ಅಪಹರಣ,ಅತ್ಯಾಚಾರದ ಕಟ್ಟುಕಥೆ ಹೆಣೆದಿದ್ದ 13ರ ಜರ್ಮನ್ ಬಾಲಕಿ

ಬರ್ಲಿನ್,ಫೆ.3: ವಲಸಿಗರು ತನ್ನನ್ನು ಅಪಹರಿಸಿದ್ದರು ಮತ್ತು ತನ್ನ ಮೇಲೆ ಅತ್ಯಾಚಾರವೆಸಗಿದ್ದರು ಎಂಬ 13ರ ಹರೆಯದ ಜರ್ಮನ್ ಬಾಲಕಿಯ ಹೇಳಿಕೆ ಸಂಪೂರ್ಣವಾಗಿ ಕಟ್ಟುಕಥೆಯಾಗಿದೆ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.
ಜರ್ಮನಿಯ ಖಾಸಗಿತನ ರಕ್ಷಣೆ ಕಾನೂನಿನಂತೆ ಕೇವಲ ಲಿಸಾ ಎಫ್.ಎಂದಷ್ಟೇ ಹೆಸರಿಸಲಾಗಿರುವ ಈ ಬಾಲಕಿಯು ‘‘ವಿದೇಶಿಯ’’ರಂತೆ ಕಾಣುತ್ತಿದ್ದ ವ್ಯಕ್ತಿಗಳು ಪಶ್ಚಿಮ ಬರ್ಲಿನ್‌ನ ಉಪನಗರಿಯಿಂದ ತನ್ನನ್ನು ಅಪಹರಿಸಿ 30 ಗಂಟೆಗಳ ಕಾಲ ಬಂಧನದಲ್ಲಿರಿಸಿದ್ದರು ಮತ್ತು ತನ್ನ ಮೇಲೆ ಅತ್ಯಾಚಾರವೆಸಗಿದ್ದರು ಎಂದು ಹೆತ್ತವರು ಮತ್ತು ಪೊಲೀಸರಲ್ಲಿ ಹೇಳಿಕೊಂಡಿದ್ದಳು.
ಲಿಸಾ ಬರ್ಲಿನ್‌ನ ರಷ್ಯನ್ ಸಮುದಾಯಕ್ಕೆ ಸೇರಿದವಳಾಗಿದ್ದು, ಆಕೆಯ ಈ ಕಟ್ಟುಕಥೆಯು ರಷ್ಯದ ಮಾಧ್ಯಮಗಳಲ್ಲಿ ವ್ಯಾಪಕವಾಗಿ ವರದಿಯಾಗಿತ್ತು. ರಷ್ಯದ ವಿದೇಶಾಂಗ ಸಚಿವ ಸೆರ್ಗಿ ಲಾವ್‌ರೋವ್ ಅವರು ಜರ್ಮನಿಯು ಈ ಪ್ರಕರಣವನ್ನು ಮುಚ್ಚಿಹಾಕಲು ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿದ್ದರು.
ಎರಡು ವಾರಗಳ ಹಿಂದೆ ಬರ್ಲಿನ್‌ನ ಮರ್ಝಾನ್‌ನಲ್ಲಿಯ ತನ್ನ ಶಾಲೆಯಿಂದ ಮರಳುವಾಗ ತಮ್ಮ ಪುತ್ರಿ ನಾಪತ್ತೆಯಾಗಿದ್ದಾಳೆ ಎಂದು ಆಕೆಯ ಹೆತ್ತವರು ದೂರು ದಾಖಲಿಸಿದ್ದರು.
30 ಗಂಟೆಗಳ ಬಳಿಕ ಪ್ರತ್ಯಕ್ಷಗೊಂಡಿದ್ದ ಬಾಲಕಿ ಮಧ್ಯ ಪ್ರಾಚ್ಯ ಅಥವಾ ಉತ್ತರ ಆಫ್ರಿಕಾದವರಂತೆ ಕಂಡು ಬರುತ್ತಿದ್ದ ವ್ಯಕ್ತಿಗಳು ತನ್ನನ್ನು ಅಪಹರಿಸಿದ್ದರು ಎಂದು ಹೇಳಿಕೊಂಡಿದ್ದಳು.
ಬಾಲಕಿಯ ಆರೋಪಗಳು ಬರ್ಲಿನ್‌ನ ರಷ್ಯನ್ ಸಮುದಾಯದಲ್ಲಿ ವ್ಯಾಪಕ ಆಕ್ರೋಶವನ್ನು ಹುಟ್ಟುಹಾಕಿತ್ತು. ಕಳೆದ ಶನಿವಾರ ಸುಮಾರು 700 ಜನರ ಗುಂಪೊಂದು ಚಾನ್ಸಲರ್ ಏಂಜೆಲಾ ಮರ್ಕೆಲ್ ಅವರ ಕಚೇರಿಯೆದುರು ಪ್ರತಿಭಟನೆಯನ್ನೂ ನಡೆಸಿತ್ತು.
