ಇಂದು ಆಸ್ಟ್ರೇಲಿಯ ಹಾಗೂ ಪಾಕಿಸ್ತಾನ ಸೆಣಸಾಟ
ಮೊಹಾಲಿ, ಮಾ.24: ಭಾರತ ತಂಡ ಬಾಂಗ್ಲಾದೇಶ ವಿರುದ್ಧ ರೋಚಕ ಗೆಲುವು ಸಾಧಿಸಿದ ಹಿನ್ನೆಲೆಯಲ್ಲಿ ಟ್ವೆಂಟಿ-20 ವಿಶ್ವಕಪ್ ಸೂಪರ್-10ರ ಗ್ರೂಪ್ 2 ಕುತೂಹಲ ಕೆರಳಿಸಿದೆ. ಭಾರತ, ಪಾಕಿಸ್ತಾನ ಹಾಗೂ ಆಸ್ಟ್ರೇಲಿಯ ತಂಡಗಳು ಸೆಮಿಫೈನಲ್ ಸ್ಪರ್ಧೆಯಲ್ಲಿದ್ದು, ಇನ್ನು ಮುಂದೆ ಪ್ರತಿ ಪಂದ್ಯಗಳೂ ಕ್ವಾರ್ಟರ್ ಫೈನಲ್ ಎನಿಸಿಕೊಳ್ಳಲಿವೆ. ಆಸ್ಟ್ರೇಲಿಯ ಹಾಗೂ ಪಾಕಿಸ್ತಾನ ನಡುವೆ ಶುಕ್ರವಾರ ಇಲ್ಲಿ ನಡೆಯಲಿರುವ ಪಂದ್ಯ ಭಾರೀ ಮಹತ್ವ ಪಡೆದುಕೊಂಡಿದೆ.
ಉಭಯ ತಂಡಗಳು ತಲಾ 2 ಅಂಕ ಹೊಂದಿವೆ. ಪಾಕ್ಗೆ ಕೇವಲ ಒಂದು ಪಂದ್ಯ ಆಡಲು ಬಾಕಿಯಿದೆ. ಆಸ್ಟ್ರೇಲಿಯ ಇನ್ನು 2 ಪಂದ್ಯ ಆಡಬೇಕಾಗಿದೆ. ಟ್ವೆಂಟಿ-20 ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯ ಹಾಗೂ ಪಾಕಿಸ್ತಾನ ನಡುವಿನ ಪಂದ್ಯ ಯಾವಾಗಲೂ ಪೈಪೋಟಿಯಿಂದ ಕೂಡಿರುತ್ತದೆ. 2010ರ ಆವೃತ್ತಿಯಲ್ಲಿ ಈ ಎರಡು ತಂಡಗಳ ನಡುವಿನ ಸೆಮಿಫೈನಲ್ ಪಂದ್ಯ ಇದಕ್ಕೆ ಸಾಕ್ಷಿ. ಆ ಪಂದ್ಯದಲ್ಲಿ ಮೈಕಲ್ ಹಸ್ಸಿ ಆಸೀಸ್ಗೆ ರೋಚಕ ಗೆಲುವು ತಂದುಕೊಟ್ಟಿದ್ದರು.
ನ್ಯೂಝಿಲೆಂಡ್ ವಿರುದ್ಧ ಸೋತಿರುವ, ಬಾಂಗ್ಲಾದೇಶ ವಿರುದ್ಧ ಪ್ರಯಾಸದ ಗೆಲುವು ಸಾಧಿಸಿರುವ ಆಸ್ಟ್ರೇಲಿಯ ಪ್ರದರ್ಶನ ಆಶಾದಾಯಕವಾಗಿಲ್ಲ. ಒಂದು ವೇಳೆ ಪಾಕ್ ವಿರುದ್ಧ ಆಸೀಸ್ ಜಯ ಸಾಧಿಸಿದರೆ, ಉತ್ತಮ ರನ್ರೇಟ್ ಹಿನ್ನೆಲೆಯಲ್ಲಿ ಗ್ರೂಪ್-2ರಲ್ಲಿ 2ನೆ ಸ್ಥಾನಕ್ಕೆ ಏರಲಿದ್ದು, ಭಾರತವನ್ನು ಹಿಂದಕ್ಕೆ ತಳ್ಳಲಿದೆ. ಪಾಕ್ಗೆ ಶರಣಾದರೆ ಸೆಮಿಫೈನಲ್ ಹಾದಿ ಕಠಿಣವಾಗಲಿದೆ.
ಮತ್ತೊಂದೆಡೆ, ಪಾಕ್ ತಂಡ ಸತತ ಎರಡು ಪಂದ್ಯಗಳಲ್ಲಿ ಸೋಲನುಭವಿಸಿ ಟೂರ್ನಿಯಿಂದ ಹೊರ ನಡೆಯುವ ಹಾದಿಯಲ್ಲಿದೆ. ಕಳೆದೆರಡು ಪಂದ್ಯಗಳಲ್ಲಿ ಪಾಕ್ನ ಬ್ಯಾಟಿಂಗ್ ಅತ್ಯಂತ ಕಳಪೆಯಾಗಿತ್ತು. ಭಾರತ ವಿರುದ್ಧ 118 ರನ್ ಗಳಿಸಿ ಎಲ್ಲೆಡೆಯಿಂದ ಟೀಕೆಗೆ ಗುರಿಯಾಗಿತ್ತು.
