕ್ಷೇತ್ರದ ಮೂಡುದಿಕ್ಕಿನಲ್ಲಿರುವ ಮಣ್ಣನ್ನು ತೆಗೆದು ಸುಮಾರು 60 ಸಾವಿರ ಚ.ಅಡಿಗಳಷ್ಟು ಸ್ಥಳಾವಕಾಶವನ್ನು ಹೆಚ್ಚಿಸಲಾಗಿದೆ. ಇದರಿಂದ ಹರಕೆ ಹಾಕುವಲ್ಲಿ ಮತ್ತು ಮೊಂಬತ್ತಿ ಉರಿಸುವಲ್ಲಿ ಭಕ್ತರಿಗಾಗುವ ಅಡಚಣೆ ಹಾಗೂ ತೊಂದರೆ ನಿವಾರಿಸಿ, ಹೆಚ್ಚಿನ ಅನುಕೂಲ ಕಲ್ಪಿಸಲಾಗಿದೆ.
* ಕಥೋಲಿಕ್ ಕ್ರೈಸ್ತರಿಗೆ ಪಾಪನಿವೇದನೆ ಈ ವರ್ಷ ದೇವಾಲಯದ ಪಶ್ಚಿಮ ಭಾಗದಲ್ಲಿ ಅಂದರೆ ಪವಾಡ ಮೂರ್ತಿ ಪ್ರತಿಷ್ಠಾಪಿಸಿದ ಪಕ್ಕದಲ್ಲಿ ನಿರ್ಮಿಸಿದ ಕಟ್ಟಡದಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಹಳೆ ದೇವಾಲಯದ ಒಳಗೆ ಪ್ರಾರ್ಥನೆಗಾಗಿ ಮಾತ್ರ ಅವಕಾಶ ನೀಡಲಾಗಿದೆ.
* ಭಕ್ತರು ಹಣದ ರೂಪದ ಹರಕೆ, ವಸ್ತು ರೂಪದ ಹರಕೆ ಮತ್ತು ಮೊಂಬತ್ತಿಗಳ ಹರಕೆಗಳನ್ನು ದೇವಾಲಯದ ಪೂರ್ವಭಾಗದಲ್ಲಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ಪವಿತ್ರ ಜಲಪ್ರಸಾದ ಮತ್ತು ಪುಷ್ಪ ಪ್ರಸಾದವನ್ನು ಅಲ್ಲಿಯೇ ನೀಡಲಾಗುವುದು.
* ಪವಾಡ ಪುಷ್ಕರಿಣಿ ಸಂದರ್ಶಿಸಲು ಮೊಂಬತ್ತಿ ಉರಿಸುವುದಲ್ಲಿಂದ ಮುಂದೆ ಹೋಗಬೇಕು. ಪುಷ್ಕರಿಣಿಗೆ ಇಳಿಯಲು ಹಾಗೂ ಮೇಲೆ ಬರಲು ಎಲ್ಲಾ ಭಕ್ತರಿಗೆ ಅನುಕೂಲವಾಗುವಂತೆ ಪುಷ್ಕರಿಣಿಯ ಹೊರ ವಿನ್ಯಾಸ ನಿರ್ಮಿಸಲಾಗಿದೆ. ಹಲವರು ಈ ನೀರನ್ನು ಕುಡಿಯಲು ಉಪಯೋಗಿಸುವುದರಿಂದ ಕೈಯಿಂದ ನೀರನ್ನು ಸ್ಪರ್ಶಿಸಲು ಮಾತ್ರ ಅವಕಾಶ ಕಲ್ಪಿಸಲಾಗಿದೆ. ಭಕ್ತಾದಿಗಳಿಗೆ ಕುಡಿಯಲು ಶುದ್ಧ, ತಂಪು ನೀರಿನ ವ್ಯವಸ್ಥೆಯುನ್ನು ಪುಣ್ಯಕ್ಷೇತ್ರದ ವಠಾರದಲ್ಲಿ ನಾಲ್ಕೂ ಕಡೆ ಮಾಡಲಾಗಿದೆ.
