ಭಾರತ ನ್ಯಾಟೊ ಮಿತ್ರರಿಗೆ ಸಮಾನ

ವಾಷಿಂಗ್ಟನ್,ಮಾ.23: ವ್ಯಾಪಾರ ಮತ್ತು ತಂತ್ರಜ್ಞಾನ ವರ್ಗಾವಣೆಗೆ ಸಂಬಂಧಿಸಿದಂತೆ ಭಾರತವನ್ನು ನ್ಯಾಟೊ ಮಿತ್ರರಾಷ್ಟ್ರಗಳಿಗೆ ಸಮಾನವಾಗಿ ಪರಿಗಣಿಸುವ ಮತ್ತು ಅಮೆರಿಕದಿಂದ ರಕ್ಷಣಾ ಸಾಮಗ್ರಿಗಳ ರಫ್ತಿನಲ್ಲಿ ಅದರ ‘ಸ್ಥಾನಮಾನ ’ವನ್ನು ಮೇಲ್ದರ್ಜೆಗೇರಿಸುವ ನಿರ್ಣಯವೊಂದನ್ನು ಸಂಸತ್ತಿನ ಕಾಂಗ್ರೆಸ್‌ನಲ್ಲಿ ಮಂಡಿಸಲಾಗಿದೆ.
 
ಸದನದ ಭಾರತ ಮಿತ್ರಕೂಟದ ಸಹ ಅಧ್ಯಕ್ಷ ಜಾರ್ಜ್ ಹೋಲ್ಡಿಂಗ್ ಅವರು ಮಂಡಿಸಿರುವ ಅಮೆರಿಕ-ಭಾರತ ರಕ್ಷಣಾ ತಂತ್ರಜ್ಞಾನ ಮತ್ತು ಪಾಲುದಾರಿಕೆ ಕಾಯ್ದೆಯು ಶಸ್ತ್ರಾಸ್ತ್ರ ರಫ್ತು ನಿಯಂತ್ರಣ ಕಾಯ್ದೆಗೆ ತಿದ್ದುಪಡಿಗಳನ್ನು ತರಲು ಉದ್ದೇಶಿಸಿದೆ.
ಈ ಶಾಸನವು ಈಗಾಗಲೇ ಆರಂಭಗೊಂಡಿರುವ ಪ್ರಕ್ರಿಯೆಯನ್ನು ಗಟ್ಟಿಗೊಳಿಸಲಿದೆ ಮತ್ತು ಭವಿಷ್ಯದ ಸಹಕಾರ ಮತ್ತು ಪ್ರಗತಿಗೆ ಬುನಾದಿಯನ್ನು ಹಾಕಲಿದೆ ಎಂದು ಹೋಲ್ಡಿಂಗ್ ಹೇಳಿದರು.
 ಈ ಶಾಸನವು ಅಮೆರಿಕದಿಂದ ಭಾರತಕ್ಕೆ ರಕ್ಷಣಾ ಸಾಮಗ್ರಿಗಳ ಮಾರಾಟ ಅಥವಾ ರಫ್ತಿಗೆ ಅಧಿಸೂಚನೆಯನ್ನು ಹೊರಡಿಸಲು ತಗಲುವ ಸಮಯವನ್ನು ಕಡಿತಗೊಳಿಸುವ ಮೂಲಕ ಭಾರತದ ಸ್ಥಾನಮಾನವನ್ನು ಹೆಚ್ಚಿಸಲಿದೆ. ಅದು ಜಂಟಿ ತುರ್ತು ಸಂದರ್ಭ ಯೋಜನೆಗಳಿಗೆ ಹೆಚ್ಚಿನ ಉತ್ತೇಜನ ನೀಡುವ ಜೊತೆಗೆ ಅಮೆರಿಕ ಸರಕಾರದಿಂದ ಪರಸ್ಪರ ಹಿತಾಸಕ್ತಿಯ ಮಿಲಿಟರಿ ಕಾರ್ಯಾಚರಣೆಗಳನ್ನು ನಿರ್ವಹಿಸುವ ಭಾರತದ ಸಾಮರ್ಥ್ಯದ ಪುನರ್‌ಪರಿಶೀಲನೆ ಮತ್ತು ವೌಲ್ಯಮಾಪನವನ್ನು ಅಗತ್ಯವಾಗಿಸುತ್ತದೆ ಎಂದರು.