ಹೊಸವರ್ಷದ ಸಂಭ್ರಮದ ನಡುವೆ ತಮ್ಮ ಮೇಲೆ ಹಲ್ಲೆ,ಲೈಂಗಿಕ ಹಲ್ಲೆ,ಅತ್ಯಾಚಾರಗಳು ನಡೆದಿವೆ ಎಂದು ಆರೋಪಿಸಿ ನೂರಾರು ಮಹಿಳೆಯರು ದೂರುಗಳನ್ನು ದಾಖಲಿಸಿದ್ದರು.
ತನ್ಮಧ್ಯೆ ಮಂಗಳವಾರ ಮಾಸ್ಕೋದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಲಾವ್‌ರೊವ್,ಬಾಲಕಿ 30 ಗಂಟೆಗಳ ಕಾಲ ತನ್ನ ಸ್ವಂತ ಇಚ್ಛೆಯಿಂದ ನಾಪತ್ತೆಯಾಗಲು ಸಾಧ್ಯವೇ ಇಲ್ಲ ಎಂದು ಪ್ರತಿಪಾದಿಸಿದ್ದಾರೆ.
ರಷ್ಯಾ ಈ ಪ್ರಕರಣವನ್ನು ತನ್ನ ರಾಜಕೀಯ ಲಾಭಕ್ಕೆ ಬಳಸಿಕೊಳ್ಳುತ್ತಿದೆ ಮತ್ತು ಜರ್ಮನಿಗೆ ವಲಸೆಯನ್ನು ಚರ್ಚಾ ವಿಷಯವನ್ನಾಗಿಸಲು ಪ್ರಯತ್ನಿಸುತ್ತಿದೆ ಎಂದು ಜರ್ಮನಿಯ ವಿದೇಶಾಂಗ ಸಚಿವ ಫ್ರಾಂಕ್-ವಾಲ್ಟರ್ ಸ್ಟೀನಮೀರ್ ಆರೋಪಿಸಿದ್ದಾರೆ.
 ಬಾಲಕಿಯನ್ನು ಅಪಹರಿಸಲಾಗಿತ್ತು ಮತ್ತು ಆಕೆಯ ಮೇಲೆ ಅತ್ಯಾಚಾರವೆಸಗಲಾಗಿತ್ತು ಎನ್ನುವುದಕ್ಕೆ ಯಾವುದೇ ಸಾಕ್ಷಾಧಾರಗಳಿಲ್ಲ ಎಂದು ಬರ್ಲಿನ್ ಪ್ರಾಸಿಕ್ಯೂಟರ್ ಕಚೇರಿಯು ಸ್ಪಷ್ಟಪಡಿಸಿದೆ.
ಶಾಲೆಯಲ್ಲಿ ಸಮಸ್ಯೆಯೊಂದು ತಲೆದೋರಿದ ಬಳಿಕ ತಾನು ಮನೆಗೆ ಮರಳಲು ಭೀತಿಗೊಂಡಿದ್ದೆ, ಹೀಗಾಗಿ ಅಪಹರಣ ಮತ್ತು ಅತ್ಯಾಚಾರದ ಕಥೆ ಕಟ್ಟಿದ್ದೆ ಎಂದು ಬಾಲಕಿ ಅಂತಿಮವಾಗಿ ಪೊಲೀಸರೆದುರು ಒಪ್ಪಿಕೊಂಡಿದ್ದಾಳೆ.
ನಾಪತ್ತೆಯಾಗುವ ಮುನ್ನ ಬಾಲಕಿ 20ರ ಹರೆಯದ ಇಬ್ಬರು ಯುವಕರೊಂದಿಗೆ ಲೈಂಗಿಕ ಸಂಪರ್ಕ ಹೊಂದಿದ್ದಳು ಎನ್ನುವುದು ತನಿಖೆಯಿಂದ ಬೆಳಕಿಗೆ ಬಂದಿದೆ.
ಅಪ್ರಾಪ್ತ ವಯಸ್ಕ ಬಾಲಕಿಯ ಮೇಲೆ ಶಂಕಿತ ಲೈಂಗಿಕ ದೌರ್ಜನ್ಯವೆಸಗಿದ್ದಕ್ಕಾಗಿ ಪ್ರಾಸಿಕ್ಯೂಟರ್ ಕಚೇರಿಯು ಈಗ ಅವರನ್ನು ತನಿಖೆಗೊಳಪಡಿಸಿದೆ. ಆದರೆ ಬಾಲಕಿ ನಾಪತ್ತೆಯಾಗಿದ್ದಕ್ಕೂ ಅವರಿಗೂ ಯಾವುದೇ ಸಂಬಂಧವಿಲ್ಲ ಎಂದು ಅದು ತಿಳಿಸಿದೆ.