ತೂಕ ಇಳಿಸಲು ಇರಾನ್ ಗೆ ಹೋಗಿ ಬಂದ ಛಲಗಾರ!
ಮಂಗಳೂರು,ಮಾ.7: ದಕ್ಷಿಣ ಕನ್ನಡ ಜಿಲ್ಲೆಯ ಕಬಡ್ಡಿ ಆಟಗಾರರು ರಾಷ್ಟ್ರ ಮಟ್ಟದಲ್ಲಿ ಆಡಬೇಕು. ಆ ರೀತಿಯಲ್ಲಿ ಅವರನ್ನು ಸಮರ್ಥರನ್ನಾಗಿಸಬೇಕೆಂಬ ಹಂಬಲದೊಂದಿಗೆ ಜಿಲ್ಲೆಯಿಂದ ರಾಷ್ಟ್ರ ಮಟ್ಟದಲ್ಲಿ ಸಮರ್ಥ ಕಬಡ್ಡಿ ತಂಡವೊಂದನ್ನು ಸಜ್ಜುಗೊಳಿಸಲು ಸಜ್ಜಾಗಿದ್ದಾರೆ ಮಂಗಳೂರಿನ ಉದಯ ಚೌಟ ಮಾಣಿ ಬದಿಗುಡ್ಡೆ. 2007ರ ದ್ವಿತೀಯ ವಿಶ್ವಕಪ್ ಕಬಡ್ಡಿ ಪಂದ್ಯಾಟದಲ್ಲಿ ಗೆಲವು ಸಾಧಿಸಿರುವ ಅತ್ಯುತ್ತಮ ಆಟಗಾರ ಪ್ರಶಸ್ತಿ ಪಡೆದಿರುವ ಇವರು ಈ ನಿಟ್ಟಿನಲ್ಲಿ ದಿಟ್ಟ ಪ್ರಯತ್ನಕ್ಕೆ ಮುಂದಾಗಿದ್ದಾರೆ. ದೇಶದ ಪ್ರಮುಖ ಕಬಡ್ಡಿ ಆಟಗಾರರಲ್ಲಿ ಒಬ್ಬರಾದ ಉದಯ ಚೌಟ ಮಾಣಿ ಬದಿಗುಡ್ಡೆ ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳ ತಾಲೂಕಿನ ಮಾಣಿ ಯ ಬದಿಗುಡ್ಡೆ ನಿವಾಸಿ. 1962-63ರಲ್ಲಿ ದಸರ ಕ್ರೀಡಾಕೂಟದಲ್ಲಿ ಕಬಡ್ಡಿ ತಂಡದ ವಿಜಯಿ ತಂಡದಲ್ಲಿದ್ದ ರಾಷ್ಟ್ರಮಟ್ಟದ ಕಬಡ್ಡಿ ಕ್ರೀಡಾಪಟುವಾಗಿದ್ದ ದಿ. ವೆಂಕಪ್ಪ ಚೌಟರ ಪುತ್ರನಾಗಿರುವ ಉದಯಚೌಟ ಕಬಡ್ಡಿ ಕ್ರೀಡೆಯಲ್ಲಿ ಎಲ್ಲರ ಹುಬ್ಬೇರಿಸುವಂತಹ ಸಾಧನೆ ಮಾಡಿದ್ದಾರೆ.
ಪ್ರಸಕ್ತ ಬ್ಯಾಂಕ್ ಆಫ್ ಬರೋಡದ ಸುರತ್ಕಲ್ ಕಚೇರಿಯಲ್ಲಿ ಉಪ ಪ್ರಬಂಧಕರಾಗಿರುವ ಉದಯ್ ಚೌಟ ಕ್ರೀಡಾ ಕೋಟದಲ್ಲಿ 8 ತಿಂಗಳ ಕಾಲ ಏರ್ ಇಂಡಿಯಾದಲ್ಲಿ, 10 ತಿಂಗಳ ಕಾಲ ಕೆಪಿಟಿಸಿಎಲ್ ಉದ್ಯೋಗದಲ್ಲಿದ್ದರು.
ಮಾಣಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣವನ್ನು, ಪುತ್ತೂರು ಸರಕಾರಿ ಕಾಲೇಜಿನಲ್ಲಿ ಪಿಯುಸಿಯನ್ನು, ಪುತ್ತೂರು ಸಂತ ಫಿಲೋಮಿನ ಕಾಲೇಜಿನಲ್ಲಿ ಪದವಿ ವ್ಯಾಸಂಗ ಮಾಡಿರುವ ಇವರು ವಿದ್ಯಾರ್ಥಿದೆಸೆಯಿಂದಲೂ ಕ್ರೀಡಾಕ್ಷೇತ್ರದಲ್ಲಿ ಅಪಾರ ಆಸಕ್ತಿಯನ್ನು ಹೊಂದಿದ್ದರು. ಪಿಯುಸಿಯಲ್ಲಿ ವಾಲಿಬಾಲ್ , ಕಬಡ್ಡಿಯಲ್ಲಿ ಆಸಕ್ತಿ ಹೊಂದಿದ್ದ ಉದಯ್ ಚೌಟ ಅವರ ಇವತ್ತಿನ ಸಾಧನೆಗೆ ಬೆನ್ನೆಲುಬು ಆಗಿದ್ದವರು ಸಂತ ಫಿಲೋಮಿನ ಕಾಲೇಜಿನ ಪ್ರಾಂಶುಪಾಲರಾಗಿದ್ದ ರೆ.ಫಾ.ಪೆಡ್ರಿಕ್ ಮಸ್ಕರೇನಸ್. ಇವರಿಗೆ ಕೋಚ್ ಆಗಿ ಬಂದವರು ಹಬೀಬ್ ಕೆ. ಮಾಣಿ. ಇವರ ಮಾರ್ಗದರ್ಶನದಲ್ಲಿ ಉದಯ್ ಚೌಟ ಅವರು ಕಬಡ್ಡಿ ಕ್ಷೇತ್ರದಲ್ಲಿ ಅಪಾರ ಸಾಧನೆ ಮಾಡುವಂತಾಯಿತು.
ವಿದ್ಯಾಭ್ಯಾಸ ಮಾಡುತ್ತಿದ್ದ ಸಂದರ್ಭದಲ್ಲಿಯೆ ನಾಲ್ಕು ವರ್ಷ ಅಂತರ್ಕಾಲೇಜು ಕಬಡ್ಡಿ ಪಂದ್ಯಾಟದಲ್ಲಿ ಜಯಗಳಿಸಿದ್ದ ಇವರು ಅಂತರ್ ವಿಶ್ವವಿದ್ಯಾನಿಲಯಕ್ಕೆ ಸೌತ್ರೆನ್ಗೆ ಮಂಗಳೂರು ವಿವಿಯನ್ನು ಮೂರು ವರ್ಷ ಪ್ರತಿನಿಧಿಸಿದ್ದರು.
1993 ರಲ್ಲಿ ಜ್ಯೂನಿಯರ್ ನ್ಯಾಷನಲ್ನಲ್ಲಿ ಕನ್ಟಾಕವನ್ನು ಪ್ರತಿನಿಧಿಸಿದ ಇವರು 2000ದಿಂದ 2008ರವರೆಗೆ ರಾಷ್ಟ್ರೀಯ ತಂಡದಲ್ಲಿದ್ದು ರಾಷ್ಟ್ರೀಯ ಪಂದ್ಯಾಟವನ್ನು ಆಡಿದ್ದರು. ಬ್ಯಾಂಕ್ ಒಲಿಂಪಿಯ ತಂಡದ ನಾಯಕನಾಗಿ, ಬ್ಯಾಂಕ್ ಸ್ಪೋರ್ಟ್ಸ್ ಬೋರ್ಡ್ ತಂಡದ ನಾಯಕನಾಗಿ ಕಾರ್ಯನಿರ್ವಹಿಸಿದ ಇವರು ಇದರಲ್ಲಿ ಹಲವಾರು ಪ್ರಶಸ್ತಿಗಳನ್ನು ಪಡೆದಿದ್ದಾರೆ. ಏಕಲವ್ಯ ಪ್ರಶಸ್ತಿ ಪಡೆದ ಜಿಲ್ಲೆಯ ಪ್ರಥಮ ಕಬಡ್ಡಿ ಆಟಗಾರ
