ನಾಳೆ ಭಾರತ-ಶ್ರೀಲಂಕಾ ಎರಡನೆ ಟ್ವೆಂಟಿ-20 ಪಂದ್ಯ:ತಿರುಗೇಟು ನೀಡುವ ವಿಶ್ವಾಸದಲ್ಲಿ ಧೋನಿ ಪಡೆ
ರಾಂಚಿ, ಫೆ.11: ಮೊದಲ ಪಂದ್ಯದಲ್ಲಿ ಅನನುಭವಿ ಶ್ರೀಲಂಕಾದಿಂದ ಆಘಾತ ಅನುಭವಿಸಿರುವ ಭಾರತ ತಂಡ ಶುಕ್ರವಾರ ಇಲ್ಲಿ ನಡೆಯಲಿರುವ ಎರಡನೆ ಟ್ವೆಂಟಿ-20 ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ದ್ವೀಪರಾಷ್ಟ್ರಕ್ಕೆ ತಿರುಗೇಟು ನೀಡಿ ಸರಣಿಯಲ್ಲಿ ಸಮಬಲ ಸಾಧಿಸುವ ವಿಶ್ವಾಸದಲ್ಲಿದೆ.
ಎಂಎಸ್ ಧೋನಿ ತನ್ನ ತವರು ಮೈದಾನದಲ್ಲಿ ಸರಣಿಯ ಎರಡನೆ ಪಂದ್ಯವನ್ನು ಆಡಲು ಸಜ್ಜಾಗಿದ್ದಾರೆ. ರಾಂಚಿ ಸ್ಟೇಡಿಯಂ ಇದೇ ಮೊದಲ ಬಾರಿ ಟ್ವೆಂಟಿ-20 ಅಂತಾರಾಷ್ಟ್ರೀಯ ಪಂದ್ಯದ ಆತಿಥ್ಯವಹಿಸಿಕೊಂಡಿದೆ.
ಭಾರತ ರಾಂಚಿಯಲ್ಲಿ ಆಡಿರುವ ಮೂರೂ ಏಕದಿನ ಪಂದ್ಯಗಳನ್ನು ಗೆದ್ದುಕೊಂಡಿದೆ. ಮೂರೂ ಪಂದ್ಯಗಳಲ್ಲಿ ಇನಿಂಗ್ಸ್ವೊಂದರಲ್ಲಿ 300ಕ್ಕೂ ಅಧಿಕ ರನ್ ಗಳಿಸಿದೆ. ಆಸ್ಟ್ರೇಲಿಯ ವಿರುದ್ಧ ಆಡಿದ್ದ ಒಂದು ಪಂದ್ಯ ಫಲಿತಾಂಶರಹಿತವಾಗಿತ್ತು. ಸಾಮಾನ್ಯವಾಗಿ ಜೆಎಸ್ಸಿಎ ಅಂತಾರಾಷ್ಟ್ರೀಯ ಸ್ಟೇಡಿಯಂ ಕಾಂಪ್ಲೆಕ್ಸ್ನಲ್ಲಿ ಗರಿಷ್ಠ ಮೊತ್ತದ ಪಂದ್ಯ ನಡೆಯುತ್ತದೆ.
ಸ್ಟೇಡಿಯಂನ ಔಟ್ ಫೀಲ್ಡ್ ಕಳಪೆ ಮಟ್ಟದಲ್ಲಿದೆ. ಇದು ಫೀಲ್ಡರ್ಗಳಿಗೆ ಅಪಾಯಕಾರಿಯಾಗಿದೆ. ತಮಗೆ ಮೈದಾನವನ್ನು ಸಿದ್ಧಪಡಿಸಲು ಸಮಯ ಸಿಗಲಿಲ್ಲ ಎಂದು ಜೆಎಸ್ಸಿಎ ಅಧಿಕಾರಿಗಳು ಕಳಪೆ ಪಿಚ್ ಬಗ್ಗೆ ಸಮರ್ಥಿಸುತ್ತಿದ್ದಾರೆ.
