ನಂ.4 ನನ್ನ ಶಕ್ತಿ : ಮನೀಷ್ ಪಾಂಡೆ

 ಸಿಡ್ನಿ, ಜ.24:ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರು ಪಾಂಡೆಗೆ ನಂ.5 ಕ್ರಮಾಂಕ ಸರಿಯಾದ ಜಾಗವೆಂದು ತಿಳದಿದ್ದರು. ಆದರೆ ‘‘ನಂ.4 ನನ್ನ ಶಕ್ತಿ ’’ಎಂದು 26ರ ಹರೆಯದ ಮನೀಷ್ ಪಾಂಡೆ ಹೇಳಿದ್ದಾರೆ.
‘‘ಈ ಹಿಂದಿನ ಪಂದ್ಯಗಳಲ್ಲಿ ನನಗೆ ಹೆಚ್ಚು ಹೊತ್ತು ಆಡಲು ಅವಕಾಶ ಸಿಕ್ಕಿರಲಿಲ್ಲ. ನನಗೆ ಮೊದಲ ಅಥವಾ ನಾಲ್ಕನೆ ಕ್ರಮಾಂಕದಲ್ಲಿ ಆಡಲು ಅವಕಾಶ ಸಿಕ್ಕಿದರೆ ಇನ್ನಷ್ಟು ಚೆನ್ನಾಗಿ ಆಡುವೆನು‘ ಎಂದು ಪಾಂಡೆ ತಿಳಿಸಿದ್ದಾರೆ.
 ‘‘ ಶತಕ ದಾಖಲಿಸಿ ಬ್ಯಾಟ್ ಮತ್ತು ಹೆಲ್ಮೆಟ್ ಮೇಲೆತ್ತುವ ಆಲೋಚನೆ ನನ್ನಲ್ಲಿತ್ತು.ಅದು ಕೈಗೂಡಿದೆ. ರೋಹಿತ್ ಶರ್ಮ ಮತ್ತು ಧೋನಿ ಇದಕ್ಕೆ ಸಹಾಯ ಮಾಡಿದರು ಎಂದು ಹೇಳಿದರು.
ಏಕದಿನದಲ್ಲಿ ಸ್ಮರಣೀಯ ಶತಕ
ಟೀಮ್ ಇಂಡಿಯಾದ ನೂತನ ಸ್ಟಾರ್ ಮನೀಷ್ ಪಾಂಡೆ ಆಸ್ಟ್ರೇಲಿಯ ವಿರುದ್ಧ ಐದನೆ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲಿ ಶತಕ ದಾಖಲಿಸುವ ಮೂಲಕ ತನ್ನ ಪ್ರತಿಭೆಯನ್ನು ಅನಾವರಣಗೊಳಿಸಿದ್ದಾರೆ.
ಐದನೆ ಪಂದ್ಯದಲ್ಲಿ ಅವರಿಗೆ ಬ್ಯಾಟಿಂಗ್‌ಗೆ ಅವಕಾಶ ಸಿಕ್ಕಿದ್ದು ಆಕಸ್ಮಿಕ ಎನ್ನಬಹುದು. ಏಕೆಂದರೆ ಅಜಿಂಕ್ಯ ರಹಾನೆ ಗಾಯಗೊಂಡು ತಂಡದಿಂದ ಹೊರಗುಳಿದ ಹಿನ್ನೆಲೆಯಲ್ಲಿ ಪಾಂಡೆ ತಂಡಲ್ಲಿ ಸ್ಥಾನ ಪಡೆದಿದ್ದರು. ಈ ಹಿಂದೆ ನಾಲ್ಕು ಪಂದ್ಯಗಳಲ್ಲಿ ಆಡಿದ್ದರೂ, ಅವರಿಂದ ದೊಡ್ಡ ಸಾಧನೆ ಸಾಧ್ಯವಾಗಿರಲಿಲ್ಲ. ಈ ಪಂದ್ಯದಲ್ಲಿ ತನ್ನ ಬಹುದಿನದ ಕನಸನ್ನು ನನಸಾಗಿಸಿದರು.
ಯಾವುದೇ ಒತ್ತಡಕ್ಕೆ ಒಳಗಾಗದೆ ಬ್ಯಾಟಿಂಗ್ ನಡೆಸಿದ ಪಾಂಡೆ ಶತಕದ ಸಾಧನೆಯೊಂದಿಗೆ ತಂಡವನ್ನು ಗೆಲುವಿನ ದಡ ಸೇರಿಸಿದ್ದರು. ಸತತ ನಾಲ್ಕು ಪಂದ್ಯಗಳಲ್ಲಿ ಸೋತಿದ್ದ ಭಾರತಕ್ಕೆ ಗೆಲುವು ಎನ್ನುವುದು ಮರೀಚಿಕೆಯಾಗಿತ್ತು. ಐದನೆ ಪಂದ್ಯದಲ್ಲಿ 331 ರನ್‌ಗಳ ಕಠಿಣ ಸವಾಲು ಪಡೆದಿದ್ದ ಭಾರತ 28.2 ಓವರ್‌ಗಳಲ್ಲಿ 2 ವಿಕೆಟ್ ನಷ್ಟದಲ್ಲಿ 134 ರನ್ ಗಳಿಸಿದ್ದಾಗ ಪಾಂಡೆ ಕ್ರೀಸ್‌ಗೆ ಆಗಮಿಸಿದ್ದರು. ಆಗ ಭಾರತ 29.4 ಓವರ್‌ಗಳಲ್ಲಿ 197 ರನ್ ಗಳಿಸಬೇಕಾದ ಒತ್ತಡಕ್ಕೆ ಸಿಲುಕಿತ್ತು. ಪಾಂಡೆ ಖಾತೆ ತೆರೆಯಲು 4 ಎಸೆತಗಳನ್ನು ಬಳಿಸಿಕೊಂಡರು. ಆರಂಭದಲ್ಲಿ ಅವರ ಆಟ ನೋಡಿದರೆ ಭಾರತ ಗೆಲ್ಲುವ ಸಂಭವ ಕಡಿಮೆಯಿತ್ತು. ಆದರೆ ರೋಹಿತ್ ಮತ್ತು ಮಹೇಂದ್ರ ಸಿಂಗ್ ಧೋನಿ ಬೆಂಬಲ ಪಡೆದು ಆಡಿದ ಮನೀಷ್ ಪಾಂಡೆ ಮ್ಯಾಚ್ ಫೀನೀಶ್ ಮಾಡಿಯೇ ವಾಪಸಾದರು.