ಟೀಮ್ ನ್ಯೂಸ್: ಬೆನ್ನುನೋವಿನಿಂದಾಗಿ ನ್ಯೂಝಿಲೆಂಡ್ ವಿರುದ್ಧ ಪಂದ್ಯದಿಂದ ಹೊರಗುಳಿದಿದ್ದ ಮುಹಮ್ಮದ್ ಹಫೀಝ್ ಆಸ್ಟ್ರೇಲಿಯ ವಿರುದ್ಧ ಪಂದ್ಯದ ವೇಳೆ ತಂಡಕ್ಕೆ ವಾಪಸಾಗುವ ಸಾಧ್ಯತೆಯಿದೆ. ಪಾಕ್ನ ಬ್ಯಾಟಿಂಗ್ ಸರದಿಯಲ್ಲಿ ಬದಲಾವಣೆಯಾಗುವ ಅಗತ್ಯವಿದೆ. ಶುಐಬ್ ಮಲಿಕ್ ಹಾಗೂ ಸರ್ಫರಾಝ್ ಅಹ್ಮದ್ಗೆ ಭಡ್ತಿ ನೀಡಬೇಕಾಗಿದೆ. ಕಳೆದ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಸ್ಪಿನ್ನರ್ ಇಮಾದ್ ವಸೀಂಗೆ ಮತ್ತೊಂದು ಅವಕಾಶ ನೀಡಬೇಕಾಗಿದೆ. ಹಫೀಝ್ ಫಿಟ್ ಆದರೆ, ವಸೀಂ ಅವರಿಗೆ ಸ್ಥಾನ ತೆರವು ಮಾಡಬೇಕಾಗುತ್ತದೆ.
ಆಸ್ಟ್ರೇಲಿಯ: ಪಾಕ್ ತಂಡ ಭಾರತ ಹಾಗೂ ನ್ಯೂಝಿಲೆಂಡ್ ವಿರುದ್ಧ ಸ್ಪಿನ್ ಬೌಲರ್ಗಳ ದಾಳಿ ಎದುರಿಸಲು ವಿಫಲವಾಗಿತ್ತು. ಈ ಹಿನ್ನೆಲೆಯಲ್ಲಿ ಬಾಂಗ್ಲಾದೇಶ ವಿರುದ್ಧ ಮಿಂಚಿದ್ದ ಸ್ಪಿನ್ನರ್ ಆಡಮ್ ಝಾಂಪಗೆ ಮತ್ತೊಂದು ಅವಕಾಶ ಸಿಗುವ ಸಾಧ್ಯತೆಯಿದೆ. ಝಾಂಪ ಹಾಗೂ ಮ್ಯಾಕ್ಸ್ವೆಲ್ ಆಸೀಸ್ನ ಸ್ಪಿನ್ ಅಸ್ತ್ರವಾಗಿದ್ದಾರೆ.
2016ರ ಟ್ವೆಂಟಿ-20 ಕ್ರಿಕೆಟ್ ಪ್ರದರ್ಶನ
ಪಾಕಿಸ್ತಾನ: ಪಂದ್ಯ 10, ಗೆಲುವು 4, ಸೋಲು 6
ಆಸ್ಟ್ರೇಲಿಯ: ಪಂದ್ಯ 8, ಗೆಲುವು 3, ಸೋಲು 5
ಅಂಕಿ-ಅಂಶ
ಟ್ವೆಂಟಿ-20 ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯ ತಂಡ 9 ಬಾರಿ ಮೊದಲ ವಿಕೆಟ್ಗೆ 50 ಹಾಗೂ ಅದಕ್ಕಿಂತ ಹೆಚ್ಚು ರನ್ ಜೊತೆಯಾಟ ನಡೆಸಿದೆ.
ಪಾಕಿಸ್ತಾನ ಟ್ವೆಂಟಿ-20 ಕ್ರಿಕೆಟ್ನಲ್ಲಿ ಮೊದಲ ವಿಕೆಟ್ನಲ್ಲಿ ಕೇವಲ 28.40ರ ಸರಾಸರಿಯಲ್ಲಿ ರನ್ ಗಳಿಸಿದೆ.
