ಮಣಿಪಾಲ : ಹಿಮೋಫಿಲಿಯಾ: ‘ಐಡಿಯಾ’ ಯೋಜನೆ ಕರ್ನಾಟಕಕ್ಕೆ ವಿಸ್ತರಣೆ
ಮಣಿಪಾಲ, ಜ.29: ಉಡುಪಿ ಸೇರಿದಂತೆ ನಾಲ್ಕು ಜಿಲ್ಲೆಗಳಲ್ಲಿ ಹಿಮೋಫಿಲಿಯಾ ರೋಗಿಗಳನ್ನು ಗುರುತಿಸಿ, ಅವರ ದಾಖಲಾತಿ, ಚಿಕಿತ್ಸೆ, ಸಬಲೀಕರಣಕ್ಕಾಗಿ ಸ್ವಿಝರ್ಲೆಂಡ್ನ ಜ್ಯುರಿಕ್ನಲ್ಲಿರುವ ನೋವೊ ನಾರ್ಡಿಸ್ಕ್ ಹಿಮೋಫಿಲಿಯಾ ಫೌಂಡೇಶನ್ನ ಸಹಯೋಗದೊಂದಿಗೆ ಅನುಷ್ಠಾನ ಗೊಳಿಸಿರುವ ‘ಐಡಿಯಾ’ (ಐಡಿಇಇಎ) ಯೋಜನೆಯನ್ನು ಇನ್ನು ಕರ್ನಾಟಕದಾದ್ಯಂತ ವಿಸ್ತರಿಸಲು ಚಿಂತನೆ ನಡೆದಿದೆ ಎಂದು ಮಲೇಕಾ ಮಣಿಪಾಲ ಮೆಡಿಕಲ್ ಕಾಲೇಜಿನ ಅಸೋಸಿಯೇಟ್ ಡೀನ್ ಹಾಗೂ ಮಣಿಪಾಲ ಹಿಮೋಫಿಲಿಯಾ ಸೊಸೈಟಿಯ ಅಧ್ಯಕ್ಷರೂ ಆಗಿರುವ ಡಾ.ಅನ್ನಮ್ಮ ಕುರಿಯನ್ ಹೇಳಿದ್ದಾರೆ.
ಮಣಿಪಾಲದಲ್ಲಿ ಇಂದು ಕರೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು ಉಡುಪಿ, ಶಿವಮೊಗ್ಗ, ಚಿಕ್ಕಮಗಳೂರು ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಕಳೆದ ನಾಲ್ಕು ವರ್ಷಗಳಲ್ಲಿ ಯೋಜನೆ ಜಾರಿಯಾಗಿದ್ದು, ಇದರ ಪರಾಮರ್ಶೆ ಹಾಗೂ ಯೋಜನೆಯನ್ನು ಕರ್ನಾಟಕಕ್ಕೆ ವಿಸ್ತರಿಸುವ ಕುರಿತು ನಾಳೆ ಎನ್ಎನ್ಎಚ್ಎಫ್ ಹಾಗೂ ಅವೆುರಿಕದ ಸೇವ್ ಒನ್ ಲೈಫ್ನೊಂದಿಗೆ ನಡೆಯುವ ಸಭೆಯಲ್ಲಿ ನಿರ್ಧರಿಸಲಾಗುವುದು ಎಂದರು.
