ಕಾರ್ಕಾಳ: ಕವೇರಿದ ತಾ.ಪಂ/ಜಿ.ಪಂ ಚುನಾವಣೆ

ಕಾಂಗ್ರೆಸ್, ಬಿಜೆಪಿಯಲ್ಲಿ ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿ ಸಿದ್ದ 

ಕಾರ್ಕಳ : ಚುನಾವಣೆ ಘೋಷಣೆಯಾಗುತ್ತಿದ್ದಂತೆ ಅಭ್ಯರ್ಥಿಗಳ ಆಯ್ಕೆ ಪ್ರಕ್ರಿಯೆ ವೇಗ ಪಡೆದುಕೊಂಡಿದೆ. ತಾ.ಪಂ ಮತ್ತು ಜಿ.ಪಂ. ಚುನಾವಣೆಯಲ್ಲಿ ಸ್ಪರ್ಧಿಸಲು ಸೂಕ್ತ ಅಭ್ಯರ್ಥಿಗಳ ಕಣಕ್ಕಿಳಿಸುವಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ಸಿದ್ದತೆ ನಡೆಸುತ್ತಿವೆ. 

ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿ ಈಗಾಗಲೇ ಸಿದ್ದಗೊಂಡಿದ್ದು, ಗ್ರಾಮ-ಗ್ರಾಮಗಳಲ್ಲಿರುವ ತಮ್ಮ ಪಕ್ಷದ ಸಮಿತಿಗಳಿಂದ ಸೂಕ್ತ ಅಭ್ಯರ್ಥಿಗಳ ಹೆಸರುಗಳನ್ನು ತರಿಸಿಕೊಳ್ಳಲಾಗಿದೆ. ಅವರಲ್ಲಿ ಯಾರೂ ಅರ್ಹರು ಎನ್ನುವ ಲೆಕ್ಕಚಾರಗಳು ಆರಂಭಗೊಂಡಿದೆ.

ಬಿಜೆಪಿಯ ಭದ್ರಕೋಟೆಯಾಗಿರುವ ಕಾರ್ಕಳದಲ್ಲಿ 2005 ಮತ್ತು 2010ರ ತಾ.ಪಂ. ಚುನಾವಣೆಯಲ್ಲಿ ಬಿಜೆಪಿಯೇ ಅಧಿಕಾರದ ಚುಕ್ಕಾಣಿ ಹಿಡಿದಿದೆ. ಅಲ್ಲದೆ ಜಿ.ಪಂ.ಸದಸ್ಯರನ್ನು ಕಾರ್ಕಳದಿಂದ ಉಡುಪಿಗೆ ಕಳುಹಿಸಿಕೊಡುವಲ್ಲಿಯೂ ಕಳೆದ ಎರಡು ಅವಧಿಯಲ್ಲೂ ಬಿಜೆಪಿಯು ಕಾಂಗ್ರೆಸನ್ನು ಹಿಂದಿಕ್ಕಿದೆ. 2004ರಲ್ಲಿ ಪ್ರಪ್ರಥಮ ಬಾರಿಗೆ ಬಿಜೆಪಿ ವಿಧಾನ ಸಭೆ ಚುನಾವಣೆಯನ್ನು ಗೆದ್ದುಕೊಂಡಿದ್ದರೆ, 2008ರಲ್ಲಿ ಕಾಂಗ್ರೆಸ್ ಮಗದೊಮ್ಮೆ ಕ್ಷೇತ್ರವನ್ನು ತನ್ನದಾಗಿಸಿಕೊಳ್ಳುವ ಮೂಲಕ ಕಾಂಗ್ರೆಸ್ ಪ್ರಾಬಲ್ಯವನ್ನು ಮೆರೆದಿತ್ತಾದರೂ, ಬಳಿಕ ನಡೆದ ಎಲ್ಲಾ ಚುನಾವಣೆಯಲ್ಲೂ ಕಾಂಗ್ರೆಸ್ ಪಕ್ಷ ಮುಗ್ಗರಿಸುತ್ತಲೇ ಸಾಗಿದೆ.

