ಇರಾನ್ನಲ್ಲಿ ‘ಅನುಕಂಪದ ಗೋಡೆಗಳು’: ವ್ಯಾಪಕವಾಗಿ ಹರಡುತ್ತಿರುವ ಬಡವರಿಗೆ ದಾನ ಮಾಡುವ ಚಳವಳಿ
ಟೆಹರಾನ್, ಫೆ. 9: ಇರಾನ್ನ ಆರ್ಥಿಕತೆ ಸಂಕಷ್ಟದಲ್ಲಿದ್ದು ತೀವ್ರ ಚಳಿ ದೇಶವನ್ನು ವ್ಯಾಪಿಸುತ್ತಿರುವಂತೆಯೇ, ಅಲ್ಲೊಂದು ವಿನೂತನ ಮಾನವೀಯ ಚಳವಳಿ ಮುನ್ನೆಲೆಗೆ ಬಂದಿದೆ.
ಬಡವರಿಗೆ ಸಹಾಯ ಮಾಡುವ ಉದ್ದೇಶದಿಂದ ದೇಶದ ಪ್ರಮುಖ ನಗರಗಳಲ್ಲಿ ‘‘ವಾಲ್ಸ್ ಆಫ್ ಕೈಂಡ್ನೆಸ್ (ಅನುಕಂಪದ ಗೋಡೆಗಳು)’’ ಎಂಬ ಚಳವಳಿಯೊಂದು ಹರಡುತ್ತಿದೆ.
ನಗರಗಳ ಗೋಡೆಗಳಲ್ಲಿ ಕೆಲವು ಕೊಕ್ಕೆಗಳು ಮತ್ತು ಹ್ಯಾಂಗರ್ಗಳನ್ನು ನೇತುಹಾಕಲಾಗುತ್ತದೆ ಹಾಗೂ ಅದರ ಪಕ್ಕದಲ್ಲೇ ಈ ರೀತಿಯ ಬರಹವಿರುತ್ತದೆ: ‘‘ನಿಮಗೆ ಅದು ಅಗತ್ಯವಿಲ್ಲದಿದ್ದರೆ ಇಲ್ಲಿ ಬಿಟ್ಟು ಹೋಗಿ; ನಿಮಗೆ ಅದು ಅಗತ್ಯವಿದ್ದರೆ ತೆಗೆದುಕೊಂಡು ಹೋಗಿ’’. ಈ ಹ್ಯಾಂಗರ್ಗಳಲ್ಲಿ ಕೋಟ್ಗಳು, ಪ್ಯಾಂಟ್ಗಳು ಮತ್ತು ಇತರ ಬೆಚ್ಚಗಿನ ಬಟ್ಟೆಗಳು ಕಾಣಿಸಲಾರಂಭಿಸಿದವು.
ಈ ಕಲ್ಪನೆ ಈಶಾನ್ಯದ ನಗರ ಮಶ್ಶದ್ನಲ್ಲಿ ಆರಂಭಗೊಂಡಿದೆಯೆಂದು ಹೇಳಲಾಗಿದೆ. ಯಾರೋ ಒಬ್ಬರು ಅಲ್ಲಿ ಈ ರೀತಿಯ ಕೊಕ್ಕೆಗಳು ಮತ್ತು ಹ್ಯಾಂಗರ್ಗಳನ್ನು ನೇತು ಹಾಕಿದ್ದರು. ಈ ಮಾನವೀಯತೆಯ ಚಳವಳಿಯನ್ನು ಹುಟ್ಟು ಹಾಕಿದ ವ್ಯಕ್ತಿ ಅನಾಮಧೇಯನಾಗಿ ಉಳಿಯಲು ಬಯಸಿದ್ದಾರೆ ಎಂದು ಸ್ಥಳೀಯ ಪತ್ರಿಕೆಗಳು ವರದಿ ಮಾಡಿವೆ.
ಆದರೆ, ಈ ಚಳವಳಿ ಕ್ಷಿಪ್ರವಾಗಿ ದೇಶಾದ್ಯಂತ ಹರಡಿತು ಹಾಗೂ ಸಾಮಾಜಿಕ ಮಾಧ್ಯಮಗಳಲ್ಲಿ ಸದ್ದು ಮಾಡಿತು.
‘‘ಗೋಡೆಗಳು ಅಂತರವನ್ನು ಉಂಟು ಮಾಡುತ್ತವೆ ನಿಜ. ಆದರೆ, ಶಿರಝ್ನ ಕೆಲವು ಬೀದಿಗಳಲ್ಲಿ ಇವೇ ಗೋಡೆಗಳು ಜನರನ್ನು ಪರಸ್ಪರ ಹತ್ತಿರಕ್ಕೆ ತಂದಿವೆ’’ ಎಂದು ಫೇಸ್ಬುಕ್ನ ಸಂದೇಶವೊಂದು ಹೇಳುತ್ತದೆ.
ಶಿರಝ್ ನಗರದ ಘಡಮ್ಗಹ್ ಬೀದಿಯ ಗೋಡೆಯೊಂದರಲ್ಲಿ ಹಲವು ಕೋಟ್ಗಳು, ಜಾಕೆಟ್ಗಳು ಮತ್ತು ಒಂದು ಜೊತೆ ಜೀನ್ಸ್ಗಳನ್ನು ನೇತು ಹಾಕಲಾಗಿದೆ. ದೇಶದ ಪಶ್ಚಿಮದ ಕೆರ್ಮನ್ಶಾದ ಗೋಡೆಯೊಂದರಲ್ಲಿ ಮಹಿಳೆಯರ ಉಡುಪುಗಳನ್ನು ನೇತು ಹಾಕಲಾಗಿದೆ. ಮಳೆಯಿಂದ ರಕ್ಷಿಸಲು ಅವುಗಳಿಗೆ ಪ್ಲಾಸ್ಟಿಕ್ ಹೊದಿಸಲಾಗಿದೆ. ಅವುಗಳ ಕೆಳಗೆ ಶೂಗಳ ಶೆಲ್ಫ್ ಇದೆ.
ಪೂರ್ವದ ನಗರ ಬಿರ್ಜಂಡ್ನಲ್ಲಿ ಬಾಲಕಿಯೊಬ್ಬಳು ಸವೆದ ಶೂಗಳನ್ನು ಬಿಸಾಡಿ ಹೊಸ ಶೂಗಳನ್ನು ಧರಿಸಿ ಸಂತೋಷಪಟ್ಟಳು.
‘‘ಹಳೆಯ ನಗರಗಳ ಜನರ ಕುರಿತ ಹಳೆಯ ಅನುಕಂಪದ ಕತೆಗಳು ಅಮಾನುಷತೆ ಮತ್ತು ನಿರ್ಲಕ್ಷವೇ ತುಂಬಿದ ಶತಮಾನದಲ್ಲಿ ಇಂದು ಮತ್ತೆ ಜೀವ ಪಡೆದುಕೊಂಡಿವೆ’’ ಎಂದು ‘ಶರ್ಘ್’ ದೈನಿಕ ಬಣ್ಣಿಸಿದೆ.
