ರೆಸ್ಟ್ ಆಫ್ ಇಂಡಿಯಾಕ್ಕೆ ಐತಿಹಾಸಿಕ ಜಯ

ಮುಂಬೈ, ಮಾ.10: ಬ್ಯಾಟ್ಸ್‌ಮನ್‌ಗಳ ಅತ್ಯುತ್ತಮ ಪ್ರದರ್ಶನದ ನೆರವಿನಲ್ಲಿ ರೆಸ್ಟ್ ಆಫ್ ಇಂಡಿಯಾ ತಂಡ ಇಲ್ಲಿ ನಡೆದ ಇರಾನಿ ಟ್ರೋಫಿ ಪಂದ್ಯದಲ್ಲಿ ರಣಜಿ ಚಾಂಪಿಯನ್ ಮುಂಬೈ ವಿರುದ್ಧ ಐತಿಹಾಸಿಕ ಜಯ ದಾಖಲಿಸಿದೆ.
ಮುಂಬೈನ ಬ್ರೆಬೊರ್ನ್ ಸ್ಟೇಡಿಯಂನಲ್ಲಿ ಪಂದ್ಯದ ಐದನೆ ಹಾಗೂ ಅಂತಿಮ ದಿನವಾಗಿರುವ ಗುರುವಾರ 480 ರನ್ ಗಳಿಸಬೇಕಿದ್ದ ರೆಸ್ಟ್ ಆಫ್ ಇಂಡಿಯಾ ತಂಡ 129.4 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟದಲ್ಲಿ 482 ರನ್ ಗಳಿಸಿ ಅಪೂರ್ವ ಗೆಲುವು ದಾಖಲಿಸಿತು.
 ವಿದರ್ಭ ತಂಡದ ಆರಂಭಿಕ ಎಡಗೈ ಬ್ಯಾಟ್ಸ್‌ಮನ್ ಫೈಝ್ ಫಝಲ್ 127 ರನ್(280, 10ಬೌ) , ಬಂಗಾಲದ ಸಂದೀಪ್ ಚಟರ್ಜಿ (54,3ಬೌ), ಕರಣ್ ನಾಯರ್ 92 ರನ್(132ಎ,7ಬೌ), ಸ್ಟುವರ್ಟ್ ಬಿನ್ನಿ 54ರನ್( 51ಎ,3ಬೌ,2ಸಿ), ಶೆಲ್ಡಾನ್ ಜಾಕ್ಸನ್ ಔಟಾಗದೆ 59 ರನ್ ಗಳಿಸಿ ರೆಸ್ಟ್ ಆಫ್ ಇಂಡಿಯಾದ ಗೆಲುವಿಗೆ ನೆರವಾದರು.
ಬುಧವಾರ ನಾಲ್ಕನೆ ದಿನದಾಟದಂತ್ಯಕ್ಕೆ 37 ಓವರ್‌ಗಳಲ್ಲಿ 1 ವಿಕೆಟ್ ನಷ್ಟದಲ್ಲಿ 100 ರನ್ ಗಳಿಸಿದ್ದ ರೆಸ್ಟ್ ಆಫ್ ಇಂಡಿಯಾ ತಂಡ ಇಂದು ಆಟ ಮುಂದುವರಿಸಿ ಮುಂಬೈಗೆ ಆಘಾತ ನೀಡಿತು.
ಅಂತಿಮ ದಿನ 380 ರನ್ ಗಳಿಸಬೇಕಾಗಿದ್ದ ರೆಸ್ಟ್ ಆಫ್ ಇಂಡಿಯಾ ತಂಡ ಯಾವುದೇ ಒತ್ತಡಕ್ಕೆ ಒಳಗಾಗದೆ ಸುಲಭವಾಗಿ ಗೆಲುವಿಗೆ ಅಗತ್ಯದ ರನ್ ಸೇರಿಸಿತು.
 
ಫಝಲ್ ಅವರು ನಾಲ್ಕನೆ ದಿನದಾಟದಂತ್ಯಕ್ಕೆ ಔಟಾಗದೆ 41 ರನ್ ಮತ್ತು 17 ರನ್ ಗಳಿಸಿದ ಸಂದೀಪ್ ಚಟರ್ಜಿ ಕ್ರೀಸ್‌ನಲ್ಲಿದ್ದರು. ಫಝಲ್ ಅವರು ಚಟರ್ಜಿ ಜೊತೆ ಬ್ಯಾಟಿಂಗ್ ಮುಂದುವರಿಸಿ ಎರಡನೆ ವಿಕೆಟ್‌ಗೆ 110 ರನ್‌ಗಳ ಜೊತೆಯಾಟ ನೀಡಿದರು. ಮೂರನೆ ವಿಕೆಟ್‌ಗೆ ಫಝಲ್ ಅವರು ಕರಣ್ ನಾಯರ್ ಅವರೊಂದಿಗೆ 130 ರನ್‌ಗಳ ಕೊಡುಗೆ ನೀಡಲು ನೆರವಾದರು. ಫಝಲ್ ತಾಳ್ಮೆಯ ಬ್ಯಾಟಿಂಗ್ ಪ್ರದರ್ಶಿಸಿ 11ನೆ ಪ್ರಥಮದರ್ಜೆ ಶತಕ ದಾಖಲಿಸಿದರು. ಚಟರ್ಜಿ ಅರ್ಧಶತಕ ದಾಖಲಿಸಿ ನಿರ್ಗಮಿಸಿದರು. ಫಝಲ್ ತಂಡದ ಸ್ಕೋರ್ 93.5 ಓವರ್‌ಗಳಲ್ಲಿ 306ಕ್ಕೆ ತಲುಪುತ್ತಿದ್ದಂತೆ ಔಟಾದರು.