ಧೋನಿ ಕೊನೆಯ ಹಂತದಲ್ಲಿ ದೊಡ್ಡ ಹೊಡೆತಕ್ಕೆ ಯತ್ನಿಸಿ ಎಡವಿದರು. ಆದರೆ ಪಾಂಡೆ ಎಚ್ಚರಿಕೆಯಿಂದಲೇ ಆಡಿದರು.80 ಎಸೆತಗಳಲ್ಲಿ ಏಳು ಬೌಂಡರಿ ಮತ್ತು ಒಂದು ಸಿಕ್ಸರ್ ಸಹಾಯದಿಂದ ಚೊಚ್ಚಲ ಶತಕ ಪೂರ್ಣಗೊಳಿಸಿದರು. ಅಷ್ಟು ಮಾತ್ರವಲ್ಲ್ಲ ಈ ಸಾಧನೆಗಾಗಿ ಅವರು ಪಂದ್ಯಶ್ರೇಷ್ಠ ಪ್ರಶಸ್ತಿ ಗಿಟ್ಟಿಸಿಕೊಂಡರು.
ಝಿಂಬಾಬ್ವೆಯಲ್ಲಿ ಚೊಚ್ಚಲ ಪಂದ್ಯ: 2015, ಜುಲೈ 14ರಂದು ಝಿಂಬಾಬ್ವೆ ವಿರುದ್ಧ ಮೊದಲ ಏಕದಿನ ಪಂದ್ಯವನ್ನಾಡಿದ್ದ ಪಾಂಡೆ ತನ್ನ ಚೊಚ್ಚಲ ಏಕದಿನ ಪಂದ್ಯದಲ್ಲಿ ಕೇದಾರ್ ಜಾಧವ್ ಜೊತೆ 144 ರನ್‌ಗಳ ಜೊತೆಯಾಟ ನೀಡಿದ್ದು. 71 ರನ್ ಗಳಿಸುವ ಮೂಲಕ ಚೊಚ್ಚಲ ಅರ್ಧಶತಕ ದಾಖಲಿಸಿದ್ದರು.
ಭಾರತ 82ಕ್ಕೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದಾಗ ಕ್ರೀಸ್‌ಗೆ ಆಗಮಿಸಿದ್ದರು. ಅವರ ಚೊಚ್ಚಲ ಶತಕ ತಂಡದ ಗೆಲುವಿಗೆ ನೆರವಾಗಿತ್ತು.
ಪಾಂಡೆ ವೃತ್ತಿ ಬದುಕು: ಪಾಂಡೆ ಹುಟ್ಟಿದ್ದು ಉತ್ತರಾಖಂಡ್‌ನ ನೈನ್‌ತಾಲ್‌ನಲ್ಲಿ ಅವರು ಕ್ರಿಕೆಟ್‌ನಲ್ಲಿ ನೆಲೆ ಕಂಡುಕೊಂಡದ್ದು ಕರ್ನಾಟಕದಲ್ಲಿ. 2008ರಿಂದ ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ , ಆರ್‌ಸಿಬಿ, ಪುಣೆ ವಾರಿಯರ್ಸ್‌ ತಂಡವನ್ನು ಪ್ರತಿನಿಧಿಸಿದ್ದ ಪಾಂಡೆ 2014ರಿಂದ ಕೋಲ್ಕತಾ ನೈಟ್ ರೈಡರ್ಸ್‌ ತಂಡದಲ್ಲಿದ್ದಾರೆ. ಐಪಿಎಲ್‌ನಲ್ಲಿ ಮೊದಲ ಶತಕ ದಾಖಲಿಸಿದ ಬ್ಯಾಟ್ಸ್‌ಮನ್ ಎನಿಸಿಕೊಂಡಿರುವ ಪಾಂಡೆ ಈ ತನಕ 76 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿದ್ದಾರೆ. 50.37 ಸರಾಸರಿಯಂತೆ 16 ಶತಕ ಮತ್ತು 22 ಅರ್ಧಶತಕಗಳನ್ನು ಒಳಗೊಂಡ 5,088 ರನ್ ಗಳಿಸಿದ್ದಾರೆ.