2013ರ ವಿಧಾನಸಭೆ ಚುನಾವಣೆಯಲ್ಲಿ ಈ ಕ್ಷೇತ್ರ ಮತ್ತೆ ಬಿಜೆಪಿ ಪಾಲಾಗಿದ್ದು, ಬಳಿಕದ ಚುನಾವಣೆಗಳಲ್ಲಿ ಬಿಜೆಪಿ ತನ್ನ ಬಲವನ್ನು ವೃದ್ದಿಸಿಕೊಳ್ಳುತ್ತಲೇ ಸಾಗಿದೆ. 2015ರಲ್ಲಿ ನಡೆದ ಗ್ರಾ.ಪಂ. ಚುನಾವಣೆಯಲ್ಲಿ ಒಟ್ಟು 34 ಗ್ರಾ.ಪಂ.ಗಳ ಪೈಕಿ ಬಿಜೆಪಿ ಬೆಂಬಲಿತ-26, ಕಾಂಗ್ರೆಸ್ ಬೆಂಬಲಿತ-8 ಅಧಿಕಾರ ನಡೆಸುತ್ತಿದ್ದಾರೆ.

ಈ ಹಿಂದಿನ ಅವಧಿಯಲ್ಲಿ ತಾ.ಪಂ.ಸದಸ್ಯರ ಪೈಕಿ ಬಿಜೆಪಿ-14 ಮತ್ತು ಕಾಂಗ್ರೆಸ್-5, ಜಿ.ಪಂ.ಸದಸ್ಯರ ಪೈಕಿ ಬಿಜೆಪಿ-3, ಕಾಂಗ್ರೆಸ್-2 ಬಲಾಬಲ ಹೊಂದಿದೆ. ಅಲ್ಲದೆ ಎಪಿಎಂಸಿ ಕೂಡಾ ಬಿಜೆಪಿ ಕೈಯಲ್ಲಿದೆ. ಪರಿಣಾಮ ಬಿಜೆಪಿಯಲ್ಲಿ ಸ್ಪರ್ಧೆಗಿಳಿಯುವ ಆಕಾಂಕ್ಷಿಗಳ ಪಟ್ಟಿಯು ದಿನದಿಂದ ದಿನಕ್ಕೆ ಬೆಳೆಯುತ್ತಿದೆ. ಉಮೇದ್ವಾರ ಸಂಖ್ಯೆ ಕೂಡಾ ಹೆಚ್ಚಿದ್ದು, ಅವಕಾಶಕ್ಕಾಗಿ ಲಾಭಿಯೂ ಆರಂಭಗೊಂಡಿದೆ.

ಜಿ.ಪಂ. ಕ್ಷೇತ್ರ:

ಹೆಬ್ರಿ, ಬಜಗೋಳಿ, ಬೈಲೂರು, ಮಿಯಾರು ಮತ್ತು ಬೆಳ್ಮಣ್ಣು ಐದು ಜಿ.ಪಂ. ಕ್ಷೇತ್ರಗಳು ಕಾರ್ಕಳದಲ್ಲಿದೆ. ಈ ಹಿಂದೆ ಜಿ.ಪಂ.ಸದಸ್ಯರಾದವರು ಹಾಗೂ ಹೈಕಮಾಂಡ್ ಎನಿಸಿಕೊಂಡವರು ತಮ್ಮ ಸ್ವ-ಕ್ಷೇತ್ರ ಬಿಟ್ಟು ಅನ್ಯ ಕ್ಷೇತ್ರಗಳಿಗೆ ವಲಸೆ ಹೋಗುತ್ತಿರುವುದು, ಅನೇಕ ವರ್ಷಗಳಿಂದ ಪಕ್ಷದಲ್ಲಿ ದುಡಿದ ಹಿರಿಯ ಕಾರ್ಯಕರ್ತರು ಹಾಗೂ ಸಕ್ರೀಯ ಕಾರ್ಯಕರ್ತರಿಗೆ ನೋವು ತಂದಿದೆ.