ಹಿಮೋಫಿಲಿಯಾ ಎಂಬುದು ದೇಹದಲ್ಲಿ ರಕ್ತ ಹೆಪ್ಪುಗಟ್ಟದಿ ರುವ ಕಾಯಿಲೆಯಾಗಿದ್ದು, ಇದಕ್ಕೆ ಚಿಕಿತ್ಸೆ ನೀಡಬಹುದೇ ಹೊರತು ಇದನ್ನು ಗುಣಪಡಿಸಲು ಸಾಧ್ಯವಿಲ್ಲ. ಇದರಿಂದ ರೋಗಿ ನಿರಂತರವಾಗಿ ವೈದ್ಯರಿಂದ ಚಿಕಿತ್ಸೆ ಪಡೆಯುತ್ತಿರ ಬೇಕಾಗುತ್ತದೆ. ಇದನ್ನು ಜನತೆ ಬಹಿರಂಗಪಡಿಸಲು ಹಿಂದೇಟು ಹಾಕುವ ಕಾರಣ ರೋಗಿಗಳನ್ನು ಪತ್ತೆ ಹಚ್ಚುವುದು ತುಂಬಾ ಕಷ್ಟದ ಕೆಲಸವಾಗಿದೆ ಎಂದು ಡಾ.ಕುರಿಯನ್ ನುಡಿದರು.
ಐಡಿಯಾ ಯೋಜನಾ ವ್ಯಾಪ್ತಿಯ ನಾಲ್ಕು ಜಿಲ್ಲೆಗಳಲ್ಲಿ ಕಳೆದ ನಾಲ್ಕು ವರ್ಷಗಳಲ್ಲಿ 586 ರೋಗಿಗಳನ್ನು ಪರೀಕ್ಷೆಗೊಳಪಡಿಸಲಾಗಿದ್ದು, ಇವರಲ್ಲಿ 88 ಮಂದಿಯಲ್ಲಿ ಹಿಮೋಫಿಲಿಯಾ ರೋಗವಿರುವುದು ಖಚಿತಗೊಂಡಿದೆ. ಇವರನ್ನು ಹೀಮೋ ಫಿಲಿಯಾ ಫೆಡರೇಷನ್ ಆಫ್ ಇಂಡಿಯಾದಲ್ಲಿ (ಎಚ್ಎಫ್ಐ) ನೋಂದಾಯಿಸಿಕೊಂಡು ರಾಜ್ಯ ಸರಕಾರದ ಮೂಲಕ ಎಲ್ಲಾ ಸೌಲಭ್ಯ ಹಾಗೂ ನೆರವನ್ನು ನೀಡಲಾಗುತ್ತದೆ ಎಂದರು.
ಎಚ್ಎಫ್ಐ ದೇಶಾದ್ಯಂತ 78 ಚಾಪ್ಟರ್ಗಳನ್ನು ಹೊಂದಿದ್ದು, ಇವುಗಳ ಮೂಲಕ ದೇಶದ 640 ಜಿಲ್ಲೆಗಳಲ್ಲಿರುವ ಹೀಮೋಫಿಲಿಯಾ ರೋಗಿಗಳ ಪತ್ತೆ, ಚಿಕಿತ್ಸೆಗೆ ಕಾರ್ಯೋನ್ಮುಖವಾಗಿದೆ. ಮಣಿಪಾಲ ಹೀಮೋಫಿಲಿಯಾ ಸೊಸೈಟಿ ಸಹ ಇದರ ಸದಸ್ಯ ಘಟಕವಾಗಿದ್ದು, ಇದರಲ್ಲಿ ಕರ್ನಾಟಕ ಮತ್ತು ಉತ್ತರ ಕೇರಳದ 380 ಹೀಮೋಫಿಲಿಯಾ ರೋಗಿಗಳು ಸದಸ್ಯರಾಗಿದ್ದಾರೆ ಎಂದರು.
‘ಐಡಿಯಾ’ ಯೋಜನೆಯಡಿ ಆಶಾ ಕಾರ್ಯಕರ್ತೆಯರ ಮೂಲಕ ನಾಲ್ಕು ಜಿಲ್ಲೆಗಳ ಗ್ರಾಮೀಣ ಪ್ರದೇಶಗಳ ಮನೆಮನೆಗೆ ಭೇಟಿ ನೀಡಿ ಹಿಮೋಫಿಲಿಯಾ ರೋಗಿಗಳನ್ನು ಪತ್ತೆ ಹಚ್ಚುವ ಕಾರ್ಯ ಮಾಡಲಾಗಿದೆ. ಇದರಲ್ಲಿ ಈ ರೋಗದ ಕುರಿತು ಸಂಪೂರ್ಣ ತಿಳುವಳಿಕೆ ಹೊಂದಿದ 2,000 ಆಶಾ ಕಾರ್ಯಕರ್ತೆಯರು ಪಾಲ್ಗೊಂಡಿದ್ದರು.
