ಎಟಿಪಿ ಮೆಂಫಿಸ್ ಓಪನ್ ಟೂರ್ನಿ: ನಿಶಿಕೊರಿಗೆ ಸತತ 4ನೆ ಪ್ರಶಸ್ತಿ

ವಾಷಿಂಗ್ಟನ್, ಫೆ.15: ಜಪಾನ್‌ನ ಏಳನೆ ರ್ಯಾಂಕಿನ ಕೀ ನಿಶಿಕೊರಿ ಎಟಿಪಿ ಮೆಂಫಿಸ್ ಓಪನ್ ಟೂರ್ನಿಯಲ್ಲಿ ಸತತ ನಾಲ್ಕನೆ ಬಾರಿ ಪುರುಷರ ಸಿಂಗಲ್ಸ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ.

   ರವಿವಾರ ಇಲ್ಲಿ ನಡೆದ ಪುರುಷರ ಸಿಂಗಲ್ಸ್ ಫೈನಲ್‌ನಲ್ಲಿ ನಿಶಿಕೊರಿ 18ರ ಹರೆಯದ ಅಮೆರಿಕದ ಆಟಗಾರ ಟೇಲರ್ ಫ್ರಿಟ್ಜ್‌ರನ್ನು 6-4, 6-4 ಸೆಟ್‌ಗಳ ಅಂತರದಿಂದ ಮಣಿಸಿ ಪ್ರಶಸ್ತಿ ಗೆದ್ದುಕೊಂಡರು. ಮೆಂಫಿಸ್ ಓಪನ್ ಟೂರ್ನಿಯಲ್ಲಿ ಸತತ 17ನೆ ಪಂದ್ಯವನ್ನು ಗೆದ್ದುಕೊಂಡಿರುವ ಅಗ್ರ ಶ್ರೇಯಾಂಕದ ನಿಶಿಕೊರಿ 11ನೆ ಬಾರಿ ಎಟಿಪಿ ಕಿರೀಟ ಧರಿಸಿದರು. ಒಂದೇ ಟೂರ್ನಿಯಲ್ಲಿ ಸತತ 4ನೆ ಬಾರಿ ಟ್ರೋಫಿ ಜಯಿಸಿರುವ ನಿಶಿಕೊರಿ ಸಮಕಾಲೀನ ಆಟಗಾರರಾದ ರೋಜರ್ ಫೆಡರರ್, ನೊವಾಕ್ ಜೊಕೊವಿಕ್ ಹಾಗೂ ರಫೆಲ್ ನಡಾಲ್ ಸಾಧನೆಯನ್ನು ಸರಿಗಟ್ಟಿದರು.