* ಸಾಕಷ್ಟು ಶೌಚಾಲಯ ಒದಗಿಸಲಾಗಿದ್ದು, ದೇವಾಲಯದ ಮುಂಭಾಗದ ದ್ವಾರದ ಮೂಲಕ ಒಳಬಂದಾಗ, ಎಡಬದಿಗೆ ಪೊಲೀಸ್ ಸೇವಾ ಕೇಂದ್ರದ ಪಕ್ಕದಲ್ಲಿ ಸುಮಾರು 40ರಷ್ಟು ಆಧುನಿಕ ಸವಲತ್ತುಗಳುಳ್ಳ ಶೌಚಾಲಯಗಳನ್ನು ನಿರ್ಮಿಸಲಾಗಿದೆ. ಅಂಗವಿಕಲರಿಗಾಗಿ ಪ್ರತ್ಯೇಕ ಮತ್ತು ಅಶಕ್ತ ಹಿರಿಯ ನಾಗರಿಕರಿಗಾಗಿ ಕೊಮೊಡ್ ಮಾದರಿಯ ಶೌಚಾಲಯ ನಿರ್ಮಿಸಲಾಗಿದೆ.
* ಕಾನೂನು, ಶಿಸ್ತು ಪಾಲನೆಗಾಗಿ ಗರಿಷ್ಟ ಸಂಖ್ಯೆಯ ಪೊಲೀಸ ಅಧಿಕಾರಿ ಮತ್ತು ಪೊಲೀಸ್ ಸಿಬ್ಬಂದಿ ಕರ್ತವ್ಯ ನಿರ್ವಹಿಸಲಿದ್ದಾರೆ. ಬಾಂಬ್ ನಿಷ್ಕ್ರಿಯ ದಳ ಹಾಗೂ ರಿಜರ್ವ್ ಪೊಲೀಸ್ ತುಕಡಿಗಳಿದ್ದು, ಯಾತ್ರಾರ್ಥಿಗಳ ಸುರಕ್ಷತೆಯ ಹೊಣೆ ನಿರ್ವಹಿಸುವರು.
* ಜಿಲ್ಲಾ ಉಸ್ತುವಾರಿ ಸಚಿವ ಹಾಗೂ ಮಾಜಿ ಶಾಸಕ ಎಚ್.ಗೋಪಾಲ ಭಂಡಾರಿ ಪರಿಶ್ರಮದಿಂದ ಪುಣ್ಯಕ್ಷೇತ್ರಕ್ಕೆ ಸಂಪರ್ಕ ಕಲ್ಪಿಸುವ ಎಲ್ಲಾ ರಸ್ತೆಗಳ ಅಗಲೀಕರಣ ಹಾಗೂ ಡಾಮರೀಕರಣ ನಡೆದಿದ್ದು, ಯಾತ್ರಾರ್ಥಿಗಳ ಸುಗಮ ಸಂಚಾರಕ್ಕೆ ವಿಶೇಷ ಗಮನ ನೀಡಲಾಗಿದೆ.
* ಯಾತ್ರಾರ್ಥಿಗಳ ವಾಹನ ನಿಲುಗಡೆ ವ್ಯವಸ್ಥೆಯ ಮೇಲ್ವಿಚಾರಣೆಯನ್ನು ನುರಿತ ಗೃಹರಕ್ಷಕದಳ ಹಾಗೂ ಇತರ ಸಿಬ್ಬಂದಿಗಳು ನಿರ್ವಹಿಸುವರು.
* ಕಾಬೆಟ್ಟು ದ್ವಾರದ ಮೂಲಕ ಬರುವ ವಾಹನಗಳ ದಟ್ಟಣೆಯಿಂದ ಭಕ್ತಾದಿಗಳಿಗೆ ಆಗುವ ಅಡಚಣೆಯನ್ನು ನಿವಾರಿಸಲು, ಪುಲ್ಕೇರಿಯಿಂದ ದೂಪದಕಟ್ಟೆ ಮೂಲಕ ವಾಹನಗಳನ್ನು ಕಳುಹಿಸಿ, ಕ್ಷೇತ್ರದ ಸಮೀಪ 5 ಸ್ಥಳಗಳಲ್ಲಿ ನಿಲುಗಡೆಗೆ ವ್ಯವಸ್ಥೆ ಕಲ್ಪಿಸಲಾಗಿದೆ. ದ್ವಿಚಕ್ರ ವಾಹನಗಳಿಗೆ ಒಂದು ಕಡೆ ಪ್ರತ್ಯೇಕ ನಿಲುಗಡೆ ವ್ಯವಸ್ಥೆ ಮಾಡಲಾಗಿದೆ. ಆದ್ದರಿಂದ ಮೂಡುಬಿದಿರೆ ಮತ್ತು ಬಜಗೋಳಿ ಕಡೆಯಿಂದ ಬರುವ ವಾಹನಗಳು ದೂಪದಕಟ್ಟೆ ದ್ವಾರದ ಮೂಲಕ ಬರುವಂತೆ ವಿನಂತಿಸಲಾಗಿದೆ.