ತಮ್ಮ ಕ್ಷೇತ್ರಕ್ಕೆ ದೊರೆತ ಮೀಸಲಾತಿಯನ್ವಯ ತಮಗೆ ಅವಕಾಶವಿರಬಹುವುದು ಎಂದು ತುದಿಗಾಲಿನಲ್ಲಿ ನಿಂತು ಕಾಯುತ್ತಿದ್ದವರೂ ಕೂಡಾ, ಅವಕಾಶ ವಂಚಿತರಾಗಿ ಮತ್ತೆ ಕಾರ್ಯಕರ್ತರಾಗಿ ದುಡಿಯಬೇಕಾಗಿರುವುದು ಅಸಮಾಧಾನಕ್ಕೆ ಕಾರಣವಾಗಿದೆ.

ಜಾತಿ ಲೆಕ್ಕಚಾರ :

ಜಿ.ಪಂ.ಅಭ್ಯರ್ಥಿಗಳ ಆಯ್ಕೆಯಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ಪಕ್ಷಗಳೆರಡು ಬಂಟ ಮತ್ತು ಬಿಲ್ಲವ ಸಮುದಾಯಗಳಿಗೆ ಪ್ರಾಧಾನ್ಯತೆ ನೀಡುತ್ತಿದೆ. ಜಾತಿ ಮತಗಳು ವಿಭಜನೆಯಗಬಾರದು ಎನ್ನುವ ಲೆಕ್ಕಚಾರವು ಅನ್ಯ ಸಮುದಾಯದ ಜನತೆಯನ್ನು ಕೆರಳಿಸಿದೆ.

ತಾಲೂಕಿನಲ್ಲಿ ಶೇ. 44ರಷ್ಟು ಮಾತ್ರ ಬಂಟ ಮತ್ತು ಬಿಲ್ಲವ ಮತಗಳಿದ್ದು, ಬಾಕಿ ಉಳಿದ ಶೇ.56ರಷ್ಟು ಇತರ ಸಮುದಾಯಗಳ ಮತಗಳಿದೆ. ತಮ್ಮಮ್ಮ ಸಮುದಾಯಗಳಿಗೂ ಪ್ರಾತಿನಿಧ್ಯ ನೀಡಬೇಕೆನ್ನುವ ಬೇಡಿಕೆಗಳು ಕೂಡಾ ಹೆಚ್ಚಿದೆ. ಇದು ಅಭ್ಯರ್ಥಿಗಳ ಆಯ್ಕೆಯ ವೇಳೆ ಪಕ್ಷದ ನಾಯಕರಿಗೆ ತಲೆ ನೋವು ತಂದಿಕ್ಕಿದೆ.

ಜಿ.ಪಂ. ಸಂಭಾವ್ಯ ಅಭ್ಯರ್ಥಿಗಳು:

ಹೆಬ್ರಿ ಕ್ಷೇತ್ರ : (ಸಾಮಾನ್ಯ ಮಹಿಳೆ) ಕಾಂಗ್ರೆಸ್ - ಸುಜಾತ ಲಕ್ಷ್ಮಣ್, ಶಶಿಕಲಾ ಪೂಜಾರಿ, ಸುಮ ಅಡ್ಯಂತಾಯ ಬಿಜೆಪಿ - ಜ್ಯೋತಿ ಹರೀಶ್, ಪ್ರಮೀಳ ಹರೀಶ್

ಬಜಗೋಳಿ ಕ್ಷೇತ್ರ : (ಹಿಂದುಳಿದ ಎ)
ಕಾಂಗ್ರೆಸ್- ಮಂಜುನಾಥ ಪೂಜಾರಿ, ರವಿಶಂಕರ್ ಶೇರಿಗಾರ್.
ಬಿಜೆಪಿ - ನವೀನ್ ನಾಯಕ್, ಹರೀಶ್ಚಂದ್ರ ತೆಂಡುಲ್ಕರ್, ಉದಯ ಎಸ್.ಕೋಟ್ಯಾನ್.
      
ಬೈಲೂರು ಕ್ಷೇತ್ರ : (ಸಾಮಾನ್ಯ)
ಕಾಂಗ್ರೆಸ್ - ನೀರೆ ಕೃಷ್ಣ ಶೆಟ್ಟಿ, ಡಾ.ಸಂತೋಷ್ ಕುಮಾರ್ ಶೆಟ್ಟಿ.
ಬಿಜೆಪಿ : ವಿಕ್ರಂ ಹೆಗ್ಡೆ, ಸುಮಿತ್ ಶೆಟ್ಟಿ, ಅಂತೋನಿ ಡಿಸೋಜಾ.