ಒಂದು ಸಮೀಕ್ಷೆಯ ಪ್ರಕಾರ ಪ್ರತಿ 5,000 ಜನಸಂಖ್ಯೆಗೆ ಒಬ್ಬ ಹಿಮೋಫಿಲಿಯಾ ರೋಗಿ ಇದ್ದಾರೆ. ಇದರಂತೆ ಕರ್ನಾಟಕದಲ್ಲಿ 6,000 ರೋಗಿಗಳಿರಬೇಕಿದ್ದು, ಈಗ ಪತ್ತೆಯಾಗಿರುವುದು ಕೇವಲ 1,750 ರೋಗಿಗಳು ಮಾತ್ರ. ಭಾರತದಲ್ಲಿ ಈ ಸಂಖ್ಯೆ 1.5 ಲಕ್ಷವನ್ನು ದಾಟುವುದಿಲ್ಲ ಎಂದರು.
ಎಚ್ಎಫ್ಐ ದೇಶದಲ್ಲಿ ಹಿಮೋಫಿಲಿಯಾ ರೋಗಿಗಳ ಪತ್ತೆ ಹಾಗೂ ಚಿಕಿತ್ಸೆಗೆ ಹಲವು ಕಾರ್ಯಕ್ರಮಗಳನ್ನು ರೂಪಿಸುತ್ತಿದೆ. ಕೆಲವು ರಾಜ್ಯ ಸರಕಾರಗಳು ಈ ಬಗ್ಗೆ ಪೂರ್ಣ ಸಹಕಾರವನ್ನು ನೀಡದೇ ಇದ್ದರೂ, ರೋಗಿಗಳಿಗೆ ಉನ್ನತ ಶಿಕ್ಷಣ, ಸ್ಕಾಲರ್ಶಿಪ್, ಚಿಕಿತ್ಸೆಗೆ ಬೇಕಾದ ನೆರವನ್ನು ನೀಡುತ್ತಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಇದರಲ್ಲಿ ಅಮೆರಿಕದ ಸೇವ್ ಒನ್ ಲೈಫ್ ಹಾಗೂ ಎನ್ಎನ್ಎಚ್ಎಫ್ ಇದೇ ಕಾರ್ಯದಲ್ಲಿ ನಿರತವಾಗಿವೆ. ಅಮೆರಿಕ ಸಂಸ್ಥೆ ಕಳೆದ ವರ್ಷ 18 ರೋಗಗಳ ಉನ್ನತ ಶಿಕ್ಷಣಕ್ಕೆ ನೆರವಾಗಿದೆ ಎಂದು ಸಂಸ್ಥೆಯ ಮಾರ್ಥಾ ಹೋಪ್ವೆಲ್ ತಿಳಿಸಿದರು.
ಪತ್ರಿಕಾಗೋಷ್ಠಿಯಲ್ಲಿ ಎನ್ಎನ್ಎಚ್ಎಫ್ನ ಕಾರ್ಯಕ್ರಮ ವ್ಯವಸ್ಥಾಪಕ ಡಾ.ರುಬೆಲ್ ಗಾರ್ಸಿಯಾ, ಸೀನಿಯರ್ ಯೋಜನಾ ವ್ಯವಸ್ಥಾಪಕ ಅಲೆಕ್ಸ್ ಎಲೆಂಕಾರ್, ಎಚ್ಎಫ್ಐನ ಉಷಾ ಪಾರ್ಥಸಾರಥಿ ಉಪಸ್ಥಿತರಿದ್ದರು.
