ವೈದ್ಯಕೀಯ ಸಲಕರಣೆ ಸಂಶೋಧನೆ ಕುರಿತ ರಾಜ್ಯಮಟ್ಟದ ಕಾರ್ಯಾಗಾರ
ಮೌಲ್ಯಾಧರಿತ ವಹಿವಾಟು ಯಶಸ್ಸಿನ ಗುಟ್ಟು
ಮಂಗಳೂರು: ಮೌಲ್ಯಾಧರಿತ ವಹಿವಾಟು ಯಶಸ್ಸಿನ ಗುಟ್ಟು ಎಂದು ವೈದ್ಯಕೀಯ ಸಲಕರಣೆಗಳ ಉತ್ಪಾದನೆಯಲ್ಲಿ ಜಾಗತಿಕ ಮಟ್ಟದಲ್ಲಿ ಮುಂಚೂಣಿಯಲ್ಲಿರುವ ಮೈಸೂರಿನ ಸ್ಕ್ಯಾನ್ರೇ ಸಂಸ್ಥಾಪಕ ಹಾಗೂ ಆಡಳಿತ ನಿರ್ದೇಶಕ ವಿಶ್ವಪ್ರಸಾದ್ ಆಳ್ವ ಅಭಿಪ್ರಾಯಪಟ್ಟರು.
ನಗರದ ಸೆಂಟ್ ಅಲೋಶಿಯಸ್ ಸಂಸ್ಥೆಯಲ್ಲಿ ಹಮ್ಮಿಕೊಂಡಿದ್ದ "ವೈದ್ಯಕೀಯ ಸಲಕರಣೆ ಸಂಶೋಧನೆ" ಕುರಿತ ರಾಜ್ಯಮಟ್ಟದ ಕಾರ್ಯಾಗಾರ ಉದ್ಘಾಟಿಸಿ ಅವರು ಮಾತನಾಡಿದರು. ಮೌಲ್ಯಗಳಿಗೆ ಬದ್ಧತೆ, ಕಠಿಣ ಪರಿಶ್ರಮ ಹಾಗೂ ಜನಪರ ಕಾಳಜಿ ಯಾವುದೇ ಉದ್ಯಮ ಯಶಸ್ಸಿನ ಸೂತ್ರವಾಗಬಲ್ಲದು ಎಂದು ವಿಶ್ಲೇಷಿಸಿದರು.
"ನಾಲ್ಕು ವರ್ಷಗಳ ಹಿಂದೆ ಆರಂಭವಾದ ಸ್ಕ್ಯಾನ್ರೇ ಇಂದು ಜಾಗತಿಕ ಮಟ್ಟಕ್ಕೆ ಬೆಳೆಯಲು ಕಾರಾಣವಾದದ್ದು ಈ ಸೂತ್ರ. ಐದು ಮಂದಿ ಉದ್ಯೋಗಿಗಳಿಂದ ಆರಂಭವಾದ ಸಂಸ್ಥೆ ಇಂದು 600 ಸಿಬ್ಬಂದಿಯನ್ನು ಹೊಂದಿ ವಾರ್ಷಿಕ 30 ದಶಲಕ್ಷ ಡಾಲರ್ ವಹಿವಾಟು ನಡೆಸುತ್ತಿದೆ. ಸಂಸ್ಥೆ ಇಂದು ಹೂಡಿಕೆದಾರರಿಗೆ 800 ಕೋಟಿ ರೂಪಾಯಿಯ ಸಂಪತ್ತು ಸೃಷ್ಟಿಸಲು ಸಾಧ್ಯವಾಗಿರುವುದು ಮೌಲ್ಯಗಳಿಗೆ ಬದ್ಧವಾಗಿರುವ ಕಾರಣದಿಂದ" ಎಂದು ದಕ್ಷಿಣ ಕನ್ನಡ ಮೂಲದ ಆಳ್ವ ತಮ್ಮ ಯಶೋಗಾಥೆ ಬಿಚ್ಚಿಟ್ಟರು.