ಶ್ರೀಲಂಕಾ ಪಾಳಯದಲ್ಲಿ ಅನನುಭವಿ ಆಟಗಾರರೇ ತುಂಬಿಕೊಂಡಿದ್ದಾರೆ. ಹೊಸ ಆಟಗಾರರ ನೆರವಿನಿಂದ ಪುಣೆಯಲ್ಲಿ ನಡೆದ ಮೊದಲ ಪಂದ್ಯವನ್ನು 5 ವಿಕೆಟ್ಗಳ ಅಂತರದಿಂದ ಜಯಿಸಿರುವ ಶ್ರೀಲಂಕಾ ಸರಣಿ ಜಯಿಸುವತ್ತ ಚಿತ್ತವಿರಿಸಿದೆ.
ಶ್ರೀಲಂಕಾದ ತ್ರಿವಳಿ ವೇಗಿಗಳಾದ ಕಸುನ್ ರಜಿತಾ, ದುಶ್ಮಂತ ಚಾಮೀರಾ ಹಾಗೂ ದಸುನ್ ಶನಕಾ ರಾಂಚಿಯ ಪಿಚ್ನಲ್ಲೂ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸದಲ್ಲಿದ್ದಾರೆ.
ಭಾರತ ತಂಡ ಆಸ್ಟ್ರೇಲಿಯ ನೆಲದಲ್ಲಿ ಅಗ್ರ ಕ್ರಮಾಂಕದ ದಾಂಡಿಗರ ಅಮೋಘ ಪ್ರದರ್ಶನದ ನೆರವಿನಿಂದ 3-0 ಅಂತರದಿಂದ ಟ್ವೆಂಟಿ-20 ಸರಣಿಯನ್ನು ಜಯಿಸಿತ್ತು. ಆ ಸರಣಿಯಲ್ಲಿ ಭಾರತದ ಮಧ್ಯಮ ಹಾಗೂ ಕೆಳ ಕ್ರಮಾಂಕದ ಆಟಗಾರರಿಗೆ ಬ್ಯಾಟಿಂಗ್ ಮಾಡಲು ಅವಕಾಶವೇ ದೊರೆತ್ತಿರಲಿಲ್ಲ.
ಪುಣೆಯಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಭಾರತದ ದಾಂಡಿಗರು ಶ್ರೀಲಂಕಾ ಬೌಲರ್ಗಳ ದಾಳಿಗೆ ತತ್ತರಿಸಿ ತರೆಗಲೆಯಂತೆ ಉದುರಿದ್ದರು. ಆರ್. ಅಶ್ವಿನ್ ಒಂದಷ್ಟು ಹೋರಾಟವನ್ನು ನೀಡಿ ತಂಡದ ಸ್ಕೋರನ್ನು 100ರ ಗಡಿಯನ್ನು ದಾಟಿಸಿದ್ದರು.
ನಾಯಕ ಧೋನಿ ಸದ್ಯ ಕಳಪೆ ಫಾರ್ಮ್ನಲ್ಲಿದ್ದಾರೆ. ಟ್ವೆಂಟಿ-20 ವಿಶ್ವಕಪ್ ಆರಂಭವಾಗುವ ಮೊದಲು ಸರಣಿಯ ಉಳಿದೆರಡು ಪಂದ್ಯಗಳು ಹಾಗೂ ಏಷ್ಯಾಕಪ್ನಲ್ಲಿ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸದಲ್ಲಿದ್ದಾರೆ. ಧೋನಿಗೆ ಮೊದಲಿನ ಲಯಕ್ಕೆ ಮರಳಲು ತವರು ಮೈದಾನ ಉತ್ತಮ ವೇದಿಕೆಯಾಗಿದೆ..
ಧೋನಿ ವೇಗಿಗಳಾದ ಆಶೀಷ್ ನೆಹ್ರಾ ಹಾಗೂ ಜಸ್ಪ್ರೀತ್ ಬುಮ್ರಾಗೆ ಅವಕಾಶ ನೀಡುವ ಸಾಧ್ಯತೆಯಿದೆ. ಭುವನೇಶ್ವರ ಕುಮಾರ್ ಅವಕಾಶ ಗಿಟ್ಟಿಸಿಕೊಳ್ಳುತ್ತಾರೋ? ಎಂದು ನೋಡಬೇಕಾಗಿದೆ. ಅಶ್ವಿನ್ ಉತ್ತಮ ಪ್ರದರ್ಶನ ನೀಡುತ್ತಿದ್ದು, ಹರ್ಭಜನ್ ಸಿಂಗ್ ಅವಕಾಶ ಪಡೆಯುವ ಸಾಧ್ಯತೆಯಿಲ್ಲ.