* ಪುಣ್ಯಕ್ಷೇತ್ರಕ್ಕೆ ಆಗಮಿಸುವ ಯಾತ್ರಾರ್ಥಿಗಳ ವಾಹನಗಳ ನಿಲುಗಡೆಗೆ ಈ ಸಲ ಹೆಚ್ಚಿನ ಅವಕಾಶ ಒದಗಿಸಲಾಗಿದೆ. ದೂಪದಕಟ್ಟೆಯಿಂದ ಬರುವವರಿಗೆ, ದೂಪದಕಟ್ಟೆ ದ್ವಾರ ಪ್ರವೇಶಿಸುವಾಗ ಎಡಬದಿಗೆ ವಿಸ್ತಾರವಾದ ನಿಲುಗಡೆ ಸ್ಥಳ, ಮುಂದಕ್ಕೆ ಗಾರ್ಡನ್ ಹೌಸ್ಗಿಂತ ಮುಂಚಿನ ತಿರುವಿನ ಬಲ ಹಾಗೂ ಎಡಬದಿಯಲ್ಲಿ 2 ಕಡೆ ನಿಲುಗಡೆ ಸ್ಥಳ, ಗಾರ್ಡನ್ ಹೌಸ್ ದಾಟಿದ ನಂತರ ಎಡಬದಿಯಲ್ಲಿ ಎರಡು ಕಡೆ ವಾಹನ ನಿಲುಗಡೆಗೆ ಅವಕಾಶ ಕಲ್ಪಿಸಲಾಗಿದೆ. ಕಾಬೆಟ್ಟು ಕಡೆಯಿಂದ ಬರುವ ವಾಹನಗಳಿಗೆ ಪ್ರಸಾದ್ ಟೈಲರ್ ಜಂಕ್ಷನ್ ಬಳಿ, ಹೈಸ್ಕೂಲ್ ಆಟದ ಮೈದಾನ ಹಾಗೂ ಚೇತನಹಳ್ಳಿ ರಸ್ತೆಯ ಎರಡೂ ಬದಿಯಲ್ಲಿ ವಾಹನ ನಿಲುಗಡೆ ವ್ಯವಸ್ಥೆ ಮಾಡಲಾಗಿದೆ. ವಾಹನಗಳ ಮಾಲಕರು ಮತ್ತು ಚಾಲಕರು ಸಹಕರಿಸಬೇಕು.
* ಕಾಬೆಟ್ಟಿನಿಂದ ಬರುವ ದ್ವಿಚಕ್ರ ವಾಹನಗಳ ಪಾರ್ಕಿಂಗ್ ಸಮಸ್ಯೆ ನಿವಾರಿಸಲು ಕಾಬೆಟ್ಟು ರಸ್ತೆಯ ಮೂಲಕ ಪುಣ್ಯಕ್ಷೇತ್ರಕ್ಕೆ ಬರುವಾಗ ರಸ್ತೆಯ ಎಡಬದಿಯ ಉಬ್ಬುತಗ್ಗುಗಳನ್ನು ಸಮತಟ್ಟು ಮಾಡಿ ದ್ವಿಚಕ್ರ ವಾಹನ ನಿಲುಗಡೆಗೆ ಅವಕಾಶ ಕಲ್ಪಿಸಲಾಗಿದೆ.
* ವೆಹಿಕಲ್ ಪಾಸ್ ಹೊಂದಿದ ವಾಹನ ಚಾಲಕರು ತಮ್ಮ ವಾಹನಗಳನ್ನು ಕಾಬೆಟ್ಟು-ಅತ್ತೂರು ಕಾನ್ವೆಂಟ್ ಮಾರ್ಗವಾಗಿಯೇ ಬರಲು ವಿನಂತಿಸಲಾಗಿದೆ.