ಭಾರತೀಯ ಕಬಡ್ಡಿ ತರಬೇತಿ ತಂಡಕ್ಕೆ ಆಯ್ಕೆಯಾಗಿದ್ದ ಇವರು 2004ರ ನವೆಂಬರ್, ಡಿಸೆಂಬರ್ನಲ್ಲಿ ಭಾರತ, ಬಾಂಗ್ಲಾ ಟೆಸ್ಟ್ ಕಬಡ್ಡಿ ಪಂದ್ಯಾಟದಲ್ಲಿ ಭಾರತವನ್ನು ಪ್ರತಿನಿಧಿಸಿ 5 ಪಂದ್ಯಗಳನ್ನು ಜಯಿಸಿ ಚಿನ್ನದ ಪದಕವನ್ನು ಪಡೆದಿದ್ದರು. ಕ್ರೀಡೆಯಲ್ಲಿ ಅತ್ಯುತ್ತಮ ಸಾಧನೆಗೆ ಕರ್ನಾಟಕ ಸರಕಾರ ನೀಡುವ ಏಕಲವ್ಯ ಪ್ರಶಸ್ತಿಯನ್ನು ಕಬಡ್ಡಿಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಿಂದ ಪ್ರಥಮ ಬಾರಿಗೆ ಪಡೆದವರಾಗಿದ್ದಾರೆ. 20 ವರ್ಷಗಳ ಕಾಲ ಕಬಡ್ಡಿ ಜೀವನದಲ್ಲಿ ಅಖಿಲ ಭಾರತ ಮಟ್ಟದಲ್ಲಿ 100 ಕ್ಕೂ ಅಧಿಕ, ರಾಜ್ಯಮಟ್ಟದಲ್ಲಿ 300 ಕ್ಕೂ ಅಧಿಕ ಪಂದ್ಯಾಟಗಳನ್ನು ಇವರು ಆಡಿದ್ದಾರೆ. ದ.ಕ ಜಿಲ್ಲೆಯ ಅಮೆಚ್ಯೂರ್ ಕಬಡ್ಡಿ ಅಸೋಸಿಯೇಶನ್ನ ಸಂಘಟನಾ ಕಾಯಧರ್ಶಿಯಾಗಿರುವ ಇವರು ದ.ಕ ಜಿಲ್ಲೆಯಿಂದ ಅಸೋಸಿಯೇಶನ್ ಮುಖಾಂತರ ದ.ಕ ಜಿಲ್ಲೆಯ ಕಬಡ್ಡಿ ಆಟಗಾರರನ್ನು ರಾಜ್ಯಮಟ್ಟ, ರಾಷ್ಟ್ರಮಟ್ಟಕ್ಕೆ ಸಮರ್ಪಿಸಲು ಅಸೋಸಿಯೆಶನ್ ಮುಖಾಂತರ ಪ್ರಯತ್ನ ಪಡುತ್ತಿದ್ದಾರೆ. ಬಾಕ್ಸ್ ಮಾಡಬಹುದು:
ಒಂದು ಸಂದರ್ಭದಲ್ಲಿ ಕಬಡ್ಡಿ ಹೀನಾಯ ಸ್ಥಿತಿಗೆ ತಲುಪಿದಾಗ ಸ್ಟಾರ್ ಸ್ಪೋರ್ಟ್ಸ್ ಪ್ರೊ.ಕಬಡ್ಡಿಯನ್ನು ಆರಂಭಿಸಿ ದೇಶಿಯ ಕ್ರೀಡೆಯಾದ ಕಬಡ್ಡಿಯನ್ನು ಉಳಿಸಿದೆ. ಕ್ರಿಕೆಟನ್ನು ಇಂಗ್ಲೇಂಡ್ ಕಳೆದುಕೊಂಡಿರುವಂತೆ ಕಬಡ್ಡಿಯನ್ನು ಕಳೆದುಕೊಳ್ಳಬಾರದು. ಕಬಡ್ಡಿಯನ್ನು ಹಣದ ಕಾರಣಕ್ಕೆ, ವ್ಯಾವಾಹಾರಿಕ ಕಾರಣಕ್ಕೆ ಮಾರಬೇಡಿ. ರಾಜ್ಯ ಕಬಡ್ಡಿ ಸಂಘದ ಚೇರ್ಮೆನ್ ಆಗಿರುವ ರಾಕೇಶ್ ಮಲ್ಲಿಯವರು ಹೆಚ್ಚಿನ ಕಬಡ್ಡಿ ಆಟಗಾರರನ್ನು ಅಂತಾರಾಷ್ಟ್ರೀಯ ಮಟ್ಟಕ್ಕೆ ಕೊಂಡೋಯ್ಯುತ್ತಾರೆ ಎಂಬ ನಿರೀಕ್ಷೆಯನ್ನು ಹೊಂದಿದ್ದೇನೆ.ದೇಶಿಯ ಕ್ರೀಡೆ ಕಬಡ್ಡಿಯನ್ನು ಉಳಿಸಿಕೊಳ್ಳಬೇಕಾಗಿದೆ
- ಉದಯ್ ಚೌಟ ಮಾಣಿ ಬದಿಗುಡ್ಡೆ
ತೂಕ ಇಳಿಸಲು ಇರಾನ್ ಗೆ ಹೋಗಿ ಬಂದ ಛಲಗಾರ!