"ಆರೋಗ್ಯ ಸುರಕ್ಷೆ ಹಳ್ಳಿಗಾಡಿನ ಜನಸಾಮಾನ್ಯರಿಗೂ ಕೈಗೆಟುಕುವಂತಾಗಬೇಕು ಎಂಬ ಧ್ಯೇಯದೊಂದಿಗೆ ವಿಶ್ವದರ್ಜೆಯ ವೈದ್ಯಕೀಯ ಸಲಕರಣೆಗಳನ್ನು ಅಗ್ಗದ ದರದಲ್ಲಿ ಉತ್ಪಾದಿಸುವ ಸಾಹಸದಲ್ಲಿ ಸ್ಕ್ಯಾನ್ರೇ ಯಶಸ್ವಿಯಾಗಿದೆ. ಈ ಕ್ಷೇಥ್ರದ ಬಹುತೇಕ ಬಹುರಾಷ್ಟ್ರೀಯ ಕಂಪನಿಗಳು ವಿದೇಶಿ ಅಗತ್ಯತೆಗಳನ್ನು ಗಮನದಲ್ಲಿಟ್ಟುಕೊಂಡು ವೈದ್ಯಕೀಯ ಸಲಕರಣೆಗಳನ್ನು ಉತ್ಪಾದಿಸಿದರೆ, ನಮ್ಮ ಸಂಸ್ಥೆ ಹೊಸ ಪ್ರಯೋಗಕ್ಕೆ ಮುಂದಾಗಿ, ಅಗ್ಗದ ದರದಲ್ಲಿ ಗುಣಮಟ್ಟದ ಉಪಕರಣಗಳನ್ನು ಉತ್ಪಾದಿಸುತ್ತಿದೆ. ನಮ್ಮ ಸಂಸ್ಥೆ ಇದೀಗ ವಿಶ್ವದ 80 ದೇಶಗಳಲ್ಲಿ ಇಂದು ಮಾರುಕಟ್ಟೆ ಹೊಂದಿದೆ.
ನಾಲ್ಕು ದೇಶಗಳಲ್ಲಿ ಘಟಕಗಳನ್ನು ಹೊಂದಿರುವ ಸ್ಕ್ಯಾನ್ರೇ ಇಷ್ಟರಲ್ಲೇ ಮೆಕ್ಸಿಕೊ, ರಷ್ಯಾ ಹಾಗೂ ಮಧ್ಯಪ್ರಾಚ್ಯ ದೇಶಗಳಲ್ಲಿ ಘಟಕಗಳನ್ನು ಆರಂಭಿಸಲಿದೆ" ಎಂದು ವಿವರಿಸಿದರು.
ದೇಶದ ಸರ್ವಾಂಗೀಣ ಅಭಿವೃದ್ಧಿಗೆ ಆರೋಗ್ಯ ಸಂರಕ್ಷಣೆ ಹಾಗೂ ಶಿಕ್ಷಣ ಕ್ಷೇತ್ರದ ಬಗ್ಗೆ ಹೆಚ್ಚಿನ ಗಮನ ಹರಿಸುವ ಅಗತ್ಯವಿದೆ ಎಂದು ಪ್ರತಿಪಾದಿಸಿದರು.
ವಿಶೇಷ ಅತಿಥಿಯಾಗಿದ್ದ ಫೋರಸ್ ಹೆಲ್ತ್ನ ವ್ಯವಸ್ಥಾಪಕ ನಿರ್ದೇಶಕ ಡಾ.ಶ್ಯಾಮ್ ವಾಸುದೇವ್ ಮಾತನಾಡಿ, "ವಿಶ್ವಾದ್ಯಂತ ಆರೋಗ್ಯ ಸುರಕ್ಷೆ ಇಂದು ಜನರ ಕೈಗೆಟುಕದ ಗಗನ ಕುಸುಮವಾಗಿದೆ. ಈ ಪರಿಸ್ಥಿತಿಯಲ್ಲಿ ಬದಲಿಸಿ, ಆಸ್ಪತ್ರೆಗಳೇ ಜನರ ಬಳಿಗೆ ಹೋಗಿ ಕೈಗೆಟುಕುವ ದರದಲ್ಲಿ ಚಿಕಿತ್ಸೆ ನೀಡುವ ಪ್ರಕ್ರಿಯೆಗೆ ವೈದ್ಯಕೀಯ ಸಲಕರಣೆಗಳ ಇತ್ತೀಚಿನ ಸಂಶೋಧನೆಗಳು ನೆರವಾಗುತ್ತಿವೆ" ಎಂದು ಅಭಿಪ್ರಾಯಪಟ್ಟರು.