* ವೆಹಿಕಲ್ ಪಾಸ್ ಹೊಂದಿದ ವಾಹನಗಳನ್ನು ದೇವಾಲಯದ ಮೇಲ್ಭಾಗದಲ್ಲಿದ್ದ ಮೈದಾನದಲ್ಲಿ ಹೊಸದಾಗಿ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ.
* ವೆಹಿಕಲ್ ಪಾಸ್ ಹೊಂದಿದ ವಾಹನಗಳು ಪುಣ್ಯಕ್ಷೇತ್ರಕ್ಕೆ ಬಂದು ಅದೇ ಮಾರ್ಗವಾಗಿ ಹಿಂದಿರುಗಿ ಹೋಗುವಾಗ ಆಗುತ್ತಿದ್ದ ತೊಂದರೆ ನಿವಾರಿಸಲು, ನಿಲುಗಡೆ ಸ್ಥಳದಿಂದ ನಿರ್ಗಮಿಸಲು 2015ರಲ್ಲಿ ನಿರ್ಮಿಸಿದ ಪರ್ಪಲೆ ಕ್ರಿಸ್ತ ಸೇವಕಿ ಆಶ್ರಮದ ರಸ್ತೆಯ ಮೂಲಕ ಕಾರ್ಕಳ-ಪಡುಬಿದ್ರಿ ರಸ್ತೆಗೆ ಏಕಮುಖ ಸಂಪರ್ಕ ಕಲ್ಪಿಸಲಾಗಿದೆ.
* ಪುಣ್ಯಕ್ಷೇತ್ರದ ವಠಾರದಲ್ಲಿ ಅನಧಿಕೃತವಾಗಿ ಮೊಂಬತ್ತಿ ಮಾರಾಟ ಹಾಗೂ ಇತರ ವ್ಯಾಪಾರ ನಿಷೇಧಿಸಲಾಗಿದೆ.
* ಮಹೋತ್ಸವದ ಸಂದರ್ಭ ಭಿಕ್ಷಾಟನೆ ಸಂಪೂರ್ಣ ನಿಷೇಧಿಸಲಾಗಿದ್ದು, ಹರಕೆ ರೂಪದಲ್ಲಿ ಭಿಕ್ಷುಕರಿಗೆ ನೀಡುವ ದಾನ ಸಂಗ್ರಹಿಸಿ, ಜ.29ರಂದು ಮಧ್ಯಾಹ್ 12 ಗಂಟೆಗೆ ಭಿಕ್ಷುಕರಿಗೆ ಊಟ ಹಾಗೂ ಸಂಗ್ರಹಿಸಿದ ದಾನ ಹಂಚಲಾಗುವುದು.
* ಮಹೋತ್ಸವದ ದಿನಗಳಲ್ಲಿ ನೀಡುವ ಸೇವೆ, ಸೌಲಭ್ಯ ಸೇವೆ ಹಾಗೂ ಸೂಚನೆಗಳನ್ನು ದೂಪದಕಟ್ಟೆಯಿಂದ ಚೇತನಹಳ್ಳಿಯವರೆಗೆ ಕೇಳುವಂತೆ ಧ್ವನಿವರ್ಧಕದ ಮೂಲಕ ನಿರಂತರವಾಗಿ ಭಕ್ತರಿಗೆ ತಿಳಿಸಲಾಗುವುದು.
ಸುದ್ದಿಗೋಷ್ಠಿಯಲ್ಲಿ ಸಹಾಯಕ ಧರ್ಮಗುರುಗಳಾದ ಫಾ. ವಿಜಯ ಡಿಸೋಜಾ, ಪಾಲನಾ ಮಂಡಳಿಯ ಉಪಾಧ್ಯಕ್ಷ ರಿಚರ್ಡ್ ಪಿಂಟೋ, ಆರ್ಥಿಕ ಸಮಿತಿ ಸದಸ್ಯ ಜೋನ್ ಡಿಸಿಲ್ವ ಹಾಗೂ ವಲೇರಿಯನ್ ಪಾಯಸ್, ಫ್ರಾನ್ಸ್ನ ಧರ್ಮಗುರುಗಳಾದ ಫಾ.ಬಲ್ದಸಾರ್ ಕ್ಯಾಸ್ತಲಿನೋ ಹಾಗೂ ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ಶಿಕ್ಷಕ ನಕ್ರೆ ಜೋರ್ಜ್ ಕ್ಯಾಸ್ತಲಿನೋ ಉಪಸ್ಥಿತರಿದ್ದರು.