ಮುಂದಿನ ತಿಂಗಳು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಆ್ಯಷ್ಟನ್ ಕಾರ್ಟರ್ ಅವರ ಭಾರತ ಭೇಟಿಗೆ ಮುನ್ನ ಮಂಡಿಸಲಾಗಿರುವ ನಿರ್ಣಯವನ್ನು ಸ್ವಾಗತಿಸಿರುವ ಅಮೆರಿಕ ಭಾರತ ಉದ್ಯಮ ಮಂಡಳಿ(ಯುಎಸ್‌ಐಬಿಸಿ)ಯು, ಅದು ಇಂದಿನ ರಾಜಕೀಯ ಸ್ಥಿತಿ ಹಿಂದಿನದಕ್ಕಿಂತ ಭಿನ್ನವಾಗಿದೆ ಎಂಬ ಮಹತ್ವದ ಸಂಕೇತವನ್ನು ಭಾರತೀಯ ರಕ್ಷಣಾ ವ್ಯವಸ್ಥೆಗೆ ರವಾನಿಸಿದೆ ಎಂದು ಹೇಳಿದೆ.
 ಈ ಮಸೂದೆಯು ಅಧಿಸೂಚನೆ ಅವಧಿಗೆ ಸಂಬಂಧಿಸಿದಂತೆ ಭಾರತವನ್ನು ಇತರ ನ್ಯಾಟೊ ಮಿತ್ರರಾಷ್ಟ್ರಗಳಿಗೆ ಸಮಾನವಾಗಿಸುವುದಲ್ಲದೆ,ಉಭಯ ಸರಕಾರಗಳಿಗೂ ರಕ್ಷಣಾ ಸಹಕಾರವು ಅತ್ಯುನ್ನತ ಆದ್ಯತೆಯಾಗಿರಬೇಕೆಂಬ ಸ್ಪಷ್ಟ ಸಂದೇಶವನ್ನು ರವಾನಿಸುತ್ತದೆ ಎಂದು ಹೋಲ್ಡಿಂಗ್ ಹೇಳಿದರು.
ನಮ್ಮ ರಾಷ್ಟ್ರಗಳ ನಡುವಿನ ರಕ್ಷಣಾ ವ್ಯಾಪಾರವು ದ್ವಿಪಕ್ಷೀಯ ಆರ್ಥಿಕ ಸಂಬಂಧದ ಅತ್ಯಂತ ಪ್ರಬಲ ಕ್ಷೇತ್ರಗಳಲ್ಲೊಂದಾಗಿದೆ ಮತ್ತು ಕಳೆದ 10 ವರ್ಷಗಳಲ್ಲಿ 300 ಮಿ.ಡಾ.ಗಳಿಂದ 14 ಬಿ.ಡಾ.ಗಳನ್ನು ದಾಟಿದೆ ಎಂದು ಯುಎಸ್‌ಐಬಿಸಿ ಅಧ್ಯಕ್ಷ ಮುಕೇಶ ಅಘಿ ಹೇಳಿದರು.

ಅಮೆರಿಕ ಮತ್ತು ಭಾರತ ಹಲವಾರು ಭದ್ರತಾ ಸವಾಲುಗಳನ್ನು ಎದುರಿಸುತ್ತಿವೆ ಎನ್ನುವುದನ್ನು ಬೆಟ್ಟು ಮಾಡಿದ ಹೋಲ್ಡಿಂಗ್ ಅವರು, ಉಭಯ ರಾಷ್ಟ್ರಗಳ ನಡುವೆ ಗಾಢ ರಕ್ಷಣಾ ಸಂಬಂಧಗಳು ಮತ್ತು ನಿಕಟ ಸಹಕಾರದ ಅಗತ್ಯಕ್ಕೆ ಒತ್ತು ನೀಡಿದರು.
ಸದನದಲ್ಲಿ ಹೇಳಿಕೆ ನೀಡಿದ ಸಂದರ್ಭ ಅವರು ಪಾಕಿಸ್ತಾನಕ್ಕೆ ಎಫ್-16 ಯುದ್ಧವಿಮಾನಗಳನ್ನು ಮಾರಾಟ ಮಾಡುವ ಒಬಾಮ ಆಡಳಿತದ ನಿರ್ಧಾರವನ್ನೂ ಪ್ರಶ್ನಿಸಿದರು.