ಮುಂಬೈನ ಇಕ್ಬಾಲ್ ಅಬ್ದುಲ್ಲ (154ಕ್ಕೆ5) ಅವರು ಫಝಲ್‌ಗೆ ಪೆವಿಲಿಯನ್ ಹಾದಿ ತೋರಿಸಿದರು. ನಾಯರ್ ಮೊದಲ ಇನಿಂಗ್ಸ್‌ನಲ್ಲಿ 94 ರನ್ ಗಳಿಸಿ ಔಟಾಗಿದ್ದರು. ಎರಡನೆ ಇನಿಂಗ್ಸ್‌ನಲ್ಲೂ (92) ಶತಕ ವಂಚಿತಗೊಂಡರು. ಬಳಿಕ ಆದರೆ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ದೊರೆಯಿತು.ನಾಯಕ ನಮನ್ ಓಜಾ 29 ರನ್ ಗಳಿಸಿ ರನೌಟಾದರು. ಅಂತಿಮ ಅವಧಿಯಲ್ಲಿ ರೆಸ್ಟ್ ಆಫ್ ಇಂಡಿಯಾ 35 ಓವರ್‌ಗಳಲ್ಲಿ 159 ರನ್ ಗಳಿಸಬೇಕಾದ ಒತ್ತಡಕ್ಕೆ ಸಿಲುಕಿತು. ಕರ್ನಾಟಕದ ಸ್ಟುವರ್ಟ್ ಬಿನ್ನಿ ಮತ್ತು ಸೌರಾಷ್ಟ್ರದ ಶೆಲ್ಡಾನ್ ಜಾಕ್ಸನ್ ಮುಂಬೈ ಬೌಲರ್‌ಗಳ ಬೆವರಿಳಿಸಿ 56 ನಿಮಿಷಗಳ ಬ್ಯಾಟಿಂಗ್‌ನಲ್ಲಿ 101 ಎಸೆತಗಳನ್ನು ಎದುರಿಸಿದರು. 92 ರನ್ ಸೇರಿಸಿದರು.
  ಬಿನ್ನಿ ಅತ್ಯಂತ ವೇಗದಲ್ಲಿ ಅರ್ಧಶತಕ ಪೂರ್ಣಗೊಳಿಸಿದರು. ಎರಡು ಬಾರಿ ಚೆಂಡನ್ನು ಸಿಕ್ಸರ್‌ಗೆ ಅಟ್ಟಿದರು. ಚೆಂಡು ಬಾರಿ ಪ್ರೆಸ್ ಬಾಕ್ಸ್‌ನ ಬಳಿ ಬಿತ್ತು. ಗೆಲುವಿಗೆ 35 ರನ್‌ಗಳ ಆವಶ್ಯಕತೆ ಇದ್ದಾಗ ಬಿನ್ನಿ ಔಟಾದರು.
  41ನೆ ಬಾರಿ ರಣಜಿ ಚಾಂಪಿಯನ್ ಎನಿಸಿಕೊಂಡಿದ್ದ ಮುಂಬೈ 16ನೆ ಬಾರಿ ಇರಾನಿ ಕಪ್ ಗೆಲ್ಲುವ ಕನಸು ಕಂಡಿತ್ತು. ಕೊನೆಯಲ್ಲಿ ಜಾಕ್ಸನ್ ಮತ್ತು ಜೆ.ಯಾದವ್ ಏಳನೆ ವಿಕೆಟ್‌ಗೆ ಮುರಿಯದ ಜೊತೆಯಾಟದಲ್ಲಿ ಯಾದವ್ ಮತ್ತು ಜಾಕ್ಸನ್ 37 ರನ್ ಸೇರಿಸಿ ತಂಡವನ್ನು ಗೆಲುವಿನ ದಡ ದಾಟಿಸಿದರು.
ಸಂಕ್ಷಿಪ್ತ ಸ್ಕೋರ್ ವಿವರ
ಮುಂಬೈ ಮೊದಲ ಇನಿಂಗ್ಸ್ 603
ರೆಸ್ಟ್ ಆಫ್ ಇಂಡಿಯಾ ಮೊದಲ ಇನಿಂಗ್ಸ್ 306
ಮುಂಬೈ ಎರಡನೆ ಇನಿಂಗ್ಸ್ 182
 ರೆಸ್ಟ್ ಆಫ್ ಇಂಡಿಯಾ ಎರಡನೆ ಇನಿಂಗ್ಸ್ 129.4 ಓವರ್‌ಗಳಲ್ಲಿ 482/6( ಫಝಲ್ 127, ಕೆ. ನಾಯರ್ 92, ಜಾಕ್ಸನ್ ಔಟಾಗದೆ 59,ಚಟರ್ಜಿ 54, ಬಿನ್ನಿ 54, ಭರತ್ 42, ಯಾದವ್ ಔಟಾಗದೆ 19; ಇಕ್ಬಾಲ್ ಅಬ್ದುಲ್ಲ 154-5).
ಪಂದ್ಯಶ್ರೇಷ್ಠ: ಕರಣ್ ನಾಯರ್.