 ಮಿಯಾರು ಕ್ಷೇತ್ರ :(ಹಿಂದುಳಿದ ಎ. ಮಹಿಳೆ)

ಕಾಂಗ್ರೆಸ್ : ವಿಜಯ ಉದಯ ಸಾಲಿಯಾನ್. ಬಿಜೆಪಿ : ದಿವ್ಯಾಶ್ರೀ ಜಿ.ಅಮೀನ್.

ಬೆಳ್ಮಣು ್ಣ ಕ್ಷೇತ್ರ : (ಹಿಂದುಳಿದ ಬಿ.ಮಹಿಳೆ)
ಕಾಂಗ್ರೆಸ್ : ಚಿತ್ರಾ ಶೆಟ್ಟಿ, ರೇಷ್ಮ ಎಸ್.ಶೆಟ್ಟಿ, ಜಾಯ್ಸಿ ಟೆಲ್ಲೀಸ್.
 

ಬಿಜೆಪಿ : ರೇಷ್ಮಾ ಶೆಟ್ಟಿ, ನಿರ್ಮಲ ಎಸ್. ಶೆಟ್ಟಿ, ಸೌಮ್ಯ ಶೆಟ್ಟಿ.

ಅಭಿಪ್ರಾಯ :

 ಚುನಾವಣೆಯ ಪೂರ್ವ ತಯಾರಿಯಲ್ಲಿ ನಾವು ತೊಡಗಿಸಿಕೊಂಡಿದ್ದು, ಐದು ಜಿ.ಪಂ ಹಾಗೂ 16 ತಾ.ಪಂ. ಕ್ಷೇತ್ರಗಳಲ್ಲಿ ಬಿಜೆಪಿ ಗೆಲುವು ಸಾಧಿಸುವುದು ಖಚಿತ. ಸ್ಪರ್ಧೆಗೆ ಸೂಕ್ತ ಅಭ್ಯರ್ಥಿಗಳನ್ನು ಆಯ್ಕೆಗೊಳಿಸಲು ತಯಾರಿ ನಡೆಸಿದ್ದೇವೆ. ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿ ಸಿದ್ದಪಡಿಸಿದ್ದು, ಅಂತಿಮ ಕ್ಷಣದಲ್ಲಿ ಕೆಲವು ಬದಲಾವಣೆಗಳಿಗೂ ಸಾಧ್ಯತೆಗಳಿವೆ ಎನ್ನುತ್ತಾರೆ ಬಿಜೆಪಿ ಕ್ಷೇತ್ರಾಧ್ಯಕ್ಷ ಮಣಿರಾಜ ಶೆಟ್ಟಿ.

* ಕಾರ್ಕಳ ತಾಲೂಕು ಪಂಚಾಯಿತಿಯಲ್ಲಿ ಈ ಬಾರಿ ಕಾಂಗ್ರೆಸ್ ಅಧಿಕಾರದ ಚುಕ್ಕಾಣಿ ಹಿಡಿಯಲಿದೆ. ಕಳೆದ ಹತ್ತು ವರ್ಷಗಳಲ್ಲಿ ತಾ.ಪಂ.ನಲ್ಲಿ ಬಿಜೆಪಿ ಆಡಳಿತವಿತ್ತು. ಜನ ಬದಲಾವಣೆಯನ್ನು ಬಯಸಿದ್ದಾರೆ. ಆದ್ದರಿಂದ ತಾ.ಪಂ/ಜಿ.ಪಂ.ನ ಪ್ರತಿ ಕ್ಷೇತ್ರದಲ್ಲೂ ಸೂಕ್ತ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲಿದ್ದೇವೆ. ರಾಜ್ಯ ಸರಕಾರದ ಸಾಧನೆ ಹಾಗೂ ಸವಲತ್ತುಗಳು ಫಲಾನುಭವಿಗಳಿಗೆ ತಲುಪಿದ ಹಿನ್ನೆಲೆಯಲ್ಲಿ ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಲೆಯಿದೆ ಎನ್ನುತ್ತಾರೆ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಸುಧಾಕರ್ ಕೋಟ್ಯಾನ್.