ಉದಯ್ ಚೌಟ ಅವರಿಗೆ ಕಬಡ್ಡಿ ಕ್ರೀಡೆಯಲ್ಲಿ ದೇಶವನ್ನು ಪ್ರತಿನಿಧಿಸಬೇಕೆಂಬ ಎಷ್ಟು ಪ್ರೀತಿಯಿತ್ತೆಂದರೆ ಕಬಡ್ಡಿ ಕ್ರೀಡೆಯಲ್ಲಿ ಪಾಲ್ಗೊಳ್ಳಲು ತಮ್ಮ ಸ್ವಂತ ಖರ್ಚಿನಲ್ಲಿನ ಇರಾನ್ಗೆ ತೆರಳಿ ತಮ್ಮ ದೇಹದ ತೂಕವನ್ನು ಕಡಿಮೆ ಮಾಡಿದ್ದರು.
ಅಂತಾರಾಷ್ಟ್ರೀಯ ನಿಯಮದಂತೆ ಕಬಡ್ಡಿ ಆಟಗಾರರು 80 ಕೆ.ಜಿ ದೇಹದ ತೂಕಕ್ಕಿಂತ ಹೆಚ್ಚಿರಬಾರದು ಎಂಬ ನಿಯಮವನ್ನು ದೇಶದಲ್ಲಿ ಜಾರಿ ಮಾಡಿದ ಸಂದರ್ಭದಲ್ಲಿ ಉದಯ್ ಚೌಟ ಅವರ ದೇಹದ ತೂಕ 119 ಕೆ.ಜಿ ಯಾಗಿತ್ತು. ನಿಗದಿತ ಪ್ರಮಾಣಕ್ಕಿಂತ 39 ಕೆ.ಜಿ ಜಾಸ್ತಿಯಿದ್ದ ಉದಯ್ ಚೌಟ ಅವರು ತಮ್ಮ ತೂಕವನ್ನು ಕಡಿಮೆ ಮಾಡಲು ಸಾಕಷ್ಟು ಶ್ರಮ ಪಟ್ಟಿದ್ದಾರೆ. ಅದರಲ್ಲಿ 50 ಡಿಗ್ರಿ ಉಷ್ಣಾಂಶವುಳ್ಳ ಇರಾನ್ನಲ್ಲಿ ಎರಡು ದಿನ ಪರಿಶ್ರಮ ಪಟ್ಟು 11.5 ಕೆ.ಜಿಯನ್ನು ಕಡಿಮೆ ಮಾಡಿಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಅಲ್ಲಿನ ಜನತೆ, ಭದ್ರತಾಸಿಬ್ಬಂದಿಗಳು ನೀಡಿದ ಸಹಕಾರವನ್ನು ಉದಯ್ ಚೌಟ ಸ್ಮರಿಸಿಕೊಳ್ಳುತ್ತಾರೆ. 2007ರಲ್ಲಿ ಎರಡನೆ ವಿಶ್ವಕಪ್ ಕಬಡ್ಡಿ ಪಂದ್ಯಾಟ ನಡೆಯುವ ವೇಳೆ ಅವರು 39.5 ಕೆ.ಜಿ ದೇಹದ ತೂಕವನ್ನು ಕಡಿಮೆಗೊಳಿಸಿ ವಿಶ್ವಕಪ್ನಲ್ಲಿ ಪಾಲ್ಗೊಂಡು ದೇಶಕ್ಕೆ ಚಿನ್ನದ ಪದಕವನ್ನು ತಂದಿದ್ದಾರೆ.
