ಸರಳ-ಸಜ್ಜನಿಕೆಗೆ ಸಾ.ಶಿ.ಮರುಳಯ್ಯ ಆದರ್ಶ: ಪ್ರೊ.ಸಿದ್ದರಾಮಯ್ಯ; ಸಾ.ಶಿ.ಮರುಳಯ್ಯಗೆ ನುಡಿನಮನ ಕಾರ್ಯಕ್ರಮ

ಬೆಂಗಳೂರು, ಫೆ. 14: ಯಾವುದೇ ಸಮಯದಲ್ಲಾಗಲಿ ಎಲ್ಲರ ಜೊತೆಗೂ ಸರಳವಾಗಿ, ಒಳ್ಳೆಯ ರೀತಿಯಲ್ಲಿ ನಡೆದುಕೊಳ್ಳುವಂತಹ ವ್ಯಕ್ತಿತ್ವಹೊಂದಿದ್ದ ಹಿರಿಯ ಸಾಹಿತಿ ಸಾ.ಶಿ.ಮರುಳಯ್ಯ ನಿಜಕ್ಕೂ ಆದರ್ಶ ವ್ಯಕ್ತಿ ಎಂದು ಹಿರಿಯ ಸಾಹಿತಿ ಪ್ರೊ. ಎಸ್.ಜಿ.ಸಿದ್ದರಾಮಯ್ಯ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ರವಿವಾರ ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ಹೊಂಬಾಳೆ ಪ್ರತಿಭಾರಂಗ ಆಯೋಜಿಸಿದ್ದ್ದ ಸಾ.ಶಿ.ಮರುಳಯ್ಯನವರ ನುಡಿನಮನ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಮರುಳಯ್ಯ ಅವರದು ತುಂಬಾ ಸರಳವಾದ ವ್ಯಕ್ತಿತ್ವವಾಗಿತ್ತು. ಸಣ್ಣ ಮಕ್ಕಳಿಂದ ಹಿಡಿದು ವಯಸ್ಸಾದವರೆಗೂ ಎಲ್ಲರನ್ನೂ ಒಂದೇ ಸಮಾನವಾಗಿ ಕಾಣುತ್ತಿದ್ದರು. ಸಾಲುಸಾಲಿನಲ್ಲಿ ಪ್ರತಿವರ್ಷ ನಡೆಯುವ ತಾರಾಬಾಗಿನದಲ್ಲಿ ಅವರು ಸಣ್ಣ ಮಕ್ಕಳಿಗೆ ಪ್ರಶಸ್ತಿಯನ್ನು ನೀಡುತ್ತಿದ್ದರು. ಆದರೆ, ಅದನ್ನು ಅವರು ಯಾವತ್ತೂ ಪ್ರಶಸ್ತಿಯೆಂದುಕೊಳ್ಳುತ್ತಿರಲಿಲ್ಲ ಎಂಬುದು ಉದಾಹರಣೆ. ಇದು ಅವರ ವ್ಯಕ್ತಿತ್ವದ ಪ್ರತಿರೂಪ ಎಂದರು.

ನೇರ ಮತ್ತು ನಿರಾಳ ಮನಸ್ಸಿನ ವ್ಯಕ್ತಿಯಾಗಿದ್ದ ಅವರು, ಕನ್ನಡ ಭಾಷೆಯನ್ನು ಹೆಚ್ಚು ಇಷ್ಟ ಪಡುತ್ತಿದ್ದರು. ಸರಳವಾಗಿದ್ದರಿಂದ ಎಲ್ಲರನ್ನೂ ಒಗ್ಗೂಡಿಸಿಕೊಳ್ಳುವಂತಹ ವ್ಯಕ್ತಿತ್ವ ಅವರದು. ಆದುದರಿಂದಲೇ ಸಮಾಜದಲ್ಲಿ ಅವರನ್ನು ಗುರುವಾಗಿ ಕಾಣದೇ, ಮನೆಯ ಹಿರಿಯರನ್ನಾಗಿ ಎಲ್ಲರೂ ಕಾಣುತ್ತಿದ್ದದು ವಿಶೇಷವಾಗಿತ್ತು. ಇಂತಹ ವ್ಯಕ್ತಿಯ ಆದರ್ಶಗಳನ್ನು ಎಲ್ಲರೂ ಪಾಲಿಸಿದಾಗ ಹೊಸ ಸಮಾಜ ಕಟ್ಟಲು ಸಾಧ್ಯ ಎಂದು ಅಭಿಪ್ರಾಯಪಟ್ಟರು.

ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಲೇಖಕ ಪ್ರೊ.ಎಂ.ಎಚ್.ಕೃಷ್ಣಪ್ಪ ಮಾತನಾಡಿ, ಮರುಳಯ್ಯನವರು ಕಾವ್ಯದಲ್ಲಿ ಹೆಚ್ಚಾಗಿ ಮಾಧುರ್ಯವನ್ನು ಇಷ್ಟಪಡುತ್ತಿದ್ದರು. ಪ್ರಾಸಗಳನ್ನು ಅನುಕರಣೆ ಮಾಡುತ್ತಿದ್ದರು ಹಾಗೂ ಯಾವುದನ್ನು ರಸ ವಿಮರ್ಶೆಯೆಂದು ಕರೆಯಲಾಗುತ್ತೋ, ಯಾವುದು ಸ್ವಾದಗಳೆಂದು ಕರೆಯಲಾಗುತ್ತೋ ಅದನ್ನು ಹಿಡಿತದಲ್ಲಿಟ್ಟುಕೊಂಡು ಪಾಠ ಮಾಡುತ್ತಿದ್ದರು. ಹಾಗಾಗಿ ಅವರ ಅಧ್ಯಾಪಕ ವೃತ್ತಿಯೇ ಒಂದು ಕಲೆಯಾಗಿತ್ತು ಎಂದರು.

ರಾಜ್ಯದಲ್ಲಿ ಐಎಎಸ್ ಸೇರಿದಂತೆ ಅನೇಕ ಉನ್ನತ ಹುದ್ದೆಗಳಿಗೆ ಕನ್ನಡದಲ್ಲಿ ಪರೀಕ್ಷೆಗೆ ಅವಕಾಶ ಮಾಡಿಕೊಟ್ಟಂತಹ ವ್ಯಕ್ತಿ ಇವರು. ಇದರಿಂದಾಗಿ ರಾಜ್ಯದಲ್ಲಿ ಹಲವರು ಉನ್ನತ ಅಧಿಕಾರಿಗಳಾಗಿದ್ದಾರೆ. ಪ್ರಾದೇಶಿಕ ಭಾಷೆ ಮತ್ತು ಸಂಸ್ಕೃತದ ಮೇಲೆ ಅಭಿಮಾನ ಇರುವವರು ನಿಜವಾದ ಸಮಾಜ ಅಭಿವೃದ್ದಿ ಮಾಡಲು ಮುಂದಾಗುತ್ತಾರೆ ಎಂಬುದು ಅವರ ವಾದವಾಗಿತ್ತು ಎಂದು ಅವರು ನೆನಪಿಸಿದರು.

ಮರುಳಯ್ಯನವರಿಗೆ ದೂರದೃಷ್ಟಿಯಿತ್ತು. ಆದುದರಿಂದಲೇ ಅವರು ಮಕ್ಕಳಿಗೆ ಪುಸ್ತಕಗಳನ್ನು ತಯಾರು ಮಾಡುವಾಗ ಆಯ್ಕೆಯಾಗಿ ಬಂದ ಪುಸ್ತಕಗಳನ್ನು ಇಡೀ ರಾತ್ರಿಯೆಲ್ಲಾ ಅಭ್ಯಾಸ ಮಾಡಿ ಅದರಲ್ಲಿರುವ ತಪ್ಪುಗಳನ್ನು ಹಿಡಿದು ಅದನ್ನು ಮುಂದಿನ ಸಭೆಯಲ್ಲಿ ಚರ್ಚಿಸಿ ಅದನ್ನು ವಿರೋಧಿಸುತ್ತಿದ್ದರು. ಎಲ್ಲರನ್ನೂ ಒಳಗೊಳ್ಳುತ್ತಿದ್ದ ಅವರು, ಗ್ರಾಮೀಣ ಮತ್ತು ದಲಿತ ಸಾಹಿತ್ಯವನ್ನು ಬೆಳೆಸುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು ಎಂದು ಪ್ರೊ.ಅ.ರಾ.ಮಿತ್ರ ಅಭಿಪ್ರಾಯಪಟ್ಟರು.