ಟೀಮ್ ನ್ಯೂಸ್: ಭಾರತ ತಂಡ ಮುಂಬರುವ ಏಷ್ಯಾಕಪ್ ಹಾಗೂ ಟ್ವೆಂಟಿ-20 ವಿಶ್ವಕಪ್ನ್ನು ದೃಷ್ಟಿಯಲ್ಲಿಟ್ಟುಕೊಂಡು ಆಲ್ರೌಂಡರ್ ಪವನ್ ನೇಗಿ ಅವರಿಗೆ ಚೊಚ್ಚಲ ಪಂದ್ಯ ಆಡಲು ಅವಕಾಶ ನೀಡಬಹುದು. ಪುಣೆಯಲ್ಲಿ ನಡೆದ ಚೊಚ್ಚಲ ಪಂದ್ಯದಲ್ಲಿ ಹಾರ್ದಿಕ್ ಪಾಂಡೆ ವಿಕೆಟ್ ಪಡೆಯಲು ವಿಫಲರಾಗಿದ್ದು, ಎರಡನೆ ಪಂದ್ಯದಿಂದ ಹೊರಗುಳಿಯಬಹುದು.
ಕೈನೋವಿನಿಂದ ಚೇತರಿಸಿಕೊಂಡಿರುವ ಶ್ರೀಲಂಕಾದ ಹಿರಿಯ ಆಟಗಾರ ತಿಲಕರತ್ನೆ ದಿಲ್ಶನ್ ಎರಡನೆ ಪಂದ್ಯಕ್ಕೆ ಲಭ್ಯವಿರುವ ಸಾಧ್ಯತೆಯಿದೆ. ದಿಲ್ಶನ್ ಅವರು ನಿರೊಶನ್ ಡಿಕ್ವೆಲ್ಲಾ ಬದಲಿಗೆ ಆಡಬಹುದು.
ತಂಡಗಳು: ಭಾರತ: ಎಂಎಸ್ ಧೋನಿ(ನಾಯಕ), ಶಿಖರ್ ಧವನ್, ರೋಹಿತ್ ಶರ್ಮ, ಅಜಿಂಕ್ಯ ರಹಾನೆ, ಸುರೇಶ್ ರೈನಾ, ಯುವರಾಜ್ ಸಿಂಗ್, ರವೀಂದ್ರ ಜಡೇಜ, ರವಿಚಂದ್ರನ್ ಅಶ್ವಿನ್, ಜಸ್ಪ್ರೀತ್ ಬುಮ್ರಾ, ಪವನ್ ನೇಗಿ, ಆಶೀಷ್ ನೆಹ್ರಾ, ಮನೀಶ್ ಪಾಂಡೆ, ಹಾರ್ದಿಕ್ ಪಾಂಡ್ಯ, ಭುವನೇಶ್ವರ ಕುಮಾರ್ ಹಾಗೂ ಹರ್ಭಜನ್ ಸಿಂಗ್.
ಶ್ರೀಲಂಕಾ: ದಿನೇಶ್ ಚಾಂಡಿಮಾಲ್(ನಾಯಕ), ದುಶ್ಮಂತ ಚಾಮೀರಾ, ನಿರೊಶನ್ ಡಿಕ್ವೆಲ್ಲ, ತಿಲಕರತ್ನೆ ದಿಲ್ಶನ್, ಬಿನುರ ಫೆರ್ನಾಂಡೊ, ದಿಲ್ಹರ ಫೆರ್ನಾಂಡೊ, ಅಸೆಲಾ ಗುಣರತ್ನೆ, ದುನುಶ್ಕಾ ಗುಣತಿಲಕ, ಚಾಮರಾ ಕಪುಗಡೆರಾ, ತಿಸಾರ ಪೆರೇರಾ, ಸೀಕುಗೆ ಪ್ರಸನ್ನ, ಕಸುನ್ ರಜಿತಾ, ಸಚಿತ್ರಾ ಸೇನಾನಾಯಕೆ, ದಸುನ್ ಶನಕಾ, ಮಿಲಿಂದ ಸಿರಿವರ್ಧನ, ಜೆಫ್ರಿ ವ್ಯಾಂಡರ್ಸೆ.
ಪಂದ್ಯ ಆರಂಭದ ಸಮಯ: ರಾತ್ರಿ 7:30