ಪಾಕ್ ಸಂಜಾತ ಉಸ್ಮಾನ್ ಖ್ವಾಜಾ ತನ್ನ ದೇಶದ ವಿರುದ್ಧ ಇದೇ ಮೊದಲ ಅಂತಾರಾಷ್ಟ್ರೀಯ ಪಂದ್ಯವನ್ನು ಆಡಲು ಸಜ್ಜಾಗಿದ್ದಾರೆ. ಉಸ್ಮಾನ್ 2015-16ರಲ್ಲಿ ಟ್ವೆಂಟಿ-20ಯಲ್ಲಿ 9 ಇನಿಂಗ್ಸ್ಗಳಲ್ಲಿ 71 ಸರಾಸರಿಯಲ್ಲಿ ಬ್ಯಾಟಿಂಗ್ ಮಾಡಿದ್ದಾರೆ.
ಪಾಕಿಸ್ತಾನ ತಂಡ ಆಸ್ಟ್ರೇಲಿಯ ವಿರುದ್ಧ ಟ್ವೆಂಟಿ-20 ಟೂರ್ನಿಯಲ್ಲಿ ಆಡಿರುವ 5 ಪಂದ್ಯಗಳ ಪೈಕಿ ಮೂರು ಬಾರಿ ಜಯ ಸಾಧಿಸಿದೆ. ಆಸ್ಟ್ರೇಲಿಯ 2010ರ ವಿಶ್ವಕಪ್ನಲ್ಲಿ ಎರಡು ಗೆಲುವು ಸಾಧಿಸಿತ್ತು. ಸೆಮಿಫೈನಲ್ನಲ್ಲಿ ಮೈಕ್ ಹಸ್ಸಿ ಆಸೀಸ್ಗೆ ಜಯ ತಂದುಕೊಟ್ಟಿದ್ದರು.
ಮುಹಮ್ಮದ್ ಆಮಿರ್ ಆಸ್ಟ್ರೇಲಿಯ ವಿರುದ್ಧ ಆಡಿರುವ ಕಳೆದ 2 ಟ್ವೆಂಟಿ-20 ಪಂದ್ಯಗಳಲ್ಲಿ ತಲಾ 3 ವಿಕೆಟ್ಗಳನ್ನು ಕಬಳಿಸಿದ್ದಾರೆ.
ಮೈದಾನದ ಸ್ಥಿತಿಗತಿ: ಪಾಕಿಸ್ತಾನ-ನ್ಯೂಝಿಲೆಂಡ್ ತಂಡಗಳು ಆಡಿರುವ ಹಸಿರು ಪಿಚ್ನಲ್ಲೇ ಪಂದ್ಯ ನಡೆಯಲಿದ್ದು, ಎರಡೂ ಇನಿಂಗ್ಸ್ನಲ್ಲಿ ಆರಂಭಿಕ ದಾಂಡಿಗರು ಉತ್ತಮ ಪ್ರದರ್ಶನ ನೀಡುವ ಸಾಧ್ಯತೆಯಿದೆ. ಕಳೆದ ಪಂದ್ಯದಲ್ಲಿ ಕಿವೀಸ್ನ ಮಾರ್ಟಿನ್ ಗಪ್ಟಿಲ್ ಹಾಗೂ ಪಾಕ್ನ ಶಾರ್ಜಿಲ್ ಖಾನ್ ಉತ್ತಮ ಪ್ರದರ್ಶನ ನೀಡಿದ್ದರು.
ತಂಡಗಳು:
ಆಸ್ಟ್ರೇಲಿಯ: ಉಸ್ಮಾನ್ ಖ್ವಾಜಾ, ಶೇನ್ ವ್ಯಾಟ್ಸನ್, ಸ್ಟೀವನ್ ಸ್ಮಿತ್(ನಾಯಕ), ಡೇವಿಡ್ ವಾರ್ನರ್, ಗ್ಲೆನ್ ಮ್ಯಾಕ್ಸ್ವೆಲ್, ಮಿಚೆಲ್ ಮಾರ್ಷ್, ಜೇಮ್ಸ್ ಫಾಕ್ನರ್,ಜಾನ್ ಹೇಸ್ಟಿಂಗ್ಸ್, ಪೀಟರ್ ನೆವಿಲ್, ನಥನ್ ಕೌಲ್ಟರ್ ನೀಲ್, ಆಡಮ್ ಝಾಂಪ.
ಪಾಕಿಸ್ತಾನ: ಅಹ್ಮದ್ ಶಹಝಾದ್, ಶಾರ್ಜಿಲ್ ಖಾನ್, ಶುಐಬ್ ಮಲಿಕ್, ಸರ್ಫರಾಝ್ ಅಹ್ಮದ್, ಉಮರ್ ಅಕ್ಮಲ್, ಶಾಹಿದ್ ಅಫ್ರಿದಿ, ಮುಹಮ್ಮದ್ ಹಫೀಝ್/ಇಮಾದ್ ವಸೀಂ, ಮುಹಮ್ಮದ್ ಸಮಿ, ವಹಾಬ್ ರಿಯಾಝ್, ಮುಹಮ್ಮದ್ ಆಮಿರ್, ಮುಹಮ್ಮದ್ ಇರ್ಫಾನ್.
ಪಂದ್ಯದ ಸಮಯ: ಮಧ್ಯಾಹ್ನ 3:00
