ಆಸ್ಕರ್ ನಲ್ಲಿ ಪ್ರಿಯಾಂಕ ಚೋಪ್ರ !

ಹೊಸದಿಲ್ಲಿ , ಫೆ. 2 : ಇತ್ತೀಚಿಗೆ ಭಾರತೀಯರು ಆಸ್ಕರ್ ನಲ್ಲಿ ಮಿಂಚುತ್ತಿದ್ದಾರೆ. ಬಾನು ಅಥೈಯ, ಸತ್ಯಜಿತ್ ರೇ, ಎ. ಆರ್ . ರೆಹಮಾನ್, ರಸೂಲ್ ಪೂಕುಟ್ಟಿ  ಮತ್ತಿತರರ ಬಳಿಕ ಈಗ ಪ್ರಿಯಾಂಕ ಚೋಪ್ರ ಸರದಿ ! ಆದರೆ ಅವರಿಗೆ ಆಸ್ಕರ್ ಪ್ರಶಸ್ತಿ ಸಿಕ್ಕಿಲ್ಲ , ಬದಲಿಗೆ ಅವರು ಆಸ್ಕರ್ ಪ್ರಶಸ್ತಿ ನೀಡುತ್ತಿದ್ದಾರೆ .  ಈ ಬಾರಿಯ ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಒಂದು ಆಸ್ಕರ್ ಪ್ರಶಸ್ತಿಯನ್ನು ಮಾಜಿ ಮಿಸ್ ವರ್ಲ್ಡ್ , ಖ್ಯಾತ ನಟಿ ಪ್ರಿಯಾಂಕ ಚೋಪ್ರ ಪ್ರದಾನ ಮಾಡಲಿದ್ದಾರೆ. ಆಸ್ಕರ್ ಸಮಿತಿಯ ಪ್ರಕಟಣೆ ಇದನ್ನು ತಿಳಿಸಿದೆ. 

ಈಗಾಗಲೇ ಅಮೆರಿಕನ್ ಧಾರಾವಾಹಿ ಕ್ವಾನ್ಟಿಕೋ ಮೂಲಕ ಹಾಲಿವುಡ್ ನ ಗಮನ ಸೆಳೆದು ಇತ್ತೀಚಿಗೆ ಪ್ರತಿಷ್ಠಿತ ಎಸ್ ಎ ಜಿ ಪ್ರಶಸ್ತಿಯಲ್ಲೂ ಮಿಂಚಿದ ಪ್ರಿಯಾಂಕ ಈಗ ಆಸ್ಕರ್ನಲ್ಲಿ ಮಿಂಚಲಿದ್ದಾರೆ. ಈ ಮೂಲಕ ಹಾಲಿವುಡ್ ನ ಖ್ಯಾತನಾಮ ಸ್ಟಾರ್ಗಳ ಪಟ್ಟಿಯಲ್ಲಿ ನಮ್ಮ ಪ್ರಿಯಾಂಕ ಕೂಡ ಸೇರಿದ್ದಾರೆ. ಈಗಾಗಲೇ ದೀಪಿಕಾ ಪಡುಕೋಣೆ ಖ್ಯಾತ ನಟ ವಿನ್ ಡೀಸೆಲ್ ಅವರ ಜೊತೆ ಮುಂದಿನ ಚಿತ್ರದಲ್ಲಿ ನಟಿಸುವ ಮೂಲಕ ಹಾಲಿವುಡ್ನಲ್ಲಿ ಹೆಸರು ಮಾಡುತ್ತಿದ್ದಾರೆ. 

ಫೆಬ್ರವರಿ 28 ರಂದು ಹಾಲಿವುಡ್ ನ ಡಾಲ್ಬಿ ಥಿಯೇಟರ್ ನಲ್ಲಿ ನಡೆಯುವ ಈ ಕಾರ್ಯಕ್ರಮವನ್ನು ಖ್ಯಾತ ಹಾಸ್ಯ ನಟ ಕ್ರಿಸ್ ರಾಕ್ ನಡೆಸಿಕೊಡಲಿದ್ದಾರೆ.