ಅಲೋಶಿಯಸ್ ಶಿಕ್ಷಣ ಸಂಸ್ಥೆಗಳ ರೆಕ್ಟರ್ ರೆವರೆಂಡ್ ಫಾದರ್ ಡೆನ್ಸಿಲ್ ಲೋಬೊ ಅಧ್ಯಕ್ಷತೆ ವಹಿಸಿದ್ದರು. ಜೀವನದಲ್ಲಿ ಶಿಸ್ತು ಹಾಗೂ ಮೌಲ್ಯವನ್ನು ಅಳವಡಿಸಿಕೊಂಡರೆ ಎಷ್ಟು ಎತ್ತರಕ್ಕೂ ಏರಲು ಸಾಧ್ಯ ಎನ್ನುವುದನ್ನು ವಿಶ್ವಪ್ರಸಾದ್ ಆಳ್ವ ಅವರಂಥ ಅಲೋಶಿಯಸ್ ಹಳೆವಿದ್ಯಾರ್ಥಿಗಳು ತೋರಿಸಿಕೊಟ್ಟಿದ್ದಾರೆ. ಶಿಸ್ತು ಹಾಗೂ ಮೌಲ್ಯದ ತಳಹದಿಯಲ್ಲಿ ಶಿಕ್ಷಣ ನೀಡಿದರೆ ಮಾತ್ರ ಉತ್ತಮ ಸಮಾಜ ನಿರ್ಮಾಣ ಸಾಧ್ಯ ಎಂದರು.
ಕಾಲೇಜಿನ ಪ್ರಾಚಾರ್ಯ ರೆವರೆಂಡ್ ಫಾದರ್ ಸ್ವೀಬರ್ಟ್ ಡಿಸಿಲ್ವಾ ಪ್ರಾಸ್ತಾವಿಕವಾಗಿ ಮಾತನಾಡಿ, "ಅಂಕ ವ್ಯವಸ್ಥೆಯೇ ಪ್ರಧಾನವಾಗಿರುವ ನಮ್ಮ ಶಿಕ್ಷಣ ವ್ಯವಸ್ಥೆಯಲ್ಲಿ ಬದಲಾವಣೆ ತಂದು ಸಂಶೋಧನಾತ್ಮಕ ಶಿಕ್ಷಣ ವ್ಯವಸ್ಥೆ ಬಂದಾಗ ಮಾತ್ರ ಅದು ಸಮಾಜಕ್ಕೆ ನೆರವಾಗುತ್ತದೆ. ಬಡವರಿಗೆ ಆರೋಗ್ಯಕ್ಷೇತ್ರದ ಸಂಶೋಧನೆಗಳ ಪ್ರಯೋಜನ ಲಭಿಸುವಂತಾದಾಗ ಮಾತ್ರ ಸಮಾಜದ ಅಭಿವೃದ್ಧಿ ಸಾಧ್ಯ" ಎಂದು ಬಣ್ಣಿಸಿದರು.
ಸಂಸ್ಥೆಯ ರಿಜಿಸ್ಟ್ರಾರ್ ನರಹರಿ, ಉಪಪ್ರಾಚಾರ್ಯ ಜಾನ್ ಸೆರಾ, ಪ್ರವೀಣ್ ಮಾರ್ಟಿಸ್ ಮತ್ತಿತರರು ಉಪಸ್ಥಿತರಿದ್ದರು. ಜೀವವಿಜ್ಞಾನ ವಿಭಾಗದ ಡೀನ್ ಪ್ರೆಸಿಲ್ವಾ ಡಿಸಿಲ್ವಾ ಸ್ವಾಗತಿಸಿ, ಭೌತವಿಜ್ಞಾನ ವಿಭಾಗದ ಡೀನ್ ಪ್ರಕಾಶ್ ಕಾಮತ್ ವಂದಿಸಿದರು. ಒಂದು ದಿನದ ಈ ಕಾರ್ಯಾಗಾರದಲ್ಲಿ ರಾಜ್ಯದ ವಿವಿಧೆಡೆಗಳ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳ ಬೋಧಕರು, ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ಈ ಸಂದರ್ಭ ಆಯೋಜಿಸಿದ್ದ ವೈದ್ಯಕೀಯ ಸಲಕರಣೆಗಳ ವಸ್ತು ಪ್ರದರ್ಶನದಲ್ಲಿ ರೇಡಿಯಾಲಜಿ, ರೋಗಿಗಳ ಮೇಲ್ವಿಚಾರಣೆ, ಕ್ರಿಟಿಕಲ್ ಕೇರ್, ಶ್ವಾಸಕಾಂಗ ವ್ಯವಸ್ಥೆಯ ಅನಸ್ತೇಶಿಯಾ, ಶಸ್ತ್ರಚಿಕಿತ್ಸೆ, ಹೃದ್ರೋಗ, ದಂತವಿಜ್ಞಾನ ಹಾಗೂ ಆರೋಗ್ಯ ವಿಜ್ಞಾನ ಕ್ಷೇತ್ರದ ಅತ್ಯಾಧುನಿಕ ಯಂತ್ರೋಪಕರಣಗಳು ಪ್ರದರ್ಶನಗೊಂಡವು. ವಿವಿಧ ವಿಷಯಗಳ ಬಗ್ಗೆ ತಜ್ಞರು ಉಪನ್ಯಾಸ ನೀಡಿದರು.
