ಪಾಕ್ ಮತ್ತು ಚೀನಾ ಏಕಕಾಲದಲ್ಲಿ ಯುದ್ಧ ಸಾರಿದರೆ ಎದುರಿಸಲು ವಿಮಾನಗಳ ಕೊರತೆ

ಕಟುವಾಸ್ತವ ಬಿಚ್ಚಿಟ್ಟ ಭಾರತೀಯ ವಾಯುಪಡೆ

ಹೊಸದಿಲ್ಲಿ,ಮಾ.10: ತನ್ನಲ್ಲಿರುವ ವಿಮಾನಗಳ ಸಂಖ್ಯೆ ಕ್ಷೀಣಿಸುತ್ತಿರುವುದನ್ನು ಪರಿಗಣಿಸಿದರೆ ಪಾಕಿಸ್ತಾನ ಮತ್ತು ಚೀನಾ ಏಕಕಾಲದಲ್ಲಿ ಭಾರತದ ಮೇಲೆ ಯುದ್ಧ ಸಾರಿದರೆ ಪೂರ್ಣ ಪ್ರಮಾಣದಲ್ಲಿ ವಾಯುದಾಳಿಗಳನ್ನು ಸಂಘಟಿಸಲು ಸಾಕಷ್ಟು ಯುದ್ಧ ವಿಮಾನಗಳು ತನ್ನ ಬಳಿಯಲ್ಲಿಲ್ಲ ಎಂಬ ಕಟುಸತ್ಯವನ್ನು ಭಾರತೀಯ ವಾಯುಪಡೆಯು ಗುರುವಾರ ಒಪ್ಪಿಕೊಂಡಿದೆ.

36 ರಾಫೇಲ್ ವಿಮಾನಗಳೇನೋ ತನ್ನ ಪಡೆಗೆ ಸೇರ್ಪಡೆಗೊಳ್ಳಲಿವೆ. ಆದರೆ ಅದರ ಜೊತೆಗೆ ತನಗೆ ಹೆಚ್ಚಿನ ಸಂಖ್ಯೆಯಲ್ಲಿ ಐದನೆ ತಲೆಮಾರಿನ ಯುದ್ಧವಿಮಾನಗಳ ಅಗತ್ಯವಿದೆ ಎಂದು ಅದು ಹೇಳಿದೆ.

ವಾಯುಪಡೆಗೆ ಮಂಜೂರಾಗಿರುವ ಸ್ಕ್ವಾಡ್ರನ್‌ಗಳ ಸಂಖ್ಯೆ 42,ಆದರೆ ಅವುಗಳ ಸಂಖ್ಯೆ ಈಗ 33ಕ್ಕೆ ಕುಸಿದಿದೆ. ಇಂತಹ ಸಂದರ್ಭದಲ್ಲಿ ವಾಯುಪಡೆಯು ಈ ಕಟುಸತ್ಯವನ್ನು ಹೊರಹಾಕಿದೆ.

ಈ 33 ಸ್ಕ್ವಾಡ್ರನ್‌ಗಳ ಪೈಕಿ ಹೆಚ್ಚಿನವು ದೇಶದ ಮುಂಚೂಣಿಯ ಯುದ್ಧವಿಮಾನವಾಗಿರುವ ರಷ್ಯ ಮೂಲದ ಸುಖೋಯಿ ಎಸ್‌ಯು-30 ಜೆಟ್‌ಗಳಾಗಿವೆ. ಆದರೆ ಯಾವುದೇ ಸಮಯದಲ್ಲಿ ಸೇವೆಗೆ ಲಭ್ಯವಿರುವ ಯುದ್ಧವಿಮಾನಗಳ ಸಂಖ್ಯೆ ಶೇ.55ರಷ್ಟು ಮಾತ್ರ. ಉಳಿದ ವಿಮಾನಗಳು ದುರಸ್ತಿಯಲ್ಲಿರುತ್ತವೆ.

ಐಎಎಫ್‌ನ ಉಪ ಮುಖ್ಯಸ್ಥ ಏರ್ ಮಾರ್ಷಲ್ ಬಿ.ಎಸ್. ಧನೋವಾ ಅವರು ಗುರುವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಈ ವಿವರಗಳನ್ನು ನೀಡಿದರು.
ನಾಳೆಯೇ ಎರಡು ಕಡೆಗಳಲ್ಲಿ ಯದ್ಧ ಆರಂಭವಾದರೆ ಅದನ್ನು ಎದುರಿಸುವ ಸಾಮರ್ಥ್ಯ ಐಎಎಫ್‌ಗೆ ಇದೆಯೇ ಎಂಬ ಪ್ರಶ್ನೆಗೆ ಅವರು ಉತ್ತರಿಸುತ್ತಿದ್ದರು.

ಮುಂದಿನ ಕೆಲವು ವರ್ಷಗಳ ಕಾಲ ಏಕಕಾಲದಲ್ಲಿ ಎರಡು ದೇಶಗಳೊಂದಿಗೆ ಯುದ್ಧ ನಡೆಯುವ ಸಾಧ್ಯತೆಯಿಲ್ಲ ಮತ್ತು ಅಷ್ಟರಲ್ಲಿ ಅಗತ್ಯ ಸಾಮರ್ಥ್ಯವನ್ನು ಪಡೆದುಕೊಳ್ಳುವ ಆಶಯವನ್ನು ಪಡೆಯು ಹೊಂದಿದೆ ಎಂದು ಐಎಎಫ್ ಮೂಲಗಳು ತಿಳಿಸಿದವು.

ನಾವು ನಮ್ಮ ಕಳವಳವನ್ನು ಸರಕಾರಕ್ಕೆ ತಿಳಿಸಿದ್ದೇವೆ. ಅದು ಸಮಸ್ಯೆಯನ್ನು ಅರ್ಥ ಮಾಡಿಕೊಂಡಿದೆ ಮತ್ತು ಇದೇ ಕಾರಣದಿಂದ ನಮ್ಮ ತುರ್ತನ್ನು ಗಮನಿಸಿ 36 ರಾಫೇಲ್ ವಿಮಾನಗಳ ಖರೀದಿ ಒಪ್ಪಂದಕ್ಕೆ ಸಹಿ ಮಾಡಿದೆ ಎಂದು ಧನೋವಾ ಹೇಳಿದರು.