ಜನಸೇವೆಗೆ ಸಿದ್ಧ ಹೈದರಾಬಾದ್ ನ ಅತ್ಯಂತ ಕಿರಿಯ ಕಾರ್ಪೊರೇಟರ್ ಫ಼ಹದ್

ಹೈದರಾಬಾದ್ , ಫೆ. 11 : ಇತ್ತೀಚಿಗೆ ನಡೆದ ಜಿಎಚ್ಎಂಸಿ ಚುನಾವಣೆಯಲ್ಲಿ  ಇಲ್ಲಿನ ಉಪ್ಪುಗುಡ ಕ್ಷೇತ್ರದಿಂದ ಚುನಾಯಿತರಾದ ೨೧ ವರ್ಷ ವಯಸ್ಸಿನ ಫ಼ಹದ್ ಹೈದರಾಬಾದ್ ನ ಅತ್ಯಂತ ಕಿರಿಯ ಕಾರ್ಪೊರೇಟರ್ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. ರಾಜಕೀಯದಲ್ಲಿ ಅನನುಭವಿಯಾಗಿದ್ದರೂ " ನನ್ನ ತಂದೆ ಅಬ್ದುಲ್ ಸಮದ್ ಅವರು ರಾಜಕಾರನಿಯಾಗಿದ್ದರಿಂದ ನಾನು ಹುಟ್ಟಿನಿಂದಲೇ ರಾಜಕಾರಣಿ " ಎನ್ನುತ್ತಾರೆ ಇಲ್ಲಿನ ಡೆಕ್ಕನ್ ಕಾಲೇಜ್ ಆಫ್ ಇಂಜಿನಿಯರಿಂಗ್ ನಲ್ಲಿ ಸಿವಿಲ್ ಇಂಜಿನಿಯರಿಂಗ್ ಕಲಿಯುತ್ತಿರುವ ಎಐಎಮ್ಐಎಮ್  ಪಕ್ಷದ ಈ ಕಿರಿಯ ಕಾರ್ಪೊರೇಟರ್ . 

" ನನಗೆ ರಾಜಕೀಯಕ್ಕೆ ಬರುವ ಕನಸು ಇತ್ತು . ಆದರೆ ಅದು ಇಷ್ಟು ಬೇಗ ನನಸಾಗುತ್ತೆ ಎಂದು ಕೊಂಡಿರಲಿಲ್ಲ. ನನ್ನ ಸುತ್ತಮುತ್ತಲ ಜನರೇ ನನ್ನನ್ನು ರಾಜಕೀಯಕ್ಕೆ ಬರುವಂತೆ ಪ್ರೇರೇಪಿಸಿದರು. ನಮ್ಮ ಪಕ್ಷದ ಅಧ್ಯಕ್ಷರಾದ ಅಸದುದ್ದೀನ್ ಉವೈಸಿ ಅವರೂ ಯುವಜನತೆ ರಾಜಕೀಯಕ್ಕೆ ಬಂದು ಪರಿಸ್ಥಿತಿ ಬದಲಾಯಿಸಬೇಕೆಂದು ಹೇಳುತ್ತಿದ್ದರು " ಎಂದು ಹೇಳುತ್ತಾರೆ ಫ಼ಹದ್ .

ಈಗ ಇಂಜಿನಿಯರಿಂಗ್ ಅಂತಿಮ ವರ್ಷದಲ್ಲಿರುವ ಫ಼ಹದ್ ಗೆ ಕಾಲೇಜಿನಲ್ಲಿ ಕಲಿತ ವಿಷಯಗಳು ಜನಸೇವೆಯಲ್ಲಿ ಉಪಕಾರವಾಗಲಿವೆ ಎಂಬ ನಿರೀಕ್ಷೆ ಇದೆ. 

ಶಿಕ್ಷಣ , ಸೂಕ್ತ ಆರೋಗ್ಯ ಸೇವೆ ಹಾಗು ಬಡವರಿಗೆ ಆಹಾರ - ಈ ಮೂರು ಈ ಕಿರಿಯ ಜನಪ್ರತಿನಿಧಿಯ ಆದ್ಯತೆಗಳಾಗಿವೆ. " ನನ್ನ ಮೊದಲ ಕೆಲಸ ಅಂಗನವಾಡಿ ಹಾಗು ಸರಕಾರೀ ಪ್ರಾಥಮಿಕ ಶಾಲೆಗಳನ್ನು ಅಭಿವೃದ್ಧಿಪಡಿಸುವುದು. ಅಕ್ಬರುದ್ದೀನ್ ಉವೈಸಿ ೧೯೯೯ ರಲ್ಲಿ ಆಯ್ಕೆಯಾಗಿದ್ದಾಗ ಅವರು ಬಡವರಿಗೆ ಉಚಿತ ಶಿಕ್ಷಣ ನೀಡುವ ಯೋಜನೆ ರೂಪಿಸಿದ್ದರು . ಉಪ್ಪುಗುಡದಲ್ಲಿ ಈ ನಿಟ್ಟಿನಲ್ಲಿ  ಶೇ . ೭೦ ಕೆಲಸ ಆಗಿದೆ. ಅದನ್ನು ನಾನು ಪೂರ್ಣ ಗೊಳಿಸುತ್ತೇನೆ. ನನ್ನ ಕ್ಷೇತ್ರದಲ್ಲಿ ಐದು ಊಟದ ಯೋಜನೆ ಜಾರಿಯಾಗುವಂತೆ ಹಾಗು ಉತ್ತಮ ಆರೋಗ್ಯ ಸೇವೆ ನೀಡುವಂತೆ ನಾನು ನೋಡಿಕೊಳ್ಳುತ್ತೇನೆ " ಎಂದು ತಮ್ಮ ಯೋಜನೆಯನ್ನು ಫ಼ಹದ್ ಮುಂದಿಟ್ಟರು. 

ಫ಼ಹದ್ ಫೇಸ್ ಬುಕ್ ಹಾಗು ವಾಟ್ಸ್ ಆಪ್ ಗಳ ಮೂಲಕವೂ ಜನರೊಂದಿಗೆ ಬೆರೆಯಲು ಅವರ ಅಹವಾಲುಗಳನ್ನು ಕೇಳಲು ಸಜ್ಜಾಗಿದ್ದಾರೆ. ಇದಲ್ಲದೆ ಅವರ ಇಮೇಲ್ (fahad.abdat70@gmail.com) ಗೂ ಜನ ಸಂಪರ್ಕಿಸಬಹುದು ಎಂದಿದ್ದಾರೆ. " ನನ್ನ ತಂದೆ ಚೆನ್ನಾಗಿ ಕೆಲಸ ಮಾಡಿದ್ದರಿಂದ ಜನ ನನ್ನನ್ನು ಆಯ್ಕೆ ಮಾಡಿದ್ದಾರೆ. ಆ ವಿಶ್ವಾಸವನ್ನು ಉಳಿಸಿಕೊಳ್ಳುತ್ತೇನೆ " ಎಂದು ಫ಼ಹದ್ ಹೇಳುತ್ತಾರೆ. 

Photo : deccan chronicle.com